ਪੰਜਾਬ ਚ ਚੋਰੀ ਕਰਕੇ UP ਚ ਬੰਗਲਾ ! ਬੱਚਿਆਂ ਨੇ ਖੋਲ੍ਹਿਆ ਮਾਪਿਆਂ ਦਾ ਭੇਤ, ਹਾਈ-ਪ੍ਰੋਫਾਈਲ ਚੋਰੀ ਨੂੰ ਲੈ ਕੇ ਖੰਨਾ ਪੁਲਿਸ ਦੇ ਵੱਡੇ ਖੁਲਾਸੇ

Khanna High Profile Chori : ਖੰਨਾ ਵਿੱਚ ਇੱਕ ਹੈਰਾਨ ਕਰਨ ਵਾਲੀ ਚੋਰੀ ਦੀ ਘਟਨਾ ਸਾਹਮਣੇ ਆਈ ਹੈ, ਜਿਸ ਨੇ ਵਿਸ਼ਵਾਸ, ਲਾਲਚ ਅਤੇ ਮਾਸੂਮੀਅਤ ਦੇ ਰਿਸ਼ਤੇ ਨੂੰ ਇੱਕ ਵਾਰ ਫਿਰ ਸਵਾਲਾਂ ਦੇ ਘੇਰੇ ਵਿੱਚ ਖੜਾ ਕਰ ਦਿੱਤਾ ਹੈ। ਇਹ ਮਾਮਲਾ ਸਿਰਫ ਚੋਰੀ ਦਾ ਨਹੀਂ, ਸਗੋਂ ਉਸ ਭਰੋਸੇ ਦੀ ਟੁੱਟਣ ਦੀ ਕਹਾਣੀ ਹੈ ਜੋ ਇੱਕ ਪਰਿਵਾਰ ਨੇ ਆਪਣੇ ਹੀ ਨੌਕਰ ‘ਤੇ ਕੀਤਾ ਸੀ।

ਜਾਣਕਾਰੀ ਮੁਤਾਬਕ ਸ਼ਹਿਰ ਦੇ ਇੱਕ ਉਦਯੋਗਪਤੀ ਪਰਿਵਾਰ, ਜੋ ਸੁਲੇਖ ਰਾਮ ਬਿਲਡਿੰਗ ਵਿੱਚ ਰਹਿੰਦਾ ਹੈ, ਨੇ ਕੋਵਿਡ ਸਮੇਂ ਦੌਰਾਨ ਆਪਣੀ ਬਜ਼ੁਰਗ ਮਹਿਲਾ ਸੁਵੇਲਾ ਕੰਵਰ (65) ਦੀ ਦੇਖਭਾਲ ਲਈ ਨਨਕੂ ਉਰਫ ਪੱਪੂ ਚੌਧਰੀ ਨੂੰ ਰੱਖਿਆ ਸੀ। ਨਨਕੂ ਆਪਣੇ ਪਰਿਵਾਰ ਸਮੇਤ ਘਰ ਦੇ ਇੱਕ ਕਵਾਰਟਰ ਵਿੱਚ ਰਹਿੰਦਾ ਸੀ ਅਤੇ ਹੌਲੀ-ਹੌਲੀ ਪਰਿਵਾਰ ਦਾ ਭਰੋਸੇਯੋਗ ਹਿੱਸਾ ਬਣ ਗਿਆ। ਉਸਨੂੰ ਘਰ ਦੇ ਹਰ ਕੋਨੇ ਅਤੇ ਅਲਮਾਰੀਆਂ ਤੱਕ ਦੀ ਪੂਰੀ ਜਾਣਕਾਰੀ ਹੋ ਗਈ ਸੀ।

ਘਰ ਦੇ ਨੌਕਰ ਨੇ ਪਤਨੀ ਨਾਲ ਮਿਲ ਕੇ ਬਣਾਈ ਸੀ ਯੋਜਨਾ

ਕੁੱਝ ਸਮਾਂ ਪਹਿਲਾਂ ਘਰ ਦੀ ਸਫਾਈ ਦੌਰਾਨ ਨਨਕੂ ਨੂੰ ਪਤਾ ਲੱਗਾ ਕਿ ਪਰਿਵਾਰ ਦੀ ਧੀ, ਜੋ ਦੁਬਈ ਰਹਿੰਦੀ ਹੈ, ਆਪਣੇ ਕੀਮਤੀ ਗਹਿਣੇ ਘਰ ਦੀ ਅਲਮਾਰੀ ਵਿੱਚ ਰੱਖ ਕੇ ਗਈ ਹੋਈ ਹੈ। ਇਹ ਗਹਿਣੇ ਇੱਕ ਕਰੋੜ ਤੋਂ ਵੱਧ ਦੀ ਕੀਮਤ ਦੇ ਦੱਸੇ ਜਾ ਰਹੇ ਹਨ। ਇਥੇ ਹੀ ਉਸਦੇ ਮਨ ਵਿੱਚ ਲਾਲਚ ਪੈਦਾ ਹੋਇਆ ਅਤੇ ਉਸਨੇ ਆਪਣੀ ਪਤਨੀ ਸਪਨਾ ਨਾਲ ਮਿਲ ਕੇ ਚੋਰੀ ਦੀ ਯੋਜਨਾ ਬਣਾਈ। ਕੁੱਝ ਦਿਨ ਪਹਿਲਾਂ ਜਦੋਂ ਪਰਿਵਾਰ ਦੀ ਧੀ ਵਾਪਸ ਆਈ ਅਤੇ ਇੱਕ ਸਮਾਰੋਹ ਲਈ ਤਿਆਰ ਹੋਣ ਵਾਸਤੇ ਅਲਮਾਰੀ ਖੋਲੀ, ਤਾਂ ਉਸਦੇ ਹੋਸ਼ ਉੱਡ ਗਏ। ਅੰਦਰੋਂ ਜ਼ਿਆਦਾਤਰ ਗਹਿਣੇ ਗਾਇਬ ਸਨ। ਪਰਿਵਾਰ ਨੇ ਤੁਰੰਤ ਨਨਕੂ ਨਾਲ ਪੁੱਛਗਿੱਛ ਕੀਤੀ, ਪਰ ਉਸਨੇ ਹਰ ਗੱਲ ਤੋਂ ਇਨਕਾਰ ਕਰ ਦਿੱਤਾ। ਇਸਤੋਂ ਬਾਅਦ ਪਰਿਵਾਰ ਨੇ ਆਪਣੇ ਤੌਰ ‘ਤੇ ਜਾਂਚ ਸ਼ੁਰੂ ਕੀਤੀ।

ਚੋਰੀ ਦੇ ਗਹਿਣਿਆਂ ਨਾਲ ਯੂਪੀ 'ਚ ਬਣਵਾਇਆ ਜਾ ਰਿਹਾ ਸੀ ਬੰਗਲਾ

ਜਾਂਚ ਦੌਰਾਨ ਪਤਾ ਲੱਗਾ ਕਿ ਨਨਕੂ, ਉੱਤਰ ਪ੍ਰਦੇਸ਼ 'ਚ ਆਪਣੇ ਪਿੰਡ ਵਿੱਚ ਇਕ ਵੱਡੀ ਕੋਠੀ ਬਣਵਾ ਰਿਹਾ ਸੀ ਅਤੇ ਉਸਨੇ ਮਹਿੰਗੇ ਮੋਬਾਈਲ ਤੇ ਬ੍ਰਾਂਡਡ ਕੱਪੜਿਆਂ ‘ਤੇ ਖਰਚਾ ਵਧਾ ਦਿੱਤਾ ਸੀ। ਇਹ ਸਾਰੀਆਂ ਗੱਲਾਂ ਸ਼ੱਕ ਨੂੰ ਯਕੀਨ ਵਿੱਚ ਬਦਲਣ ਲੱਗੀਆਂ। ਮਾਮਲੇ ਵਿੱਚ ਸਭ ਤੋਂ ਵੱਡਾ ਮੋੜ ਉਸ ਵੇਲੇ ਆਇਆ ਜਦੋਂ ਪਰਿਵਾਰ ਨੇ ਨਨਕੂ ਦੇ ਬੱਚਿਆਂ ਨਾਲ ਗੱਲਬਾਤ ਕੀਤੀ। ਮਾਸੂਮ ਬੱਚਿਆਂ ਨੇ ਸੱਚਾਈ ਬਿਆਨ ਕਰ ਦਿੱਤੀ।

ਦੋਵੇਂ ਪਤੀ-ਪਤਨੀ ਕਾਬੂ

ਨਨਕੂ ਦੇ 10 ਸਾਲਾ ਪੁੱਤਰ ਨੇ ਦੱਸਿਆ ਕਿ ਉਸਦਾ ਪਿਤਾ ਘਰ ਦੇ ਅੰਦਰ ਹੀ ਜ਼ਮੀਨ ਖੋਦ ਕੇ ਗਹਿਣੇ ਦੱਬਦਾ ਸੀ। ਬੱਚਿਆਂ ਵੱਲੋਂ ਦੱਸੇ ਸਥਾਨ ‘ਤੇ ਜਦੋਂ ਖੁਦਾਈ ਕੀਤੀ ਗਈ, ਤਾਂ ਉਥੋਂ ਕੁਝ ਗਹਿਣੇ ਬਰਾਮਦ ਹੋ ਗਏ। ਇਸ ਨਾਲ ਸਾਫ ਹੋ ਗਿਆ ਕਿ ਚੋਰੀ ਘਰ ਦੇ ਅੰਦਰੋਂ ਹੀ ਹੋਈ ਹੈ। ਮਾਮਲਾ ਪੁਲਿਸ ਕੋਲ ਪਹੁੰਚਣ ‘ਤੇ ਖੰਨਾ ਪੁਲਿਸ ਨੇ ਤੁਰੰਤ ਕਾਰਵਾਈ ਕਰਦਿਆਂ ਨਨਕੂ ਉਰਫ ਪੱਪੂ ਚੌਧਰੀ ਅਤੇ ਉਸਦੀ ਪਤਨੀ ਸਪਨਾ ਨੂੰ ਗ੍ਰਿਫਤਾਰ ਕਰ ਲਿਆ। ਦੋਹਾਂ ਨੂੰ ਰਿਮਾਂਡ ‘ਤੇ ਲੈ ਕੇ ਪੁੱਛਗਿੱਛ ਕੀਤੀ ਜਾ ਰਹੀ ਹੈ।

ਡੀਐਸਪੀ ਕਰਮਜੀਤ ਸਿੰਘ ਗਰੇਵਾਲ ਨੇ ਦੱਸਿਆ ਕਿ ਪੁਲਿਸ ਵੱਲੋਂ ਮੁਲਜ਼ਮ ਪਤੀ-ਪਤਨੀ ਨੂੰ ਕਾਬੂ ਕਰ ਲਿਆ ਗਿਆ ਹੈ ਅਤੇ ਰਿਮਾਂਡ ਦੌਰਾਨ ਕਰੀਬ ਪੰਜ ਤੋਲੇ ਸੋਨੇ ਦੇ ਗਹਿਣੇ ਵੀ ਬਰਾਮਦ ਕੀਤੇ ਗਏ ਹਨ। ਬਾਕੀ ਗਹਿਣਿਆਂ ਦੀ ਭਾਲ ਕੀਤੀ ਜਾ ਰਹੀ ਹੈ ਅਤੇ ਇਹ ਵੀ ਪਤਾ ਲਾਇਆ ਜਾ ਰਿਹਾ ਹੈ ਕਿ ਉਹ ਕਿਸਨੂੰ ਵੇਚੇ ਗਏ ਹਨ। ਪੁਲਿਸ ਜਾਂਚ ਵਿੱਚ ਇਹ ਵੀ ਸਾਹਮਣੇ ਆਇਆ ਹੈ ਕਿ ਨਨਕੂ ਖਿਲਾਫ 2019 ਵਿੱਚ ਮੰਡੀ ਗੋਬਿੰਦਗੜ੍ਹ ਵਿੱਚ ਵੀ ਚੋਰੀ ਦਾ ਮਾਮਲਾ ਦਰਜ ਸੀ। ਜੇਲ੍ਹ ਤੋਂ ਬਾਹਰ ਆਉਣ ਤੋਂ ਬਾਅਦ ਉਹ ਖੰਨਾ ਵਿੱਚ ਆ ਕੇ ਕੰਮ ਕਰਨ ਲੱਗ ਪਿਆ ਸੀ।