ਪੰਜਾਬ ਕਾਂਗਰਸ ਨੇ ਜਾਰੀ ਕੀਤੀ ਪਾਰਟੀ ਬੁਲਾਰਿਆਂ ਦੀ "ਜਾਤ-ਪਾਤ" ਆਧਾਰਤ ਸੂਚੀ
ਪੰਜਾਬ ਕਾਂਗਰਸ ਨੇ ਜਾਰੀ ਕੀਤੀ ਪਾਰਟੀ ਬੁਲਾਰਿਆਂ ਦੀ "ਜਾਤ-ਪਾਤ" ਆਧਾਰਤ ਸੂਚੀ
ਪੰਜਾਬ ਕਾਂਗਰਸ ਦੇ ਸੱਤਾ 'ਚ ਆਉਣ ਤੋਂ ਬਾਅਦ ਦੇ ਹੀ ਕਈ ਅਜਿਹੇ ਵਿਵਾਦ ਸਾਹਮਣੇ ਆ ਰਹੇ ਹਨ, ਜੋ ਕਿ ਪੰਜਾਬ ਭਲਾਈ ਦੀ ਤਾਂ ਕਿਤੇ ਗੱਲ ਕਰਦੇ ਦਿਖਾਈ ਨਹੀਂ ਦਿੰਦੇ ਬਲਕਿ ਪੰਜਾਬੀਆਂ ਨੂੰ ਨਿਰਾਸ਼ਾ ਦੇ ਹਨੇਰੇ 'ਚ ਧਕੇਲਦੇ ਨਜ਼ਰ ਜ਼ਰੂਰ ਆ ਰਹੇ ਹਨ।
ਜੇਕਰ ਗੱਲ ਪੰਜਾਬ ਦੇ ਕਿਸਾਨਾਂ ਦੇ ਕਰਜ਼ਾ ਮੁਆਫੀ ਜਾਂ ਕੁਰਕੀ ਦੀ ਕਰੀਏ ਤਾਂ ਕੈਪਟਨ ਸਰਕਾਰ ਨੇ ਇਸ ਤੋਂ ਬਹੁਤ ਆਰਾਮ ਨਾਲ ਪਾਸਾ ਵੱਟ ਲਿਆ ਹੈ। ਇਸ ਤੋਂ ਇਲਾਵਾ ਨੌਜਵਾਨਾਂ ਲਈ ਖੋਲ੍ਹੀ ਗਈ ਰੁਜ਼ਗਾਰ ਸਕੀਮ ਦੇ ਤਹਿਤ ਊਬਰ ਨਾਲ ਹੋਏ ਕੰਟਰੈਕਟ ਨੂੰ ਲੈ ਕੇ ਵੀ ਵਿਵਾਦ ਛਿੜਿਆ ਰਿਹਾ ਸੀ।
ਫਿਰ ਹੁਣ ਹੁਣ "ਘਰ ਘਰ ਨੌਕਰੀ" ਸਕੀਮ ਤਹਿਤ ਨੌਜਵਾਨਾਂ ਨੂੰ ਨੌਕਰੀ ਦੇਣ ਦੀ ਪੋਲ ਉਸ ਸਮੇਂ ਖੁੱਲ ਗਈ, ਜਦੋਂ ਐਮ ਟੈਕ ਕੀਤੇ ਵਿਦਿਆਰਥੀਆਂ ਨੂੰ 10,000 ਰੁ:/ਮਹੀਨਾ ਦਾ ਆਫਰ ਦਿੱਤਾ ਗਿਆ ਸੀ।
ਪਰ ਅੱਜ ਪੰਜਾਬ ਕਾਂਗਰਸ ਦੀ ਪੰਜਾਬ ਨੂੰ ਵੰਡਣ ਦੀ ਇੱਕ ਹੋਰ ਸਾਜਿਸ਼ ਬੇਨਕਾਬ ਹੋ ਗਈ ਹੈ। ਪੰਜਾਬ ਸਰਕਾਰ ਨੇ ਆਪਣੇ ਪਾਰਟੀ ਬੁਲਾਰਿਆਂ ਦੀ ਇੱਕ ਸੂਚੀ ਜਾਰੀ ਕੀਤੀ ਜਿਸਨੂੰ ਕਿ ਜਾਤਾਂ ਪਾਤਾਂ ਦੇ ਆਧਾਰ 'ਤੇ ਵੰਡਿਆ ਗਿਆ ਅਤੇ ਬਾਅਦ 'ਚ ਸ਼ਾਇਦ "ਗਲਤੀ" ਦਾ ਅਹਿਸਾਸ ਹੋਣ 'ਤੇ ਕਾਂਗਰਸ ਵੱਲੋਂ ਇਹ ਸੂਚੀ ਦੁਬਾਰਾ "ਜਾਤ" ਵਾਲੇ ਕਾਲਮ ਤੋਂ ਬਿਨ੍ਹਾਂ ਭੇਜੀ ਗਈ।
ਹਾਂਲਾਕਿ ਪੰਜਾਬ ਕਾਂਗਰਸ ਆਪਣੇ ਆਪ ਨੂੰ ਧਰਮ ਨਿਰਪੱਖ ਪਾਰਟੀ ਦੱਸਦੀ ਹੈ ਪਰ ਹੁਣ ਸਵਾਲ ਇਹ ਪੈਦਾ ਹੁੰਦਾ ਹੈ ਕਿ ਕੀ ਸੂਚੀ ਜਾਤ-ਪਾਤ ਆਧਾਰ 'ਤੇ ਹੀ ਤਿਆਰ ਕੀਤੀ ਗਈ ਸੀ?
ਖੈਰ, ਇਸਦਾ ਜਵਾਬ ਜੋ ਵੀ ਹੋਵੇ ਪਰ ਇਸ ਸੂਚੀ ਦੇ ਰਿਲੀਜ਼ ਹੋਣ ਨਾਲ ਪੰਜਾਬ ਕਾਂਗਰਸ ਦੀ ਪੰਜਾਬ 'ਚ ਜਾਤ-ਪਾਤ ਦੇ ਆਧਾਰ 'ਤੇ ਵੰਡੀਆਂ ਪਾਉਣ ਦੀ ਸਾਜ਼ਿਸ਼ ਜ਼ਰੂਰ ਜਗ ਜਾਹਿਰ ਹੋ ਗਈ ਹੈ।
ਦੱਸ ਦੇਈਏ ਕਿ ਇਸ ਤੋਂ ਪਹਿਲਾਂ ਕਿਸੇ ਵੀ ਪਾਰਟੀ ਦੁਆਰਾ ਇੰਝ ਸੂਚੀ ਤਿਆਰ ਨਹੀਂ ਕੀਤੀ ਗਈ ਹੈ।
—PTC News