ਇੱਧਰ ਧੀ ਦੀ ਡੋਲੀ ਉੱਠੀ, ਉੱਧਰ ਪਿਤਾ ਤੇ ਦਾਦੀ ਦੀ ਅਰਥੀ
ਬਸੀ ਪਠਾਣਾਂ - ਕੰਨਿਆਦਾਨ ਨੂੰ ਸੰਸਾਰ ਦਾ ਸਭ ਤੋਂ ਵੱਡਾ ਦਾਨ ਵੀ ਮੰਨਿਆ ਜਾਂਦਾ ਹੈ ਤੇ ਇੱਕ ਪਿਤਾ ਲਈ ਸਭ ਤੋਂ ਵੱਡਾ ਸੁਭਾਗ ਵੀ। ਪਰ ਬਸੀ ਪਠਾਣਾਂ 'ਚ ਵਾਪਰੇ ਦੁਖਾਂਤ 'ਚ ਧੀ ਦੇ ਵਿਆਹ ਲਈ ਚਾਵਾਂ ਨਾਲ ਲੱਗੇ ਪਿਤਾ ਨੂੰ ਕੰਨਿਆਦਾਨ ਕਰਨ ਤੋਂ ਪਹਿਲਾਂ ਹੀ ਕਾਲ ਨੇ ਲਪੇਟ ਵਿੱਚ ਲੈ ਲਿਆ ਤੇ ਨਾਲ ਹੀ ਉਸ ਵਿਆਹ ਵਾਲੀ ਲੜਕੀ ਦੀ ਵੀ ਮੌਤ ਹੋਣ ਨਾਲ ਇੱਕ ਘਰ 'ਚੋਂ ਮਾਂ ਤੇ ਪੁੱਤ ਦੀਆਂ ਦੋ ਅਰਥੀਆਂ ਇਕੱਠੀਆਂ ਉੱਠੀਆਂ।
ਘਟਨਾ ਇੱਥੋਂ ਦੇ ਮੁਹੱਲਾ ਵਾਰਡ ਨੰ. 5 ਦੀ ਹੈ ਜਿੱਥੇ 10 ਜੂਨ ਨੂੰ ਇੱਕ ਲੜਕੀ ਦਾ ਵਿਆਹ ਹੋਣਾ ਸੀ, ਜਿਸ ਦੀ ਬਾਰਾਤ ਜਲੰਧਰ ਤੋਂ ਆਉਣੀ ਸੀ। ਲੜਕੀ ਦੇ ਪਿਤਾ ਜਗਦੀਸ਼ ਕੁਮਾਰ ਦੇ ਰਿਸ਼ਤੇਦਾਰ ਰਵਿੰਦਰ ਕੁਮਾਰ ਰਿੰਕੂ ਵੱਲੋਂ ਦਿੱਤੀ ਜਾਣਕਾਰੀ ਅਨੁਸਾਰ ਲੜਕੀ ਦਾ ਪਰਿਵਾਰ ਖੁਸ਼ੀ-ਖੁਸ਼ੀ ਇਸ ਪਰਿਵਾਰ ਦੇ ਚਾਅ 'ਚ ਮਗਨ ਸੀ। 9 ਜੂਨ ਦੀ ਰਾਤ ਨੂੰ ਜਾਗੋ ਕੱਢੀ ਗਈ ਤੇ ਐੱਫ਼.ਸੀ.ਆਈ. 'ਚ ਨੌਕਰੀ ਕਰਦੇ ਲੜਕੀ ਦੇ ਪਿਤਾ ਜਗਦੀਸ਼ ਕੁਮਾਰ ਵੀ ਆਪਣੀ ਬੇਟੀ ਦੇ ਅਗਲੇ ਦਿਨ ਹੋਣ ਵਾਲੇ ਵਿਆਹ ਦੀਆਂ ਤਿਆਰੀਆਂ ਖੁਸ਼ੀ-ਖੁਸ਼ੀ ਨਿਪਟਾ ਕੇ ਲਈ ਰਾਤ ਨੂੰ ਆਪਣੇ ਕਮਰੇ 'ਚ ਜਾ ਕੇ ਸੌ ਗਏ।
ਅਗਲੀ ਸਵੇਰ ਜਦੋਂ ਉਨ੍ਹਾਂ ਨੂੰ ਜਗਾਉਣ ਦੀ ਕੋਸ਼ਿਸ਼ ਕੀਤੀ ਗਈ ਤਾਂ ਉਹ ਨਹੀਂ ਉੱਠੇ, ਜਿਸ ਤੋਂ ਬਾਅਦ ਉਨ੍ਹਾਂ ਨੂੰ ਪਹਿਲਾਂ ਸਿਵਲ ਹਸਪਤਾਲ ਬਸੀ ਪਠਾਣਾਂ ਤੇ ਫਿਰ ਪੀ.ਜੀ.ਆਈ. ਚੰਡੀਗੜ੍ਹ ਲਿਜਾਇਆ ਗਿਆ, ਜਿੱਥੇ ਡਾਕਟਰਾਂ ਵੱਲੋਂ ਉਨ੍ਹਾਂ ਨੂੰ ਮ੍ਰਿਤਕ ਘੋਸ਼ਿਤ ਕਰ ਦਿੱਤਾ ਗਿਆ। ਵਿਆਹ 'ਚ ਕੋਈ ਵਿਘਨ ਨਾ ਪਵੇ ਇਸ ਲਈ ਲੜਕੀ ਨੂੰ ਬਿਨਾਂ ਦੱਸੇ ਜਗਦੀਸ਼ ਕੁਮਾਰ ਦੀ ਲਾਸ਼ ਨੂੰ ਸਿਵਲ ਹਸਪਤਾਲ ਦੀ ਮੋਰਚਰੀ 'ਚ ਰਖਵਾ ਦਿੱਤਾ ਗਿਆ। ਕੁਝ ਦੇਰ ਬਾਅਦ ਬਾਰਾਤ ਆ ਗਈ, ਜਿਸ ਦੀਆਂ ਸਾਰੀਆਂ ਰਸਮਾਂ ਨੂੰ ਲੜਕੀ ਪਰਿਵਾਰ ਵਲੋਂ ਕਲੇਜੇ 'ਤੇ ਪੱਥਰ ਰੱਖ ਕੇ ਨਿਭਾਈਆਂ ਗਈਆਂ ਅਤੇ ਦੁਪਹਿਰ ਕਰੀਬ 3.30 ਵਜੇ ਜਦੋਂ ਡੋਲੀ ਵਿਦਾ ਹੋਣ ਦਾ ਸਮਾਂ ਹੋਇਆ ਤਾਂ ਇਸੇ ਦੌਰਾਨ ਲੜਕੀ ਦੀ ਦਾਦੀ ਕਮਲਾ ਦੇਵੀ (80) ਜੋ ਕਿ ਪਿਛਲੇ ਕਾਫ਼ੀ ਸਮੇਂ ਤੋਂ ਬੀਮਾਰ ਸੀ, ਉਨ੍ਹਾਂ ਨੇ ਵੀ ਦਮ ਤੋੜ ਦਿੱਤਾ।
ਲੜਕੀ ਨੂੰ ਇਸ ਬਾਰੇ ਵੀ ਬਿਨਾਂ ਦੱਸੇ ਉਸ ਦੀ ਡੋਲੀ ਵਿਦਾ ਕੀਤੀ ਗਈ, ਜਿਸ ਉਪਰੰਤ ਮਾਂ-ਪੁੱਤ ਦਾ ਅੰਤਿਮ ਸਸਕਾਰ ਕੀਤਾ ਗਿਆ। ਦੱਸਿਆ ਗਿਆ ਹੈ ਕਿ ਪਹਿਲਾਂ ਲੜਕੀ ਦਾ ਵਿਆਹ 17 ਅਪ੍ਰੈਲ ਨੂੰ ਹੋਣਾ ਸੀ ਪਰ ਲੌਕਡਾਊਨ ਕਰ ਕੇ ਇਹ ਤਰੀਕ ਅੱਗੇ ਪਾ ਦਿੱਤੀ ਗਈ ਸੀ ਤੇ ਹੁਣ ਲਾਕਡਾਊਨ ਖੁੱਲ੍ਹਣ 'ਤੇ ਵਿਆਹ 26 ਜੂਨ ਨੂੰ ਹੋਣਾ ਸੀ, ਪਰ ਲੜਕੀ ਦੀ ਦਾਦੀ ਦੀ ਤਬੀਅਤ ਜ਼ਿਆਦਾ ਖਰਾਬ ਹੋਣ ਕਰ ਕੇ ਵਿਆਹ 10 ਜੂਨ ਨੂੰ ਤੈਅ ਕੀਤਾ ਗਿਆ ਸੀ।
ਇੱਕ ਧੀ ਦੀ ਵਿਦਾਈ ਦੇ ਨਾਲ-ਨਾਲ, ਉਸੇ ਦਿਨ ਉਸੇ ਘਰ 'ਚੋਂ ਉਸ ਦੇ ਪਿਤਾ ਤੇ ਦਾਦੀ ਦੇ ਅੰਤਿਮ ਸਸਕਾਰ ਦੀ ਰੂਹ ਕੰਬਾਉਣ ਵਾਲੀ ਘਟਨਾ ਕਾਰਨ ਪੂਰੇ ਇਲਾਕੇ ਵਿੱਚ ਸੋਗ ਦਾ ਮਾਹੌਲ ਹੈ।