ਸੁਸਾਇਟੀ ਸਿਨੇਮਾ ਦੇ ਮਾਲਕ ਨੇ ਖ਼ੁਦ ਨੂੰ ਗੋਲ਼ੀ ਮਾਰ ਕੇ ਦਿੱਤੀ ਜਾਨ
ਲੁਧਿਆਣਾ : ਸ਼ਹਿਰ ਦੇ ਸੁਸਾਇਟੀ ਸਿਨੇਮਾ ਦੇ ਮਾਲਕ ਤੇ ਮਸ਼ਹੂਰ ਵਪਾਰੀ ਤੇਜੇਸ਼ਵਰ ਮਲਹੋਤਰਾ ਉਰਫ ਰਾਜਾ ਨੇ ਖ਼ੁਦ ਨੂੰ ਗੋਲ਼ੀ ਮਾਰ ਕੇ ਜਾਨ ਦੇ ਦਿੱਤੀ ਹੈ। ਤੇਜੇਸ਼ਵਰ ਮਲਹੋਤਰਾ ਉਰਫ਼ ਰਾਜਾ ਪਿਛਲੇ ਲੰਮੇ ਸਮੇਂ ਤੋਂ ਜਿਗਰ ਦੀ ਬਿਮਾਰੀ ਦੀ ਲਪੇਟ ਵਿਚ ਸਨ। ਦੱਸਿਆ ਜਾ ਰਿਹਾ ਹੈ ਕਿ ਉਹ ਸਤਲੁਜ ਕਲੱਬ 'ਚ ਆਪਣੇ ਕੁਝ ਦੋਸਤਾਂ ਨਾਲ ਸਮਾਂ ਬਿਤਾਉਣ ਤੋਂ ਬਾਅਦ ਦੇਰ ਰਾਤ ਘਰ ਗਏ ਸਨ ਜਿੱਥੇ ਉਸ ਨੇ ਆਪਣੇ ਲੜਕੇ ਨਾਲ ਮੋਬਾਈਲ 'ਤੇ ਗੱਲ ਕੀਤੀ ਤੇ ਬਾਥਰੂਮ 'ਚ ਜਾ ਕੇ ਆਪਣੇ ਲਾਇਸੈਂਸੀ ਪਿਸਤੌਲ ਨਾਲ ਆਪਣੇ-ਆਪ ਨੂੰ ਗੋਲ਼ੀ ਮਾਰ ਕੇ ਆਪਣੀ ਜਾਨ ਦੇ ਦਿੱਤੀ।
ਪੁਲਿਸ ਨੇ ਲਾਸ਼ ਨੂੰ ਪੋਸਟਮਾਰਟਮ ਲਈ ਸਿਵਲ ਹਸਪਤਾਲ ਦੀ ਮੋਰਚਰੀ 'ਚ ਰਖਵਾ ਕੇ ਮਾਮਲੇ ਦੀ ਜਾਂਚ ਸ਼ੁਰੂ ਕਰ ਦਿੱਤੀ ਹੈ। ਕਾਬਿਲੇਗੌਰ ਹੈ ਕਿ ਤੇਜੇਸ਼ਵਰ ਮਲਹੋਤਰਾ ਦਾ ਪਰਿਵਾਰ ਪੁਰਾਣੇ ਸ਼ਹਿਰ 'ਚ ਸੁਸਾਇਟੀ ਸਿਨੇਮਾ ਦੇ ਨਾਂ ਉੱਤੇ ਇਕ ਸਿਨੇਮਾ ਚਲਾਉਂਦਾ ਸੀ ਤੇ ਸਿਨੇਮੇ ਦੇ ਬੰਦ ਹੋਣ ਪਿੱਛੋਂ ਇਸ ਨੂੰ ਤੋੜ ਕੇ ਉੱਥੇ ਇਕ ਸੁਸਾਇਟੀ ਕੰਪਲੈਕਸ ਬਣਾ ਦਿੱਤਾ ਗਿਆ ਸੀ ਜਿਥੇ ਉਨ੍ਹਾਂ ਵੱਲੋਂ ਵੱਡਾ ਨਿਵੇਸ਼ ਕੀਤਾ ਗਿਆ ਸੀ।
ਇਸ ਤੋਂ ਇਲਾਵਾ ਤੇਜੇਸ਼ਵਰ ਮਲਹੋਤਰਾ ਦਾ ਉੱਤਰਾਖੰਡ 'ਚ ਇਕ ਵੱਡਾ ਫਾਰਮ ਹਾਊਸ ਹੈ ਤੇ ਇਕ ਵੱਡਾ ਸ਼ੋਅਰੂਮ ਵੀ ਸ਼ਹਿਰ ਵਿੱਚ ਹੈ। ਉਨ੍ਹਾਂ ਦਾ ਆਪਣੇ ਰਿਸ਼ਤੇਦਾਰ ਨਾਲ ਜ਼ਮੀਨੀ ਵਿਵਾਦ ਵੀ ਸੀ। ਇੰਟਰਨੈਟ ਮੀਡੀਆ ਉਨ੍ਹਾਂ ਨੂੰ ਸ਼ਰਧਾਂਜਲੀ ਦੇਣ ਵਾਲਿਆਂ ਨਾਲ ਭਰਿਆ ਹੋਇਆ ਹੈ।
-PTC News