1983 ਵਿਸ਼ਵ ਕੱਪ ਜਿੱਤ ਦੇ 40 ਸਾਲ ਪੂਰੇ, ਜਾਣੋ ਪਹਿਲੀ ਗੇਂਦ ਤੋਂ ਲੈ ਕੇ ਆਖਰੀ ਗੇਂਦ ਤੱਕ ਦੀ ਪੂਰੀ ਕਹਾਣੀ

1983 World Cup: 2 ਵਾਰ ਦੀ ਚੈਂਪੀਅਨ ਵੈਸਟਇੰਡੀਜ਼ ਸਾਹਮਣੇ ਹੈ ਅਤੇ ਸਕੋਰ ਬੋਰਡ 'ਤੇ ਸਿਰਫ 183 ਦੌੜਾਂ ਹਨ। ਯਾਨੀ ਜਿੱਤ ਦੀ ਉਮੀਦ ਨਾਮੁਮਕਿਨ ਸੀ। ਇਸ ਦੇ ਬਾਵਜੂਦ ਕਪਿਲ ਦੇਵ ਦੀ ਅਗਵਾਈ ਵਾਲੀ ਭਾਰਤੀ ਟੀਮ ਨੇ ਅਸੰਭਵ ਨੂੰ ਸੰਭਵ ਕਰ ਦਿੱਤਾ ਅਤੇ ਭਾਰਤ ਪਹਿਲੀ ਵਾਰ ਵਨਡੇ ਵਿਸ਼ਵ ਚੈਂਪੀਅਨ ਬਣਿਆ। ਅੱਜ ਭਾਰਤ ਦੇ ਵਿਸ਼ਵ ਚੈਂਪੀਅਨ ਬਣਨ ਦੀ ਚਰਚਾ ਹੈ ਕਿਉਂਕਿ ਅੱਜ ਦੇ ਦਿਨ ਭਾਵ 25 ਜੂਨ 1983 ਨੂੰ ਭਾਰਤ ਨੇ ਪਹਿਲੀ ਵਾਰ ਵਨਡੇ ਵਿਸ਼ਵ ਕੱਪ ਜਿੱਤਿਆ ਸੀ। ਇਸ ਜਿੱਤ ਨੂੰ 40 ਸਾਲ ਹੋ ਗਏ ਹਨ। ਪਰ, ਅੱਜ ਵੀ ਸ਼ਾਇਦ ਹੀ ਕੋਈ ਕ੍ਰਿਕਟ ਪ੍ਰਸ਼ੰਸਕ ਕਪਿਲ ਦੇਵ ਨੂੰ ਇੰਗਲੈਂਡ ਦੇ ਲਾਰਡਜ਼ ਮੈਦਾਨ ਦੀ ਬਾਲਕੋਨੀ ਤੋਂ ਵਿਸ਼ਵ ਕੱਪ ਦੀ ਟਰਾਫੀ ਲਹਿਰਾਉਂਦੇ ਹੋਏ ਭੁੱਲਿਆ ਹੋਵੇਗਾ।

ਅੱਜ ਟੀਮ ਇੰਡੀਆ ਨੂੰ ਕ੍ਰਿਕਟ ਦਾ ਪਾਵਰਹਾਊਸ ਮੰਨਿਆ ਜਾਂਦਾ ਹੈ। ਪਰ, 80 ਦੇ ਦਹਾਕੇ ਵਿੱਚ ਅਜਿਹਾ ਨਹੀਂ ਸੀ। ਉਨ੍ਹੀਂ ਦਿਨੀਂ ਵੈਸਟ ਇੰਡੀਜ਼ ਦੀ ਤੂਤੀ ਬੋਲਦੀ ਸੀ। ਵਿਵਿਅਨ ਰਿਚਰਡਸ, ਐਂਡੀ ਰੌਬਰਟਸ, ਮੈਲਕਮ ਮਾਰਸ਼ਲ ਵਰਗੇ ਤਕੜੇ ਖਿਡਾਰੀ ਸਨ। ਇਹ ਟੀਮ ਜਿੱਥੇ ਵੀ ਉਤਰਦੀ ਸੀ, ਜਿੱਤ ਦਰਜ ਕਰਕੇ ਵਾਪਸ ਪਰਤਦੀ ਸੀ। 1983 ਦੇ ਵਿਸ਼ਵ ਕੱਪ ਵਿੱਚ ਵੀ ਵੈਸਟਇੰਡੀਜ਼ ਨੂੰ ਹਾਟ ਫੌਰੀਟ ਮੰਨਿਆ ਜਾਂਦਾ ਸੀ। ਫਾਈਨਲ ਦੀ ਸ਼ੁਰੂਆਤ ਵੀ ਇਸ ਤਰ੍ਹਾਂ ਹੋਈ।

ਕਪਿਲ ਦੇਵ ਦੇ ਕੈਚ ਨੇ ਮੈਚ ਬਣਾ ਦਿੱਤਾ

ਵੈਸਟਇੰਡੀਜ਼ ਨੇ ਭਾਰਤ ਨੂੰ 183 ਦੌੜਾਂ 'ਤੇ ਢੇਰ ਕਰ ਦਿੱਤਾ ਅਤੇ ਇਸ ਟੀਚੇ ਦਾ ਪਿੱਛਾ ਕਰਦੇ ਹੋਏ ਇਕ ਸਮੇਂ 1 ਵਿਕਟ ਦੇ ਨੁਕਸਾਨ 'ਤੇ 50 ਦੌੜਾਂ ਬਣਾ ਲਈਆਂ ਸਨ। ਵਿਵਿਅਨ ਰਿਚਰਡਸ ਆਪਣੇ ਅੰਦਾਜ਼ 'ਚ ਬੱਲੇਬਾਜ਼ੀ ਕਰ ਰਹੇ ਸਨ ਅਤੇ ਉਨ੍ਹਾਂ ਨੇ 28 ਗੇਂਦਾਂ 'ਚ 7 ਚੌਕਿਆਂ ਦੀ ਮਦਦ ਨਾਲ 33 ਦੌੜਾਂ ਬਣਾਈਆਂ ਸਨ। ਪਰ, ਮੈਚ ਅਚਾਨਕ ਪਲਟ ਗਿਆ ਜਦੋਂ ਰਿਚਰਡਸ ਨੇ ਮਦਨ ਲਾਲ ਦੀ ਇੱਕ ਗੇਂਦ 'ਤੇ ਵੱਡਾ ਸ਼ਾਟ ਮਾਰਨ ਦੀ ਕੋਸ਼ਿਸ਼ ਕੀਤੀ, ਗੇਂਦ ਹਵਾ ਵਿੱਚ ਉੱਚੀ ਗਈ ਅਤੇ ਕਪਿਲ ਦੇਵ ਨੇ ਪਿੱਛੇ ਵੱਲ ਦੌੜਦੇ ਹੋਏ ਸ਼ਾਨਦਾਰ ਕੈਚ ਫੜ ਲਿਆ। ਇਸ ਤੋਂ ਬਾਅਦ ਵੈਸਟਇੰਡੀਜ਼ ਦੀਆਂ ਵਿਕਟਾਂ ਦੀ ਅਜਿਹੀ ਗਿਰਾਵਟ ਆਈ ਕਿ 76 ਦੌੜਾਂ ਦੇ ਸਕੋਰ 'ਤੇ 6 ਬੱਲੇਬਾਜ਼ ਪੈਵੇਲੀਅਨ ਪਰਤ ਗਏ।

ਕ੍ਰਿਕੇਟ ਦੀ ਦੁਨੀਆ ਵਿੱਚ ਇੱਕ ਆਵਾਜ਼ ਸੀ ਕਿ ਇੱਕ ਵੱਡੀ ਉਥਲ-ਪੁਥਲ ਹੋਣ ਵਾਲੀ ਹੈ ਅਤੇ ਇਹ ਹੋ ਗਿਆ। ਮਹਿੰਦਰ ਅਮਰਨਾਥ ਨੇ 52ਵੇਂ ਓਵਰ ਦੀ ਆਖਰੀ ਗੇਂਦ 'ਤੇ ਮਾਈਕਲ ਹੋਲਡਿੰਗ ਨੂੰ ਕਲੀਨ ਬੋਲਡ ਕਰਕੇ ਵੈਸਟਇੰਡੀਜ਼ ਨੂੰ 140 ਦੌੜਾਂ 'ਤੇ ਆਊਟ ਕਰਕੇ ਭਾਰਤ ਨੂੰ ਵਿਸ਼ਵ ਚੈਂਪੀਅਨ ਬਣਾਇਆ। ਅਮਰਨਾਥ ਨੂੰ ਫਾਈਨਲ ਵਿੱਚ ਮੈਨ ਆਫ਼ ਦਾ ਮੈਚ ਚੁਣਿਆ ਗਿਆ। ਉਸ ਨੇ 26 ਦੌੜਾਂ ਬਣਾਉਣ ਦੇ ਨਾਲ ਹੀ ਤਿੰਨ ਵਿਕਟਾਂ ਵੀ ਲਈਆਂ। ਉਹ ਸੈਮੀਫਾਈਨਲ ਵਿੱਚ ਵੀ ਪਲੇਅਰ ਆਫ ਦਿ ਮੈਚ ਰਿਹਾ। ਕ੍ਰਿਸ਼ਣਮਾਚਾਰੀ ਸ਼੍ਰੀਕਾਂਤ (38) ਫਾਈਨਲ ਵਿੱਚ ਸਭ ਤੋਂ ਵੱਧ ਸਕੋਰਰ ਰਹੇ।

ਜੇਕਰ ਅਸੀਂ 1983 ਦੇ ਵਿਸ਼ਵ ਕੱਪ ਵਿੱਚ ਭਾਰਤ ਲਈ ਸਰਵੋਤਮ ਪ੍ਰਦਰਸ਼ਨ ਕਰਨ ਵਾਲੇ ਖਿਡਾਰੀਆਂ ਦੀ ਗੱਲ ਕਰੀਏ ਤਾਂ ਮੌਜੂਦਾ ਬੀਸੀਸੀਆਈ ਪ੍ਰਧਾਨ ਰੋਜਰ ਬਿੰਨੀ ਨੇ ਪੂਰੇ ਟੂਰਨਾਮੈਂਟ ਵਿੱਚ ਸਭ ਤੋਂ ਵੱਧ ਵਿਕਟਾਂ ਲਈਆਂ। ਉਸ ਨੇ ਕੁੱਲ 18 ਸ਼ਿਕਾਰ ਬਣਾਏ ਸਨ। ਭਾਰਤ ਲਈ ਕਪਤਾਨ ਕਪਿਲ ਦੇਵ ਨੇ ਸਭ ਤੋਂ ਵੱਧ ਦੌੜਾਂ ਬਣਾਈਆਂ। ਕਪਿਲ ਨੇ 8 ਮੈਚਾਂ 'ਚ ਕੁੱਲ 303 ਦੌੜਾਂ ਬਣਾਈਆਂ।