PTC News Desk : ਅਮਰੀਕਾ ਦੇ ਵੈਸਟਮੋਰਲੈਂਡ ਕਾਉਂਟੀ ਵਿੱਚ ਜ਼ਿਲ੍ਹਾ ਅਟਾਰਨੀ ਨੇ ਇਸ ਸਾਲ ਦੇ ਸ਼ੁਰੂ ਵਿੱਚ ਇੱਕ 4 ਸਾਲ ਦੇ ਲੜਕੇ ਵੱਲੋਂ ਗੋਲੀ ਚਲਾਉਣ ਅਤੇ ਜ਼ਖਮੀ ਹੋਣ ਦੇ ਮਾਮਲੇ 'ਚ ਲੜਕੇ ਦੇ ਮਾਪਿਆਂ ਲੌਰਾ ਸਟੀਲ ਅਤੇ ਮਾਈਕਲ ਲਿਨ ਦੇ ਖਿਲਾਫ ਇਲਜ਼ਾਮ ਦਾਇਰ ਕੀਤੇ ਹਨ।
ਦੋਵਾਂ 'ਤੇ ਬੱਚਿਆਂ ਦੀ ਭਲਾਈ ਨੂੰ ਖ਼ਤਰੇ ਵਿਚ ਪਾਉਣ ਅਤੇ ਲਾਪਰਵਾਹੀ ਨਾਲ ਕਿਸੇ ਹੋਰ ਵਿਅਕਤੀ ਨੂੰ ਖ਼ਤਰੇ ਵਿਚ ਪਾਉਣ ਦਾ ਇਲਜ਼ਾਮ ਹੈ। ਘਟਨਾ ਦੀ ਡੂੰਘਾਈ ਨਾਲ ਜਾਂਚ ਤੋਂ ਬਾਅਦ ਇਹ ਗੱਲ ਸਾਹਮਣੇ ਆਈ ਹੈ।
'ਸ਼ੂਟਿੰਗ ਦੁਖਦਾਈ ਅਤੇ ਅਸਵੀਕਾਰਨਯੋਗ ਸੀ'
ਜ਼ਿਲ੍ਹਾ ਅਟਾਰਨੀ ਨਿਕੋਲ ਜ਼ਿਕਰੇਲੀ ਨੇ ਇੱਕ ਬਿਆਨ ਵਿੱਚ ਕਿਹਾ, "ਇਹ ਇੱਕ ਦੁਖਦਾਈ ਅਤੇ ਅਸਵੀਕਾਰਨਯੋਗ ਗੋਲੀਬਾਰੀ ਸੀ ਜਿਸ ਨੂੰ ਰੋਕਿਆ ਜਾ ਸਕਦਾ ਸੀ। ਇਸ ਤਰ੍ਹਾਂ ਦੀਆਂ ਘਟਨਾਵਾਂ ਨੂੰ ਵਾਪਰਨ ਤੋਂ ਰੋਕਣ ਦਾ ਇੱਕ ਸਰਲ ਤਰੀਕਾ ਹੈ ਅਤੇ ਇਹ ਹੈ ਕਿ ਤੁਹਾਨੂੰ ਆਪਣੇ ਹਥਿਆਰਾਂ ਨੂੰ ਸੁਰੱਖਿਅਤ ਥਾਵਾਂ 'ਤੇ ਰੱਖਣਾ ਚਾਹੀਦਾ ਹੈ।
ਲੜਕਾ ਅਜੇ ਵੀ ਪ੍ਰਾਪਤ ਕਰ ਰਿਹਾ ਡਾਕਟਰੀ ਦੇਖਭਾਲ
ਚਾਰ ਸਾਲ ਦੇ ਰੌਨੀ ਲਿਨ ਨੇ 6 ਜੁਲਾਈ ਨੂੰ ਰੋਸਟ੍ਰਾਵਰ ਟਾਊਨਸ਼ਿਪ ਵਿੱਚ ਗੌਡੀਓ ਡਰਾਈਵ 'ਤੇ ਆਪਣੇ ਘਰ ਵਿੱਚ ਅਚਾਨਕ ਇੱਕ ਹੈਂਡਗਨ ਨਾਲ ਆਪਣੇ ਆਪ ਨੂੰ ਗੋਲੀ ਮਾਰਨ ਤੋਂ ਬਾਅਦ ਹਸਪਤਾਲ ਲਿਜਾਇਆ ਗਿਆ ਸੀ। ਵੈਸਟਮੋਰਲੈਂਡ ਕਾਉਂਟੀ ਦੇ ਜ਼ਿਲ੍ਹਾ ਅਟਾਰਨੀ ਦੇ ਦਫ਼ਤਰ ਨੇ ਕਿਹਾ ਕਿ ਲੜਕਾ ਅਜੇ ਵੀ ਡਾਕਟਰੀ ਦੇਖਭਾਲ ਪ੍ਰਾਪਤ ਕਰ ਰਿਹਾ ਹੈ।
ਜ਼ਿਲ੍ਹਾ ਅਟਾਰਨੀ ਦਫ਼ਤਰ ਦੇ ਸਹਿਯੋਗ ਨਾਲ ਰੋਸਟਰੇਵਰ ਪੁਲਿਸ ਪਿਛਲੇ ਕਈ ਮਹੀਨਿਆਂ ਤੋਂ ਜਾਂਚ ਕਰ ਰਹੀ ਹੈ। ਕਈ ਇੰਟਰਵਿਊਆਂ ਤੋਂ ਬਾਅਦ ਜਾਸੂਸਾਂ ਨੂੰ ਪਤਾ ਲੱਗਿਆ ਕਿ ਹੈਂਡਗਨ ਘਰ ਦੇ ਇੱਕ ਬੈੱਡਰੂਮ ਵਿੱਚ ਫਰਸ਼ 'ਤੇ ਅਸੁਰੱਖਿਅਤ ਅਤੇ ਲੋਡ ਕੀਤੀ ਪਈ ਸੀ। ਪੁਲਿਸ ਨੇ ਪੁਸ਼ਟੀ ਕੀਤੀ ਕਿ ਗੋਲੀਬਾਰੀ ਦੇ ਸਮੇਂ ਸਟੀਲ ਅਤੇ ਲਿਨ ਦੋਵੇਂ ਘਰ ਸਨ ਅਤੇ ਉਨ੍ਹਾਂ ਨੇ ਬੈੱਡਰੂਮ ਤੋਂ ਗੋਲੀ ਚੱਲਣ ਦੀ ਆਵਾਜ਼ ਸੁਣੀ ਅਤੇ ਬੱਚੇ ਨੂੰ ਹੈਂਡਗਨ ਨਾਲ ਖੂਨ ਨਾਲ ਲਥਪਥ ਫਰਸ਼ 'ਤੇ ਪਿਆ ਦੇਖਿਆ।
ਜ਼ਿਲ੍ਹਾ ਅਟਾਰਨੀ ਜ਼ਿਕਰੇਲੀ ਨੇ ਕਿਹਾ ਕਿ ਛੋਟੇ ਲੜਕੇ ਨੂੰ ਸੰਭਾਵਤ ਤੌਰ 'ਤੇ ਆਪਣੀ ਬਾਕੀ ਦੀ ਜ਼ਿੰਦਗੀ ਇਸ ਦਰਦਨਾਕ ਯਾਦ ਨਾਲ ਰਹਿਣਾ ਪਏਗਾ। ਹਾਲਾਂਕਿ ਅਸੀਂ ਜਾਣਦੇ ਹਾਂ ਕਿ ਅਸੀਂ ਹਰ ਅਪਰਾਧ ਨੂੰ ਨਹੀਂ ਰੋਕ ਸਕਦੇ ਪਰ ਸਾਨੂੰ ਆਪਣੇ ਸਭ ਤੋਂ ਕਮਜ਼ੋਰ ਲੋਕਾਂ ਦੀ ਰੱਖਿਆ ਕਰਨ ਦਾ ਤਰੀਕਾ ਤਾਂ ਲੱਭਣਾ ਹੀ ਹੋਵੇਗਾ।