ਭਾਰਤੀ ਮੂਲ ਦੀ ਔਰਤ ਨੇ ਨਵਜੰਮੇ ਬੱਚੇ ਨੂੰ ਖਿੜਕੀ ਤੋਂ ਬਾਹਰ ਸੁੱਟਿਆ , ਕਿਹਾ - ਮੈਨੂੰ ਨਹੀਂ ਪਤਾ ਸੀ ਕੀ ਕਰਨਾ ਹੈ, ਮੈਨੂੰ ਮਾਫ ਕਰਨਾ!

ਦਰਅਸਲ ਨਿਊਯਾਰਕ ਦੇ ਕੁਈਨਜ਼ ਖੇਤਰ ਦੀ ਰਹਿਣ ਵਾਲੀ ਸਬਿਤਾ ਡੁਕਰਮ ਨੇ ਸ਼ਨੀਵਾਰ ਨੂੰ ਨਹਾਉਂਦੇ ਸਮੇਂ ਇਕ ਬੱਚੇ ਨੂੰ ਜਨਮ ਦਿੱਤਾ, ਜਿਸ ਤੋਂ ਬਾਅਦ ਉਹ ਘਬਰਾ ਗਈ ਅਤੇ ਬੱਚੇ ਨੂੰ ਖਿੜਕੀ ਤੋਂ ਬਾਹਰ ਇਕ ਗਲੀ ਵਿਚ ਸੁੱਟ ਦਿੱਤਾ।

ਦੱਸਣਯੋਗ ਹੈ ਕਿ ਬੱਚੇ ਦੇ ਜਨਮ ਤੋਂ ਬਾਅਦ ਵਿਚ, ਡੁਕਰਮ ਨੇ ਕਿਸੇ ਨੂੰ ਦੱਸਣ ਦੀ ਬਜਾਏ, ਬਾਥਰੂਮ ਸਾਫ਼ ਕਰ ਦਿੱਤਾ, ਸ਼ਾਵਰ ਲਿਆ ਅਤੇ ਬਿਸਤਰ 'ਤੇ ਜਾ ਕੇ ਸੌਂ ਗਈ । ਉਸਨੇ ਦੱਸਿਆ “ ਮੈਂ ਬਾਥਰੂਮ ਗਈ, ਅਤੇ ਪਤਾ ਨਹੀਂ ਮੈਂ ਕਦੋਂ ਬੱਚੇ ਨੂੰ ਜਨਮ ਦੇ ਦਿੱਤਾ। ਮੈਨੂੰ ਨਹੀਂ ਪਤਾ ਸੀ ਕੀ ਕਰਨਾ ਹੈ, ਮੈਨੂੰ ਮਾਫ ਕਰਨਾ! ਮੈਂ ਘਬਰਾ ਕੇ ਬਾਥਰੂਮ ਦੀ ਖਿੜਕੀ 'ਚੋਂ ਬੱਚੇ ਨੂੰ ਬਾਹਰ ਸੁੱਟ ਦਿੱਤਾ। ਮੈਂ ਬੱਚੇ ਦੀ ਜਾਂਚ ਨਹੀਂ ਕੀਤੀ, ਡੁਕਰਮ ਨੇ ਜਾਂਚ ਕਰਤਾਵਾਂ ਨੂੰ ਕਿਹਾ, ”ਮੈਂ ਆਪਣੇ ਕੱਪੜੇ ਬਾਥਰੂਮ ਵਿੱਚ ਲਾਂਡਰੀ ਬੈਗ ਵਿੱਚ ਪਾ ਦਿੱਤੇ, ਮੈਂ ਸ਼ਾਵਰ ਲਿਆ ਅਤੇ ਸੌਂ ਗਈ। ਡੁਕਰਮ ਨੇ ਦੱਸਿਆ ਕਿ ਉਸਨੇ ਬਾਥਰੂਮ ਵਿੱਚੋਂ ਕੈਚੀ ਨਾਲ ਬੱਚੇ ਦਾ ਨਾੜੂ ਕੱਟਿਆ।

ਰਿਪੋਰਟ ਮੁਤਾਬਕ ਖਿੜਕੀ ਤੋਂ ਬਾਹਰ ਡਿੱਗੇ ਬੱਚੇ ਨੂੰ ਗੁਆਂਢੀਆਂ ਨੇ ਗੰਭੀਰ ਹਾਲਤ ਵਿਚ ਬੱਚਿਆਂ ਦੇ ਹਸਪਤਾਲ ਪਹੁੰਚਾਇਆ, ਜਿਨ੍ਹਾਂ ਨੇ ਉਸ ਦੀ ਆਵਾਜ਼ ਸੁਣਦਿਆਂ ਹੀ ਬੱਚੇ ਨੂੰ ਲੱਭ ਲਿਆ ਅਤੇ ਬਾਅਦ ਵਿਚ ਪੁਲਿਸ ਨੂੰ ਵੀ ਸੂਚਿਤ ਕੀਤਾ।

ਨਵਜੰਮੇ ਬੱਚੇ ਨੂੰ ਭਾਵੇਂ ਬਚਾ ਲਿਆ ਗਿਆ ਹੈ ਪਰ ਉਸਦੀ ਹਾਲਤ ਕਾਫ਼ੀ ਗੰਭੀਰ ਦੱਸੀ ਜਾ ਰਹੀ ਹੈ, ਕਿਹਾ ਜਾ ਰਿਹਾ ਹੈ ਕਿ ਉਸਨੂੰ ਕਾਫ਼ੀ ਸੱਟਾਂ ਲੱਗੀਆਂ ਸਨ। ਦੱਸ ਦੇਈਏ ਕਿ ਔਰਤ 'ਤੇ ਹੱਤਿਆ ਦੀ ਕੋਸ਼ਿਸ਼ ਦਾ ਮੁਕੱਦਮਾ ਦਰਜ ਕਰ ਲਿਆ ਗਿਆ ਹੈ ਅਤੇ ਅਗਲੇਰੀ ਕਾਰਵਾਈ ਜਾਰੀ ਹੈ।