Anshuman Gaekwad Cancer: ਸਾਬਕਾ ਖਿਡਾਰੀਆਂ ਦੀ ਅਪੀਲ ਦਾ ਅਸਰ, BCCI ਨੇ ਬਲੱਡ ਕੈਂਸਰ ਤੋਂ ਪੀੜਤ ਅੰਸ਼ੁਮਨ ਗਾਇਕਵਾੜ ਦੀ ਮਦਦ ਲਈ ਆਇਆ ਅੱਗੇ
Anshuman Gaekwad Cancer: ਭਾਰਤੀ ਕ੍ਰਿਕਟ ਕੰਟਰੋਲ ਬੋਰਡ ਆਖਰਕਾਰ ਸਾਬਕਾ ਭਾਰਤੀ ਕ੍ਰਿਕਟਰ ਅੰਸ਼ੁਮਨ ਗਾਇਕਵਾੜ ਦੀ ਮਦਦ ਲਈ ਅੱਗੇ ਆਇਆ ਹੈ। ਬੀਸੀਸੀਆਈ ਨੇ ਅੰਸ਼ੁਮਨ ਗਾਇਕਵਾੜ ਲਈ 1 ਕਰੋੜ ਰੁਪਏ ਦਾ ਫੰਡ ਜਾਰੀ ਕੀਤਾ ਹੈ। ਸਾਬਕਾ ਕ੍ਰਿਕਟਰ ਬਲੱਡ ਕੈਂਸਰ ਨਾਲ ਜੂਝ ਰਹੇ ਹਨ। ਟੀਮ ਇੰਡੀਆ ਦੇ ਸਾਬਕਾ ਕਪਤਾਨ ਕਪਿਲ ਦੇਵ ਨੇ ਅੰਸ਼ੁਮਨ ਗਾਇਕਵਾੜ ਦਾ ਮੁੱਦਾ ਚੁੱਕਿਆ ਸੀ। ਬੀਸੀਸੀਆਈ ਸਕੱਤਰ ਨੇ ਇਸ ਦਾ ਨੋਟਿਸ ਲਿਆ ਅਤੇ ਜਲਦੀ ਹੀ ਅੰਸ਼ੂਮਨ ਗਾਇਕਵਾੜ ਦੀ ਮਦਦ ਲਈ ਫੰਡ ਜਾਰੀ ਕੀਤੇ ਗਏ।
ਮੀਡੀਆ ਰਿਪੋਰਟਾਂ ਦੀ ਮੰਨੀਏ ਤਾਂ ਬੀਸੀਸੀਆਈ ਦੀ ਸਿਖਰ ਕੌਂਸਲ ਨੇ ਕਿਹਾ ਕਿ ਬੀਸੀਸੀਆਈ ਸਕੱਤਰ ਜੈ ਸ਼ਾਹ ਨੇ ਬੀਸੀਸੀਆਈ ਨੂੰ ਕੈਂਸਰ ਨਾਲ ਜੂਝ ਰਹੇ ਭਾਰਤ ਦੇ ਦਿੱਗਜ ਕ੍ਰਿਕਟਰ ਅੰਸ਼ੂਮਨ ਗਾਇਕਵਾੜ ਨੂੰ ਵਿੱਤੀ ਸਹਾਇਤਾ ਦੇਣ ਲਈ ਤੁਰੰਤ ਪ੍ਰਭਾਵ ਨਾਲ 1 ਕਰੋੜ ਰੁਪਏ ਜਾਰੀ ਕਰਨ ਦਾ ਨਿਰਦੇਸ਼ ਦਿੱਤਾ। ਜੈ ਸ਼ਾਹ ਨੇ ਗਾਇਕਵਾੜ ਦੇ ਪਰਿਵਾਰ ਨਾਲ ਵੀ ਗੱਲ ਕੀਤੀ ਅਤੇ ਸਥਿਤੀ ਦਾ ਜਾਇਜ਼ਾ ਲਿਆ ਅਤੇ ਸਹਾਇਤਾ ਪ੍ਰਦਾਨ ਕੀਤੀ।
ਦੱਸ ਦਈਏ ਕਿ ਜਿਵੇਂ ਹੀ ਸਾਬਕਾ ਕਪਤਾਨ ਕਪਿਲ ਦੇਵ ਨੂੰ ਪਤਾ ਲੱਗਾ ਕਿ ਉਨ੍ਹਾਂ ਦੇ ਸਾਥੀ ਅੰਸ਼ੁਮਨ ਨੂੰ ਬਲੱਡ ਕੈਂਸਰ ਹੈ, ਤਾਂ ਉਨ੍ਹਾਂ ਨੇ ਆਪਣੇ ਦੂਜੇ ਸਾਥੀਆਂ ਨੂੰ ਉਨ੍ਹਾਂ ਦੀ ਮਦਦ ਕਰਨ ਲਈ ਕਿਹਾ। ਉਨ੍ਹਾਂ ਨੇ ਬੀ.ਸੀ.ਸੀ.ਆਈ. ਨੂੰ ਅਜਿਹਾ ਸਿਸਟਮ ਬਣਾਉਣ ਲਈ ਵੀ ਕਿਹਾ ਤਾਂ ਜੋ ਸਾਬਕਾ ਖਿਡਾਰੀਆਂ ਦੀ ਅਜਿਹੇ ਸੰਕਟ ਦੀ ਘੜੀ 'ਚ ਮਦਦ ਕੀਤੀ ਜਾ ਸਕੇ, ਕਿਉਂਕਿ ਅੱਜ ਦੇ ਕ੍ਰਿਕਟਰਾਂ ਕੋਲ ਬਹੁਤ ਪੈਸਾ ਹੈ, ਪਰ ਜਦੋਂ ਕਪਿਲ ਦੇਵ ਜਾਂ ਸੰਦੀਪ ਪਾਟਿਲ, ਸੁਨੀਲ ਗਾਵਸਕਰ ਅਤੇ ਹੋਰ ਮਹਾਨ ਕ੍ਰਿਕਟਰ ਖੇਡਦੇ ਸਨ, ਤਾਂ ਨਾ ਹੀ ਉਨ੍ਹਾਂ ਕੋਲ ਸੀ। ਨਾ ਹੀ ਬੋਰਡ ਕੋਲ ਪੈਸਾ ਸੀ।
ਇਸ ਤੋਂ ਇਲਾਵਾ ਕਪਿਲ ਦੇਵ ਨੇ ਕਿਹਾ ਸੀ ਕਿ ਅਜਿਹਾ ਸਿਸਟਮ ਬਣਾਇਆ ਜਾਣਾ ਚਾਹੀਦਾ ਹੈ, ਜਿਸ 'ਚ ਸਾਬਕਾ ਕ੍ਰਿਕਟਰ ਵੀ ਥੋੜ੍ਹਾ-ਬਹੁਤ ਯੋਗਦਾਨ ਪਾਉਣ, ਤਾਂ ਕਿ ਕਿਸੇ ਹੋਰ ਕ੍ਰਿਕਟਰ ਨੂੰ ਪੈਸੇ ਨਾਲ ਜੁੜੀ ਕੋਈ ਸਮੱਸਿਆ ਨਾ ਹੋਵੇ। ਕਪਿਲ ਦੇਵ ਆਪਣੀ ਪੈਨਸ਼ਨ ਵੀ ਦਾਨ ਕਰਨ ਲਈ ਤਿਆਰ ਸਨ। ਹਾਲਾਂਕਿ, ਹੁਣ ਬੀਸੀਸੀਆਈ ਨੇ ਮਦਦ ਮੁਹੱਈਆ ਕਰਵਾਈ ਹੈ, ਪਰ ਬੋਰਡ ਨੂੰ ਕਪਿਲ ਦੇਵ ਦੀ ਗੱਲ 'ਤੇ ਵੀ ਧਿਆਨ ਦੇਣਾ ਚਾਹੀਦਾ ਹੈ, ਕਿਉਂਕਿ ਇਹ ਇਕ ਮਹੱਤਵਪੂਰਨ ਮੁੱਦਾ ਹੈ। ਕਈ ਸਾਬਕਾ ਕ੍ਰਿਕਟਰ ਗਰੀਬੀ ਦੀ ਜ਼ਿੰਦਗੀ ਬਤੀਤ ਕਰ ਰਹੇ ਹਨ।
- PTC NEWS
