Chandigarh News : ਕੈਬ -ਆਟੋ ਚ ਸਫ਼ਰ ਕਰਨ ਵਾਲਿਆਂ ਲਈ ਵੱਡੀ ਖ਼ਬਰ, ਹੁਣ ਦੇਣੇ ਪੈਣਗੇ ਵੱਧ ਪੈਸੇ, ਪ੍ਰਸ਼ਾਸਨ ਨੇ ਤੈਅ ਕੀਤਾ ਕਿਰਾਇਆ

Chandigarh News : ਚੰਡੀਗੜ੍ਹ ਵਿੱਚ ਟੈਕਸੀ, ਆਟੋ, ਈ-ਰਿਕਸ਼ਾ ਅਤੇ ਬਾਈਕ ਟੈਕਸੀ ਵਿੱਚ ਹੁਣ ਸਫ਼ਰ ਕਰਨਾ ਮਹਿੰਗਾ ਹੋ ਗਿਆ ਹੈ। ਪ੍ਰਸ਼ਾਸਨ ਨੇ ਵੱਖ-ਵੱਖ ਕਿਰਾਇਆ ਤੈਅ ਕੀਤਾ ਹੈ। 3 ਕਿਲੋਮੀਟਰ ਲਈ ਇੱਕ ਨਿਸ਼ਚਿਤ ਕਿਰਾਇਆ ਹੈ। ਇਸ ਤੋਂ ਬਾਅਦ ਕਿਲੋਮੀਟਰ ਦੇ ਹਿਸਾਬ ਨਾਲ ਕਿਰਾਇਆ ਵਸੂਲਿਆ ਜਾਵੇਗਾ।

ਇਸ ਨੂੰ ਲੈ ਕੇ ਟਰਾਂਸਪੋਰਟ ਵਿਭਾਗ ਨੇ ਸੋਮਵਾਰ ਨੂੰ ਇੱਕ ਆਦੇਸ਼ ਜਾਰੀ ਕੀਤਾ ਹੈ। ਇਹ ਆਦੇਸ਼ ਸੋਮਵਾਰ (7 ਜੁਲਾਈ) ਤੋਂ ਲਾਗੂ ਹੋ ਗਿਆ ਹੈ। ਹੁਣ ਪੰਜ ਸੀਟਾਂ ਵਾਲੀ ਟੈਕਸੀ ਵਿੱਚ 3 ਕਿਲੋਮੀਟਰ ਦਾ ਕਿਰਾਇਆ 90 ਰੁਪਏ ਹੋਵੇਗਾ। ਇਸ ਤੋਂ ਬਾਅਦ ਇੱਕ ਕਿਲੋਮੀਟਰ ਲਈ 25 ਰੁਪਏ ਵਸੂਲੇ ਜਾਣਗੇ। ਹਾਲਾਂਕਿ, ਇਸ ਆਦੇਸ਼ ਤੋਂ ਬਾਅਦ ਲੋਕਾਂ ਨੂੰ ਜੇਬ ਹੋਰ ਢਿੱਲੀ ਕਰਨੀ ਪਵੇਗੀ।

ਕੈਬ ਡਰਾਈਵਰਾਂ ਨੇ ਦੱਸਿਆ ਕਿ ਪਹਿਲਾਂ ਉਹ ਹਰ ਕਿਲੋਮੀਟਰ ਲਈ 13 ਤੋਂ 14 ਰੁਪਏ, ਯਾਨੀ 3 ਕਿਲੋਮੀਟਰ ਲਈ 39 ਜਾਂ 42 ਰੁਪਏ ਵਸੂਲਦੇ ਸਨ ਪਰ ਹੁਣ ਲੋਕਾਂ ਨੂੰ 3 ਕਿਲੋਮੀਟਰ ਲਈ 90 ਰੁਪਏ ਦੇਣੇ ਪੈਣਗੇ। ਯਾਨੀ ਲੋਕਾਂ ਨੂੰ 50 ਰੁਪਏ ਜ਼ਿਆਦਾ ਦੇਣੇ ਪੈਣਗੇ। ਟਰਾਂਸਪੋਰਟ ਸਕੱਤਰ ਦੀਪਰਵਾ ਲਾਕੜਾ ਵੱਲੋਂ ਜਾਰੀ ਹੁਕਮ ਵਿੱਚ ਕਿਹਾ ਗਿਆ ਹੈ ਕਿ ਜੇਕਰ ਕੋਈ ਡਰਾਈਵਰ ਨਿਰਧਾਰਤ ਕੀਮਤ ਤੋਂ ਵੱਧ ਪੈਸੇ ਮੰਗਦਾ ਹੈ ਤਾਂ ਯਾਤਰੀ ਸ਼ਿਕਾਇਤ ਕਰ ਸਕਦਾ ਹੈ। ਲੋਕ ਟਰਾਂਸਪੋਰਟ ਵਿਭਾਗ ਜਾਂ ਪੁਲਿਸ ਹੈਲਪਲਾਈਨ ਨੰਬਰ 'ਤੇ ਸੰਪਰਕ ਕਰ ਸਕਦੇ ਹਨ।

ਆਟੋ ਚਾਲਕਾਂ ਨੂੰ ਵੀ 3 ਕਿਲੋਮੀਟਰ 'ਤੇ ਹੋਵੇਗਾ 22 ਰੁਪਏ ਦਾ ਫ਼ਾਇਦਾ 

ਚੰਡੀਗੜ੍ਹ ਆਟੋ ਯੂਨੀਅਨ ਦੇ ਮੁਖੀ ਅਨਿਲ ਕੁਮਾਰ ਨੇ ਕਿਹਾ ਕਿ ਪਹਿਲਾਂ ਉਹ 1 ਕਿਲੋਮੀਟਰ ਦੇ 14 ਰੁਪਏ ਲੈਂਦੇ ਸਨ। ਇਸ ਤੋਂ ਬਾਅਦ ਹਰ ਕਿਲੋਮੀਟਰ 7 ਰੁਪਏ ਲੈਂਦੇ ਸਨ, ਯਾਨੀ ਕਿ 3 ਕਿਲੋਮੀਟਰ ਲਈ 28 ਰੁਪਏ ਲਏ ਜਾਂਦੇ ਸਨ। ਇਸ ਹੁਕਮ ਤੋਂ ਬਾਅਦ ਹੁਣ ਉਨ੍ਹਾਂ ਨੂੰ ਪ੍ਰਤੀ 3 ਕਿਲੋਮੀਟਰ 22 ਰੁਪਏ ਦਾ ਲਾਭ ਹੈ। ਕਿਉਂਕਿ ਹੁਣ 3 ਕਿਲੋਮੀਟਰ ਦਾ ਕਿਰਾਇਆ 50 ਰੁਪਏ ਨਿਰਧਾਰਤ ਕੀਤਾ ਗਿਆ ਹੈ।

ਚੰਡੀਗੜ੍ਹ ਕੈਬ ਡਰਾਈਵਰ ਐਸੋਸੀਏਸ਼ਨ ਦੇ ਪ੍ਰਧਾਨ ਅਮਨਦੀਪ ਸਿੰਘ ਨੇ ਕਿਹਾ ਕਿ ਉਹ ਕਈ ਦਿਨਾਂ ਤੋਂ ਭੁੱਖ ਹੜਤਾਲ 'ਤੇ ਸਨ। ਚੰਡੀਗੜ੍ਹ ਭਾਜਪਾ ਦੇ ਸਾਬਕਾ ਪ੍ਰਧਾਨ ਅਰੁਣ ਸੁਧਾ ਨੇ ਉਨ੍ਹਾਂ ਦੀ ਗੱਲ ਸੁਣੀ ਅਤੇ ਕੈਬ ਡਰਾਈਵਰ ਨੂੰ ਚੰਡੀਗੜ੍ਹ ਪ੍ਰਸ਼ਾਸਕ ਗੁਲਾਬਚੰਦ ਕਟਾਰੀਆ ਨਾਲ ਮਿਲਵਾਇਆ। ਉਨ੍ਹਾਂ ਨੇ ਆਪਣਾ ਮੰਗ ਪੱਤਰ ਉਨ੍ਹਾਂ ਨੂੰ ਸੌਂਪਿਆ। ਉਨ੍ਹਾਂ ਦੇ ਮੰਗ ਪੱਤਰ ਵਿੱਚ ਇੱਕੋ ਇੱਕ ਮੰਗ ਸੀ ਕਿ ਨਿੱਜੀ ਕੰਪਨੀਆਂ ਨੂੰ ਲਗਾਮ ਦਿੱਤੀ ਜਾਵੇ। ਇਸ ਲਈ ਇੱਕ ਲੰਬੀ ਲੜਾਈ ਲੜੀ ਗਈ। ਇਸ ਹੁਕਮ ਤੋਂ ਬਾਅਦ ਉਹ ਪ੍ਰਸ਼ਾਸਨ ਦਾ ਸਵਾਗਤ ਕਰਦੇ ਹਨ।