ਜਨਮਦਿਨ ਮਨਾਉਣ ਗਏ 4 ਦੋਸਤਾਂ ਦੀ ਕਾਰ ਨਹਿਰ 'ਚ ਡਿੱਗੀ, ਇਕ ਦੀ ਲਾਸ਼ ਬਰਾਮਦ
ਲੁਧਿਆਣਾ : ਪੰਜਾਬ ਵਿੱਚ ਲੁਧਿਆਣਾ ਦੇ ਜਗਰਾਉਂ ਕਸਬੇ ਵਿੱਚ ਸਥਿਤ ਡੱਲਾ ਨਹਿਰ ਵਿੱਚ ਡਿੱਗੀ ਕਾਰ ਵਿੱਚੋਂ ਦੋ ਨੌਜਵਾਨਾਂ ਇਕਬਾਲ ਤੇ ਮਨਜਿੰਦਰ ਨੂੰ ਲੋਕਾਂ ਨੇ ਬਚਾ ਲਿਆ। ਜਦਕਿ ਕਾਰ ਦੀ ਅਗਲੀ ਸੀਟ 'ਤੇ ਬੈਠੇ ਦਿਲਪ੍ਰੀਤ ਅਤੇ ਸਤਨਾਮ ਪਾਣੀ ਤੇਜ਼ ਵਹਾਅ ਕਾਰਨ ਰੁੜ੍ਹ ਗਏ।
ਦੇਰ ਸ਼ਾਮ ਦਿਲਪ੍ਰੀਤ ਦੀ ਲਾਸ਼ ਡੱਲਾ ਨਹਿਰ ਤੋਂ ਕਰੀਬ 11 ਕਿਲੋਮੀਟਰ ਦੂਰ ਮੋਗਾ ਦੇ ਪਿੰਡ ਦੋਧਰ ਤੋਂ ਬਰਾਮਦ ਹੋਈ। ਦਿਲਪ੍ਰੀਤ ਆਪਣੇ ਜਨਮ ਦਿਨ ਦੀ ਪਾਰਟੀ ਤੋਂ ਬਾਅਦ ਤਿੰਨੋਂ ਦੋਸਤਾਂ ਨਾਲ ਘਰ ਵਾਪਸ ਜਾ ਰਿਹਾ ਸੀ। ਉਸ ਦੇ ਜਨਮ ਦਿਨ ਦੀ ਰਾਤ ਉਸ ਦੀ ਮੌਤ ਬਣ ਗਈ। ਦਿਲਪ੍ਰੀਤ ਨੇ ITI ਦਾ ਕੋਰਸ ਕੀਤਾ ਹੋਇਆ ਸੀ। ਹੁਣ ਉਹ ਆਈਲੈਟਸ ਕਰਕੇ ਆਪਣੇ ਭਰਾ ਕੋਲ ਕੈਨੇਡਾ ਜਾਣ ਦੀ ਤਿਆਰੀ ਕਰ ਰਿਹਾ ਸੀ।
ਦਿਲਪ੍ਰੀਤ ਦੇ ਨਾਲ ਪਾਣੀ ਵਿੱਚ ਡੁੱਬਣ ਵਾਲੇ ਉਸਦੇ ਦੋਸਤ ਸਤਨਾਮ ਬਾਰੇ ਅਜੇ ਤੱਕ ਕੁਝ ਪਤਾ ਨਹੀਂ ਲੱਗ ਸਕਿਆ ਹੈ। ਉਹ ਪਿੰਡ ਵਿੱਚ ਪਲੰਬਰ ਦਾ ਕੰਮ ਕਰਦਾ ਸੀ। ਉਸ ਦਾ ਤਿੰਨ ਸਾਲ ਪਹਿਲਾਂ ਵਿਆਹ ਹੋਇਆ ਸੀ। ਉਸ ਦੇ ਦੋ ਪੁੱਤਰ ਹਨ। ਵੱਡੇ ਪੁੱਤਰ ਦੀ ਉਮਰ ਡੇਢ ਸਾਲ ਅਤੇ ਛੋਟੇ ਪੁੱਤਰ ਦੀ ਉਮਰ 7 ਮਹੀਨੇ ਹੈ। ਛੋਟੇ ਬੇਟੇ ਦੇ ਇਕ ਹਫ਼ਤੇ ਬਾਅਦ ਸਤਨਾਮ ਨੇ ਪਹਿਲੀ ਲੋਹੜੀ ਮਨਾਉਣੀ ਸੀ ਪਰ ਪਰਿਵਾਰ ਨੂੰ ਪਤਾ ਨਹੀਂ ਸੀ ਕਿ ਉਨ੍ਹਾਂ 'ਤੇ ਦੁੱਖਾਂ ਦਾ ਪਹਾੜ ਟੁੱਟ ਜਾਵੇਗਾ। ਗੋਤਾਖੋਰ ਲਗਾਤਾਰ ਸਤਨਾਮ ਦੀ ਨਹਿਰ ਵਿੱਚ ਭਾਲ ਕਰ ਰਹੇ ਹਨ।
ਮਨਜਿੰਦਰ ਅਤੇ ਇਕਬਾਲ ਨੇ ਦੱਸਿਆ ਕਿ ਉਹ ਪਾਣੀ ਦੇ ਵਿਚਕਾਰ ਵਹਾਅ ਵਿਚਾਲੇ ਕਰੀਬ 1 ਘੰਟੇ ਤੱਕ ਕਾਰ ਦੀ ਛੱਤ 'ਤੇ ਬੈਠੇ ਰਹੇ | ਮਨਜਿੰਦਰ ਨੇ ਦੱਸਿਆ ਕਿ ਹਾਦਸੇ ਵਿੱਚ ਉਹ ਜ਼ਖ਼ਮੀ ਹੋ ਗਿਆ ਪਰ ਇਕਬਾਲ ਸਿੰਘ ਸੁਰੱਖਿਅਤ ਹੈ। ਨੌਜਵਾਨਾਂ ਨੇ ਦੱਸਿਆ ਕਿ ਅੱਜ ਦਿਲਪ੍ਰੀਤ ਦਾ ਜਨਮ ਦਿਨ ਸੀ, ਇਸ ਲਈ ਚਾਰੇ ਦੋਸਤ ਕਰੀਬ ਸਾਢੇ ਸੱਤ ਵਜੇ ਪਾਰਟੀ ਲਈ ਰਵਾਨਾ ਹੋਏ।
ਇਹ ਵੀ ਪੜ੍ਹੋ : ਵੱਡੀ ਖ਼ਬਰ : ਕੈਬਨਿਟ ਮੰਤਰੀ ਫ਼ੌਜਾ ਸਿੰਘ ਸਰਾਰੀ ਵੱਲੋਂ ਅਸਤੀਫ਼ਾ, ਡਾ.ਬਲਬੀਰ ਸਿੰਘ ਦੀ ਪੰਜਾਬ ਵਜ਼ਾਰਤ 'ਚ ਸ਼ਾਮਲ ਹੋਣ ਦੀ ਸੰਭਾਵਨਾ
ਪਾਰਟੀ ਤੋਂ ਪਹਿਲਾਂ ਉਹ ਨੇੜਲੇ ਪਿੰਡ ਦੇ ਗੁਰਦੁਆਰਾ ਸਾਹਿਬ ਵਿਖੇ ਨਗਰ ਕੀਰਤਨ ਵਿੱਚ ਪੁੱਜੇ। ਉਥੋਂ ਉਹ ਢਾਬੇ 'ਤੇ ਪਾਰਟੀ ਕਰਨ ਲਈ ਚਲੇ ਗਏ ਸਨ। ਦਿਲਪ੍ਰੀਤ ਨੇ ਡਰਾਈਵਿੰਗ ਦੀ ਜ਼ਿੱਦ ਕਰਨੀ ਸ਼ੁਰੂ ਕਰ ਦਿੱਤੀ ਅਤੇ ਡਰਾਈਵਰ ਸੀਟ 'ਤੇ ਬੈਠ ਕੇ ਗੱਡੀ ਚਲਾਉਣੀ ਸ਼ੁਰੂ ਕਰ ਦਿੱਤੀ। ਕੁਝ ਸਮੇਂ ਬਾਅਦ ਅਚਾਨਕ ਦੇਖਿਆ ਕਿ ਪਿੰਡ ਡੱਲੇ ਕੋਲ ਸੜਕ ਖ਼ਤਮ ਹੋ ਗਈ ਅਤੇ ਕਾਰ ਨਹਿਰ ਵਿੱਚ ਡਿੱਗ ਗਈ। ਕਾਰ ਦੀ ਹੈਂਡ ਬ੍ਰੇਕ ਵੀ ਖਿੱਚੀ ਗਈ ਪਰ ਕਾਰ ਨਹੀਂ ਰੁਕੀ। ਕਾਰ ਡਿੱਗਣ ਤੋਂ ਬਾਅਦ ਸਾਰੇ ਦੋਸਤਾਂ ਨੇ ਰੌਲਾ ਪਾਇਆ।
- PTC NEWS
