Bunty Aur Bubli : AI ਨੇ ਖੋਹੀ ਨੌਕਰੀ ਤਾਂ 18 ਸਾਲਾ ਮੁੰਡੇ ਅਤੇ ਕੁੜੀ ਨੇ ਮਿਲ ਕੇ ਜਵੈਲਰ ਦੇ ਮਾਰਿਆ ਡਾਕਾ, 16 ਲੱਖ ਦੇ ਗਹਿਣਿਆਂ ਸਮੇਤ ਕਾਬੂ

Bunty Aur Bubli : ਪੁਲਿਸ ਨੇ ਇੱਕ 18 ਸਾਲਾ ਗ੍ਰਾਫਿਕ ਡਿਜ਼ਾਈਨਰ ਅਤੇ ਉਸਦੇ ਦੋਸਤ ਨੂੰ ਇੱਕ ਗਹਿਣਿਆਂ ਦੀ ਦੁਕਾਨ ਤੋਂ 16 ਲੱਖ ਰੁਪਏ ਤੋਂ ਵੱਧ ਦੇ ਗਹਿਣੇ ਚੋਰੀ ਕਰਨ ਦੇ ਇਲਜ਼ਾਮ ਵਿੱਚ ਗ੍ਰਿਫ਼ਤਾਰ ਕੀਤਾ ਹੈ। ਫਿਲਮ "ਬੰਟੀ ਔਰ ਬਬਲੀ" ਤੋਂ ਪ੍ਰੇਰਿਤ ਹੋ ਕੇ, ਦੋਵਾਂ ਨੇ ਇਹ ਚੋਰੀ ਕੀਤੀ। ਪੁਲਿਸ ਨੇ ਚੋਰੀ ਕੀਤਾ ਸਾਰਾ ਸਮਾਨ ਬਰਾਮਦ ਕਰ ਲਿਆ ਹੈ।

18 ਸਾਲ ਦੀ ਉਮਰ ਦੇ ਹਨ ਦੋਵੇਂ ਮੁੰਡਾ ਤੇ ਕੁੜੀ

22 ਦਸੰਬਰ ਦੀ ਰਾਤ ਨੂੰ ਰਾਉ ਥਾਣਾ ਖੇਤਰ ਵਿੱਚ ਇੱਕ ਦੁਕਾਨ ਤੋਂ 16.17 ਲੱਖ ਰੁਪਏ ਦੇ ਸੋਨੇ, ਚਾਂਦੀ ਅਤੇ ਹੀਰੇ ਦੇ ਗਹਿਣੇ ਚੋਰੀ ਹੋ ਗਏ ਸਨ। ਪੁਲਿਸ ਨੇ ਇਸ ਮਾਮਲੇ ਦੇ ਸਬੰਧ ਵਿੱਚ ਇੱਕ ਨੌਜਵਾਨ ਮੁੰਡੇ ਤੇ ਕੁੜੀ ਨੂੰ ਗ੍ਰਿਫ਼ਤਾਰ ਕੀਤਾ ਹੈ। ਡਿਪਟੀ ਕਮਿਸ਼ਨਰ ਆਫ਼ ਪੁਲਿਸ (ਡੀਸੀਪੀ) ਸ਼੍ਰੀਕ੍ਰਿਸ਼ਨ ਲਾਲਚੰਦਾਨੀ ਨੇ ਦੱਸਿਆ ਕਿ ਦੋਵੇਂ 18 ਸਾਲ ਦੀ ਉਮਰ ਦੇ ਹਨ। ਮੁੰਡਾ ਗ੍ਰਾਫਿਕ ਡਿਜ਼ਾਈਨਰ ਹੈ ਅਤੇ ਕੁੜੀ NEET ਦੀ ਤਿਆਰੀ ਕਰ ਰਹੀ ਹੈ। ਦੋਵੇਂ ਇੱਕ-ਦੂਜੇ ਨੂੰ ਬਚਪਨ ਤੋਂ ਜਾਣਦੇ ਹਨ।

ਬੰਟੀ ਔਰ ਬਬਲੀ ਫਿਲਮ ਵੇਖ ਕੇ ਬਣਾਈ ਚੋਰੀ ਦੀ ਯੋਜਨਾ

ਡੀਸੀਪੀ ਨੇ ਦੱਸਿਆ ਕਿ ਪੁੱਛਗਿੱਛ ਦੌਰਾਨ, ਮੁੰਡੇ ਨੇ ਦੱਸਿਆ ਕਿ ਉਹ ਇੱਕ ਆਈਟੀ ਕੰਪਨੀ ਵਿੱਚ ਪਾਰਟ-ਟਾਈਮ ਗ੍ਰਾਫਿਕ ਡਿਜ਼ਾਈਨਰ ਸੀ, ਪਰ ਕੰਪਨੀ ਨੇ ਏਆਈ (Artificial Intelligence) ਤਕਨਾਲੋਜੀ ਅਪਣਾਈ, ਜਿਸਦੇ ਨਤੀਜੇ ਵਜੋਂ ਉਸਦੀ ਨੌਕਰੀ ਚਲੀ ਗਈ। ਇਸ ਨਾਲ ਉਸਨੂੰ ਵਿੱਤੀ ਮੁਸ਼ਕਲਾਂ ਦਾ ਸਾਹਮਣਾ ਕਰਨਾ ਪਿਆ। ਮੁਲਜ਼ਮ, ਜੋ ਆਰਥਿਕ ਤੌਰ 'ਤੇ ਕਮਜ਼ੋਰ ਪਰਿਵਾਰਾਂ ਤੋਂ ਹਨ, ਨੇ ਕਿਹਾ ਕਿ ਉਨ੍ਹਾਂ ਨੇ ਹਿੰਦੀ ਫਿਲਮ "ਬੰਟੀ ਔਰ ਬਬਲੀ" ਦੇਖਣ ਤੋਂ ਬਾਅਦ ਚੋਰੀ ਦੀ ਯੋਜਨਾ ਬਣਾਈ।

ਮਾਲ ਦੀ ਨਹੀਂ ਮਿਲ ਰਹੀ ਸੀ ਸਹੀ ਕੀਮਤ

ਚੋਰੀ ਤੋਂ ਬਾਅਦ ਦੋਵੇਂ ਭੱਜ ਗਏ ਅਤੇ ਭੋਪਾਲ ਵਿੱਚ ਫੜੇ ਗਏ। ਮੁਲਜ਼ਮਾਂ ਦਾ ਕਹਿਣਾ ਹੈ ਕਿ ਉਨ੍ਹਾਂ ਨੇ ਚੋਰੀ ਕੀਤੇ ਗਹਿਣੇ ਵੇਚਣ ਦੀ ਕੋਸ਼ਿਸ਼ ਕੀਤੀ, ਪਰ ਖਰੀਦਦਾਰਾਂ ਨੇ ਉਨ੍ਹਾਂ ਨੂੰ ਬੱਚੇ ਸਮਝ ਕੇ ਘੱਟ ਪੈਸੇ ਦੇਣ ਦੀ ਪੇਸ਼ਕਸ਼ ਕੀਤੀ, ਜਿਸ 'ਤੇ ਉਨ੍ਹਾਂ ਨੇ ਕ੍ਰਿਸਮਸ ਦੀਆਂ ਛੁੱਟੀਆਂ ਤੋਂ ਬਾਅਦ ਗਹਿਣੇ ਵੇਚਣ ਦਾ ਫੈਸਲਾ ਕੀਤਾ ਸੀ।