ਲਾਕਡਾਊਨ ਦੌਰਾਨ ਘਰ ਜਾ ਰਹੀ ਵਿਦਿਆਰਥਣ ਨਾਲ 10 ਮੁੰਡਿਆਂ ਨੇ ਕੀਤਾ ਗੈਂਗਰੇਪ

ਲਾਕਡਾਊਨ ਦੌਰਾਨ ਘਰ ਜਾ ਰਹੀ ਵਿਦਿਆਰਥਣ ਨਾਲ 10 ਮੁੰਡਿਆਂ ਨੇ ਕੀਤਾ ਗੈਂਗਰੇਪ:ਝਾਰਖੰਡ :  ਝਾਰਖੰਡ ਦੇ ਦੁਮਕਾ ਤੋਂ ਲਾਕਡਾਊਨ ਦੌਰਾਨ ਇੱਕ ਸ਼ਰਮਨਾਕ ਘਟਨਾ ਸਾਹਮਣੇ ਆਈ ਹੈ। ਜਿੱਥੇ ਲਾਕਡਾਊਨ ਤੋਂ ਬਾਅਦ ਆਪਣੇ ਪਿੰਡ ਪਰਤ ਰਹੀ 16 ਸਾਲਾ ਵਿਦਿਆਰਥਣ ਨਾਲ 10 ਨੌਜਵਾਨਾਂ ਨੇ ਸਮੂਹਕ ਜ਼ਬਰ ਜਨਾਹ ਕੀਤਾ ਹੈ। ਇਹ ਘਟਨਾ ਬੀਤੀ 24 ਮਾਰਚ ਨੂੰ ਗੋਪੀਕਾਂਦਰ ਦੇ ਗੜ੍ਹੀਆਪਾਨੀ ਜੰਗਲ ‘ਚ ਵਾਪਰੀ ਹੈ।

ਮਿਲੀ ਜਾਣਕਾਰੀ ਅਨੁਸਾਰ ਲੜਕੀ ਗੋਪੀਚਾਂਦਰ ਬਲਾਕ ਇਲਾਕੇ ਦੀ ਰਹਿਣ ਵਾਲੀ ਹੈ। ਉਹ ਦੁਮਕਾ ਸ਼ਹਿਰ ਦੇ ਸ਼ਿਵਪਹਾੜ ਵਿਖੇ ਕਿਰਾਏ ਦੇ ਮਕਾਨ ‘ਚ ਰਹਿ ਕੇ ਐਸ.ਪੀ. ਕਾਲਜ ਤੋਂ 12ਵੀਂ ਜਮਾਤ ਦੀ ਪੜ੍ਹਾਈ ਕਰ ਰਹੀ ਹੈ। ਲਾਕਡਾਊਨ ਕਾਰਨ ਕਾਲਜ ਬੰਦ ਹੋ ਗਿਆ ਸੀ। ਗੱਡੀਆਂ ਤੇ ਬੱਸਾਂ ਵੀ ਨਹੀਂ ਚੱਲ ਰਹੀਆਂ ਸਨ। ਉਹ 24 ਮਾਰਚ ਨੂੰ ਆਪਣੀ ਇੱਕ ਸਹੇਲੀ ਨਾਲ ਸਕੂਟੀ ‘ਤੇ ਘਰ ਜਾਣ ਲਈ ਨਿਕਲੀ ਸੀ।

ਲੜਕੀ ਨੇ ਦੱਸਿਆ ਕਿ ਮਦਦ ਲਈ ਬੁਲਾਏ ਗਏ ਇੱਕ ਦੋਸਤ ਅਤੇ ਉਸ ਦੇ ਸਾਥੀ ਨੇ ਉਸ ਦਾ ਬਲਾਤਕਾਰ ਕੀਤਾ ਹੈ ਅਤੇ ਫਿਰ 8 ਹੋਰ ਨੌਜਵਾਨ ਪਹੁੰਚੇ ਅਤੇ ਸਮੂਹਿਕ ਬਲਾਤਕਾਰ ਨੂੰ ਅੰਜਾਮ ਦਿੱਤਾ। ਉਹ ਰਾਤ ਭਰ ਜੰਗਲ ‘ਚ ਬੇਹੋਸ਼ ਪਈ ਰਹੀ। ਜਿਸ ਤੋਂ ਬਾਅਦ ਲੜਕੀ ਨੇ ਗੋਪੀਕਾਂਦਰ ਥਾਣੇ ‘ਚ ਆਪਣੀ ਸ਼ਿਕਾਇਤ ਦਰਜ ਕਰਵਾਈ ਹੈ।
-PTCNews