ਗਲਵਾਨ 'ਚ ਝੜਪ ਵਾਲੀ ਥਾਂ ਤੋਂ ਪਿੱਛੇ ਹਟਿਆ ਚੀਨ, ਗੱਲਬਾਤ ਦਾ ਅਸਰ ਜਾਂ ਕੁਝ ਹੋਰ ?
ਨਵੀਂ ਦਿੱਲੀ - 20 ਫ਼ੌਜੀ ਜਵਾਨਾਂ ਦੀ ਸ਼ਹਾਦਤ ਅਤੇ ਫ਼ੌਜੀ ਅਧਿਕਾਰੀਆਂ ਦੀ ਗੱਲਬਾਤ ਤੋਂ ਬਾਅਦ, ਭਾਰਤ-ਚੀਨ ਦੇ ਚੱਲਦੇ ਤਣਾਅ ਬਾਰੇ ਆਈ ਖ਼ਬਰ ਨੇ ਸਭ ਦਾ ਧਿਆਨ ਖਿੱਚਿਆ ਹੈ। ਸੂਤਰਾਂ ਮੁਤਾਬਿਕ ਲਾਈਨ ਆਫ ਐਕਚੁਅਲ ਕੰਟਰੋਲ (LAC) ਕੋਲ ਗਲਵਾਨ ਘਾਟੀ 'ਚ ਝੜਪ ਵਾਲੀ ਜਗ੍ਹਾ 'ਤੇ ਚੀਨੀ ਫ਼ੌਜ 1-2 ਕਿਲੋਮੀਟਰ ਪਿੱਛੇ ਹਟ ਗਈ ਹੈ। ਪਤਾ ਲੱਗਿਆ ਹੈ ਕਿ ਚੀਨੀ ਫ਼ੌਜੀ ਡਿਸਇੰਗੇਜਮੈਂਟ ਪ੍ਰਕਿਰਿਆ ਤਹਿਤ ਪਿੱਛੇ ਹਟੀ ਹੈ। ਮਿਲੀ ਜਾਣਕਾਰੀ ਮੁਤਾਬਿਕ ਇਲਾਕੇ 'ਚੋਂ ਚੀਨੀ ਫ਼ੌਜੀਆਂ ਨੇ ਆਪਣੇ ਕੈਂਪ ਵੀ ਪਿੱਛੇ ਹਟਾਏ ਹਨ। ਲੱਦਾਖ 'ਚ ਹੋਈ ਝੜਪ ਤੋਂ ਬਾਅਦ ਭਾਰਤ ਤੇ ਚੀਨ ਵਿਚਕਾਰ ਜਾਰੀ ਤਣਾਅ, ਅਤੇ ਫ਼ੌਜੀ ਅਧਿਕਾਰੀਆਂ ਦੀ ਗੱਲਬਾਤ ਤੋਂ ਬਾਅਦ ਹੋਈ ਪ੍ਰਤੀਕਿਰਿਆ ਦੇ ਮੱਦੇਨਜ਼ਰ ਇਹ ਖ਼ਬਰ ਬੜੀ ਮਹੱਤਵਪੂਰਨ ਹੈ। ਏਐੱਨਆਈ (ANI) ਭਾਵ ਏਸ਼ੀਅਨ ਨਿਊਜ਼ ਇੰਟਰਨੈਸ਼ਨਲ ਨੇ ਇਸ ਬਾਰੇ ਇੱਕ ਟਵੀਟ ਕੀਤਾ ਹੈ।
Chinese heavy armoured vehicles still present in depth areas in Galwan river area. Indian army monitoring the situation with caution: Indian Army Sources https://t.co/GbGnoAy4K4 — ANI (@ANI) July 6, 2020
ਭਾਰਤ-ਚੀਨ ਦਾ ਹੋਵੇ ਤੇ ਚਾਹੇ ਭਾਰਤ-ਪਾਕਿਸਤਾਨ ਦਾ, ਸਰਹੱਦਾਂ ਦੇ ਮਸਲੇ ਬੜੇ ਗੰਭੀਰ ਮੁੱਦੇ ਹਨ। ਚੀਨ ਦੇ ਪਿੱਛੇ ਹਟਣ ਨੂੰ ਮਸਲੇ ਦਾ ਹੱਲ ਸਮਝਣਾ ਬੇਵਕੂਫ਼ੀ ਹੋਵੇਗੀ ਅਤੇ ਅੰਤਰਰਾਸ਼ਟਰੀ ਸਰਹੱਦਾਂ ਦੇ ਮਸਲਿਆਂ ਦੇ ਹੱਲ ਵਾਸਤੇ ਭਾਰਤ ਨੂੰ ਦੂਰਦ੍ਰਿਸ਼ਟੀ ਅਤੇ ਕੂਟਨੀਤਕ ਸਮਝ ਭਰੇ ਫ਼ੈਸਲੇ ਲੈਣ ਲਈ ਤਿਆਰ ਰਹਿਣਾ ਪਵੇਗਾ।
