ਭਾਰਤੀ ਮਹਿਲਾ ਹਾਕੀ ਟੀਮ ਦਾ ਚੀਨ ਦੌਰਾ ਰੱਦ, ਜਾਣੋ ਕੀ ਹੈ ਵਜ੍ਹਾ
ਨਵੀਂ ਦਿੱਲੀ: ਜਾਨਲੇਵਾ ਕੋਰੋਨਾਵਾਇਰਸ ਨੇ ਚੀਨ 'ਚ ਤਹਿਕਲਾ ਮਚਾਇਆ ਹੋਇਆ ਹੈ, ਜਿਸ ਕਾਰਨ ਜਨਜੀਵਨ ਕਾਫੀ ਪ੍ਰਭਾਵਿਤ ਹੋ ਰਿਹਾ ਹੈ। ਇਸ ਨੂੰ ਮੱਦੇਨਜ਼ਰ ਰੱਖਦਿਆਂ ਭਾਰਤੀ ਮਹਿਲਾ ਹਾਕੀ ਟੀਮ ਨੂੰ ਆਪਣਾ ਚੀਨ ਦੌਰਾ ਰੱਦ ਕਰਨਾ ਪਿਆ ਅਤੇ ਹੁਣ ਹਾਕੀ ਇੰਡੀਆ ਦੇ ਸਾਹਮਣੇ ਓਲੰਪਿਕ ਦੀ ਤਿਆਰੀ ਲਈ ਬਦਲਵੇਂ ਦੌਰੇ ਦਾ ਆਯੋਜਨ ਦੀ ਮੁਸ਼ਕਲ ਚੁਣੌਤੀ ਹੈ।
ਤੁਹਾਨੂੰ ਦੱਸ ਦੇਈਏ ਕਿ ਭਾਰਤੀ ਮਹਿਲਾ ਹਾਕੀ ਟੀਮ ਨੇ 14 ਤੋਂ 25 ਮਾਰਚ ਤੱਕ ਚੀਨ ਦੌਰੇ 'ਤੇ ਜਾਣਾ ਸੀ, ਪਰ ਇਸ ਭਿਆਨਕ ਬਿਮਾਰੀ ਦੇ ਕਾਰਨ ਭਾਰਤੀ ਟੀਮ ਨੂੰ ਇਹ ਦੌਰਾ ਰੱਦ ਕਰਨਾ ਪਿਆ।
ਭਾਰਤੀ ਕਪਤਾਨ ਰਾਣੀ ਰਾਮਪਾਲ ਨੇ ਅੱਜ ਕਿਹਾ ਕਿ ''ਸਾਨੂੰ ਚੀਨ ਜਾਣਾ ਸੀ ਪਰ ਵਾਇਰਸ ਕਾਰਨ ਦੌਰਾ ਰੱਦ ਹੋ ਗਿਆ,ਕਈ ਦੂਜੀਆਂ ਟੀਮਾਂ ਵੀ ਉਪਲਬਧ ਨਹੀਂ ਹਨ ਕਿਉਂਕਿ ਉਹ ਪ੍ਰੋ ਹਾਕੀ ਲੀਗ ਖੇਡ ਰਹੀਆਂ ਹਨ।'' ਹਾਕੀ ਇੰਡੀਆ ਅਤੇ ਸਾਡੇ ਕੋਚ ਵਿਵਸਥਾ ਕਰ ਰਹੇ ਹਨ। ਓਲੰਪਿਕ ਦੀਆਂ ਤਿਆਰੀਆਂ ਲਈ ਵੱਡੀਆਂ ਟੀਮਾਂ ਨਾਲ ਖੇਡਣਾ ਜ਼ਰੂਰੀ ਹੈ।
ਹੋਰ ਪੜ੍ਹੋ: ਰੂਪਨਗਰ: ਮਹਿਲਾ ਨੇ ਸਤਲੁਜ ਦਰਿਆ 'ਚ ਮਾਰੀ ਛਾਲ, ਪਰਸ 'ਚੋਂ ਮਿਲਿਆ ਸੁਸਾਈਡ ਨੋਟ
ਰਾਣੀ ਨੇ ਅੱਗੇ ਕਿਹਾ ਕਿ "ਸਾਨੂੰ ਛੇਤੀ ਹੀ ਇਹ ਦੱਸਿਆ ਜਾਵੇਗਾ ਕਿ ਹੁਣ ਅਸੀਂ ਕਿਸ ਦੇਸ਼ ਦੇ ਖਿਲਾਫ ਖੇਡਣਾ ਹੈ। ਹੁਣ ਤੱਕ ਤਾਂ ਸਾਡੇ ਕੋਲ ਇੱਕ ਹਫਤੇ ਦਾ ਸਮਾਂ ਹੈ। ਇਸ ਤੋਂ ਬਾਅਦ ਅਸੀਂ ਚਾਰ ਹਫਤੇ ਦੇ ਟਰੇਨਿੰਗ ਕੈਂਪ 'ਚ ਹਿੱਸਾ ਲਵਾਂਗੇ।
ਉਧਰ ਹਾਕੀ ਇੰਡੀਆ ਦੇ ਸੀ.ਈ.ਓ ਦਾ ਕਹਿਣਾ ਹੈ ਕਿ, "ਹਾਕੀ ਇੰਡੀਆ ਨੂੰ ਅਗਲੇ ਹਫਤੇ ਤੱਕ ਨਵੀਂ ਟੀਮ ਜਾਣ ਦੀ ਉਮੀਦ ਹੈ। ਸਾਡੀ ਕੁਝ ਫੈਡਰੇਸ਼ਨ ਦੇ ਨਾਲ ਗੱਲਬਾਤ ਚੱਲ ਰਹੀ ਹੈ, ਹੁਣ ਤੱਕ ਤਾਂ ਇਹ ਜਾਣਕਾਰੀ ਹੈ।
ਜ਼ਿਕਰਯੋਗ ਹੈ ਕਿ ਇਸ ਵਾਇਰਸ ਕਾਰਨ ਚੀਨ 'ਚ ਦਹਿਸ਼ਤ ਦਾ ਮਾਹੌਲ ਬਣਿਆ ਹੋਇਆ ਹੈ, ਜਿਸ ਕਾਰਨ ਹੁਣ ਤੱਕ 636 ਲੋਕਾਂ ਦੀ ਮੌਤ ਹੋ ਗਈ ਹੈ, ਜਦਕਿ ਕਰੀਬ 32 ਹਜ਼ਾਰ ਲੋਕ ਇਸ ਨਾਲ ਪ੍ਰਭਾਵਿਤ ਹੋ ਚੁੱਕੇ ਹਨ।
-PTC News
