Andhra Pradesh : 2 ਸਾਲਾਂ ਚ 14 ਲੋਕਾਂ ਨੇ ਕੀਤਾ ਕੁੜੀ ਨਾਲ ਗੈਂਗਰੇਪ, 8 ਮਹੀਨੇ ਦੀ ਗਰਭਵਤੀ ਹੁਣ ਦੇਵੇਗੀ ਬੱਚੇ ਨੂੰ ਜਨਮ

Andhra Pradesh : ਆਂਧਰਾ ਪ੍ਰਦੇਸ਼ ਤੋਂ ਇੱਕ ਅਜਿਹਾ ਮਾਮਲਾ ਸਾਹਮਣੇ ਆਇਆ ਹੈ ,ਜੋ ਤੁਹਾਨੂੰ ਹੈਰਾਨ ਕਰ ਦੇਵੇਗਾ। ਇੱਕ 15 ਸਾਲਾ ਨਾਬਾਲਗ ਦਲਿਤ ਬੱਚੀ , ਜੋ ਹੁਣ ਅੱਠ ਮਹੀਨੇ ਦੀ ਗਰਭਵਤੀ ਹੈ, ਰਾਜ ਦੇ ਇੱਕ ਹਸਪਤਾਲ ਵਿੱਚ ਦਾਖਲ ਹੈ। ਉਸਦੀ ਹਾਲਤ ਨੂੰ ਵੇਖਦਿਆਂ ਡਾਕਟਰਾਂ ਅਤੇ ਪ੍ਰਸ਼ਾਸਨ ਨੇ ਫੈਸਲਾ ਕੀਤਾ ਹੈ ਕਿ ਉਸਨੂੰ ਜਣੇਪੇ ਤੱਕ ਹਸਪਤਾਲ ਵਿੱਚ ਰੱਖਿਆ ਜਾਵੇਗਾ। ਉਸਦਾ ਗਰਭਪਾਤ ਹੁਣ ਸੰਭਵ ਨਹੀਂ ਹੈ ਅਤੇ ਉਸਨੂੰ ਪਿੰਡ ਵਾਪਸ ਭੇਜਣਾ ਵੀ ਖ਼ਤਰਨਾਕ ਸਾਬਤ ਹੋ ਸਕਦਾ ਹੈ।

ਇਹ ਮਾਮਲਾ ਸਿਰਫ਼ ਜਿਨਸੀ ਹਿੰਸਾ ਦਾ ਨਹੀਂ ਹੈ, ਸਗੋਂ ਜਾਤੀ ਭੇਦਭਾਵ , ਸਮਾਜਿਕ ਅਸਮਾਨਤਾ ਅਤੇ ਸਰਕਾਰੀ ਪ੍ਰਣਾਲੀ ਦੀ ਨਾਕਾਮੀ ਦਾ ਸ਼ੀਸ਼ਾ ਹੈ। ਪੀੜਤਾ ਦਲਿਤ (ਮਡਿਗਾ) ਭਾਈਚਾਰੇ ਨਾਲ ਸਬੰਧਤ ਹੈ। ਜਦੋਂ ਉਸਦੀ ਜ਼ਿੰਦਗੀ ਤਬਾਹ ਹੋ ਗਈ ਤਾਂ ਉਹ ਅੱਠਵੀਂ ਜਮਾਤ ਵਿੱਚ ਸੀ। ਉਸਦੇ ਪਿਤਾ ਦੀ ਮੌਤ ਤੋਂ ਬਾਅਦ ਉਸਦੀ ਮਾਂ ਉਸਨੂੰ ਦੂਜੇ ਪਿੰਡ ਲੈ ਆਈ। ਇਕੱਲੀ ਮਾਂ ਅਤੇ ਆਰਥਿਕ ਤੰਗੀਆਂ ਨੇ ਬੱਚੀ ਨੂੰ ਬੇਵੱਸ ਬਣਾ ਦਿੱਤਾ ਅਤੇ ਪਿੰਡ ਦੇ ਉੱਚ ਸਮਾਜ ਦੇ 14 ਮੁੰਡਿਆਂ ਅਤੇ ਆਦਮੀਆਂ ਨੇ ਉਸਦਾ ਸ਼ੋਸ਼ਣ ਕਰਨਾ ਸ਼ੁਰੂ ਕਰ ਦਿੱਤਾ।

ਬਲੈਕਮੇਲ ਕੀਤਾ ਗਿਆ, ਫਿਰ 2 ਸਾਲ ਤੱਕ ਹੁੰਦਾ ਰਿਹਾ ਸ਼ੋਸ਼ਣ  

ਪੁਲਿਸ ਦੇ ਅਨੁਸਾਰ ਦੋ ਦੋਸ਼ੀਆਂ ਨੇ ਪਹਿਲਾਂ ਲੜਕੀ ਦੀ ਫੋਟੋ ਲਈ ਅਤੇ ਇਸਨੂੰ ਸੋਸ਼ਲ ਮੀਡੀਆ 'ਤੇ ਪੋਸਟ ਕਰਨ ਦੀ ਧਮਕੀ ਦਿੱਤੀ। ਇਸ ਤੋਂ ਬਾਅਦ ਉਨ੍ਹਾਂ ਨੇ ਉਸ ਨਾਲ ਬਲਾਤਕਾਰ ਕੀਤਾ ਅਤੇ ਇੱਕ ਵੀਡੀਓ ਵੀ ਬਣਾਈ। ਦੂਜੇ ਦੋਸ਼ੀਆਂ ਨੇ ਇਸ ਵੀਡੀਓ ਅਤੇ ਫੋਟੋ ਇਸ ਇਸਤੇਮਾਲ ਕਰਕੇ 2 ਸਾਲ ਤੱਕ ਪੀੜਤਾ ਦਾ ਸ਼ੋਸ਼ਣ ਕੀਤਾ। ਜਦੋਂ ਲੜਕੀ ਗਰਭਵਤੀ ਹੋ ਗਈ ਤਾਂ ਉਸਦੀ ਮਾਂ ਨੇ ਜੂਨ ਦੇ ਪਹਿਲੇ ਹਫ਼ਤੇ ਪੁਲਿਸ ਨੂੰ ਸ਼ਿਕਾਇਤ ਕੀਤੀ।

17 ਮੁਲਜ਼ਮਾਂ ਨੂੰ ਕੀਤਾ ਗਿਆ ਗ੍ਰਿਫ਼ਤਾਰ, ਜਿਨ੍ਹਾਂ ਵਿੱਚ ਤਿੰਨ ਨਾਬਾਲਗ ਵੀ ਸ਼ਾਮਲ 

ਹੁਣ ਤੱਕ ਪੁਲਿਸ ਨੇ ਇਸ ਮਾਮਲੇ ਵਿੱਚ 17 ਲੋਕਾਂ ਨੂੰ ਗ੍ਰਿਫ਼ਤਾਰ ਕੀਤਾ ਹੈ, ਜਿਨ੍ਹਾਂ ਵਿੱਚ 14 ਬਲਾਤਕਾਰ ਦੇ ਦੋਸ਼ੀ ਅਤੇ ਤਿੰਨ ਜੋ ਸਭ ਕੁਝ ਜਾਣਦੇ ਹੋਏ ਵੀ ਚੁੱਪ ਰਹੇ, ਜਿਨ੍ਹਾਂ ਵਿੱਚ ਉਸਦਾ ਇੱਕ ਸਹਿਪਾਠੀ ਵੀ ਸ਼ਾਮਲ ਹੈ। 17 ਵਿੱਚੋਂ ਤਿੰਨ ਮੁਲਜ਼ਮ ਨਾਬਾਲਗ ਹਨ ਅਤੇ ਬਾਕੀ 18 ਤੋਂ 51 ਸਾਲ ਦੀ ਉਮਰ ਦੇ ਹਨ।

ਪੁਲਿਸ ਸੁਪਰਡੈਂਟ ਵੀ. ਰਤਨਾ ਨੇ ਕਿਹਾ ਕਿ ਸਕੂਲ ਦੇ ਅਧਿਆਪਕਾਂ ਨੇ ਵੀ ਲੜਕੀ ਦੀ ਗੈਰਹਾਜ਼ਰੀ ਬਾਰੇ ਕੋਈ ਰਿਪੋਰਟ ਨਹੀਂ ਦਿੱਤੀ, ਭਾਵੇਂ ਉਹ 10ਵੀਂ ਜਮਾਤ ਵਿੱਚ ਸੀ। ਇਸ ਤੋਂ ਇਲਾਵਾ ਪਿੰਡ ਦੀਆਂ ਮਹਿਲਾ ਪੁਲਿਸ, ਆਂਗਣਵਾੜੀ ਵਰਕਰਾਂ ਅਤੇ ਆਸ਼ਾ ਵਰਕਰਾਂ, ਜੋ ਨਿਯਮਿਤ ਤੌਰ 'ਤੇ ਘਰ-ਘਰ ਜਾ ਕੇ ਜਾਂਚ ਕਰਦੀਆਂ ਹਨ, ਨੇ ਵੀ ਕੋਈ ਧਿਆਨ ਨਹੀਂ ਦਿੱਤਾ।

ਡਿਲੀਵਰੀ ਤੋਂ ਬਾਅਦ ਸਰਕਾਰੀ ਮਹਿਲਾ ਘਰ ਵਿੱਚ ਰੱਖਿਆ ਜਾਵੇਗਾ

ਇਸ ਵੇਲੇ ਲੜਕੀ ਦੀ ਕੌਂਸਲਿੰਗ ਕੀਤੀ ਜਾ ਰਹੀ ਹੈ ਅਤੇ ਪੂਰੀ ਡਾਕਟਰੀ ਦੇਖਭਾਲ ਕੀਤੀ ਜਾ ਰਹੀ ਹੈ। ਪੁਲਿਸ ਨੇ ਕਿਹਾ ਕਿ ਡਿਲੀਵਰੀ ਤੋਂ ਬਾਅਦ ਮਾਂ ਅਤੇ ਬੱਚੇ ਨੂੰ ਸਰਕਾਰੀ ਮਹਿਲਾ ਘਰ ਵਿੱਚ ਤਬਦੀਲ ਕਰ ਦਿੱਤਾ ਜਾਵੇਗਾ। ਉਸਨੂੰ ਹੁਣੇ ਹਸਪਤਾਲ ਤੋਂ ਬਾਹਰ ਭੇਜਣਾ ਜੋਖਮ ਭਰਿਆ ਹੈ ਕਿਉਂਕਿ ਜੇਲ੍ਹ ਵਿੱਚ ਦੋਸ਼ੀ ਕਿਸੇ ਵੀ ਤਰੀਕੇ ਨਾਲ ਕੇਸ ਵਾਪਸ ਲੈਣ ਲਈ ਦਬਾਅ ਪਾ ਸਕਦੇ ਹਨ। ਹਸਪਤਾਲ ਦੇ ਖੂਨ ਦੀ ਜਾਂਚ ਤੋਂ ਪਤਾ ਲੱਗਾ ਹੈ ਕਿ ਲੜਕੀ ਅਨੀਮੀਆ (ਖੂਨ ਦੀ ਕਮੀ) ਹੈ ਅਤੇ ਡਿਪਰੈਸ਼ਨ ਤੋਂ ਵੀ ਪੀੜਤ ਹੈ। ਡਾਕਟਰ ਉਸਦੀ ਸਰੀਰਕ ਅਤੇ ਮਾਨਸਿਕ ਸਿਹਤ ਵੱਲ ਪੂਰਾ ਧਿਆਨ ਦੇ ਰਹੇ ਹਨ।