ਚੰਡੀਗੜ੍ਹ ਨਿਗਮ ਦੇ ਐੱਸਡੀਓ ਤੇ ਐਕਸੀਅਨ ਵਿਚਾਲੇ ਹੋਈ ਝੜਪ; ਇਕ ਮੁਅੱਤਲ
ਚੰਡੀਗੜ੍ਹ : ਚੰਡੀਗੜ੍ਹ ਨਗਰ ਨਿਗਮ ਦੇ ਦੋ ਵੱਡੇ ਅਫਸਰ ਅੱਜ ਆਪਸ ਵਿੱਚ ਭਿੜ ਪਏ। ਇਸ ਨਾਲ ਦਫਤਰ ਵਿੱਚ ਇਕਦਮ ਭੱਜਦੌੜ ਵਾਲਾ ਮਾਹੌਲ ਬਣ ਗਿਆ। ਐਸਡੀਓ ਅਰਜੁਨ ਪੁਰੀ ਤੇ ਐਕਸੀਅਨ ਅਨੁਰਾਗ ਬਿਸ਼ਨੋਈ ਵਿਚਕਾਰ ਝੜਪ ਹੋ ਗਈ। ਦੋਵਾਂ ਦਰਮਿਆਨ ਹੋਇਆ ਵਿਵਾਦ ਸੈਕਟਰ-17 ਥਾਣੇ ਤੱਕ ਪਹੁੰਚ ਗਿਆ ਹੈ। ਘਟਨਾ ਦੀ ਸੂਚਨਾ ਮਿਲਦਿਆਂ ਹੀ ਪੀਸੀਆਰ ਟੀਮ ਮੌਕੇ ਉਤੇ ਪੁੱਜੀ ਅਤੇ ਬਿਆਨ ਦਰਜ ਕੀਤੇ ਗਏ। ਵਿਭਾਗ ਨੇ ਹਰਕਤ ਵਿੱਚ ਆਉਂਦੇ ਹੀ ਐਸਡੀਓ ਨੂੰ ਮੁਅੱਤਲ ਕਰ ਦਿੱਤਾ ਹੈ।
ਝਗੜੇ ਵਿੱਚ ਐਕਸੀਅਨ ਦੀ ਕਮੀਜ਼ ਫਟ ਗਈ। ਪੁਲਿਸ ਨੇ ਦੋਵਾਂ ਅਧਿਕਾਰੀਆਂ ਦਾ ਮੈਡੀਕਲ ਕਰਵਾਇਆ। ਫਿਲਹਾਲ ਪੁਲਿਸ ਦਾ ਕਹਿਣਾ ਹੈ ਕਿ ਐਕਸੀਅਨ ਦੀ ਸ਼ਿਕਾਇਤ ਲਿਖਤੀ ਰੂਪ ਵਿੱਚ ਨਹੀਂ ਮਿਲੀ ਹੈ। ਅਜਿਹੇ 'ਚ ਅਜੇ ਤੱਕ ਐੱਸਡੀਓ 'ਤੇ ਐੱਫ.ਆਈ.ਆਰ ਦਰਜ ਨਹੀਂ ਹੋਈ ਹੈ। ਸੂਤਰਾਂ ਤੋਂ ਮਿਲੀ ਜਾਣਕਾਰੀ ਅਨੁਸਾਰ ਐੱਸ.ਡੀ.ਓ ਅਰਜੁਨ ਪੁਰੀ ਐਕਸੀਅਨ ਅਨੁਰਾਗ ਬਿਸ਼ਨੋਈ ਦੇ ਤੀਜੀ ਮੰਜ਼ਿਲ 'ਤੇ ਸਥਿਤ ਦਫਤਰ 'ਚ ਆਏ ਸਨ। ਜਿਵੇਂ ਹੀ ਉਹ ਪਹੁੰਚੇ, XEN ਅਤੇ ਉਨ੍ਹਾਂ ਵਿਚਕਾਰ ਬਹਿਸ ਹੋ ਗਈ। ਐਸਡੀਓ ਨੇ ਐਕਸੀਅਨ ਨੂੰ ਥੱਪੜ ਤੇ ਮੁੱਕਾ ਮਾਰਿਆ। ਐਕਸੀਅਨ ਆਪਣੀ ਕੁਰਸੀ ਤੋਂ ਹੇਠਾਂ ਡਿੱਗ ਪਿਆ। ਰੌਲਾ ਸੁਣ ਕੇ ਸਟਾਫ਼ ਭੱਜ ਕੇ ਆਇਆ। ਇਸ ਤੋਂ ਬਾਅਦ ਐਕਸੀਅਨ ਪਹਿਲੇ ਕਮਰੇ ਤੋਂ ਬਾਹਰ ਭੱਜਿਆ ਅਤੇ ਐਸਡੀਓ ਉਸ ਦੇ ਪਿੱਛੇ ਭੱਜਿਆ।
ਇਹ ਵੀ ਪੜ੍ਹੋ : ਬੱਸਾਂ ਚਲਾਉਣ ਲਈ ਟਾਈਮ ਅਲਾਟ ਨਾ ਹੋਣ 'ਤੇ ਆਰਟੀਓ ਦਫ਼ਤਰ ਦਾ ਕੀਤਾ ਘਿਰਾਓ
ਐਸਡੀਓ ਦੀ ਡਿਊਟੀ ਮਹਿਲਾ ਭਵਨ ਸੈਕਟਰ-38 ਵਿੱਚ ਹੈ। ਇਸ ਤੋਂ ਪਹਿਲਾਂ ਉਹ ਮਨੀਮਾਜਰਾ ਵਿੱਚ ਤਾਇਨਾਤ ਸਨ। ਉਹ ਮਹਿਲਾ ਭਵਨ ਸਥਿਤ ਦਫ਼ਤਰ ਤੋਂ ਸਵੇਰੇ 11 ਵਜੇ ਦੇ ਕਰੀਬ ਨਿਗਮ ਦਫ਼ਤਰ ਪੁੱਜੇ ਸਨ। ਇਸ ਤੋਂ ਬਾਅਦ ਇਹ ਘਟਨਾ ਵਾਪਰੀ। ਨੀਲਮ ਚੌਕੀ ਦੇ ਇੰਚਾਰਜ ਵਿਵੇਕ ਕੁਮਾਰ ਦਾ ਕਹਿਣਾ ਹੈ ਕਿ ਫਿਲਹਾਲ ਉਹ ਪੁੱਛਗਿੱਛ ਕਰ ਰਹੇ ਹਨ। ਝਗੜੇ ਵਿਚ ਸ਼ਾਮਲ ਦੋਵੇਂ ਧਿਰਾਂ ਫਿਲਹਾਲ ਖੁੱਲ੍ਹ ਕੇ ਸਾਹਮਣੇ ਨਹੀਂ ਆ ਰਹੀਆਂ ਹਨ।
ਇਸ ਸਬੰਧੀ ਜਦੋਂ ਐਕਸੀਅਨ ਨਾਲ ਗੱਲ ਕਰਨ ਦੀ ਕੋਸ਼ਿਸ਼ ਕੀਤੀ ਤਾਂ ਉਨ੍ਹਾਂ ਨੇ ਕੁਝ ਵੀ ਕਹਿਣ ਤੋਂ ਇਨਕਾਰ ਕਰ ਦਿੱਤਾ। ਇਸ ਦੇ ਨਾਲ ਹੀ ਨਿਗਮ ਦਾ ਕੋਈ ਵੀ ਵੱਡਾ ਅਧਿਕਾਰੀ ਇਸ ਮਾਮਲੇ ਵਿੱਚ ਖੁੱਲ੍ਹ ਕੇ ਨਹੀਂ ਬੋਲ ਰਿਹਾ। ਉਧਰ, ਚੰਡੀਗੜ੍ਹ ਨਗਰ ਨਿਗਮ ਦੀ ਮੇਅਰ ਸਰਬਜੀਤ ਕੌਰ ਨੇ ਇਸ ਘਟਨਾ ਦੀ ਪੁਸ਼ਟੀ ਕਰਦਿਆਂ ਕਿਹਾ ਹੈ ਕਿ ਘਟਨਾ 'ਚ ਇਕ ਅਧਿਕਾਰੀ ਦੇ ਕੱਪੜੇ ਵੀ ਫਟ ਗਏ ਹਨ। ਘਟਨਾ ਵੇਲੇ ਉਹ ਦਫ਼ਤਰ ਵਿੱਚ ਨਹੀਂ ਸੀ।
-PTC News