ਤਰਾਸਦੀ: ਐਂਬੂਲੈਂਸ ਨਾ ਮਿਲਣ 'ਤੇ ਬਿਮਾਰ ਪਤਨੀ ਨੂੰ ਕਈ ਕਿਲੋਮੀਟਰ ਦੂਰ ਹਸਪਤਾਲ ਮੋਢਿਆ 'ਤੇ ਚੁੱਕ ਲਿਆਇਆ ਪਤੀ, ਵੀਡੀਓ ਵਾਇਰਲ
ਸਿੰਗਰੌਲੀ 'ਚ ਇੱਕ ਵਿਅਕਤੀ ਨੂੰ ਆਪਣੀ ਬਿਮਾਰ ਪਤਨੀ ਨੂੰ ਕਈ ਕਿਲੋਮੀਟਰ ਦੂਰ ਹਸਪਤਾਲ ਮੋਢਿਆਂ 'ਤੇ ਚੁੱਕ ਕੇ ਲਿਆਉਣਾ ਪਿਆ, ਕਿਉਂਕਿ ਉਸ ਨੂੰ ਬਿਮਾਰ ਪਤਨੀ ਲਈ ਹਸਪਤਾਲ ਤੋਂ ਐਂਬੂਲੈਂਸ ਨਹੀਂ ਮਿਲੀ ਸੀ।
Madhya Pardesh News: ਮੱਧ ਪ੍ਰਦੇਸ਼ 'ਚ ਤਰਾਸਦੀ ਭਰੀ ਇੱਕ ਤਸਵੀਰ ਵਿਖਾਈ ਦਿੱਤੀ ਹੈ। ਇਥੇ ਸਿੰਗਰੌਲੀ 'ਚ ਇੱਕ ਵਿਅਕਤੀ ਨੂੰ ਆਪਣੀ ਬਿਮਾਰ ਪਤਨੀ ਨੂੰ ਕਈ ਕਿਲੋਮੀਟਰ ਦੂਰ ਹਸਪਤਾਲ ਮੋਢਿਆਂ 'ਤੇ ਚੁੱਕ ਕੇ ਲਿਆਉਣਾ ਪਿਆ, ਕਿਉਂਕਿ ਉਸ ਨੂੰ ਬਿਮਾਰ ਪਤਨੀ ਲਈ ਹਸਪਤਾਲ ਤੋਂ ਐਂਬੂਲੈਂਸ ਨਹੀਂ ਮਿਲੀ ਸੀ।
ਪਤਾ ਲੱਗਾ ਹੈ ਜਿਹੜੇ ਪਿੰਡ ਤੋਂ ਵਿਅਕਤੀ ਆ ਰਿਹਾ ਹੈ, ਉਸ ਪਿੰਡ ਵਿੱਚ ਸਹੂਲਤਾਂ ਦੇ ਨਾਂ ’ਤੇ ਕੁਝ ਵੀ ਨਹੀਂ ਹੈ। ਦੱਸਿਆ ਜਾਂਦਾ ਹੈ ਕਿ ਇੱਥੇ ਵਿਧਾਇਕ ਫੰਡ ਵਿੱਚੋਂ ਐਂਬੂਲੈਂਸ ਦਾ ਪ੍ਰਬੰਧ ਕੀਤਾ ਗਿਆ ਸੀ ਪਰ ਡਰਾਈਵਰ ਅਤੇ ਰੱਖ-ਰਖਾਅ ਦੀ ਘਾਟ ਕਾਰਨ ਇਹ ਖ਼ਰਾਬ ਹੋ ਚੁੱਕੀ ਹੈ।
ਮਾਮਲਾ ਸਿੰਗਰੌਲੀ ਜ਼ਿਲ੍ਹੇ ਦੇ ਸਰਾਏ ਇਲਾਕੇ ਦੇ ਪਿੰਡ ਪੁਤਪਨੀ ਬੇਲਵਾਨੀ ਦਾ ਹੈ। ਪਿੰਡ ਦੇ ਇੱਕ ਆਦਿਵਾਸੀ ਨੌਜਵਾਨ ਦੀ ਪਤਨੀ ਦੀ ਤਬੀਅਤ ਅਚਾਨਕ ਵਿਗੜ ਗਈ ਸੀ। ਉਸਨੇ ਸਰਾਏ ਦੇ ਕਮਿਊਨਿਟੀ ਹੈਲਥ ਸੈਂਟਰ ਤੱਕ ਪਹੁੰਚਣ ਲਈ ਐਂਬੂਲੈਂਸ ਦਾ ਪ੍ਰਬੰਧ ਕਰਨ ਦੀ ਕੋਸ਼ਿਸ਼ ਕੀਤੀ। ਉਸ ਨੇ ਲੋਕਾਂ ਨਾਲ ਸੰਪਰਕ ਕੀਤਾ, ਪਰ ਕੋਈ ਫਾਇਦਾ ਨਹੀਂ ਹੋਇਆ। ਉਸ ਨੂੰ ਕਈ ਘੰਟੇ ਐਂਬੂਲੈਂਸ ਨਹੀਂ ਮਿਲੀ। ਇਸ ਦੌਰਾਨ ਉਸ ਦੀ ਪਤਨੀ ਦੀ ਹਾਲਤ ਵੀ ਵਿਗੜ ਰਹੀ ਸੀ। ਇਹ ਦੇਖ ਕੇ ਉਹ ਆਪਣੀ ਪਤਨੀ ਨੂੰ ਮੋਢੇ 'ਤੇ ਚੁੱਕ ਕੇ ਕਮਿਊਨਿਟੀ ਹੈਲਥ ਸੈਂਟਰ ਪਹੁੰਚਿਆ।