ਨਨਕਾਣਾ ਸਾਹਿਬ ਦੇ ਦਰਸ਼ਨਾਂ ਲਈ ਗਈ ਹੁਸ਼ਿਆਰਪੁਰ ਦੀ ਔਰਤ ਨੇ ਪਾਕਿਸਤਾਨ 'ਚ ਕਰਵਾਇਆ ਵਿਆਹ
ਨਨਕਾਣਾ ਸਾਹਿਬ ਦੇ ਦਰਸ਼ਨਾਂ ਲਈ ਗਈ ਹੁਸ਼ਿਆਰਪੁਰ ਦੀ ਔਰਤ ਨੇ ਪਾਕਿਸਤਾਨ 'ਚ ਕਰਵਾਇਆ ਵਿਆਹ:ਵਿਸਾਖੀ ਮੌਕੇ 12 ਅਪ੍ਰੈਲ ਨੂੰ ਪਾਕਿਸਤਾਨ ਦੇ ਗੁਰਧਾਮਾਂ ਦੀ ਯਾਤਰਾ ਲਈ ਭਾਰਤ ਤੋਂ ਗਏ 1800 ਸਿੱਖ ਸ਼ਰਧਾਲੂਆਂ ਦੇ ਜੱਥੇ 'ਚੋਂ ਇੱਕ ਔਰਤ ਨੇ ਇਸਲਾਮ ਧਰਮ ਕਬੂਲ ਲਿਆ ਹੈ।ਇਸ ਦੀ ਪੁਸ਼ਟੀ ਮਹਿਲਾ ਕਿਰਨ ਬਾਲਾ ਦੇ ਸੁਹਰਾ ਪਰਿਵਾਰ ਵੱਲੋਂ ਕੀਤੀ ਗਈ ਹੈ।
ਕਿਰਨ ਬਾਲਾ ਹੁਸ਼ਿਆਰਪੁਰ ਦੇ ਗੜ੍ਹਸ਼ੰਕਰ ਦੀ ਰਹਿਣ ਵਾਲੀ ਹੈ।ਉਸ ਦਾ ਸੁਹਰਾ ਤਰੇਸਮ ਸਿੰਘ ਉੱਥੋਂ ਦੇ ਗੁਰਦੁਆਰੇ ਦਾ ਹੈੱਡ ਗ੍ਰੰਥੀ ਹੈ।ਤਰਸੇਮ ਸਿੰਘ ਨੇ ਦੱਸਿਆ ਕਿ ਉਨ੍ਹਾਂ ਨੂੰ ਕਿਰਨ ਬਾਲਾ ਨੇ ਫੋਨ ਕਰਕੇ ਦੱਸਿਆ ਕੇ ਉਸ ਨੇ ਇਸਲਾਮ ਕਬੂਲ ਕੇ ਨਿਕਾਹ ਕਰ ਲਿਆ ਹੈ।ਉਨ੍ਹਾਂ ਕਿਹਾ ਕਿ ਪਹਿਲਾਂ ਤਾਂ ਇਹ ਮਜ਼ਾਕ ਲੱਗਾ ਪਰ ਇੱਕ ਚੈਨਲ 'ਤੇ ਖਬਰ ਵੇਖਣ ਮਗਰੋਂ ਹੋਸ਼ ਉੱਡ ਗਏ।ਤਰਸੇਮ ਸਿੰਘ ਨੇ ਕਿਹਾ ਕਿ 10 ਅਪ੍ਰੈਲ ਨੂੰ ਉਹ ਕਿਰਨ ਨੂੰ ਅੰਮ੍ਰਿਤਸਰ ਛੱਡ ਕੇ ਆਏ ਸੀ।
12 ਅਪ੍ਰੈਲ ਨੂੰ ਕਿਰਨ ਐਸ.ਜੀ.ਪੀ.ਸੀ. ਦੇ ਜੱਥੇ ਨਾਲ ਨਨਕਾਣਾ ਸਾਹਿਬ ਲਈ ਰਵਾਨਾ ਹੋਈ ਸੀ। 16 ਅਪ੍ਰੈਲ ਨੂੰ ਪਾਕਿਸਤਾਨ 'ਚ ਕਿਰਨ ਜਥੇ ਨਾਲੋਂ ਵੱਖ ਹੋ ਗਈ ਤੇ ਘਰ ਫੋਨ ਕਰਕੇ ਦੱਸਿਆ ਕਿ ਉਸ ਨੇ ਲਾਹੌਰ 'ਚ ਇਸਲਾਮ ਧਰਮ ਕਬੂਲ ਕਰਕੇ ਨਿਕਾਹ ਕਰਵਾ ਲਿਆ ਹੈ।ਦਰਅਸਲ ਕਿਰਨ ਦੇ ਪਤੀ ਦੀ ਸੜਕ ਹਾਦਸੇ 'ਚ ਮੌਤ ਹੋ ਗਈ ਸੀ।
ਪਤੀ ਦੀ ਮੌਤ ਤੋਂ ਬਾਅਦ ਕਿਰਨ ਆਪਣੀ ਧੀ ਤੇ ਦੋ ਪੁੱਤਰਾਂ ਨੂੰ ਲੈ ਕੇ ਮਾਪਿਆਂ ਕੋਲ ਚਲੀ ਗਈ ਸੀ।ਸੁਹਰਾ ਪਰਿਵਾਰ ਨੇ ਸਾਲ 2005 'ਚ ਕਿਰਨ ਨੂੰ ਵਾਪਸ ਘਰ ਲਿਆਂਦਾ ਸੀ।ਉਸ ਦੇ ਬੱਚੇ ਮਾਂ ਨੂੰ ਉਡੀਕ ਰਹੇ ਹਨ।ਤਰਸੇਮ ਸਿੰਘ ਨੇ ਕਿਹਾ ਕਿ ਹੁਣ 20 ਅਪ੍ਰੈਲ ਨੂੰ ਜਥਾ ਵਾਪਸ ਆਉਣ ਮਗਰੋਂ ਹੀ ਸਾਰੀ ਗੱਲ਼ ਸਾਫ ਹੋਏਗੀ।
-PTCNews
