ਕੈਨੇਡਾ 'ਚ ਭੰਗ ਦੀ ਵਰਤੋਂ ਨੂੰ ਮਿਲੀ ਕਾਨੂੰਨੀ ਮਾਨਤਾ ,ਸੰਸਦ 'ਚ ਬਿਲ ਹੋਇਆ ਪਾਸ
ਕੈਨੇਡਾ 'ਚ ਭੰਗ ਦੀ ਵਰਤੋਂ ਨੂੰ ਮਿਲੀ ਕਾਨੂੰਨੀ ਮਾਨਤਾ ,ਸੰਸਦ 'ਚ ਬਿਲ ਹੋਇਆ ਪਾਸ:ਕੈਨੇਡਾ ਨੇ ਭੰਗ ਦੀ ਆਮ ਲੋਕਾਂ 'ਚ ਖੁੱਲ੍ਹੀ ਖਪਤ ਅਤੇ ਵਿੱਕਰੀ ਨੂੰ ਕੌਮੀ ਪੱਧਰ 'ਤੇ ਕਾਨੂੰਨੀ ਮਾਨਤਾ ਦੇ ਦਿੱਤੀ ਹੈ।ਸੱਤ ਮਹੀਨਿਆਂ ਦੀ ਚਰਚਾ ਉਪਰੰਤ ਸੈਨੇਟ ਵਲੋਂ ਮੰਗਲਵਾਰ ਨੂੰ 29 ਦੇ ਮੁਕਾਬਲੇ 52 ਵੋਟਾਂ ਦੇ ਫਤਵੇ ਨਾਲ ਭੰਗ ਦੀ ਵਰਤੋਂ ਨੂੰ ਕਨੂੰਨੀ ਮਾਨਤਾ ਦੇਣ ਵਾਲੇ ਬਿਲ ਸੀ-45 ਨੂੰ ਪਾਸ ਕਰ ਦਿੱਤਾ ਹੈ।ਇਸ ਦੇ ਤਹਿਤ ਸਤੰਬਰ ਦੇ ਅੱਧ ਤੋਂ ਕੈਨੇਡੀਅਨ ਬਾਲਗ ਮਨਮਰਜ਼ੀ ਨਾਲ ਭੰਗ ਦੀ ਵਰਤੋਂ ਕਰ ਸਕਣਗੇ।ਬੀਤੇ ਦਿਨ ਮੰਗਲਵਾਰ ਨੂੰ ਕੈਨੇਡਾ ਦੀ ਸੰਸਦ 'ਚ ਹੈਰਾਨ ਕਰਨ ਵਾਲਾ ਫੈਸਲਾ ਸੁਣਾਇਆ ਗਿਆ।ਕੈਨੇਡਾ ਵਿਚ ਲੋਕ ਹੁਣ ਕਾਨੂੰਨੀ ਤਰੀਕੇ ਨਾਲ ਭੰਗ ਖਰੀਦ ਕੇ ਉਸਦੀ ਵਰਤੋਂ ਕਰ ਸਕਣਗੇ।ਸੰਸਦ ਵਿਚ ਬਿਲ ਪੇਸ਼ ਕਰਨ ਵਾਲੇ ਸੰਸਦ ਮੈਂਬਰ ਟੋਨੀ ਡੀਨ ਨੇ ਕਿਹਾ ਕਿ ਅੱਜ ਉਹ ਕੈਨੇਡਾ 'ਚ ਇਕ 90 ਸਾਲ ਪੁਰਾਣੇ ਕਾਨੂੰਨ ਨੁੰ ਖਤਮ ਕਰਨ ਜਾ ਰਹੇ ਨੇ ਤੇ ਜਿਸ 'ਚ ਭੰਗ ਦੀ ਵਰਤੋਂ ਨੂੰ ਬੈਨ ਕੀਤਾ ਗਿਆ ਸੀ।ਉਹਨਾਂ 90 ਸਾਲਾਂ 'ਚ ਕੈਨੇਡਾ 'ਚ ਜੁਰਮ ਨੂੰ ਬੜ੍ਹਾਵਾ ਮਿਲਿਆ ਅਤੇ ਜਿਸ ਤੋਂ ਸਿਵਾਏ ਨੁਕਸਾਨ ਦੇ ਹੋਰ ਕੁਝ ਨਾ ਹਾਸਿਲ ਹੋਇਆ।ਇਸ 'ਤੇ ਕੈਨੇਡਾ ਦੇ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਵੀ ਟਵੀਟ ਕਰਕੇ ਕਿਹਾ ਕਿ 'ਸਾਡੇ ਬੱਚਿਆਂ ਨੂੰ ਭੰਗ ਪ੍ਰਾਪਤ ਕਰਨਾ ਬਹੁਤ ਅਸਾਨ ਰਿਹਾ ਹੈ ਅਤੇ ਅਪਰਾਧੀਆਂ ਨੂੰ ਮੁਨਾਫਾ ਖੱਟਣਾ।ਅੱਜ ਅਸੀਂ ਇਸ ਨੂੰ ਬਦਲ ਦਿੱਤਾ।ਕੈਨੇਡਾ 'ਚ ਭੰਗ ਦਾ ਲੀਗਲ ਹੋ ਜਾਣ ਨਾਲ ਹੁਣ ਕੈਨੇਡਾ ਦੁਨੀਆ 'ਚ ਦੂਜਾ ਅਜਿਹਾ ਦੇਸ਼ ਬਣ ਗਿਆ ਹੈ।ਪਹਿਲਾਂ ਉਰੂਗਵੇ ਦੇਸ਼ 'ਚ ਭੰਗ ਨੂੰ ਕਾਨੂੰਨੀ ਮਾਨਤਾ ਮਿਲੀ ਹੋਈ ਹੈ।ਡਰੱਗਜ਼ ਵਰਤਣ ਲਈ ਬਣਾਈ ਗਈ ਕਮੇਟੀ ਨੇ ਸੁਝਾਅ ਦਿੱਤਾ ਹੈ ਕਿ ਕੈਨੇਡਾ 'ਚ ਬਾਲਗਾਂ ਨੂੰ 30 ਗ੍ਰਾਮ ਭੰਗ ਨਾਲ ਲਿਜਾਣ ਅਤੇ 4 ਪੌਦੇ ਲਗਾਉਣ ਦੀ ਇਜਾਜ਼ਤ ਹੋਣੀ ਚਾਹੀਦੀ ਹੈ।ਇਸ ਕਾਨੂੰਨ ਤਹਿਤ ਘੱਟੋ-ਘੱਟ ਉਮਰ 18-19 ਸਾਲ ਰੱਖੀ ਗਈ ਹੈ। -PTCNews