Operation Sindoor : ਭਾਰਤ ਨੇ ਵੀ ਜੰਗ ਦੌਰਾਨ ਆਪਣੇ ਕੁੱਝ ਲੜਾਕੂ ਜਹਾਜ਼ ਗੁਆਏCDS ਚੌਹਾਨ ਨੇ ਪਾਕਿਸਤਾਨ ਦੇ 6 ਜਹਾਜ਼ਾਂ ਦੇ ਦਾਅਵੇ ਨੂੰ ਕੀਤਾ ਰੱਦ

Operation Sindoor : ਚੀਫ਼ ਆਫ਼ ਡਿਫੈਂਸ ਸਟਾਫ਼ (CDS) ਜਨਰਲ ਅਨਿਲ ਚੌਹਾਨ (General Anil Chohan) ਨੇ ਪਹਿਲੀ ਵਾਰ ਜਨਤਕ ਤੌਰ 'ਤੇ ਸਵੀਕਾਰ ਕੀਤਾ ਹੈ ਕਿ ਇਸ ਮਹੀਨੇ ਪਾਕਿਸਤਾਨ ਨਾਲ ਹੋਈ ਜੰਗ (India-Pakista War) ਵਿੱਚ ਭਾਰਤ ਨੇ ਆਪਣੇ ਕੁਝ ਲੜਾਕੂ ਜਹਾਜ਼ ਗੁਆ ਦਿੱਤੇ ਹਨ। ਹਾਲਾਂਕਿ, ਉਨ੍ਹਾਂ ਨੇ ਪਾਕਿਸਤਾਨ ਦੇ ਇਸ ਦਾਅਵੇ ਨੂੰ ਪੂਰੀ ਤਰ੍ਹਾਂ ਰੱਦ ਕਰ ਦਿੱਤਾ ਕਿ ਉਸ ਦੇ ਪਾਇਲਟਾਂ ਨੇ ਛੇ ਭਾਰਤੀ ਜਹਾਜ਼ਾਂ ਨੂੰ ਡੇਗ ਦਿੱਤਾ ਸੀ। ਸ਼ਾਂਗਰੀ-ਲਾ ਡਾਇਲਾਗ ਵਿੱਚ ਬਲੂਮਬਰਗ ਟੀਵੀ ਨਾਲ ਗੱਲ ਕਰਦੇ ਹੋਏ ਜਨਰਲ ਚੌਹਾਨ ਨੇ ਕਿਹਾ, "ਇਹ ਮਹੱਤਵਪੂਰਨ ਨਹੀਂ ਹੈ ਕਿ ਜਹਾਜ਼ ਡਿੱਗਿਆ, ਸਗੋਂ ਇਹ ਕਿਉਂ ਡਿੱਗਿਆ। ਕੀ ਗਲਤ ਹੋਇਆ, ਇਹ ਜ਼ਿਆਦਾ ਮਾਇਨੇ ਰੱਖਦਾ ਹੈ। ਗਿਣਤੀ ਇੰਨੀ ਮਹੱਤਵਪੂਰਨ ਨਹੀਂ ਹੈ।"

ਸੀਡੀਐਸ ਨੇ ਕਿਹਾ ਕਿ ਭਾਰਤੀ ਹਵਾਈ ਸੈਨਾ (Indian air Force) ਨੇ ਦੋ ਦਿਨਾਂ ਦੇ ਅੰਦਰ ਆਪਣੀ ਰਣਨੀਤਕ ਗਲਤੀ ਨੂੰ ਪਛਾਣ ਲਿਆ, ਇਸਨੂੰ ਠੀਕ ਕੀਤਾ ਅਤੇ ਲੰਬੀ ਦੂਰੀ 'ਤੇ ਸਟੀਕ ਹਮਲੇ ਕਰਨ ਦੀ ਯੋਗਤਾ ਨਾਲ ਦੁਬਾਰਾ ਕਾਰਵਾਈ ਜਾਰੀ ਰੱਖੀ। ਚੰਗੀ ਗੱਲ ਇਹ ਹੈ ਕਿ ਅਸੀਂ ਸਮੇਂ ਸਿਰ ਆਪਣੀ ਗਲਤੀ ਨੂੰ ਪਛਾਣਨ ਦੇ ਯੋਗ ਸੀ, ਇਸਨੂੰ ਠੀਕ ਕੀਤਾ ਅਤੇ ਦੋ ਦਿਨਾਂ ਦੇ ਅੰਦਰ ਦੁਬਾਰਾ ਕਾਰਵਾਈ ਵਿੱਚ ਸ਼ਾਮਲ ਹੋ ਗਏ। ਸਾਡੇ ਜਹਾਜ਼ ਦੁਸ਼ਮਣ ਦੇ ਅੰਦਰ ਡੂੰਘਾਈ ਨਾਲ ਹਮਲਾ ਕਰ ਰਹੇ ਸਨ।

ਜਨਰਲ ਚੌਹਾਨ ਨੇ ਪਾਕਿਸਤਾਨ ਦੇ ਪ੍ਰਧਾਨ ਮੰਤਰੀ ਸ਼ਾਹਬਾਜ਼ ਸ਼ਰੀਫ ਦੇ ਉਸ ਬਿਆਨ ਨੂੰ ਵੀ ਰੱਦ ਕਰ ਦਿੱਤਾ ਜਿਸ ਵਿੱਚ ਉਨ੍ਹਾਂ ਨੇ ਛੇ ਭਾਰਤੀ ਜੈੱਟਾਂ ਨੂੰ ਡੇਗਣ ਦਾ ਦਾਅਵਾ ਕੀਤਾ ਸੀ। ਉਨ੍ਹਾਂ ਕਿਹਾ ਕਿ ਚੀਨ ਤੋਂ ਪਾਕਿਸਤਾਨ ਕੋਲ ਜੋ ਹਵਾਈ ਰੱਖਿਆ ਪ੍ਰਣਾਲੀ ਸੀ, ਉਹ ਇਸ ਟਕਰਾਅ ਵਿੱਚ ਪੂਰੀ ਤਰ੍ਹਾਂ ਅਸਫਲ ਹੋ ਗਈ। ਉਨ੍ਹਾਂ ਕਿਹਾ, ਚੀਨ ਤੋਂ ਪ੍ਰਾਪਤ ਪ੍ਰਣਾਲੀਆਂ ਉਨ੍ਹਾਂ ਦੀ ਰੱਖਿਆ ਨਹੀਂ ਕਰ ਸਕੀਆਂ। ਸਾਡੇ ਹਮਲੇ 300 ਕਿਲੋਮੀਟਰ ਅੰਦਰ ਹੋਏ, ਅਤੇ ਉਹ ਕੁਝ ਨਹੀਂ ਕਰ ਸਕੇ।

'ਹੁਣ ਜੰਗਬੰਦੀ ਹੈ, ਪਰ ਸ਼ਰਤਾਂ ਭਾਰਤ ਦੀਆਂ ਹਨ'

ਸੀਡੀਐਸ ਨੇ ਕਿਹਾ ਕਿ ਜੰਗਬੰਦੀ ਇਸ ਸਮੇਂ ਲਾਗੂ ਹੈ, ਪਰ ਭਾਰਤ ਨੇ ਸਪੱਸ਼ਟ ਲਾਲ ਲਕੀਰਾਂ ਨਿਰਧਾਰਤ ਕੀਤੀਆਂ ਹਨ। ਉਨ੍ਹਾਂ ਚੇਤਾਵਨੀ ਦਿੱਤੀ ਕਿ ਜੇਕਰ ਪਾਕਿਸਤਾਨ ਦੁਬਾਰਾ ਭੜਕਾਉਣ ਦੀ ਕੋਸ਼ਿਸ਼ ਕਰਦਾ ਹੈ, ਤਾਂ ਜਵਾਬ ਪਹਿਲਾਂ ਨਾਲੋਂ ਵੀ ਸਖ਼ਤ ਹੋਵੇਗਾ। ਸੀਡੀਐਸ ਨੇ ਕਿਹਾ, ਅਸੀਂ ਆਪਣੀਆਂ ਸ਼ਰਤਾਂ ਸਪੱਸ਼ਟ ਕਰ ਦਿੱਤੀਆਂ ਹਨ। ਹੁਣ ਫੈਸਲਾ ਪਾਕਿਸਤਾਨ ਦੇ ਹੱਥ ਵਿੱਚ ਹੈ ਕਿ ਉਹ ਕੀ ਕਰਦਾ ਹੈ।