Russia Ukraine War : ਰੂਸ ਨੇ ਯੂਕਰੇਨ 'ਤੇ ਕੀਤਾ ਹਵਾਈ ਹਮਲਾ , ਯਾਤਰੀ ਟ੍ਰੇਨ ਅਤੇ ਰੇਲਵੇ ਸਟੇਸ਼ਨ ਨੂੰ ਬਣਾਇਆ ਨਿਸ਼ਾਨਾ, 30 ਲੋਕਾਂ ਦੀ ਮੌਤ ਅਤੇ ਕਈ ਜ਼ਖਮੀ
Russia Ukraine War : ਰੂਸ ਨੇ ਇੱਕ ਵਾਰ ਫਿਰ ਯੂਕਰੇਨ 'ਤੇ ਵੱਡਾ ਹਵਾਈ ਹਮਲਾ ਕੀਤਾ ਹੈ। ਰੂਸੀ ਹਮਲਿਆਂ ਵਿੱਚ ਇੱਕ ਯਾਤਰੀ ਰੇਲਗੱਡੀ ਨੂੰ ਨਿਸ਼ਾਨਾ ਬਣਾਇਆ ਗਿਆ ਹੈ। ਉੱਤਰੀ ਖੇਤਰ ਸੁਮੀ ਦੇ ਗਵਰਨਰ ਓਲੇਹ ਹਰੀਹੋਰੋਵ ਨੇ ਕਿਹਾ ਕਿ ਰੂਸੀ ਹਮਲੇ ਵਿੱਚ ਰੇਲਵੇ ਸਟੇਸ਼ਨ ਅਤੇ ਕੀਵ ਜਾ ਰਹੀ ਇੱਕ ਰੇਲਗੱਡੀ ਨੂੰ ਨਿਸ਼ਾਨਾ ਬਣਾਇਆ ਗਿਆ ਸੀ। ਰੇਲਗੱਡੀ ਨੂੰ ਕਾਫ਼ੀ ਨੁਕਸਾਨ ਪਹੁੰਚਿਆ ਹੈ। ਮੀਡੀਆ ਰਿਪੋਰਟਾਂ ਦੇ ਅਨੁਸਾਰ ਗਵਰਨਰ ਓਲੇਹ ਨੇ ਕਿਹਾ ਕਿ ਹਮਲੇ ਵਿੱਚ ਕਰੀਬ 30 ਮੌਤਾਂ ਹੋ ਗਈਆਂ ਹਨ ਅਤੇ ਕਈ ਲੋਕ ਜ਼ਖਮੀ ਹੋਏ ਹਨ। ਹਰੀਹੋਰੋਵ ਨੇ ਸੋਸ਼ਲ ਮੀਡੀਆ 'ਤੇ ਇੱਕ ਸੜਦੀ ਹੋਈ ਰੇਲਗੱਡੀ ਦੀ ਇੱਕ ਫੋਟੋ ਸਾਂਝੀ ਕੀਤੀ ਅਤੇ ਕਿਹਾ ਕਿ ਰਾਹਤ ਅਤੇ ਬਚਾਅ ਟੀਮਾਂ ਮੌਕੇ 'ਤੇ ਪਹੁੰਚ ਗਈਆਂ ਹਨ।
ਇਨ੍ਹਾਂ ਖੇਤਰਾਂ ਵਿੱਚ ਹਮਲੇ
ਇਹ ਹਮਲਾ ਰੂਸ ਦੇ ਹਵਾਈ ਹਮਲੇ ਦੀ ਮੁਹਿੰਮ ਦਾ ਹਿੱਸਾ ਦੱਸਿਆ ਜਾ ਰਿਹਾ ਹੈ, ਜੋ ਪਿਛਲੇ ਦੋ ਮਹੀਨਿਆਂ ਤੋਂ ਲਗਾਤਾਰ ਯੂਕਰੇਨ ਦੇ ਰੇਲਵੇ ਬੁਨਿਆਦੀ ਢਾਂਚੇ ਨੂੰ ਨਿਸ਼ਾਨਾ ਬਣਾ ਰਿਹਾ ਹੈ। ਰੂਸ ਲਗਭਗ ਰੋਜ਼ਾਨਾ ਯੂਕਰੇਨ ਦੇ ਆਵਾਜਾਈ ਨੈੱਟਵਰਕ 'ਤੇ ਹਮਲਾ ਕਰ ਰਿਹਾ ਹੈ। ਇੱਕ ਦਿਨ ਪਹਿਲਾਂ ਹੀ ਰੂਸ ਨੇ ਯੂਕਰੇਨ ਦੀ ਸਰਕਾਰੀ ਗੈਸ ਅਤੇ ਤੇਲ ਕੰਪਨੀ, ਨਫਟੋਗਾਜ਼ ਦੀਆਂ ਸਹੂਲਤਾਂ 'ਤੇ 35 ਮਿਜ਼ਾਈਲਾਂ ਅਤੇ 60 ਡਰੋਨ ਦਾਗੇ ਸਨ। ਇਹ ਹਮਲੇ ਖਾਰਕਿਵ ਅਤੇ ਪੋਲਟਾਵਾ ਖੇਤਰਾਂ ਵਿੱਚ ਹੋਏ।
ਲੰਬੇ ਸਮੇਂ ਤੱਕ ਬਲੈਕਆਊਟ ਦੀ ਸਮੱਸਿਆ
ਰੂਸੀ ਰੱਖਿਆ ਮੰਤਰਾਲੇ ਨੇ ਪੁਸ਼ਟੀ ਕੀਤੀ ਹੈ ਕਿ ਉਸਦੀਆਂ ਫੌਜਾਂ ਨੇ ਯੂਕਰੇਨ ਦੇ ਗੈਸ ਅਤੇ ਊਰਜਾ ਬੁਨਿਆਦੀ ਢਾਂਚੇ 'ਤੇ ਰਾਤੋ-ਰਾਤ ਵੱਡੇ ਪੱਧਰ 'ਤੇ ਹਮਲੇ ਕੀਤੇ। ਰੂਸ ਨੇ ਦਾਅਵਾ ਕੀਤਾ ਕਿ ਉਸਨੇ ਫੌਜੀ-ਉਦਯੋਗਿਕ ਸਥਾਨਾਂ ਨੂੰ ਵੀ ਨਿਸ਼ਾਨਾ ਬਣਾਇਆ। ਜਿਵੇਂ-ਜਿਵੇਂ ਸਰਦੀਆਂ ਨੇੜੇ ਆ ਰਹੀਆਂ ਹਨ, ਰੂਸ ਨੇ ਯੂਕਰੇਨ ਦੇ ਊਰਜਾ ਬੁਨਿਆਦੀ ਢਾਂਚੇ 'ਤੇ ਹਮਲੇ ਤੇਜ਼ ਕਰ ਦਿੱਤੇ ਹਨ, ਜਿਸ ਕਾਰਨ ਕਈ ਖੇਤਰਾਂ ਵਿੱਚ ਲੰਬੇ ਸਮੇਂ ਤੱਕ ਬਲੈਕਆਊਟ ਹੋ ਰਹੇ ਹਨ।
ਯੂਕਰੇਨ ਨੇ ਕੀਤਾ ਪਲਟਵਾਰ
ਯੂਕਰੇਨ ਨੇ ਵੀ ਆਪਣੀਆਂ ਜਵਾਬੀ ਕਾਰਵਾਈਆਂ ਤੇਜ਼ ਕਰ ਦਿੱਤੀਆਂ ਹਨ। ਹਾਲ ਹੀ ਦੇ ਮਹੀਨਿਆਂ ਵਿੱਚ ਕੀਵ ਦੀ ਫੌਜ ਨੇ ਰੂਸ ਦੇ ਅੰਦਰ ਤੇਲ ਰਿਫਾਇਨਰੀਆਂ 'ਤੇ ਹਮਲੇ ਵਧਾ ਦਿੱਤੇ ਹਨ, ਜਿਸ ਕਾਰਨ ਰੂਸ ਦੇ ਕਈ ਖੇਤਰਾਂ ਵਿੱਚ ਬਾਲਣ ਦੀ ਕਮੀ ਹੋ ਗਈ ਹੈ। ਸਿਰਫ਼ ਸਤੰਬਰ ਵਿੱਚ ਯੂਕਰੇਨ ਨੇ ਰੂਸ ਅਤੇ ਕਬਜ਼ੇ ਵਾਲੇ ਖੇਤਰਾਂ ਵਿੱਚ 19 ਤੇਲ ਸਥਾਪਨਾਵਾਂ 'ਤੇ ਡਰੋਨ ਹਮਲੇ ਕੀਤੇ।
- PTC NEWS
