ਡੇਂਗੂ ਦਾ ਕਹਿਰ: ਫ਼ਿਰੋਜ਼ਾਬਾਦ-ਕਾਸਗੰਜ 'ਚ ਪਿਛਲੇ 24 ਘੰਟਿਆਂ 'ਚ ਹੋਈਆਂ 20 ਮੌਤਾਂ
ਫ਼ਿਰੋਜ਼ਾਬਾਦ- ਦੇਸ਼ ਵਿਚ ਹੁਣ ਡੇਂਗੂ ਦਾ ਕਹਿਰ ਦਿਨੋ ਦਿਨ ਵਧਦਾ ਜਾ ਰਿਹਾ ਹੈ। ਇਸ ਦੇ ਚਲਦੇ ਅੱਜ ਉੱਤਰ ਪ੍ਰਦੇਸ਼ ਦੇ ਫ਼ਿਰੋਜ਼ਾਬਾਦ ਤੇ ਕਾਸਗੰਜ ਜਨਪਦ ਵਿਚ ਡੇਂਗੂ ਤੇ ਵਾਇਰਲ ਬੁਖ਼ਾਰ ਹੁਣ ਬੇਕਾਬੂ ਹੋ ਗਿਆ ਹੈ। ਪਿਛਲੇ 24 ਘੰਟਿਆਂ ਵਿਚ 9 ਬੱਚਿਆਂ ਸਮੇਤ 20 ਲੋਕਾਂ ਦੀ ਮੌਤ ਹੋ ਗਈ ਹੈ। ਮਰੀਜ਼ਾਂ ਦਾ ਹਸਪਤਾਲ ਵਿੱਚ ਆਉਣਾ ਜਾਰੀ ਹੈ। ਸਥਿਤੀ ਅਜਿਹੀ ਹੈ ਕਿ ਸਾਰੇ ਹਸਪਤਾਲਾਂ ਵਿੱਚ ਬਿਸਤਰੇ ਭਰੇ ਪਏ ਹਨ ਅਤੇ ਇੱਕ ਬੈੱਡ ਉੱਤੇ ਦੋ ਮਰੀਜ਼ਾਂ ਦਾ ਇਲਾਜ ਕੀਤਾ ਜਾ ਰਿਹਾ ਹੈ। ਫ਼ਿਰੋਜ਼ਾਬਾਦ ਵਿੱਚ ਹੁਣ ਤੱਕ 134 ਲੋਕਾਂ ਦੀ ਮੌਤ ਹੋ ਚੁੱਕੀ ਹੈ। ਜਦਕਿ ਕਾਸਗੰਜ ਵਿੱਚ 25 ਜਾਨਾਂ ਜਾ ਚੁੱਕੀਆਂ ਹਨ।
ਫ਼ਿਰੋਜ਼ਾਬਾਦ ਵਿੱਚ ਡੇਂਗੂ ਅਤੇ ਵਾਇਰਸ ਨਾਲ ਹੋਣ ਵਾਲੀਆਂ ਮੌਤਾਂ ਵਿੱਚ ਦਿਨੋ ਦਿਨ ਵਾਧਾ ਹੋ ਰਿਹਾ ਹੈ। ਪਿਛਲੇ 24 ਘੰਟਿਆਂ ਵਿੱਚ 101 ਨਵੇਂ ਮਰੀਜ਼ਾਂ ਵਿੱਚ ਡੇਂਗੂ ਦੀ ਪੁਸ਼ਟੀ ਹੋਈ ਹੈ। ਡੇਂਗੂ ਦੀ ਪੁਸ਼ਟੀ ਏਟਾ ਜ਼ਿਲ੍ਹੇ ਵਿੱਚ ਇੱਕ ਲੜਕੀ ਸਮੇਤ ਛੇ ਅਤੇ ਕਾਸਗੰਜ ਵਿੱਚ ਦੋ ਮਰੀਜ਼ਾਂ ਦੀ ਰਿਪੋਰਟ ਵਿੱਚ ਹੋਈ ਹੈ। ਦੂਜੇ ਪਾਸੇ, ਮੈਨਪੁਰੀ ਦੇ ਜ਼ਿਲ੍ਹਾ ਹਸਪਤਾਲ ਵਿੱਚ 20 ਮਰੀਜ਼ ਡੇਂਗੂ ਪਾਜ਼ੇਟਿਵ ਪਾਏ ਗਏ। ਇਸ ਵੇਲੇ ਸੌ ਬੈੱਡ ਦੇ ਹਸਪਤਾਲ ਵਿੱਚ 429 ਮਰੀਜ਼ ਦਾਖਲ ਹਨ।
ਜਿਕਰਯੋਗ ਹੈ ਕਿ ਜ਼ਿਲ੍ਹੇ ਲੁਧਿਆਣਾ ਵਿੱਚ ਡੇਂਗੂ ਦੇ 12 ਨਵੇਂ ਮਰੀਜ਼ ਪਾਏ ਗਏ। ਇਹ ਮਰੀਜ਼ ਸ਼ਿਮਲਾਪੁਰੀ, ਹੈਬੋਵਾਲ, ਤਾਜਪੁਰ ਰੋਡ, ਸਿਵਲ ਲਾਈਨ ਦੇ ਵਸਨੀਕ ਹਨ। ਮਰੀਜ਼ਾਂ ਦੀ ਗਿਣਤੀ ਹੁਣ 67 ਤੱਕ ਪਹੁੰਚ ਗਈ ਹੈ, ਜਿਸ ਵਿੱਚ 58 ਮਰੀਜ਼ ਸ਼ਹਿਰੀ ਹੀ ਹਨ। ਕੋਰੋਨਾ ਦਾ ਖਤਰਾ ਘੱਟ ਹੋਣ ਤੋਂ ਬਾਅਦ ਡੇਂਗੂ ਸ਼ਹਿਰ ਵਿੱਚ ਤਬਾਹੀ ਮਚਾ ਰਿਹਾ ਹੈ। ਬਹੁਤ ਸਾਰੇ ਖੇਤਰਾਂ ਵਿੱਚ, ਨਵੇਂ ਕੇਸ ਸਾਹਮਣੇ ਆਉਣਗੇ ਅਤੇ ਸਿਹਤ ਵਿਭਾਗ ਵਿੱਚ ਹਲਚਲ ਹੈ।
-PTC News
