Google And Apple ਸਣੇ 18 ਅਮਰੀਕੀ ਕੰਪਨੀਆਂ ਖਤਰੇ ’ਚ; ਈਰਾਨ ਨੇ ਦਿੱਤੀ ਹਮਲਾ ਕਰਨ ਦੀ ਧਮਕੀ

ਮੱਧ ਪੂਰਬ ਵਿੱਚ ਚੱਲ ਰਹੀ ਜੰਗ ਦੌਰਾਨ ਤਣਾਅ ਉਦੋਂ ਵਧ ਗਿਆ ਜਦੋਂ ਈਰਾਨ ਦੀ ਫੌਜ, ਇਸਲਾਮਿਕ ਰੈਵੋਲਿਊਸ਼ਨਰੀ ਗਾਰਡ ਕੋਰ (IRGC) ਨੇ ਮੰਗਲਵਾਰ ਨੂੰ ਇੱਕ ਧਮਕੀ ਭਰਿਆ ਬਿਆਨ ਜਾਰੀ ਕੀਤਾ, ਜਿਸ ਵਿੱਚ ਕਿਹਾ ਗਿਆ ਕਿ ਜੇਕਰ ਈਰਾਨੀ ਨੇਤਾਵਾਂ ਨੂੰ ਨਿਸ਼ਾਨਾ ਬਣਾਇਆ ਗਿਆ ਅਤੇ ਉਨ੍ਹਾਂ ਦੀ ਹੱਤਿਆ ਕੀਤੀ ਗਈ ਤਾਂ ਉਹ 1 ਅਪ੍ਰੈਲ ਤੋਂ ਅਮਰੀਕੀ ਕੰਪਨੀਆਂ ਨੂੰ ਨਿਸ਼ਾਨਾ ਬਣਾਏਗਾ।

ਇਸਲਾਮਿਕ ਰੈਵੋਲਿਊਸ਼ਨਰੀ ਗਾਰਡ ਕੋਰ (IRGC) ਨੇ ਆਪਣੀ ਚਿਤਾਵਨੀ ਵਿੱਚ ਕਈ ਵੱਡੀਆਂ ਕੰਪਨੀਆਂ ਦਾ ਨਾਮ ਲਿਆ ਹੈ, ਜਿਨ੍ਹਾਂ ਵਿੱਚ ਮਾਈਕ੍ਰੋਸਾਫਟ, ਗੂਗਲ, ​​ਐਪਲ, ਇੰਟੇਲ, ਆਈਬੀਐਮ, ਟੇਸਲਾ ਅਤੇ ਬੋਇੰਗ ਸ਼ਾਮਲ ਹਨ। ਹੋਰ ਪ੍ਰਮੁੱਖ ਕੰਪਨੀਆਂ ਵਿੱਚ ਮੈਟਾ ਪਲੇਟਫਾਰਮ, ਓਰੇਕਲ, ਸਿਸਕੋ, ਡੈਲ ਟੈਕਨਾਲੋਜੀ ਅਤੇ ਜੇਪੀ ਮੋਰਗਨ ਚੇਜ਼ ਸ਼ਾਮਲ ਹਨ। 

ਇਸਲਾਮਿਕ ਰੈਵੋਲਿਊਸ਼ਨਰੀ ਗਾਰਡ ਕੋਰ (IRGC) ਨੇ ਕਿਹਾ ਕਿ ਹਰ ਅੱਤਵਾਦੀ ਕਾਰਵਾਈ ਦੇ ਜਵਾਬ ਵਿੱਚ ਇਨ੍ਹਾਂ ਕੰਪਨੀਆਂ ਦੀਆਂ ਇਕਾਈਆਂ ਨੂੰ ਤਬਾਹ ਕਰ ਦਿੱਤਾ ਜਾਵੇਗਾ। ਇਸਨੇ ਆਪਣੇ ਕਰਮਚਾਰੀਆਂ ਨੂੰ ਤੁਰੰਤ ਆਪਣੇ ਕੰਮ ਵਾਲੇ ਸਥਾਨ ਛੱਡਣ ਦੀ ਚੇਤਾਵਨੀ ਵੀ ਦਿੱਤੀ। ਇਹ ਧਮਕੀ 1 ਅਪ੍ਰੈਲ ਨੂੰ ਤਹਿਰਾਨ ਦੇ ਸਮੇਂ ਅਨੁਸਾਰ ਰਾਤ 8 ਵਜੇ (ਭਾਰਤੀ ਸਮੇਂ ਅਨੁਸਾਰ ਰਾਤ 10:30 ਵਜੇ) ਤੋਂ ਲਾਗੂ ਹੈ।

AI ਕੰਪਨੀਆਂ ਵੀ ਸੂਚੀ ਵਿੱਚ 

ਇਸ ਬਿਆਨ ਵਿੱਚ, ਇਸਲਾਮਿਕ ਰੈਵੋਲਿਊਸ਼ਨਰੀ ਗਾਰਡ ਕੋਰ ਨੇ ਖਾਸ ਤੌਰ 'ਤੇ ਸੂਚਨਾ ਤਕਨਾਲੋਜੀ ਅਤੇ ਆਰਟੀਫੀਸ਼ੀਅਲ ਇੰਟੈਲੀਜੈਂਸ (AI) ਕੰਪਨੀਆਂ ਦੀ ਭੂਮਿਕਾ 'ਤੇ ਸਵਾਲ ਉਠਾਏ। ਇਸ ਨੇ ਦੋਸ਼ ਲਗਾਇਆ ਕਿ ਇਹ ਕੰਪਨੀਆਂ ਫੌਜੀ ਕਾਰਵਾਈਆਂ ਵਿੱਚ, ਖਾਸ ਕਰਕੇ ਡਰੋਨ ਅਤੇ ਨਿਸ਼ਾਨਾ ਚੋਣ ਵਿੱਚ ਮਹੱਤਵਪੂਰਨ ਭੂਮਿਕਾ ਨਿਭਾ ਰਹੀਆਂ ਹਨ। ਈਰਾਨੀ ਫੋਰਸ ਨੇ OpenAI ਅਤੇ Anthropic ਵਰਗੀਆਂ ਕੰਪਨੀਆਂ ਦਾ ਨਾਮ ਵੀ ਲਿਆ। 

ਈਰਾਨੀ ਫੌਜੀ ਅਧਿਕਾਰੀ ਦਾ ਕਤਲ 

ਇਹ ਧਮਕੀ ਉਦੋਂ ਆਈ ਹੈ ਜਦੋਂ ਈਰਾਨ ਨੇ ਪੁਸ਼ਟੀ ਕੀਤੀ ਹੈ ਕਿ ਹਾਲ ਹੀ ਵਿੱਚ ਹੋਏ ਅਮਰੀਕਾ-ਇਜ਼ਰਾਈਲੀ ਹਮਲੇ ਵਿੱਚ ਉਸਦੇ ਇੱਕ ਸੀਨੀਅਰ ਫੌਜੀ ਅਧਿਕਾਰੀ ਦੀ ਮੌਤ ਹੋ ਗਈ ਹੈ। ਆਈਆਰਜੀਸੀ ਮੁਖੀ ਅਹਿਮਦ ਵਹੀਦੀ ਨੇ ਬ੍ਰਿਗੇਡੀਅਰ ਜਨਰਲ ਜਮਸ਼ੀਦ ਈਸ਼ਾਗੀ ਦੀ ਮੌਤ 'ਤੇ ਸੋਗ ਪ੍ਰਗਟ ਕੀਤਾ। ਈਸ਼ਾਗੀ ਨੇ ਈਰਾਨ ਦੇ ਫੌਜੀ ਢਾਂਚੇ ਵਿੱਚ ਮੁੱਖ ਭੂਮਿਕਾ ਨਿਭਾਈ ਅਤੇ ਰੱਖਿਆ ਬਜਟ ਅਤੇ ਵਿੱਤ ਦੇ ਮੁਖੀ ਸਨ।

ਕਾਬਿਲੇਗੌਰ ਹੈ ਕਿ 28 ਫਰਵਰੀ ਤੋਂ ਸ਼ੁਰੂ ਹੋਏ ਇਸ ਸੰਘਰਸ਼ ਵਿੱਚ ਸੁਪਰੀਮ ਲੀਡਰ ਅਲੀ ਖਮੇਨੀ ਅਤੇ ਸੀਨੀਅਰ ਲੀਡਰ ਅਲੀ ਲਾਰੀਜਾਨੀ ਸਮੇਤ ਕਈ ਚੋਟੀ ਦੇ ਈਰਾਨੀ ਨੇਤਾ ਮਾਰੇ ਗਏ ਹਨ। ਇਨ੍ਹਾਂ ਘਟਨਾਵਾਂ ਤੋਂ ਬਾਅਦ, ਈਰਾਨ ਤੋਂ ਬਦਲਾ ਲੈਣ ਦਾ ਡਰ ਵਧ ਰਿਹਾ ਹੈ।

ਇਹ ਵੀ ਪੜ੍ਹੋ  : US Visa Rules : ਅਮਰੀਕਾ ਨੇ ਸਖਤ ਕੀਤੇ ਵੀਜ਼ਾ ਨਿਯਮ, ਹੁਣ ਸੋਸ਼ਲ ਮੀਡੀਆ ਵੀ ਕਰਨਾ ਹੋਵੇਗਾ ਜਨਤਕ, ਜਾਣੋ ਕਿਵੇਂ ਪਵੇਗਾ ਅਸਰ ?