Canada Sikh Women Murder : ਕੈਨੇਡਾ 'ਚ ਸਿੱਖ ਔਰਤ ਦਾ ਕਤਲ; ਪਤੀ ਗ੍ਰਿਫ਼ਤਾਰ, ਗੁਆਂਢੀਆਂ ਨੇ ਕੀਤੇ ਹੈਰਾਨੀਜਨਕ ਖੁਲਾਸੇ
Canada Sikh Women Murder : ਕੈਨੇਡਾ 'ਚ ਇੱਕ ਸਿੱਖ ਔਰਤ ਦਾ ਕਤਲ ਕੀਤੇ ਜਾਣ ਦੀ ਖ਼ਬਰ ਸਾਹਮਣੇ ਆਈ ਹੈ। ਪੁਲਿਸ ਨੇ ਇਸ ਮਾਮਲੇ ਵਿੱਚ ਪਤੀ ਨੂੰ ਗ੍ਰਿਫ਼ਤਾਰ ਕੀਤਾ ਹੈ। ਓਨਟਾਰੀਓ ਦੇ ਲੰਡਨ 'ਚ 30 ਸਾਲਾ ਕੁੜੀ ਦੀ ਮੌਤ ਨੂੰ ਪੁਲਿਸ ਨੇ ਨਾਰੀ ਹੱਤਿਆ ਦੱਸਿਆ ਹੈ। ਇਹ ਘਟਨਾ 15 ਸਤੰਬਰ ਨੂੰ ਸਮਰਸਾਈਡ ਖੇਤਰ ਵਿੱਚ ਚੈਲਟਨ ਰੋਡ 'ਤੇ ਇੱਕ ਘਰ ਵਿੱਚ ਵਾਪਰੀ ਸੀ। ਜਦੋਂ ਪੁਲਿਸ ਪਹੁੰਚੀ, ਤਾਂ ਉਨ੍ਹਾਂ ਨੇ ਦੋ ਬੱਚਿਆਂ ਦੀ ਮਾਂ ਰਮਨ ਦੇਵੀ ਨੂੰ ਗੰਭੀਰ ਜ਼ਖਮੀ ਹਾਲਤ ਵਿੱਚ ਪਾਇਆ। ਉਸਨੂੰ ਹਸਪਤਾਲ ਲਿਜਾਇਆ ਗਿਆ, ਪਰ ਬਾਅਦ ਵਿੱਚ ਉਸਦੀ ਮੌਤ ਹੋ ਗਈ।
ਪੁਲਿਸ ਨੇ ਉਸਦੇ ਪਤੀ, 41 ਸਾਲਾ ਮੈਂਡੀ ਸਿੰਘ ਨੂੰ ਗ੍ਰਿਫਤਾਰ ਕਰਕੇ ਦੂਜੇ ਦਰਜੇ ਦੇ ਕਤਲ ਦਾ ਦੋਸ਼ ਲਗਾਇਆ ਹੈ।
ਗੁਆਂਢੀਆਂ ਨੇ ਕੀਤੇ ਹੈਰਾਨੀਜਨਕ ਖੁਲਾਸੇ
ਗੁਆਂਢੀਆਂ ਨੇ CBC News ਨੂੰ ਦੱਸਿਆ ਕਿ ਪੁਲਿਸ ਦੇ ਪਹੁੰਚਣ ਤੋਂ ਪਹਿਲਾਂ ਰਮਨ ਦੇਵੀ ਦੀ ਮਾਂ ਨੂੰ ਦੋਵੇਂ ਬੱਚਿਆਂ ਨਾਲ ਬਹੁਤ ਹੀ ਪਰੇਸ਼ਾਨ ਹਾਲਤ ਵਿੱਚ ਘਰ ਤੋਂ ਬਾਹਰ ਨਿਕਲਦੇ ਦੇਖਿਆ ਗਿਆ ਸੀ।
ਗੁਆਂਢੀ ਸੈਮ ਅਵਦੀ ਨੇ ਦੱਸਿਆ ਕਿ ਉਸ ਨੇ ਇੱਕ ਬਜ਼ੁਰਗ ਔਰਤ ਨੂੰ ਘਰ ਤੋਂ ਬਾਹਰ ਆਉਂਦੇ ਦੇਖਿਆ। ਉਹ ਉੱਚੀ ਆਵਾਜ਼ ਵਿੱਚ ਚੀਕ ਰਹੀ ਸੀ ਅਤੇ ਆਪਣੇ ਆਪ ਨੂੰ ਮਾਰ ਰਹੀ ਸੀ। ਉਸ ਦੇ ਨਾਲ ਦੋਵੇਂ ਬੱਚੇ ਵੀ ਸਨ। ਉਸ ਨੇ ਕਿਹਾ ਕਿ ਇਹ ਘਟਨਾ ਬਹੁਤ ਹੀ ਦੁਖਦਾਈ ਸੀ ਅਤੇ ਸ਼ਹਿਰ ਵਿੱਚ ਆਪਣੇ 40 ਸਾਲਾਂ ਦੇ ਰਹਿਣ ਦੌਰਾਨ ਉਸ ਨੇ ਅਜਿਹਾ ਕੁਝ ਪਹਿਲਾਂ ਕਦੇ ਨਹੀਂ ਦੇਖਿਆ।
ਲੰਡਨ ਫ੍ਰੀ ਪ੍ਰੈੱਸ ਮੁਤਾਬਕ, ਦੇਵੀ ਮਸਾਜ ਥੈਰੇਪੀ ਦੀ ਪੜ੍ਹਾਈ ਕਰ ਰਹੀ ਸੀ ਅਤੇ ਉਸ ਦੀ ਮੌਤ ਨਾਲ ਉਸ ਦੇ ਸਹਿਪਾਠੀਆਂ ਨੂੰ ਵੀ ਡੂੰਘਾ ਸਦਮਾ ਲੱਗਾ ਹੈ।
ਉਸ ਦੀ ਸਹਿਪਾਠੀ ਸੈਂਡਰਾ ਸਾਂਚੇਜ਼ ਨੇ ਵੀ ਆਨਲਾਈਨ ਫੰਡਰੇਜ਼ਰ ਸ਼ੁਰੂ ਕੀਤਾ। ਉਸ ਨੇ ਰਮਨ ਦੇਵੀ ਨੂੰ ਯਾਦ ਕਰਦਿਆਂ ਕਿਹਾ ਕਿ ਉਸ ਦੀ ਮੌਜੂਦਗੀ ਆਲੇ-ਦੁਆਲੇ ਦੇ ਲੋਕਾਂ ਲਈ ਖੁਸ਼ੀ ਅਤੇ ਪਿਆਰ ਲੈ ਕੇ ਆਉਂਦੀ ਸੀ। ਉਸ ਨੇ ਕਿਹਾ ਕਿ ਰਮਨ ਦੇਵੀ ਦੀ ਉਨ੍ਹਾਂ ਦੇ ਦਿਲਾਂ ਵਿੱਚ ਹਮੇਸ਼ਾ ਇੱਕ ਖਾਸ ਜਗ੍ਹਾ ਰਹੇਗੀ।
ਬੱਚਿਆਂ ਲਈ ਮਾਂ ਨੂੰ ਗੁਆਉਣ ਦਾ ਦਰਦ ਅਸਹਿ
ਗੁਰਦੁਆਰਾ ਲੰਡਨ ਸਿੱਖ ਸੋਸਾਇਟੀ ਵੱਲੋਂ ਵੀ ਰਮਨ ਦੇਵੀ ਲਈ ਫੰਡਰੇਜ਼ਰ ਸ਼ੁਰੂ ਕੀਤਾ ਗਿਆ ਹੈ। ਫੰਡਰੇਜ਼ਰ ਵਿੱਚ ਕਿਹਾ ਗਿਆ, “ਮਾਂ ਨੂੰ ਗੁਆਉਣ ਦਾ ਦਰਦ ਅਸਹਿ ਹੈ। ਰਮਨ ਦੇਵੀ ਦੇ ਛੋਟੇ ਬੱਚਿਆਂ ਲਈ ਇਹ ਘਾਟਾ ਖਾਸ ਤੌਰ ’ਤੇ ਦਿਲ ਤੋੜਨ ਵਾਲਾ ਹੈ, ਕਿਉਂਕਿ ਹੁਣ ਉਨ੍ਹਾਂ ਨੂੰ ਆਪਣੀ ਮਾਂ ਦੇ ਪਿਆਰ, ਦੇਖਭਾਲ, ਮਾਰਗਦਰਸ਼ਨ ਅਤੇ ਸਹਾਰਾ ਦੇਣ ਵਾਲੀ ਮੌਜੂਦਗੀ ਤੋਂ ਬਿਨਾਂ ਅਗਲਾ ਜੀਵਨ ਬਿਤਾਉਣਾ ਪਵੇਗਾ। ਕਿਸੇ ਵੀ ਬੱਚੇ ਨੂੰ ਇੰਨੀ ਛੋਟੀ ਉਮਰ ਵਿੱਚ ਅਜਿਹਾ ਡੂੰਘਾ ਘਾਟਾ ਨਹੀਂ ਸਹਿਣਾ ਚਾਹੀਦਾ।”
ਇਹ ਵੀ ਪੜ੍ਹੋ...
ਵਿਧਾਨ ਸਭਾ ਚੋਣਾਂ ਤੋਂ ਠੀਕ ਪਹਿਲਾਂ ਪੰਜਾਬ ਦੀਆਂ ਪ੍ਰਾਈਵੇਟ ਯੂਨੀਵਰਸਿਟੀਆਂ 'ਚ ਵਿਰੋਧ ਪ੍ਰਦਰਸ਼ਨਾਂ ਦੇ ਭਾਂਬੜ ਕਿਉਂ ?
- PTC NEWS
