New Update
ਨੋਟਬੰਦੀ ਤੋਂ ਬਾਅਦ ਆਏ ਨਵੇਂ ਨੋਟਾਂ ਦੇ ਬਾਰੇ 'ਚ ਚਾਹੇ ਇਹ ਕਿਹਾ ਗਿਆ ਸੀ ਕਿ ਉਹਨਾਂ ਨੂੰ ਕਾਪੀ ਕਰਨਾ ਬਹੁਤ ਮੁਸ਼ਕਿਲ ਹੋਵੇਗਾ ਕਿਉਂਕਿ ਉਹ ਨਵੀਨਤਮ ਤਕਨਾਲੋਜੀ ਨਾਲ ਬਣਾਏ ਗਏ ਹਨ।
ਪਰ ਇਸ ਦਾਅਵੇ ਦੀਆਂ ਧੱਜੀਆਂ ਉਡਾਈਆਂ ਗਈਆ ਹਨ, ਉਹ ਵੀ ਇੱਕ ਦਸਵੀਂ ਪਾਸ ਵਿਅਕਤੀ ਨੇ।
ਕਰਾਇਮ ਬ੍ਰਾਂਚ ਨੇ ਇੱਕ ਅਜਿਹੇ ਗਿਰੋਹ ਦਾ ਪਰਦਾਫਾਸ਼ ਕੀਤਾ ਹੈ ਜੋ ਕਿ ਨਕਲੀ ਨੋਟ ਛਾਪਦਾ ਸੀ। ਇਸ ਤਹਿਤ ਤਕਰੀਬਨ 5 ਦੋਸ਼ੀਆਂ ਨੂੰ ਗ੍ਰਿਫਤਾਰ ਕਰ ਲਿਆ ਗਿਆ ਹੈ।
ਜਾਂਚ ਟੀਮ ਵੱਲੋਂ ਦੋਸ਼ੀਆਂ ਕੋਲੋਂ ਤਕਰੀਬਨ ਦੋ ਲੱਖ 60 ਹਜਾਰ ਰੁਪਏ ਦੇ ਨਕਲੀ ਨੋਟ, ਪੇਪਰ, ਲੈਪਟਾਪ, ਪ੍ਰਿੰਟਰ, ਅਤੇ ਕੈਮੀਕਲ ਬਰਾਮਦ ਕੀਤੇ ਹਨ। ਦੋਸ਼ੀਆਂ ਨੇ ਪੁੱਛਗਿਛ ਦੌਰਾਨ ਕਬੂਲ ਕੀਤਾ ਹੈ ਕਿ ਉਹਨਾਂ ਨੇ ਹੁਣ ਤੱਕ ਤਕਰੀਬਨ ਦਸ ਲੱਖ ਰੁਪਏ ਤੱਕ ਦੇ ਨਕਲੀ ਨੋਟ ਛਾਪੇ ਹਨ।
ਡੀਆਈਜੀ ਹਰਿਨਾਰਾਇਣਚਾਰੀ ਮਿਸਰ ਮੁਤਾਬਕ ਉਹਨਾਂ ਨੇ ਗੁਪਤ ਸੂਚਨਾ 'ਤੇ ਕਾਰਵਾਈ ਕਰਦਿਆਂ ਪਾਟਨੀਪੁਰਾ ਖੇਤਰ 'ਚ ਰੇਡ ਕੀਤੀ ਅਤੇ ਦੇਖਿਆ ਕਿ ਲੋਕ 2000, 500 ਅਤੇ 100 ਰੁਪਏ ਦੇ ਨਕਲੀ ਨੋਟ ਛਾਪਣ ਦੇ ਧੰਦੇ ਨਾਲ ਜੁੜੇ ਹਨ, ਜਿਸ ਤੋਂ ਬਾਅਦ ਉਹਨਾਂ ਨੇ ਤਿੰਨ ਲੋਕਾਂ ਨੂੰ ਫੜਿਆ। ਜਾਂਚ ਦੌਰਾਨ ਪਤਾ ਲੱਗਿਆ ਕਿ ਨਕਲੀ ਨੋਟ ਪੀਥਮਪੁਰ ਦਾ ਰਹਿਣ ਵਾਲਾ ਨਰੇਸ਼ ਪਵਾਰ ਦਿੰਦਾ ਹੈ, ਅਤੇ ਫਿਰ ਇੱਕ ਹੋਰ ਛਾਪੇ ਦੌਰਾਨ ਇੱਕ ਮਕਾਨ ਵਿੱਚ ਨਰੇਸ਼ ਅਤੇ ਰਾਮੇਸ਼ਵਰ ਨਕਲੀ ਨੋਟ ਛਾਪਦੇ ਹੋਏ ਪਾਏ ਗਏ ਸਨ।
ਮੌਕੇ 'ਤੇ ਦੋਸ਼ੀ ਨਰੇਸ਼ ਦੇ ਕੋਲੋਂ ਟੀਮ ਨੂੰ 83500 ਰੁਪਏ ਦੇ ਨਕਲੀ ਨੋਟ ਮਿਲੇ ਅਤੇ ਨੋਟ ਛਾਪਣ ਲਈ ਪੇਪਰ, ਛਪਾਈ ਦੇ ਦੌਰਾਨ ਖ਼ਰਾਬ ਨੋਟ ਵਾਲੇ ਪੇਪਰ, ਪ੍ਰਿੰਟਰ, ਲੈਪਟਾਪ ਸਹਿਤ ਕੁੱਝ ਹੋਰ ਸਾਮਾਨ ਜਬਤ ਕੀਤੇ।
ਦੱਸਣਯੋਗ ਹੈ ਕਿ ਦੋਸ਼ੀ ਨੇ ਕਿਹਾ ਕਿ ਉਸਨੇ ਮਜ਼ਾਕ 'ਚ ਨਕਲੀ ਨੋਟ ਛਾਪੇ ਸਨ ਜੋ ਕਿ ਹੁਬਹੂ ਨਿਕਲੇ ਸਨ ਅਤੇ ਉਹਨਾਂ ਨੇ ਇਹੀ ਕੰਮ ਸ਼ੁਰੂ ਕਰ ਦਿੱਤਾ।
ਪੁਲਿਸ ਮਾਮਲੇ ਦੀ ਜਾਂਚ ਕਰ ਕੇ ਅਜਿਹੇ ਹੋਰ ਗਿਰੋਹਾਂ ਦਾ ਪਰਦਾਫਾਸ਼ ਕਰਨ ਦਾ ਸੋਚ ਰਹੀ ਸੀ। ਇਸ ਤੋਂ ਪਹਿਲਾਂ ਵੀ ਉਹ ਫੜ੍ਹਿਆ ਜਾ ਚੁੱਕਾ ਹੈ।
—PTC News-