ਲੁਧਿਆਣਾ ਦੇ ਪਿੰਡ ਚੌਂਕੀਮਾਨ 'ਚ ਭਤੀਜੇ ਨੇ 18 ਹਜ਼ਾਰ ਲਈ ਕੀਤਾ ਚਾਚੇ ਦਾ ਕਤਲ,ਮਾਮਲਾ ਦਰਜ
ਲੁਧਿਆਣਾ ਦੇ ਪਿੰਡ ਚੌਂਕੀਮਾਨ 'ਚ ਭਤੀਜੇ ਨੇ 18 ਹਜ਼ਾਰ ਲਈ ਕੀਤਾ ਚਾਚੇ ਦਾ ਕਤਲ,ਮਾਮਲਾ ਦਰਜ:ਲੁਧਿਆਣਾ-ਜਗਰਾਉਂ ਮੁੱਖ ਮਾਰਗ 'ਤੇ ਪੈਂਦੇ ਪਿੰਡ ਚੌਂਕੀਮਾਨ ਵਿਖੇ ਭਤੀਜੇ ਨੇ 18 ਹਜ਼ਾਰ ਰੁਪਏ ਦੀ ਖ਼ਾਤਰ ਅਪਣੇ ਚਾਚੇ ਦਲਜੀਤ ਸਿੰਘ ਦਾ ਕਤਲ ਕਰ ਦਿੱਤਾ ਹੈ।ਥਾਣਾ ਦਾਖਾ ਦੀ ਪੁਲਿਸ ਨੇ ਮ੍ਰਿਤਕ ਦਲਜੀਤ ਸਿੰਘ ਦੀ ਲਾਸ਼ ਨੂੰ ਕਬਜ਼ੇ ਵਿਚ ਲੈ ਉਸ ਦੀ ਪਤਨੀ ਪਰਮਿੰਦਰ ਕੌਰ ਦੇ ਬਿਆਨਾਂ ਦੇ ਆਧਾਰ 'ਤੇ ਮੁਲਜ਼ਮ ਰਾਜਿੰਦਰ ਸਿੰਘ (ਭਤੀਜਾ) ਪੁੱਤਰ ਸਵਰਗਵਾਸੀ ਪਰਮਜੀਤ ਸਿੰਘ ਦੇ ਵਿਰੁਧ ਮਾਮਲਾ ਦਰਜ ਕੀਤਾ ਹੈ।
ਉਕਤ ਮਾਮਲੇ ਦੇ ਤਫ਼ਤੀਸ਼ੀ ਅਫਸਰ ਏ.ਐਸ.ਆਈ ਸੁਰਜੀਤ ਸਿੰਘ ਨੇ ਦੱਸਿਆ ਕਿ ਇੰਦਰਜੀਤ ਸਿੰਘ,ਪਰਮਜੀਤ ਸਿੰਘ ਅਤੇ ਦਲਜੀਤ ਸਿੰਘ ਪੁੱਤਰਾਨ ਗੁਰਮੇਲ ਸਿੰਘ ਵਾਸੀਆਨ ਚੌਂਕੀਮਾਨ ਤਿੰਨ ਭਰਾ ਸਨ ਅਤੇ ਕਾਫੀ ਸਮਾਂ ਪਹਿਲਾਂ ਇੰਦਰਜੀਤ ਸਿੰਘ ਅਤੇ ਪਰਮਜੀਤ ਸਿੰਘ ਮੌਤ ਹੋ ਚੁੱਕੀ ਹੈ ਤੇ ਦਲਜੀਤ ਸਿੰਘ ਸਭ ਤੋਂ ਛੋਟਾ ਸੀ।
ਵੱਡੇ ਭਰਾ ਮ੍ਰਿਤਕ ਪਰਮਜੀਤ ਸਿੰਘ ਦੇ ਲੜਕੇ ਰਾਜਿੰਦਰ ਸਿੰਘ ਨੇ ਆਪਣੀ 1 ਕਿਲ੍ਹਾ ਖੇਤੀਬਾੜੀ ਵਾਲੀ ਜ਼ਮੀਨ ਅਪਣੇ ਚਾਚੇ ਦਲਜੀਤ ਸਿੰਘ ਨੂੰ 30 ਹਜ਼ਾਰ ਰੁਪਏ ਮਾਮਲੇ 'ਤੇ ਦਿਤੀ ਸੀ ਜਿਸ ਵਿਚ ਦਲਜੀਤ ਸਿੰਘ ਨੇ 12 ਹਜ਼ਾਰ ਰੁਪਏ ਅਪਣੇ ਭਤੀਜੇ ਰਾਜਿੰਦਰ ਸਿੰਘ ਨੂੰ ਦੇ ਦਿੱਤੇ ਅਤੇ ਉਸ ਵਿਚੋਂ ਬਾਕੀ ਰਹਿੰਦੇ ਪੈਸੇ 18 ਹਜਾਰ ਰੁਪਏ ਉਸ ਨੇ ਮੰਡੀ ਵਿਚ ਕਣਕ ਵੇਚ ਕੇ ਦੇਣੇ ਸਨ।
ਸਿੱਟੇ ਵਜੋਂ ਬੀਤੀ ਸ਼ਾਮ ਰਾਜਿੰਦਰ ਸਿੰਘ ਨੇ ਆਪਣੇ ਚਾਚੇ ਦਲਜੀਤ ਸਿੰਘ ਤੋਂ ਬਾਕੀ ਰਹਿੰਦੇ ਪੈਸੇ ਦੇਣ ਲਈ ਆਖਿਆ ਅਤੇ ਜਦ ਉਸ ਦੇ ਚਾਚੇ ਦਲਜੀਤ ਸਿੰਘ ਨੇ ਟਰਾਲੀ ਵਿਚ ਪਈ ਕਣਕ ਮੰਡੀ ਵਿਚ ਵੇਚ ਕੇ ਪੈਸੇ ਦੇਣ ਦੀ ਗੱਲ ਕੀਤੀ ਤਾਂ ਕਥਿਤ ਦੋਸ਼ੀ ਰਾਜਿੰਦਰ ਸਿੰਘ ਕਹੀ ਦੇ ਦਸਤੇ ਨਾਲ ਅਪਣੇ ਚਾਚੇ 'ਤੇ ਹਮਲਾ ਕਰ ਦਿਤਾ ਜਿਸ ਨੂੰ ਬੇਹੋਸ਼ੀ ਦੀ ਹਾਲਤ ਵਿਚ ਸਿਵਲ ਹਸਪਤਾਲ ਜਗਰਾਉਂ ਪਹੁੰਚਾਇਆ ਗਿਆ,ਜਿਥੇ ਅੱਧੀ ਰਾਤ ਦਲਜੀਤ ਸਿੰਘ ਦੀ ਮੌਤ ਹੋ ਗਈ।
-PTCNews
