ਘਰ ਦੀ ਕੈਦ ਦੇ ਰਹੀ ਹੈ Stress ਤਾਂ ਅਸ਼ਾਂਤ ਮਨ ਨੂੰ ਇਸ ਤਰ੍ਹਾਂ ਕਰੋ ਸ਼ਾਂਤ
ਘਰ ਦੀ ਕੈਦ ਦੇ ਰਹੀ ਹੈ Stress ਤਾਂ ਅਸ਼ਾਂਤ ਮਨ ਨੂੰ ਇਸ ਤਰ੍ਹਾਂ ਕਰੋ ਸ਼ਾਂਤ: ਇਸ ਵਿਚ ਕੋਈ ਸ਼ੱਕ ਨਹੀਂ ਕਿ ਕੋਰੋਨਾਵਾਇਰਸ ਦੇ ਚਲਦੇ ਲੌਕਡਾਊਨ ਕਾਰਨ ਸਾਰਿਆਂ ਦੀ ਜੀਵਨ-ਸ਼ੈਲੀ 'ਚ ਪਰਿਵਰਤਨ ਆਇਆ ਹੈ। ਘਰੇਲੂ ਕੰਮ, ਪਰਿਵਾਰਕ ਰੁਝੇਵੇਆਂ ਵਿਚਕਾਰ ਘਰੋਂ ਬੈਠ ਕੇ ਦਫ਼ਤਰੀ ਕੰਮ-ਕਾਜ ਕਰ ਰਹੇ ਲੋਕਾਂ ਨੂੰ ਵੀ ਕਈ ਦਿੱਕਤਾਂ ਦਰਪੇਸ਼ ਆ ਰਹੀਆਂ ਹਨ । ਜ਼ਿਆਦਾਤਰ ਕੰਮ ਆਨਲਾਈਨ ਹੋਣ ਦੀ ਸੂਰਤ 'ਚ ਸਾਰਾ ਦਿਨ ਲੈਪਟਾਪ ਅਤੇ ਮੋਬਾਈਲ 'ਤੇ ਟਿਕੇ ਰਹਿਣ ਵਾਲੇ ਕੰਮਕਾਜੀ ਕਰਮੀਆਂ ਲਈ ਘਰ 'ਚ ਰਹਿ ਕੇ ਕੰਮ ਕਰਨਾ ਵੀ ਇੱਕ ਚੁਣੌਤੀ ਹੈ । ਜੋ ਲੋਕ ਮਜਬੂਰੀਵੱਸ ਆਪਣੇ ਕੰਮਾਂ ਨੂੰ ਬਿਲਕੁਲ ਛੱਡੀ ਬੈਠੇ ਹਨ , ਉਹਨਾਂ ਲਈ ਤਾਂ ਜ਼ਿਆਦਾ ਤਣਾਅ ਭਰਿਆ ਸਮਾਂ ਹੋਏਗਾ ।
ਖ਼ੈਰ ਕੋਈ ਵੀ ਇਨਸਾਨ ਜੋ ਇਸ ਸਮੇਂ ਘਰ 'ਚ ਬੰਦ ਹੈ ਅਤੇ ਤਣਾਅ ਦੇ ਆਲਮ 'ਚ ਹੈ ਤਾਂ ਤਣਾਅ ਮੁਕਤ ਕਰਨ ਲਈ ਇਹਨਾਂ ਸੁਝਾਵਾਂ ਵੱਲ ਜ਼ਰੂਰ ਗੌਰ ਕਰੇ । ਭਾਵੇਂ ਤੁਸੀਂ ਕਿੰਨੇ ਰੁੱਝੇ ਹੋਏ ਹੋ, ਜਾਂ ਬਿਲਕੁਲ ਵਿਹਲੇ ਹੋ ਤਾਂ ਵੀ ਤੁਸੀਂ ਖੁਦ ਨੂੰ ਤਣਾਅ ਮੁਕਤ ( stress free ) ਰੱਖ ਸਕਦੇ ਹੋ !
1. ਸਵੇਰ ਦੀ ਸ਼ੁਰੂਆਤ - ਪ੍ਰਮਾਤਮਾ ਦਾ ਸ਼ੁਕਰਾਨਾ
ਸਵੇਰ ਦੀ ਸ਼ੁਰੂਆਤ 'ਚ ਪ੍ਰਮਾਤਮਾ ਦਾ ਸ਼ੁਕਰਾਨਾ ਕਰੋ , ਜਿਸਦੀ ਬਦੌਲਤ ਤੁਹਾਨੂੰ ਹਰ ਸਵੇਰ ਨੂੰ ਮਾਨਣ ਦਾ ਮੌਕਾ ਮਿਲਿਆ ਹੈ।
2. ਫੁੱਲਾਂ-ਪੌਦਿਆਂ ਤੋਂ ਲਓ ਪਾਜ਼ਿਟਿਵ ਵਾਈਬਜ਼
ਤਾਜ਼ੇ ਫੁੱਲਾਂ ਦੀ ਖੁਸ਼ਬੂ ਲਓ , ਉਹਨਾਂ ਦੀ ਸੁੰਦਰਤਾ ਦਾ ਅਨੰਦ ਮਾਣੋ । ਜੇਕਰ ਤੁਹਾਨੂੰ ਬਾਗਬਾਨੀ ਦਾ ਸ਼ੌਂਕ ਹੈ ਅਤੇ ਤੁਹਾਡੇ ਘਰ, ਘਰ ਦੀ ਪਾਰਕ ਜਾਂ ਬਾਲਕੋਨੀ 'ਚ ਫੁੱਲ-ਪੌਦੇ ਲੱਗੇ ਹਨ ਤਾਂ ਰੋਜ਼ ਉਹਨਾਂ ਨੂੰ ਪਾਣੀ ਦਿਓ ਅਤੇ ਕੁਝ ਚਿਰ ਲਈ ਉਹਨਾਂ ਨੂੰ ਨਿਹਾਰੋ । ਰੰਗੀਨ ਫੁੱਲਾਂ ਦੀ ਚੋਣ ਕਰ ਕੇ ਕੁਝ ਫੁੱਲਾਂ ਦੇ ਗੁਲਦਸਤੇ ਉੱਥੇ ਟਿਕਾਓ ਜਿੱਥੇ ਤੁਹਾਡੀ ਨਜ਼ਰ ਪੈਂਦੀ ਰਹੇ । ਇਹ ਤਰੀਕਾ ਯਕੀਨਨ ਤੁਹਾਨੂੰ ਸ਼ਾਂਤ ਕਰੇਗਾ ।
3. ਡਸਟਿੰਗ ( ਸਾਫ਼-ਸਫ਼ਾਈ ) ਕਰੋ
ਜੇ ਤੁਸੀਂ ਤਣਾਅ ਮਹਿਸੂਸ ਕਰਦੇ ਹੋ, ਤਾਂ ਹੋ ਸਕੇ ਤਾਂ ਘਰ ਦੀ ਡਸਟਿੰਗ ਕਰੋ , ਇਹ ਇੱਕ ਕਿਫਾਇਤੀ ਤਰੀਕਾ ਹੈ ਤਣਾਅ ਭਜਾਉਣ ਦਾ । ਜੇਕਰ ਤੁਸੀਂ ਫੁੱਲਾਂ ਉੱਤੇ ਲੱਗੇ ਘੱਟੇ ਮਿੱਟੀ ਨੂੰ ਸਾਫ਼ ਕਰ ਸਕਦੇ ਹੋ ਤਾਂ ਕਰੋ , ਇਹ ਸਮਾਂ ਤੁਹਾਨੂੰ ਬਹੁਤ ਸਕੂਨ ਦੇਵੇਗਾ , ਇੱਕ ਸਿੱਧੇ ਤੌਰ ਤੇ ਫੁੱਲਾਂ ਜਾਂ ਪੌਦਿਆਂ ਨਾਲ ਰਾਬਤਾ ਤੁਹਾਨੂੰ ਕੰਪਿਊਟਰ ਜਾਂ ਫੋਨ 'ਤੇ ਬਿਤਾਏ ਸਮੇਂ ਨਾਲੋਂ ਵੀ ਬਿਹਤਰ ਜਾਪੇਗਾ । ਇਹ ਤੁਹਾਡੀ ਦਿਮਾਗੀ ਘੁਟਣ ਅਤੇ ਮਨ ਨੂੰ ਸ਼ਾਂਤ ਕਰਨ 'ਚ ਸਹਾਈ ਸਾਬਤ ਹੋਵੇਗਾ ।
4. ਇੱਕ ਘੰਟੇ ਦਾ ਸਮਾਂ ਸਿਰਫ਼ ਆਪਣੇ ਲਈ ਕੱਢੋ
ਕੁਝ ਸਮੇਂ ( one hour ) ਲਈ ਕੰਮ ਤੋਂ ਬਿਲਕੁਲ ਧਿਆਨ ਹਟਾਓ , ਮੋਬਾਈਲ / ਲੈਪਟੋਪ ਨੂੰ ਕੁਝ ਚਿਰ ਲਈ ਬੰਦ ਕਰੋ , ਸ਼ਾਂਤ ਇਕਾਗਰ ਚਿੱਤ ਹੋ ਕੇ ਬੈਠੋ , ਅੱਖਾਂ ਨੂੰ ਅਰਾਮ ਦਿਓ।
5. ਕਾਲੀ / ਹਰਬਲ ਚਾਹ ਪੀਓ
ਇਕ ਕੱਪ ਕਾਲੀ ਜਾਂ ਹਰੀ / ਹਰਬਲ ਚਾਹ ਨੂੰ ਘੁੱਟ-ਘੁੱਟ ਕਰਕੇ ਪੀਓ । ਚਾਹ ਦੀ ਖੁਸ਼ਬੂ, ਸੁਆਦ ਤੁਹਾਨੂੰ ਨਿੱਘ ਪ੍ਰਦਾਨ ਕਰਨ ਦੇ ਨਾਲ ਚਿੰਤਾ ਨੂੰ ਘਟਾਉਣ 'ਚ ਮਦਦਗਾਰ ਹਨ , ਇਸ ਲਈ ਚਾਹ ਦਾ ਸੇਵਨ ਇੱਕ ਵਾਰ ਜ਼ਰੂਰ ਕਰੋ।
6. ਰੋਜ਼ ਨਹਾਓ
ਕੋਸੇ-ਕੋਸੇ ਪਾਣੀ ਦਾ ਨਿੱਘ ਤੁਹਾਡੇ ਸਾਰੇ ਸਰੀਰ ਵਿੱਚ ਖੂਨ ਦੇ ਪ੍ਰਵਾਹ ਵਿੱਚ ਸੁਧਾਰ ਕਰਦਾ ਹੈ । ਕੁਝ ਚਿਰ ਕੋਸੇ ਪਾਣੀ 'ਚ ਹੱਥ ਡੁਬਾਉਂਣ ਨਾਲ ਤੁਹਾਨੂੰ ਚੰਗਾ ਲੱਗੇਗਾ । ਜਿਹੜੇ ਲੋਕ ਨਿਯਮਿਤ ਤੌਰ 'ਤੇ ਨਹਾਉਂਦੇ ਹਨ ਉਹ ਘੱਟ ਤਣਾਅ ਅਤੇ ਘੱਟ ਥਕਾਨ ਮਹਿਸੂਸ ਕਰਦੇ ਹਨ । ਰਾਤ ਨੂੰ ਹੱਥ ਮੂੰਹ ਧੋ ਕੇ ਜਾਂ ਫਿਰ ਨਹਾ ਕੇ ਸੌਣ ਨਾਲ ਨੀਂਦ ਬਿਹਤਰ ਆਉਂਦੀ ਹੈ , ਬਿਲਕੁਲ ਉਸ ਤਰ੍ਹਾਂ ਜਿਵੇਂ ਸਵੇਰ ਦਾ ਇਸ਼ਨਾਨ ਤੁਹਾਨੂੰ ਤਾਜ਼ਗੀ ਦਿੰਦਾ ਹੈ ।
7. ਸੰਗੀਤ ਸੁਣੋ
ਸੰਗੀਤ ਤੁਹਾਨੂੰ ਸ਼ਾਂਤ ਕਰਦਾ ਹੈ । ਆਪਣੀ ਪਸੰਦ ਦਾ ਸੰਗੀਤ ਜੋ ਤੁਹਾਡੇ ਮਨ ਨੂੰ ਚੰਗਾ ਲੱਗੇ ਉਹ ਜ਼ਰੂਰ ਸੁਣੋ , ਚਾਹੇ ਤੁਸੀਂ ਕੰਮ ਕਰਦੇ ਵੀ ਸੰਗੀਤਕ ਧੁਨਾਂ ਲਗਾ ਸਕਦੇ ਹੋ। ਸੰਗੀਤ 'ਚ ਬਹੁਤ ਤਾਕਤ ਹੈ ਮਨੁੱਖ ਨੂੰ ਸ਼ਾਂਤ ਕਰਨ ਦੀ , ਇਹ ਸਭ ਜਾਣਦੇ ਹਨ ਕਿ ਕਈ ਰੋਗ ਸੰਗੀਤ ਨਾਲ ਠੀਕ ਹੋ ਸਕਦੇ ਹਨ । ਇਕ ਅਧਿਐਨ ਅਨੁਸਾਰ, ਪੰਛੀ ਅਤੇ ਜਾਨਵਰ ਵੀ ਸੰਗੀਤ ਦਾ ਆਨੰਦ ਮਾਣਦੇ ਹਨ। ਮਨ ਨੂੰ ਸ਼ਾਂਤ ਰੱਖਣ ਲਈ ਸੰਗੀਤ ਦਾ ਸਹਾਰਾ ਲਓ ।
8. ਖੁਸ਼ਬੂਦਾਰ ਪਰਫ਼ਯੂਮ / ਇਤਰ /ਅਗਰਬੱਤੀ ਦਾ ਇਸਤੇਮਾਲ
ਜੇ ਤੁਹਾਨੂੰ ਜਾਂ ਤੁਹਾਡੇ ਘਰ 'ਚ ਕਿਸੇ ਨੂੰ ਖੁਸ਼ਬੂਦਾਰ ਤਰਲ/ਠੋਸ ਚੀਜ਼ਾਂ ਤੋਂ ਐਲਰਜੀ ਨਹੀਂ ਹੈ ਤਾਂ ਤੁਸੀਂ ਕੁਝ ਨਾਮਚੀ ਪਰ ਹਲਕੀ ਖੁਸ਼ਬੂ ਦਾ ਛਿੜਕਾਅ ਆਪਣੇ ਘਰ ਦੇ ਅੰਦਰ ਕਰ ਸਕਦੇ ਹੋ ( ਚੇਤੇ ਰਹੇ ਜੇਕਰ ਤੁਹਾਨੂੰ ਐਲਰਜੀ ਦੀ ਸਮੱਸਿਆ ਨਹੀਂ ਹੈ ਤਾਂ ) ਇਹ ਤੁਹਾਡੇ ਲਈ ਮਦਦਗਾਰ ਸਿੱਧ ਹੋਵੇਗੀ ।
ਮੰਨਦੇ ਹਾਂ ਕਿ ਸਮਾਂ ਥੋੜਾ ਤਣਾਅ ਵਾਲਾ ਹੈ , ਪਰ ਉਪਰੋਕਤ ਸੁਝਾਅ ਸਾਡੇ ਲਈ ਸਹਾਈ ਹੋ ਸਕਦੇ ਹਨ। ਬਾਕੀ "ਸਮਾਂ ਉਹ ਵੀ ਨਹੀਂ ਰਿਹਾ ਸਮਾਂ ਆਹ ਵੀ ਨਹੀਂ ਰਹਿਣਾ " ਇਸ ਫਿਕਰੇ ਨੂੰ ਯਾਦ ਰੱਖੋ , ਤਣਾਅ-ਮੁਕਤ ਰਹੋ , ਸੁਖਾਵਾਂ ਸਮਾਂ ਜਲਦ ਆਵੇਗਾ ।
