ਫੌਜੀ ਜਵਾਨਾਂ ਦੀ ਛੁੱਟੀ 'ਤੇ ਭਾਰੀ ਪਿਆ ਰੇਲ ਬੰਦ ਦਾ ਅਸਰ
ਬਠਿੰਡਾ : ਇਕ ਪਾਸੇ ਬੀਤੇ ਲੰਬੇ ਸਮੇਂ ਤੋਂ ਕਿਸਾਨੀ ਬਿੱਲਾਂ ਖਿਲਾਫ ਲੜ ਰਹੇ ਕਿਸਾਨ ਸੰਘਰਸ਼ ਦੀ ਰਾਹ 'ਤੇ ਡਟੇ ਹੋਏ ਹਨ। ਉਥੇ ਹੀ ਇਸ ਮੌਕੇ ਸੂਬੇ 'ਚ ਰੇਲ ਆਵਾਜਾਈ ਬੰਦ ਹੋਣ ਕਾਰਨ ਆਮ ਵਰਗ ਤੋਂ ਲੈਕੇ ਹਰ ਇਕ ਉਤੇ ਇਸ ਦਾ ਅਸਰ ਵੇਖਣ ਨੂੰ ਮਿਲ ਰਿਹਾ ਹੈ। ਜਿਥੇ ਰੇਲ ਬੰਦ ਦੇ ਚੱਲਦਿਆਂ ਪੰਜਾਬ ਦਾ ਸੰਪਰਕ ਦੇਸ਼ ਦੇ ਹੋਰਨਾਂ ਸੂਬਿਆਂ ਨਾਲੋਂ ਟੁੱਟਣ ਕਾਰਨ ਜਨ ਜੀਵਨ ਪ੍ਰਭਾਵਿਤ ਹੋ ਰਿਹਾ ਹੈ।ਇਸ ਸਭ ਦੇ ਵਿਚਾਲੇ ਤਿਉਹਾਰਾਂ ਦਾ ਸੀਜ਼ਨ ਵੀ ਚਲ ਰਿਹਾ ਹੈ ਜਿਸ ਨਾਲ ਗਰੀਬ ਤੋਂ ਲੈਕੇ ਅਮੀਰ ਆਦਮੀ ਤੱਕ ਪ੍ਰਭਾਵਿਤ ਹੈ |
ਸਾਲ ਵਿਚ ਦੀਵਾਲੀ ਤੇ ਵਿਸਾਖੀ ਦੇ ਤਿਉਹਾਰ ਮੌਕੇ ਜ਼ਿਆਦਾਤਰ ਫੌਜ਼ੀਆਂ ਨੂੰ ਘਰ ਜਾਣ ਲਈ ਕੁੱਝ ਦਿਨਾਂ ਦੀ ਹੀ ਛੁੱਟੀ ਮਿਲਦੀ ਹੈ। ਪ੍ਰੰਤੂ ਇਸ ਵਾਰ ਪੰਜਾਬ ਵਿਚ ਰੇਲ ਸੰਪਰਕ ਬੰਦ ਹੋਣ ਕਾਰਨ ਫੌਜ਼ੀਆਂ ਨੂੰ ਵੀ ਮੁਸ਼ਕਲਾਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਇੱਥੋਂ ਤੱਕ ਕਿ ਕਈਆਂ ਨੇ ਤਾਂ ਆਪਣੀਆਂ ਛੁੱਟੀਆਂ ਤੱਕ ਮੁਲਤਵੀ ਕਰ ਦਿੱਤੀਆਂ ਹਨ ਕਿਉਂਕਿ ਛੁੱਟੀ ਦਾ ਜ਼ਿਆਦਾ ਸਮਾਂ ਤਾਂ ਸਫ਼ਰ ਵਿਚ ਹੀ ਲੰਘ ਜਾਵੇਗਾ । ਫੌਜ਼ੀ ਜੀਤ ਸਿੰਘ ਦਾ ਕਹਿਣਾ ਹੈ ਕਿ ਦੀਵਾਲੀ ਤੇ ਵਿਸਾਖੀ ਮੌਕੇ ਛੁੱਟੀ ਜਾਣ ਲਈ ਫੌਜ਼ੀਆਂ ਨੂੰ ਫਰੀ ਰੇਲਵੇ ਪਾਸ ਜਾਰੀ ਹੁੰਦੇ ਹਨ ਜਿਨ੍ਹਾਂ ਰਾਹੀਂ ਉਹ ਦੇਸ਼ ਦੇ ਹੋਰਨਾਂ ਰਾਜਾਂ ਵਿਚੋਂ ਰੇਲਵੇ ਸਫ਼ਰ ਕਰਕੇ ਪੰਜਾਬ ਆਪਣੇ ਘਰ ਪਹੁੰਚਦੇ ਹਨ|
ਪਰ ਹੁਣ ਪੰਜਾਬ 'ਚ ਇਹਨਾਂ ਹਲਾਤਾਂ ਨੂੰ ਦੇਖਦੇ ਹੋਏ ਕਈ ਫੌਜੀ ਵੀਰਾਂ ਨੂੰ ਆਪਣੀ ਛੁਟੀ ਦਾ ਬਲੀਦਾਨ ਦੇਣਾ ਪੈ ਰਿਹਾ ਹੈ।ਖੇਤੀ ਬਿੱਲਾਂ ਨੂੰ ਲੈ ਕੇ ਕੇਂਦਰ ਸਰਕਾਰ ਦੇ ਅੜੀਅਲ ਰਵੱਈਏ ਅਤੇ ਕਿਸਾਨਾਂ ਦੇ ਸੰਘਰਸ਼ ਦੇ ਚੱਲਦਿਆਂ ਪੰਜਾਬ ਦਾ ਰੇਲ ਸੰਪਰਕ ਪੂਰੇ ਦੇਸ਼ ਨਾਲੋਂ ਟੁੱਟਿਆ ਪਿਆ ਹੈ।ਰੇਲਾਂ ਬੰਦ ਹੋਣ ਦਾ ਅਸਰ ਪੰਜਾਬ ਦੇ ਹਰ ਵਰਗ ਉਤੇ ਪੈ ਰਿਹਾ ਹੈ ਅਤੇ ਇਸ ਵਾਰ ਪੰਜਾਬ ਦੇ ਲੋਕ ਕਾਲੀ ਦੀਵਾਲੀ ਮਨਾਉਣ ਲਈ ਮਜ਼ਬੂਰ ਹਨ।
solider
