Lakshya Sen : ਪੈਰਿਸ ਓਲੰਪਿਕ 'ਚ ਰਚਿਆ ਇਤਿਹਾਸ, ਲਕਸ਼ਯ ਸੇਨ ਦੇ ਸ਼ਾਟ ਨੇ ਮਚਾਈ ਸਨਸਨੀ, ਵਿਰੋਧੀ ਖਿਡਾਰੀ ਹੈਰਾਨ
Paris Olympics 2024 : ਭਾਰਤੀ ਬੈਡਮਿੰਟਨ ਸਟਾਰ ਲਕਸ਼ਯ ਸੇਨ ਨੇ ਪੈਰਿਸ ਓਲੰਪਿਕ 'ਚ ਇਤਿਹਾਸ ਰਚ ਦਿੱਤਾ ਹੈ। ਇਸ 22 ਸਾਲ ਦੇ ਨੌਜਵਾਨ ਨੇ ਖੇਡਾਂ ਦੇ ਮਹਾਕੁੰਭ 'ਚ ਕੁਝ ਅਜਿਹਾ ਕਰ ਦਿਖਾਇਆ ਜੋ ਇਸ ਤੋਂ ਪਹਿਲਾਂ ਕਿਸੇ ਭਾਰਤੀ ਪੁਰਸ਼ ਬੈਡਮਿੰਟਨ ਖਿਡਾਰੀ ਨੇ ਨਹੀਂ ਕੀਤਾ ਸੀ। ਓਲੰਪਿਕ ਦੇ ਵੱਡੇ ਮੰਚ 'ਤੇ ਆਪਣੀ ਤਾਕਤ ਦਿਖਾਉਂਦੇ ਹੋਏ ਉਸ ਨੇ ਵੱਡੇ ਸਿਤਾਰਿਆਂ ਨੂੰ ਹਰਾ ਕੇ ਸੈਮੀਫਾਈਨਲ 'ਚ ਜਗ੍ਹਾ ਪੱਕੀ ਕੀਤੀ। ਓਲੰਪਿਕ ਦੇ ਦੌਰਾਨ ਅਤੇ ਇਸ ਤੋਂ ਪਹਿਲਾਂ ਨਿਸ਼ਾਨੇ 'ਤੇ ਸ਼ਾਟ ਵਿਰੋਧੀਆਂ ਨੂੰ ਮਾਤ ਦੇ ਰਹੇ ਹਨ।
ਪੈਰਿਸ ਓਲੰਪਿਕ ਵਿੱਚ ਪੁਰਸ਼ ਸਿੰਗਲ ਬੈਡਮਿੰਟਨ ਵਿੱਚ ਭਾਰਤ ਪਹਿਲੀ ਵਾਰ ਤਮਗਾ ਜਿੱਤਣ ਦੇ ਨੇੜੇ ਹੈ। ਲਕਸ਼ਯ ਸੇਨ ਨੇ ਸ਼ੁੱਕਰਵਾਰ ਸ਼ਾਮ ਚੀਨੀ ਤਾਈਪੇ ਦੇ ਖਿਡਾਰੀ ਚੋਊ ਤਿਏਨ ਚੇਨ ਨੂੰ 19-21, 21-15 ਅਤੇ 21-12 ਨਾਲ ਹਰਾ ਕੇ ਸੈਮੀਫਾਈਨਲ 'ਚ ਜਗ੍ਹਾ ਪੱਕੀ ਕੀਤੀ। ਹੁਣ ਉਹ ਤਮਗਾ ਜਿੱਤ ਕੇ ਇਤਿਹਾਸ ਦੇ ਪੰਨਿਆਂ 'ਚ ਆਪਣਾ ਨਾਂ ਲਿਖਣ ਤੋਂ ਸਿਰਫ਼ 2 ਕਦਮ ਦੂਰ ਹੈ। ਉਸ ਕੋਲ ਇਸ ਪੈਰਿਸ ਓਲੰਪਿਕ ਵਿੱਚ ਭਾਰਤ ਲਈ ਪਹਿਲਾ ਸੋਨ ਤਮਗਾ ਜਿੱਤਣ ਦਾ ਮੌਕਾ ਹੋਵੇਗਾ।
ਪਹਿਲੀ ਗੇਮ ਹਾਰਨ ਤੋਂ ਬਾਅਦ ਜ਼ਬਰਦਸਤ ਵਾਪਸੀ
ਹਾਲਾਂਕਿ ਲਕਸ਼ਯ ਦੇ ਸਾਹਮਣੇ ਚੁਣੌਤੀ ਆਸਾਨ ਨਹੀਂ ਸੀ ਕਿਉਂਕਿ ਉਹ ਤਾਈਵਾਨੀ ਖਿਡਾਰੀ ਚਾਉ ਤਿਏਨ ਚੇਨ ਖਿਲਾਫ 4 ਮੈਚਾਂ 'ਚੋਂ ਸਿਰਫ 1 ਹੀ ਜਿੱਤ ਸਕਿਆ ਸੀ। ਇਸ ਮੈਚ ਦੀ ਸ਼ੁਰੂਆਤ ਵੀ ਲਕਸ਼ਯ ਲਈ ਚੰਗੀ ਨਹੀਂ ਰਹੀ ਅਤੇ ਸਖ਼ਤ ਮੁਕਾਬਲੇ ਵਿੱਚ ਤਾਈਵਾਨੀ ਖਿਡਾਰੀ ਨੇ ਪਹਿਲੀ ਗੇਮ 21-19 ਨਾਲ ਜਿੱਤ ਲਈ। ਇਸ ਤੋਂ ਬਾਅਦ ਲਕਸ਼ਯ ਨੇ ਹੈਰਾਨੀਜਨਕ ਵਾਪਸੀ ਕੀਤੀ ਅਤੇ ਚਾਉ ਨੂੰ ਵੀ ਸੰਭਲਣ ਦਾ ਮੌਕਾ ਨਹੀਂ ਦਿੱਤਾ। ਲਕਸ਼ੈ ਨੇ ਅਗਲੇ ਦੋ ਗੇਮਾਂ ਵਿੱਚ ਤਾਈਵਾਨੀ ਸ਼ਟਲਰ ਦੀਆਂ ਕੋਸ਼ਿਸ਼ਾਂ ਨੂੰ ਨਾਕਾਮ ਕਰ ਦਿੱਤਾ ਅਤੇ ਜ਼ਬਰਦਸਤ ਸਮੈਸ਼ ਅਤੇ ਚਲਾਕ ਡਰਾਪ ਸ਼ਾਟ ਨਾਲ ਮੈਚ ਜਿੱਤ ਲਿਆ।
ਰਚਿਆ ਇਤਿਹਾਸ, ਹੁਣ ਤਮਗਾ ਹਾਸਲ ਕਰਨ 'ਤੇ ਨਜ਼ਰ
ਇਸ ਨਾਲ ਲਕਸ਼ਯ ਨੇ ਪੈਰਿਸ ਓਲੰਪਿਕ ਦੇ ਸੈਮੀਫਾਈਨਲ 'ਚ ਜਗ੍ਹਾ ਬਣਾਈ ਅਤੇ ਅਜਿਹਾ ਕਰਨ ਵਾਲੇ ਪਹਿਲੇ ਭਾਰਤੀ ਪੁਰਸ਼ ਸ਼ਟਲਰ ਬਣ ਗਏ। ਉਸ ਤੋਂ ਪਹਿਲਾਂ ਕੋਈ ਵੀ ਖਿਡਾਰੀ ਕੁਆਰਟਰ ਫਾਈਨਲ ਤੋਂ ਅੱਗੇ ਨਹੀਂ ਵਧ ਸਕਿਆ ਸੀ। ਵਿਸ਼ਵ ਚੈਂਪੀਅਨਸ਼ਿਪ ਅਤੇ ਆਲ ਇੰਗਲੈਂਡ ਚੈਂਪੀਅਨਸ਼ਿਪ ਵਰਗੇ ਟੂਰਨਾਮੈਂਟਾਂ ਦੇ ਫਾਈਨਲ 'ਚ ਪਹੁੰਚ ਚੁੱਕੇ ਸਿਰਫ 22 ਸਾਲਾ ਲਕਸ਼. ਕੋਲ ਹੁਣ ਫਾਈਨਲ 'ਚ ਪਹੁੰਚ ਕੇ ਤਮਗਾ ਪੱਕਾ ਕਰਨ ਦਾ ਮੌਕਾ ਹੈ। ਜੇਕਰ ਉਹ ਅਜਿਹਾ ਕਰਦਾ ਹੈ ਤਾਂ ਬੈਡਮਿੰਟਨ 'ਚ ਭਾਰਤ ਦਾ ਇਹ ਚੌਥਾ ਓਲੰਪਿਕ ਤਮਗਾ ਹੋਵੇਗਾ।
- PTC NEWS
