Kolkata Warehouse Tragedy : ਕੋਲਕਾਤਾ ਚ ਨਿਰਮਾਣ ਅਧੀਨ ਗੋਦਾਮ ਦੀ ਡਿੱਗੀ ਛੱਤ, 3 ਲੋਕਾਂ ਦੀ ਮੌਤ, ਕਈਆਂ ਮਜਦੂਰਾਂ ਦੇ ਦੇ ਹੱਥ-ਪੈਰ ਕੱਟੇ

Kolkata Warehouse Tragedy : ਕੋਲਕਾਤਾ ਦੇ ਤਾਰਤਲਾ ਥਾਣਾ ਖੇਤਰ ਵਿੱਚ ਬ੍ਰੇਸ ਬ੍ਰਿਜ ਨੇੜੇ ਟਰਾਂਸਪੋਰਟ ਡਿਪੂ ਰੋਡ 'ਤੇ ਉਸਾਰੀ ਅਧੀਨ ਇੱਕ ਗੋਦਾਮ ਦੀ ਛੱਤ ਬੁੱਧਵਾਰ ਦੁਪਹਿਰ 12 ਵਜੇ ਦੇ ਕਰੀਬ ਅਚਾਨਕ ਡਿੱਗ (Roof Collapsed) ਗਈ। ਮੌਕੇ 'ਤੇ ਕੰਮ ਕਰ ਰਹੇ ਕਈ ਮਜ਼ਦੂਰਾਂ ਦੇ ਮਲਬੇ ਹੇਠ ਫਸਣ ਦਾ ਖਦਸ਼ਾ ਹੈ। ਦੱਸਿਆ ਜਾ ਰਿਹਾ ਹੈ ਕਿ 3 ਲੋਕਾਂ ਦੀ ਮੌਤ ਹੋ ਗਈ ਹੈ। ਕੋਲਕਾਤਾ ਪੁਲਿਸ, ਆਫ਼ਤ ਪ੍ਰਬੰਧਨ ਸਮੂਹ (ਡੀਐਮਜੀ), ਸਿਵਲ ਡਿਫੈਂਸ ਅਤੇ ਫਾਇਰ ਵਿਭਾਗ ਦੀਆਂ ਟੀਮਾਂ ਤੁਰੰਤ ਮੌਕੇ 'ਤੇ ਪਹੁੰਚੀਆਂ ਅਤੇ ਰਾਹਤ ਅਤੇ ਬਚਾਅ ਕਾਰਜ ਸ਼ੁਰੂ ਕੀਤੇ, ਹੁਣ ਤੱਕ ਮਲਬੇ ਵਿੱਚੋਂ ਚਾਰ ਲੋਕਾਂ ਨੂੰ ਸਫਲਤਾਪੂਰਵਕ ਬਾਹਰ ਕੱਢਿਆ ਗਿਆ।

21 ਮਜਦੂਰਾਂ ਨੂੰ ਕੱਢਿਆ ਗਿਆ ਬਾਹਰ

ਹੁਣ ਤੱਕ, 21 ਮਜ਼ਦੂਰਾਂ ਨੂੰ ਬਾਹਰ ਕੱਢਿਆ ਗਿਆ ਹੈ ਅਤੇ ਹਸਪਤਾਲਾਂ ਵਿੱਚ ਤਬਦੀਲ ਕਰ ਦਿੱਤਾ ਗਿਆ ਹੈ, ਜਿਨ੍ਹਾਂ ਵਿੱਚੋਂ ਕਈਆਂ ਦੀ ਹਾਲਤ ਗੰਭੀਰ ਹੈ। ਬਚਾਅ ਟੀਮਾਂ ਢਹਿ-ਢੇਰੀ ਹੋਏ ਢਾਂਚੇ ਦੇ ਹੇਠਾਂ ਫਸੇ ਹੋਏ ਲੋਕਾਂ ਦੀ ਭਾਲ ਜਾਰੀ ਰੱਖ ਰਹੀਆਂ ਹਨ।

ਅਧਿਕਾਰੀਆਂ ਵੱਲੋਂ ਅਜੇ ਵੀ ਇਮਾਰਤ ਦੇ ਢਹਿਣ ਵੇਲੇ ਮੌਜੂਦ ਮਜ਼ਦੂਰਾਂ ਦੀ ਸਹੀ ਗਿਣਤੀ ਦਾ ਪਤਾ ਲਗਾਉਣ ਦੀ ਕੋਸ਼ਿਸ਼ ਕਰ ਰਹੇ ਹਨ, ਹਾਲਾਂਕਿ ਸ਼ੁਰੂਆਤੀ ਰਿਪੋਰਟਾਂ ਤੋਂ ਪਤਾ ਚੱਲਦਾ ਹੈ ਕਿ ਉਸ ਸਮੇਂ 40 ਤੋਂ 50 ਮਜ਼ਦੂਰ ਅੰਦਰ ਕੰਮ ਕਰ ਰਹੇ ਹੋ ਸਕਦੇ ਹਨ। ਉਸਾਰੀ ਦਾ ਕੰਮ ਚੱਲ ਰਹੇ ਸਮੇਂ ਲੋਹੇ ਦੇ ਵੱਡੇ ਬੀਮ ਅਤੇ ਕੰਕਰੀਟ ਦੀਆਂ ਸਲੈਬਾਂ ਡਿੱਗ ਗਈਆਂ, ਜਿਸ ਨਾਲ ਕਈ ਮਜ਼ਦੂਰ ਮਲਬੇ ਹੇਠ ਦੱਬ ਗਏ।

ਗੋਦਾਮ ਦੇ ਅੰਦਰ ਖੌਫਨਾਕ ਮੰਜਰ

ਇਸ ਵੇਲੇ, ਕਰੇਨ ਦੀ ਮਦਦ ਨਾਲ ਲੋਹੇ ਦੇ ਬੀਮ ਕੱਟ ਕੇ ਪੀੜਤਾਂ ਨੂੰ ਬਚਾਉਣ ਦੀਆਂ ਕੋਸ਼ਿਸ਼ਾਂ ਜਾਰੀ ਹਨ। ਕਈ ਲਾਸ਼ਾਂ ਲੋਹੇ ਦੇ ਬੀਮ ਦੇ ਹੇਠਾਂ ਫਸੀਆਂ ਹੋਈਆਂ ਹਨ; ਉਨ੍ਹਾਂ ਦੇ ਅੰਗ ਅਤੇ ਸਿਰ ਕੁਚਲੇ ਗਏ ਹਨ। ਤਸਵੀਰ ਵਿੱਚ ਦਿਖਾਈ ਦੇਣ ਵਾਲਾ ਦ੍ਰਿਸ਼ ਸੱਚਮੁੱਚ ਭਿਆਨਕ ਹੈ - ਲਾਸ਼ਾਂ ਲੋਹੇ ਦੇ ਬੀਮ ਨਾਲ ਲਟਕ ਰਹੀਆਂ ਹਨ, ਅਤੇ ਉਨ੍ਹਾਂ ਦੀਆਂ ਲੱਤਾਂ ਕੱਟੀਆਂ ਗਈਆਂ ਹਨ।

ਭਾਰਤੀ ਫੌਜ ਸਮੇਤ ਵੱਖ ਵੱਖ ਟੀਮਾਂ ਕਰ ਰਹੀਆਂ ਬਚਾਅ ਕਾਰਜ

ਰਾਜ ਸਰਕਾਰ ਅਤੇ ਆਫ਼ਤ ਪ੍ਰਬੰਧਨ ਅਧਿਕਾਰੀਆਂ ਦੀ ਬੇਨਤੀ 'ਤੇ ਭਾਰਤੀ ਫੌਜ ਦੀਆਂ ਚਾਰ ਟੁਕੜੀਆਂ ਤਾਇਨਾਤ ਕੀਤੀਆਂ ਗਈਆਂ। NDRF, SDRF, ਪੁਲਿਸ ਅਤੇ ਫਾਇਰ ਬ੍ਰਿਗੇਡ ਕਰਮਚਾਰੀ ਮਲਬੇ ਦੇ ਹੇਠਾਂ ਫਸੇ ਮਜ਼ਦੂਰਾਂ ਤੱਕ ਪਹੁੰਚਣ ਲਈ ਲਗਾਤਾਰ ਕੰਮ ਕਰ ਰਹੇ ਹਨ।

ਐਨਡੀਆਰਐਫ ਨੇ ਢਹਿ-ਢੇਰੀ ਹੋਈ ਢਾਂਚੇ ਦੇ ਹੇਠਾਂ ਜੀਵਨ ਦੇ ਸੰਕੇਤਾਂ ਦਾ ਪਤਾ ਲਗਾਉਣ ਲਈ ਸਨਿਫਰ ਕੁੱਤੇ ਅਤੇ ਓਵਰਹੈੱਡ ਡਰੋਨ ਵੀ ਤਾਇਨਾਤ ਕੀਤੇ ਹਨ।