ਇੰਗਲੈਂਡ 'ਚ ਸ਼ਤਰੰਜ ਮੁਕਾਬਲੇ 'ਚ ਚਾਂਦੀ ਤਗ਼ਮਾ ਜੇਤੂ ਮਲਿਕਾ ਹਾਂਡਾ ਦਾ ਜਲੰਧਰ ਪਹੁੰਚਣ 'ਤੇ ਨਿੱਘਾ ਸਵਾਗਤ
ਇੰਗਲੈਂਡ 'ਚ ਸ਼ਤਰੰਜ ਮੁਕਾਬਲੇ 'ਚ ਚਾਂਦੀ ਤਗ਼ਮਾ ਜੇਤੂ ਮਲਿਕਾ ਹਾਂਡਾ ਦਾ ਜਲੰਧਰ ਪਹੁੰਚਣ 'ਤੇ ਨਿੱਘਾ ਸਵਾਗਤ:ਇੰਗਲੈਂਡ ਦੇ ਮਾਨਚੈਸਟਰ ਵਿਖੇ ਜਲੰਧਰ ਦੀ 23 ਸਾਲਾ ਮਲਿਕਾ ਹਾਂਡਾ ਨੇ ਗੂੰਗੇ-ਬੋਲੇ ਖਿਡਾਰੀਆਂ ਦੇ ਖੇਤਰ 'ਚ 5ਵੇਂ ਆਈ.ਸੀ.ਸੀ. ਵਿਸ਼ਵ ਗੂੰਗੇ ਬੋਲੇ ਚੈੱਸ ਚੈਂਪੀਅਨਸ਼ਿਪ ਵਿੱਚ ਚਾਂਦੀ ਦਾ ਤਗਮਾ ਪ੍ਰਾਪਤ ਕਰਕੇ ਦੇਸ਼ ਦਾ ਨਾਂਅ ਰੌਸ਼ਨ ਕੀਤਾ ਹੈ।ਕੌਮਾਂਤਰੀ ਪੱਧਰ ਦੀ ਇਸ ਚੈਂਪੀਅਨਸ਼ਿਪ ਵਿੱਚ ਮਲਿਕਾ ਹਾਂਡਾ ਨੇ ਆਪਣੇ ਸ਼ਾਨਦਾਰ ਪ੍ਰਦਰਸ਼ਨ ਨਾਲ ਸਤਰੰਜ਼ ਵਿੱਚ ਦੇਸ਼ ਦਾ ਨਾਂ ਮੋਹਰੀ ਸਫਾਂ ਵਿਚ ਲਿਆਂਦਾ ਹੈ।ਜਲੰਧਰ ਰੇਲਵੇ ਸਟੇਸ਼ਨ ਪਹੁੰਚਣ ’ਤੇ ਮਲਿਕਾ ਹਾਂਡਾ ਦਾ ਐੱਸਡੀਐੱਮ ਪਰਮਵੀਰ ਸਿੰਘ ਦੀ ਅਗਵਾਈ ਹੇਠ ਸ਼ਾਨਦਾਰ ਸਵਾਗਤ ਕੀਤਾ ਗਿਆ।ਮਲਿਕਾ ਨਾਲ ਉਸ ਦੀ ਮਾਤਾ ਰੇਨੂ ਹਾਂਡਾ, ਪਿਤਾ ਸੁਰੇਸ਼ ਹਾਂਡਾ ਵੀ ਮੌਜੂਦ ਸਨ।ਇਸ ਮੌਕੇ ਐਸਡੀਐਮ ਨੇ ਕਿਹਾ ਕਿ ਮਲਿਕਾ ਨੇ ਆਪਣੀ ਵਿਸ਼ੇਸ਼ ਸਮਰੱਥਾ ਨਾਲ ਇਤਿਹਾਸ ਸਿਰਜਿਆ ਹੈ ਜਿਸ ’ਤੇ ਹਰ ਦੇਸ਼ ਵਾਸੀ ਨੂੰ ਮਾਣ ਹੈ।ਉਨ੍ਹਾਂ ਕਿਹਾ ਕਿ ਮਲਿਕਾ ਅਨੇਕਾਂ ਨੌਜਵਾਨਾਂ ਲਈ ਪ੍ਰੇਰਨਾ ਦਾ ਸ੍ਰੋਤ ਬਣੇਗੀ।ਇਸ ਮੌਕੇ ਜ਼ਿਲ੍ਹਾ ਪ੍ਰਸਾਸ਼ਨ ਦੇ ਅਧਿਕਾਰੀਆਂ ਤੇ ਖੇਡ ਪ੍ਰੇਮੀਆਂ ਨੇ ਮਲਿਕਾ ਦਾ ਹਾਰ ਪਾ ਕੇ ਸਵਾਗਤ ਕੀਤਾ।ਮਲਿਕਾ ਦੀ ਮਾਤਾ ਰੇਨੂੰ ਹਾਂਡਾ ਨੇ ਦੱਸਿਆ ਕਿ ਮਲਿਕਾ ਦੇਸ਼ ਦੀ ਪਹਿਲੀ ਗੂੰਗੀ-ਬੋਲੀ ਖਿਡਾਰਨ ਹੈ ਜੋ ਲਗਾਤਾਰ ਚਾਰ ਸਾਲ ਤੋਂ ਦੇਸ਼ ਲਈ ਤਗਮੇ ਜਿੱਤ ਰਹੀ ਹੈ।ਮਲਿਕਾ ਦੇ ਪਿਤਾ ਅਕਾਊਟਸ ਦਾ ਕੰਮ ਕਰਦੇ ਹਨ। -PTCNews