Hemkunt Sahib Accident Case - ਹੇਮਕੁੰਟ ਸਾਹਿਬ ਯਾਤਰਾ ਦੌਰਾਨ 7 ਲੋਕਾਂ ਦੀ ਮੌਤ ਦੇ ਮਾਮਲੇ ਚ ਪਰਿਵਾਰਾਂ ਨੂੰ ਮਿਲੇਗਾ 4.20 ਕਰੋੜ ਰੁਪਏ ਮੁਆਵਜ਼ਾ

Hemkunt Sahib Accident Case : ਹੇਮਕੁੰਟ ਸਾਹਿਬ ਯਾਤਰਾ ਦੌਰਾਨ 7 ਲੋਕਾਂ ਦੀ ਮੌਤ ਦੇ ਮਾਮਲੇ 'ਚ ਪੀੜਤ ਪਰਿਵਾਰਾਂ ਨੂੰ 4.20 ਕਰੋੜ ਰੁਪਏ ਦਾ ਮੁਆਵਜ਼ਾ ਦਿੱਤਾ ਜਾਵੇਗਾ। ਦੱਸ ਦਈਏ ਕਿ 6 ਸਾਲ ਪਹਿਲਾਂ ਸ੍ਰੀ ਹੇਮਕੁੰਟ ਸਾਹਿਬ ਦੀ ਯਾਤਰਾ ਦੌਰਾਨ, 28 ਸਤੰਬਰ, 2019 ਨੂੰ, ਟ੍ਰਾਈਸਿਟੀ ਦੇ 7 ਲੋਕਾਂ ਦੇ ਇੱਕ ਟੈਂਪੂ ਟ੍ਰੈਵਲ ‘ਤੇ ਚੱਟਾਨ ਡਿੱਗਣ ਕਾਰਨ ਮੌਤ ਹੋ ਗਈ ਸੀ।

ਚੰਡੀਗੜ੍ਹ ਮੋਟਰ ਐਕਸੀਡੈਂਟ ਕਲੇਮ ਟ੍ਰਿਬਿਊਨਲ ਨੇ ਜਾਰੀ ਕੀਤੇ ਹੁਕਮ

ਇਸ ਮਾਮਲੇ ਵਿੱਚ, ਚੰਡੀਗੜ੍ਹ ਮੋਟਰ ਐਕਸੀਡੈਂਟ ਕਲੇਮ ਟ੍ਰਿਬਿਊਨਲ ਨੇ ਪੰਜ ਮ੍ਰਿਤਕਾਂ ਦੇ ਪਰਿਵਾਰਾਂ ਨੂੰ 4.20 ਕਰੋੜ ਰੁਪਏ ਦਾ ਮੁਆਵਜ਼ਾ ਦੇਣ ਦੇ ਹੁਕਮ ਜਾਰੀ ਕੀਤੇ ਹਨ। ਸਾਰਿਆਂ ਨੇ ਇਸ ਮਾਮਲੇ ਵਿੱਚ ਵੱਖ-ਵੱਖ ਕੇਸ ਦਾਇਰ ਕੀਤੇ ਸਨ।

ਕਿੰਨਾ-ਕਿੰਨਾ ਮਿਲੇਗਾ ਮੁਆਵਜ਼ਾ

ਸਭ ਤੋਂ ਵੱਧ ਮੁਆਵਜ਼ਾ ਖਰੜ ਨਿਵਾਸੀ ਤੇਜਿੰਦਰ ਸਿੰਘ ਨੂੰ ਦਿੱਤਾ ਜਾਵੇਗਾ। ਉਹ ਓਮੈਕਸ ਕੰਪਨੀ ਵਿੱਚ ਤਾਇਨਾਤ ਸੀ। ਉਸਦੀ ਤਨਖਾਹ 2.26 ਲੱਖ ਰੁਪਏ ਪ੍ਰਤੀ ਮਹੀਨਾ ਸੀ। ਹਾਦਸੇ ਸਮੇਂ ਉਹ 55 ਸਾਲ ਦੇ ਸਨ। ਅਜਿਹੀ ਸਥਿਤੀ ਵਿੱਚ, ਪੂਰੀ ਸਥਿਤੀ ਨੂੰ ਧਿਆਨ ਵਿੱਚ ਰੱਖਦੇ ਹੋਏ, ਟ੍ਰਿਬਿਊਨਲ ਨੇ 1.20 ਕਰੋੜ ਰੁਪਏ ਦਾ ਮੁਆਵਜ਼ਾ ਦੇਣ ਦਾ ਹੁਕਮ ਦਿੱਤਾ ਹੈ। ਬਾਕੀ ਮ੍ਰਿਤਕਾਂ ਦੇ ਪਰਿਵਾਰਾਂ ਨੂੰ 60 ਲੱਖ ਤੋਂ 80 ਲੱਖ ਰੁਪਏ ਦੇ ਵਿਚਕਾਰ ਭੁਗਤਾਨ ਕੀਤਾ ਜਾਵੇਗਾ।

ਪਿੰਜੌਰ ਪੰਚਕੂਲਾ ਦੇ ਰਮੇਸ਼ ਕੁਮਾਰ (44) ਨੂੰ 70.47 ਲੱਖ ਰੁਪਏ, ਪਿੰਡ ਜਯੰਤੀ ਮਾਜਰੀ ਮੋਹਾਲੀ ਦੇ ਗੁਰਦੀਪ ਸਿੰਘ (35) ਨੂੰ 66.73 ਲੱਖ ਰੁਪਏ, ਨਯਾਗਾਓਂ ਮੋਹਾਲੀ ਦੇ ਸੁਰਿੰਦਰ ਕੁਮਾਰ (41) ਨੂੰ 88.80 ਲੱਖ ਰੁਪਏ ਅਤੇ ਪਿੰਡ ਸਰਸੈਣੀ ਮੋਹਾਲੀ ਦੇ ਗੁਰਪ੍ਰੀਤ ਸਿੰਘ (33) ਨੂੰ 73.93 ਲੱਖ ਰੁਪਏ ਮਿਲਣਗੇ।

ਟੈਂਪੂ ਟਰੈਵਲ 'ਤੇ ਚੱਟਾਨ ਡਿੱਗਣ ਕਾਰਨ ਵਾਪਰਿਆ ਸੀ ਹਾਦਸਾ

ਇਸ ਮਾਮਲੇ ਦੇ ਵਕੀਲ ਨੇ ਕਿਹਾ ਕਿ 2019 ਵਿੱਚ ਕੁਝ ਦੋਸਤ ਸ੍ਰੀ ਹੇਮਕੁੰਟ ਸਾਹਿਬ ਮੱਥਾ ਟੇਕਣ ਗਏ ਸਨ। ਉਨ੍ਹਾਂ ਨੇ ਇੱਕ ਟੈਂਪੋ ਟਰੈਵਲਰ ਬੁੱਕ ਕੀਤੀ ਸੀ।ਰਿਸ਼ੀਕੇਸ਼ ਵਿੱਚ ਇੱਕ ਦਿਨ ਰਹਿਣ ਤੋਂ ਬਾਅਦ, ਉਹ 28 ਸਤੰਬਰ 2019 ਨੂੰ ਯਾਤਰਾ ‘ਤੇ ਨਿਕਲ ਪਏ। ਉਸ ਦਿਨ ਬਹੁਤ ਮੀਂਹ ਪੈ ਰਿਹਾ ਸੀ। ਰਸਤਾ ਵੀ ਬਹੁਤ ਖਰਾਬ ਸੀ। ਉਹ ਰਿਸ਼ੀਕੇਸ਼ ਤੋਂ 50 ਕਿਲੋਮੀਟਰ ਦੂਰ ਚਾਹ ਪੀਣ ਲਈ ਰੁਕਿਆ। ਇਸ ਤੋਂ ਬਾਅਦ ਸਫ਼ਰ ਦੌਰਾਨ ਇੱਕ ਵੱਡਾ ਪੱਥਰ ਉਨ੍ਹਾਂ ਦੀ ਗੱਡੀ ‘ਤੇ ਡਿੱਗ ਪਿਆ। ਇਸ ਹਾਦਸੇ ਵਿੱਚ ਡਰਾਈਵਰ ਸਮੇਤ ਸੱਤ ਲੋਕਾਂ ਦੀ ਮੌਤ ਹੋ ਗਈ, ਜਦੋਂ ਕਿ ਦੋ ਬਚ ਗਏ।