ਅਮਰੀਕਾ ਵਿੱਚ ਅੰਮ੍ਰਿਤਸਰ ਦੀ ਮੁਟਿਆਰ ਨੇ ਕਰਾਈ ਬੱਲੇ -ਬੱਲੇ ,'ਜਿੱਤਿਆ 'ਮਿਸਜ਼ ਏਸ਼ੀਆ-ਵਾਸ਼ਿੰਗਟਨ'' ਦਾ ਤਾਜ
ਅਮਰੀਕਾ ਵਿੱਚ ਅੰਮ੍ਰਿਤਸਰ ਦੀ ਮੁਟਿਆਰ ਨੇ ਕਰਾਈ ਬੱਲੇ -ਬੱਲੇ ,'ਜਿੱਤਿਆ 'ਮਿਸਜ਼ ਏਸ਼ੀਆ-ਵਾਸ਼ਿੰਗਟਨ'' ਦਾ ਤਾਜ ਵਾਸ਼ਿੰਗਟਨ : ਅਮਰੀਕਾ ਦੇ ਵਾਸ਼ਿੰਗਟਨ ਸੂਬੇ ਵਿੱਚ ਪਿਛਲੇ ਦਿਨੀ ਸੁੰਦਰਤਾ ਮੁਕਾਬਲੇ ''ਮਿਸਜ਼ ਏਸ਼ੀਆ-ਵਾਸ਼ਿੰਗਟਨ' ਕਰਵਾਏ ਗੲੇ ਸਨ।ਇਸ ਸੁੰਦਰਤਾ ਮੁਕਾਬਲੇ ਵਿੱਚ ਭਾਰਤ ਤੋਂ ਇਲਾਵਾ ਚੀਨ ਅਤੇ ਜਪਾਨ ਵਰਗੇ ਏਸ਼ੀਆਈ ਮੁਲਕਾਂ ਨਾਲ ਸਬੰਧਤ ਸੁੰਦਰੀਆਂ ਨੇ ਭਾਗ ਲਿਆ ਸੀ।ਇਸ ਦੌਰਾਨ ਅੰਮ੍ਰਿਤਸਰ ਨਾਲ ਸਬੰਧ ਰੱਖਦੀ ਮੁਟਿਆਰ ਗੀਤ ਕੌਰ ਨੇ ਸੁੰਦਰਤਾ ਮੁਕਾਬਲੇ ''ਮਿਸਜ਼ ਏਸ਼ੀਆ-ਵਾਸ਼ਿੰਗਟਨ'' ਦਾ ਤਾਜ ਆਪਣੇ ਸਿਰ ਸਜਾਇਆ ਹੈ।ਉਸਨੂੰ ਇਹ ਤਾਜ ਕੁੱਲ ਬਾਰਾਂ ਪ੍ਰਤੀਯੋਗੀਆਂ ਦੇ ਮੁਕਾਬਲੇ ਵਿੱਚੋਂ ਮਿਲਿਆ ਹੈ।ਇਸ ਮੁਕਾਬਲੇ ਵਿੱਚ ਸ਼ਾਮਿਲ ਹੋਣ ਵਾਲੀਆਂ ਮੁਟਿਆਰਾਂ ਕੋਲੋਂ ਏਸ਼ੀਅਨ ਮੁਲਕਾਂ ਦੇ ਸੱਭਿਆਚਾਰ ਅਤੇ ਪੱਛਮੀ ਤਰਜ਼ੇ ਜ਼ਿੰਦਗੀ ਤੋਂ ਇਲਾਵਾ ਕਲਾ ਸਬੰਧੀ ਵੀ ਸੁਆਲ ਪੁੱਛੇ ਗਏ ਸਨ।ਜਾਣਕਾਰੀ ਅਨੁਸਾਰ ਗੀਤ ਕੌਰ ਅਮਰੀਕਾ ਦੇ ਸ਼ਹਿਰ ਸਿਆਟਲ ਦੀ ਰਹਿਣ ਵਾਲੀ ਹੈ ਅਤੇ ਅੰਮ੍ਰਿਤਸਰ ਜ਼ਿਲ੍ਹੇ ਦੇ ਜੰਡਿਆਲਾ ਗੁਰੂ ਕਸਬੇ ਨਾਲ ਸਬੰਧ ਰੱਖਦੀ ਹੈ।ਉਸਨੂੰ ਬਚਪਨ ਤੋਂ ਹੀ ਨਾਚ ਅਤੇ ਹੋਰ ਕਲਾਵਾਂ ਦਾ ਸੌਂਕ ਸੀ।ਦੱਸ ਦੇਈਏ ਕਿ ਗੀਤ ਕੌਰ ਨੇ ਪੰਜ ਸਾਲ ਪਹਿਲਾਂ ਵਿਆਹ ਕਰਵਾ ਲਿਆ ਸੀ ਅਤੇ ਅਮਰੀਕਾ ਦੇ ਸ਼ਹਿਰ ਸਿਆਟਲ ਵਿੱਚ ਰਹਿਣ ਲੱਗ ਗਈ ਸੀ।ਗੀਤ ਕੌਰ ਨੇ ਆਪਣੀ ਕਾਮਯਾਬੀ ਦਾ ਸਿਹਰਾ ਆਪਣੀ ਮਾਂ ਨਿਰਮਲ ਕੌਰ ਸੰਧੂ ਅਤੇ ਪਿਤਾ ਕੁਲਦੀਪ ਸਿੰਘ ਸੰਧੂ (ਪੰਜਾਬ ਪੁਲਿਸ ਅਫਸਰ) ਤੋਂ ਇਲਾਵਾ ਆਪਣੇ ਪਤੀ ਅਤੇ ਸਹੁਰਾ ਪਰਿਵਾਰ ਨੂੰ ਦਿੱਤਾ ਹੈ।ਗੀਤ ਕੌਰ ਆਪਣੇ ਸਰੀਰ ਨੂੰ ਫਿੱਟ ਰੱਖਣ ਲਈ ਰੋਜ਼ਾਨਾ ਯੋਗਾ ਅਤੇ ਕਸਰਤ ਕਰਦੀ ਹੈ।ਇਸ ਦੇ ਨਾਲ ਹੀ ਉਹ ਗੁਰਬਾਣੀ ਦੇ ਲੜ ਲੱਗੀ ਹੋਈ ਹੈ। -PTCNews