Champions Trophy 2025 : ਮੁਹੰਮਦ ਸ਼ਮੀ ਨੇ ਬਣਾਇਆ ਸਭ ਤੋਂ ਤੇਜ਼ 200 ਵਿਕਟਾਂ ਦਾ ਰਿਕਾਰਡ, ਕੋਹਲੀ ਨੇ ਅਜ਼ਹਰੂਦੀਨ ਦੀ ਕੀਤੀ ਬਰਾਬਰੀ

ਚੈਂਪੀਅਨਸ ਟਰਾਫੀ 'ਚ ਭਾਰਤ-ਬੰਗਲਾਦੇਸ਼ ਮੈਚ ਮੁਹੰਮਦ ਸ਼ਮੀ ਅਤੇ ਵਿਰਾਟ ਕੋਹਲੀ ਲਈ ਇਤਿਹਾਸਕ ਸਾਬਤ ਹੋਇਆ। ਸ਼ਮੀ ਨੇ ਇਸ ਮੈਚ ਦੌਰਾਨ ਵਨਡੇ ਕ੍ਰਿਕਟ 'ਚ ਆਪਣੀਆਂ 200 ਵਿਕਟਾਂ ਪੂਰੀਆਂ ਕੀਤੀਆਂ। ਉਸ ਨੇ ਸਭ ਤੋਂ ਘੱਟ ਗੇਂਦਾਂ 'ਚ 200 ਵਿਕਟਾਂ ਲੈਣ ਦਾ ਵਿਸ਼ਵ ਰਿਕਾਰਡ ਬਣਾਇਆ ਹੈ। ਇਸ ਮੈਚ ਵਿੱਚ ਵਿਰਾਟ ਕੋਹਲੀ ਨੇ ਮੁਹੰਮਦ ਅਜ਼ਹਰੂਦੀਨ ਦੇ ਸਭ ਤੋਂ ਵੱਧ ਕੈਚਾਂ ਦੇ ਰਿਕਾਰਡ ਦੀ ਬਰਾਬਰੀ ਕਰ ਲਈ ਹੈ।

ਭਾਰਤ-ਬੰਗਲਾਦੇਸ਼ ਮੈਚ ਤੋਂ ਪਹਿਲਾਂ ਮੁਹੰਮਦ ਸ਼ਮੀ ਦੇ ਨਾਂ 103 ਵਨਡੇ ਮੈਚਾਂ 'ਚ 197 ਵਿਕਟਾਂ ਸਨ। ਇਸੇ ਤਰ੍ਹਾਂ ਵਿਰਾਟ ਕੋਹਲੀ ਦੇ ਨਾਂ 154 ਕੈਚ ਸਨ। ਸ਼ਮੀ ਅਤੇ ਵਿਰਾਟ ਦੋਵਾਂ ਨੇ ਸ਼ਾਨਦਾਰ ਪ੍ਰਦਰਸ਼ਨ ਕਰਕੇ ਇਸ ਮੈਚ ਨੂੰ ਯਾਦਗਾਰ ਬਣਾ ਦਿੱਤਾ। ਦਿਲਚਸਪ ਗੱਲ ਇਹ ਹੈ ਕਿ ਦੋਵਾਂ ਨੇ ਇਕ ਹੀ ਗੇਂਦ 'ਤੇ ਰਿਕਾਰਡ ਬੁੱਕ 'ਚ ਆਪਣਾ ਨਾਂ ਦਰਜ ਕਰਵਾਇਆ। ਸ਼ਮੀ ਦੀ ਇਸ ਗੇਂਦ 'ਤੇ ਕੋਹਲੀ ਨੇ ਜਿਵੇਂ ਹੀ ਜ਼ਾਕਰ ਅਲੀ ਨੂੰ ਪੈਵੇਲੀਅਨ ਭੇਜਿਆ, ਨਵਾਂ ਰਿਕਾਰਡ ਬਣ ਗਿਆ।

ਮੁਹੰਮਦ ਸ਼ਮੀ ਆਪਣਾ ਅੱਠਵਾਂ ਓਵਰ ਲਿਆਉਣ ਤੋਂ ਪਹਿਲਾਂ ਬੰਗਲਾਦੇਸ਼ ਨੇ 5 ਵਿਕਟਾਂ 'ਤੇ 183 ਦੌੜਾਂ ਬਣਾ ਲਈਆਂ ਸਨ। ਤੌਹੀਦ ਹਿਰਦੋਏ ਅਤੇ ਜ਼ਾਕਰ ਅਲੀ ਨੇ ਸੈਂਕੜੇ ਵਾਲੀ ਸਾਂਝੇਦਾਰੀ ਕੀਤੀ ਸੀ। ਸ਼ਮੀ ਨੇ ਜ਼ਾਕਰ ਅਲੀ ਨੂੰ ਵਿਰਾਟ ਕੋਹਲੀ ਦੇ ਹੱਥੋਂ ਕੈਚ ਕਰਵਾ ਕੇ ਇਸ ਸਾਂਝੇਦਾਰੀ ਨੂੰ ਤੋੜਿਆ, ਇਹ ਮੈਚ ਵਿੱਚ ਉਨ੍ਹਾਂ ਦੀ ਤੀਜੀ ਵਿਕਟ ਸੀ ਅਤੇ ਕੋਹਲੀ ਦਾ ਦੂਜਾ ਕੈਚ। ਇਸ ਦੇ ਨਾਲ ਹੀ ਸ਼ਮੀ ਨੇ ਵਨਡੇ ਮੈਚਾਂ 'ਚ 200 ਵਿਕਟਾਂ ਪੂਰੀਆਂ ਕਰ ਲਈਆਂ ਹਨ।

ਮੁਹੰਮਦ ਸ਼ਮੀ ਨੇ ਵਨਡੇ ਮੈਚਾਂ 'ਚ ਸਭ ਤੋਂ ਘੱਟ ਗੇਂਦਾਂ (5126) ਗੇਂਦਬਾਜ਼ੀ ਕਰਕੇ 200 ਵਿਕਟਾਂ ਹਾਸਲ ਕੀਤੀਆਂ ਹਨ। ਉਸ ਤੋਂ ਪਹਿਲਾਂ ਇਹ ਰਿਕਾਰਡ ਮਿਸ਼ੇਲ ਸਟਾਰਕ ਦੇ ਨਾਂ ਸੀ। ਆਸਟ੍ਰੇਲੀਆ ਦੇ ਸਟਾਰਕ ਨੇ 5240 ਗੇਂਦਾਂ 'ਚ 200 ਵਿਕਟਾਂ ਪੂਰੀਆਂ ਕੀਤੀਆਂ ਸਨ। ਸ਼ਮੀ ਨੇ ਬੰਗਲਾਦੇਸ਼ ਖਿਲਾਫ 10 ਓਵਰਾਂ ਦੇ ਆਪਣੇ ਸਪੈੱਲ 'ਚ 53 ਦੌੜਾਂ ਦੇ ਕੇ 5 ਵਿਕਟਾਂ ਲਈਆਂ। ਆਪਣੇ ਵਨਡੇ ਕਰੀਅਰ ਵਿੱਚ ਇਹ ਛੇਵਾਂ ਮੌਕਾ ਹੈ ਜਦੋਂ ਸ਼ਮੀ ਨੇ ਇੱਕ ਪਾਰੀ ਵਿੱਚ 5 ਜਾਂ ਇਸ ਤੋਂ ਵੱਧ ਵਿਕਟਾਂ ਲਈਆਂ ਹਨ।

ਕੋਹਲੀ ਨੇ ਅਜ਼ਹਰ ਦੀ ਬਰਾਬਰੀ, ਪੋਂਟਿੰਗ ਦੇ ਨਿਸ਼ਾਨੇ 'ਤੇ

ਦੂਜੇ ਪਾਸੇ ਵਿਰਾਟ ਕੋਹਲੀ ਨੇ ਵਨਡੇ ਮੈਚਾਂ 'ਚ 156 ਕੈਚ ਲੈ ਕੇ ਮੁਹੰਮਦ ਅਜ਼ਹਰੂਦੀਨ ਦੀ ਬਰਾਬਰੀ ਕਰ ਲਈ ਹੈ। ਕੋਹਲੀ ਨੇ 298ਵੇਂ ਵਨਡੇ ਮੈਚ ਵਿੱਚ 156ਵਾਂ ਕੈਚ ਫੜਿਆ। ਅਜ਼ਹਰੂਦੀਨ ਨੇ 334 ਵਨਡੇ ਮੈਚਾਂ 'ਚ ਇਹ ਕਈ ਕੈਚ ਲਏ ਸਨ। ਹੁਣ ਦੁਨੀਆ 'ਚ ਸਿਰਫ ਦੋ ਅਜਿਹੇ ਖਿਡਾਰੀ ਹਨ, ਜਿਨ੍ਹਾਂ ਨੇ ਵਨਡੇ ਮੈਚਾਂ 'ਚ ਕੋਹਲੀ ਤੋਂ ਜ਼ਿਆਦਾ ਕੈਚ ਲਏ ਹਨ। ਇਹ ਦੋ ਖਿਡਾਰੀ ਮਹੇਲਾ ਜੈਵਰਧਨੇ ਅਤੇ ਰਿਕੀ ਪੋਂਟਿੰਗ ਹਨ। ਵਨਡੇ ਮੈਚਾਂ 'ਚ ਜੈਵਰਧਨੇ ਨੇ 218 ਅਤੇ ਰਿਕੀ ਪੋਂਟਿੰਗ ਨੇ 160 ਕੈਚ ਲਏ ਹਨ।