Mohali Dimple Murder Case ’ਚ ਵੱਡਾ ਖੁਲਾਸਾ; ਮੁਲਜ਼ਮ ਹਰਜਿੰਦਰ ਸਿੰਘ ਨੇ ਪੁੱਛਗਿੱਛ ’ਚ ਦੱਸਿਆ ਸਾਰਾ 'ਸੱਚ'
Mohali Dimple Murder Case News : ਮੁਹਾਲੀ ਦੇ ਸੈਕਟਰ 66 ਵਿੱਚ ਇੱਕ ਨਿੱਜੀ ਕੰਪਨੀ ਵਿੱਚ ਕੰਮ ਕਰਨ ਵਾਲੀ ਇੱਕ ਲੜਕੀ ਡਿੰਪਲ ਦੇ ਕਤਲ ਮਾਮਲੇ ’ਚ ਵੱਡੇ ਖੁਲਾਸੇ ਹੋਏ ਹਨ। ਮਾਮਲੇ ਦੇ ਮੁੱਖ ਮੁਲਜ਼ਮ ਹਰਜਿੰਦਰ ਸਿੰਘ ਵੱਲੋਂ ਕਈ ਅਹਿਮ ਖੁਲਾਸੇ ਕੀਤੇ ਗਏ ਹਨ ਅਤੇ ਨਾਲ ਹੀ ਆਪਣੇ ਪੂਰੇ ਪਲਾਨ ਬਾਰੇ ਵੀ ਦੱਸਿਆ।
'ਐਮਾਜ਼ਾਨ ਤੋਂ ਮੰਗਵਾਏ ਸੀ ਚਾਕੂ'
ਦੱਸ ਦਈਏ ਕਿ ਮੁਲਜ਼ਮ ਹਰਜਿੰਦਰ ਸਿੰਘ ਮਾਨ ਨੇ ਪੁੱਛਗਿੱਛ ਦੌਰਾਨ ਕਬੂਲ ਕੀਤਾ ਕਿ ਉਸਨੇ ਕਤਲ ਵਿੱਚ ਵਰਤੇ ਗਏ ਤਿੰਨ ਚਾਕੂ ਔਨਲਾਈਨ ਸ਼ਾਪਿੰਗ ਪਲੇਟਫਾਰਮ ਐਮਾਜ਼ਾਨ ਤੋਂ ਮੰਗਵਾਏ ਸਨ। ਪੁਲਿਸ ਹੁਣ ਚਾਕੂਆਂ ਦੀ ਖਰੀਦ ਨਾਲ ਸਬੰਧਤ ਸਾਰੇ ਡਿਜੀਟਲ ਰਿਕਾਰਡਾਂ ਅਤੇ ਹੋਰ ਸਬੂਤਾਂ ਦੀ ਜਾਂਚ ਕਰ ਰਹੀ ਹੈ। ਹਾਲਾਂਕਿ, ਕਤਲ ਵਿੱਚ ਵਰਤਿਆ ਗਿਆ ਚਾਕੂ ਬਰਾਮਦ ਕਰ ਲਿਆ ਗਿਆ ਹੈ। ਨਾਲ ਹੀ ਉਸਨੇ ਇਹ ਵੀ ਦੱਸਿਆ ਕਿ ਜੋ ਚਾਕੂ ਉਸ ਨੂੰ ਜਿਆਦਾ ਤੇਜ਼ਧਾਰ ਲੱਗਿਆ ਉਸ ਨੇ ਉਸੇ ਨੂੰ ਵਰਤਿਆ।
ਮੁਲਜ਼ਮ ਨੂੰ ਡਰ ਸੀ ਕਿ ਡਿੰਪਲ ਛੱਡ ਰਹੀ ਹੈ ਸ਼ਹਿਰ
ਪੁਲਿਸ ਦੇ ਅਨੁਸਾਰ, ਮਾਨ ਨੇ ਪੁੱਛਗਿੱਛ ਦੌਰਾਨ ਕਬੂਲ ਕੀਤਾ ਕਿ ਡਿੰਪਲ ਕੁਝ ਸਮੇਂ ਤੋਂ ਉਸ ਤੋਂ ਦੂਰੀ ਬਣਾ ਰਹੀ ਸੀ ਅਤੇ ਉਸ ਨਾਲ ਗੱਲਬਾਤ ਕਰਨਾ ਬੰਦ ਕਰ ਦਿੱਤਾ ਸੀ। ਇਸ ਕਾਰਨ ਮਾਨਸਿਕ ਤੌਰ ’ਤੇ ਪ੍ਰੇਸ਼ਾਨ ਸੀ। ਉਸਨੂੰ ਡਰ ਸੀ ਕਿ ਡਿੰਪਲ ਉਸ ਨਾਲ ਹਮੇਸ਼ਾ ਲਈ ਸਾਰੇ ਸੰਬੰਧ ਤੋੜ ਰਹੀ ਹੈ ਅਤੇ ਸ਼ਹਿਰ ਛੱਡ ਰਹੀ ਹੈ। ਇਸ ਡਰ ਅਤੇ ਗੁੱਸੇ ਨੇ ਉਸਨੂੰ ਇਹ ਭਿਆਨਕ ਅਪਰਾਧ ਕਰਨ ਲਈ ਮਜਬੂਰ ਕਰ ਦਿੱਤਾ।
ਗੱਲ ਕਰਨ ਲਈ ਗਿਆ ਸੀ ਮੁਲਜ਼ਮ
ਜਾਂਚ ਤੋਂ ਇਹ ਵੀ ਪਤਾ ਲੱਗਾ ਕਿ ਘਟਨਾ ਤੋਂ ਪਹਿਲਾਂ ਮੁਲਜ਼ਮ ਨੇ ਡਿੰਪਲ ਦੇ ਭਰਾ ਨਾਲ ਸੰਪਰਕ ਕਰਕੇ ਇਹ ਪਤਾ ਲਗਾਇਆ ਸੀ ਕਿ ਉਹ ਉਸ ਨਾਲ ਕਿਉਂ ਗੱਲ ਨਹੀਂ ਕਰ ਰਹੀ ਸੀ। ਹਾਲਾਂਕਿ, ਜਦੋਂ ਉਸਨੂੰ ਕੋਈ ਸਕਾਰਾਤਮਕ ਜਵਾਬ ਨਹੀਂ ਮਿਲਿਆ ਤਾਂ ਉਹ ਹੋਰ ਵੀ ਪਰੇਸ਼ਾਨ ਹੋ ਗਿਆ। ਪੁਲਿਸ ਪੁੱਛਗਿੱਛ ਦੌਰਾਨ, ਮੁਲਜ਼ਮ ਨੇ ਖੁਲਾਸਾ ਕੀਤਾ ਕਿ ਉਹ ਸ਼ੁਰੂ ਵਿੱਚ ਡਿੰਪਲ ਨੂੰ ਦੁਬਾਰਾ ਗੱਲ ਸ਼ੁਰੂ ਕਰਨ ਲਈ ਮਨਾਉਣ ਲਈ ਗਿਆ ਸੀ, ਪਰ ਉਹ ਇਸ ਦੌਰਾਨ ਆਪਣੇ ਨਾਲ ਇੱਕ ਚਾਕੂ ਵੀ ਲੈ ਕੇ ਗਿਆ ਸੀ।
ਜਦੋਂ ਉਸਨੇ ਡਿੰਪਲ ਨਾਲ ਗੱਲ ਕਰਨ ਦੀ ਕੋਸ਼ਿਸ਼ ਕੀਤੀ, ਤਾਂ ਉਸਨੇ ਸੁਣਨ ਤੋਂ ਇਨਕਾਰ ਕਰ ਦਿੱਤਾ। ਕੰਪਨੀ ਦੇ ਦਫ਼ਤਰ ਪਹੁੰਚਣ 'ਤੇ, ਉਸਨੇ ਉਸ 'ਤੇ ਬੇਰਹਿਮੀ ਨਾਲ ਹਮਲਾ ਕਰ ਦਿੱਤਾ। ਹਮਲੇ ਦੀ ਅਚਾਨਕਤਾ ਤੋਂ ਮੌਜੂਦ ਕਰਮਚਾਰੀ ਹੈਰਾਨ ਰਹਿ ਗਏ ਅਤੇ ਦਖਲ ਦੇਣ ਵਿੱਚ ਅਸਮਰੱਥ ਰਹੇ। ਡਿੰਪਲ ਦੀ ਸੱਟਾਂ ਕਾਰਨ ਤੁਰੰਤ ਮੌਤ ਹੋ ਗਈ।
ਇਹ ਸੀ ਪੂਰਾ ਮਾਮਲਾ
ਕਾਬਿਲੇਗੌਰ ਹੈ ਕਿ 4 ਜੂਨ ਦੀ ਸ਼ਾਮ ਨੂੰ ਮੁਹਾਲੀ ਦੇ ਫੇਜ਼ 11 ਵਿੱਚ ਇੱਕ ਨਿੱਜੀ ਕੰਪਨੀ ਦੇ ਦਫ਼ਤਰ ਵਿੱਚ ਹਰਜਿੰਦਰ ਸਿੰਘ ਵੱਲੋਂ ਇੱਕੋਂ ਦਫਤਰ ’ਚ ਕੰਮ ਕਰਨ ਵਾਲੀ ਲੜਕੀ ਡਿੰਪਲ ’ਤੇ ਚਾਕੂ ਨਾਲ ਹਮਲਾ ਕਰ ਦਿੱਤਾ ਸੀ, ਜਿਸ ਕਾਰਨ ਉਸਦੀ ਮੌਤ ਹੋ ਗਈ। ਇਸ ਹਮਲੇ ਮਗਰੋਂ ਉਸ ਨੇ ਖੁਦ ਨੂੰ ਵੀ ਮਾਰਨ ਦੀ ਕੋਸ਼ਿਸ਼ ਕੀਤੀ ਸੀ। ਪਰ ਇਲਾਜ ਦੌਰਾਨ ਉਸਦੀ ਜਾਨ ਬਚ ਗਈ ਅਤੇ ਬਾਅਦ ’ਚ ਪੁਲਿਸ ਨੇ ਉਸ ਨੂੰ ਗ੍ਰਿਫਤਾਰ ਕਰ ਲਿਆ।
ਇਹ ਵੀ ਪੜ੍ਹੋ : Gurdaspur ’ਚ ਮੰਡਰਾਇਆ ਹੜ੍ਹ ਦਾ ਖਤਰਾ ! ਸਠਿਆਲੀ ਹੈੱਡਵਰਕਸ ਨੇੜੇ ਨਹਿਰ ’ਚ ਪਿਆ ਵੱਡਾ ਪਾੜ
- PTC NEWS
