Tateeree Song ਗਾ ਕੇ ਫਸ ਗਏ ਰੈਪਰ ਬਾਦਸ਼ਾਹ ! ਹਰਿਆਣਾ ਮਹਿਲਾ ਕਮਿਸ਼ਨ ਨੇ ਭੇਜਿਆ ਨੋਟਿਸ, ਪੰਚਕੂਲਾ ਚ ਵੀ ਦਰਜ ਹੋਈ FIR

Tateeree Song Row : ਪੰਜਾਬੀ ਅਤੇ ਹਿੰਦੀ ਰੈਪਰ ਬਾਦਸ਼ਾਹ (Rapper Badshah) ਦੀਆਂ ਮੁਸ਼ਕਿਲਾਂ ਰੁਕਣ ਦਾ ਨਾਮ ਨਹੀਂ ਲੈ ਰਹੀਆਂ ਹਨ। ਹੁਣ ਉਨ੍ਹਾਂ ਦੇ ਨਵੇਂ ਗੀਤ "ਟਟੀਰੀ" ਨੇ ਇੱਕ ਵੱਡਾ ਵਿਵਾਦ ਛੇੜ ਦਿੱਤਾ ਹੈ, ਜਿਸ ਕਾਰਨ ਹਰਿਆਣਾ ਮਹਿਲਾ ਕਮਿਸ਼ਨ (Haryana Women Commission) ਨੇ ਉਨ੍ਹਾਂ ਨੂੰ ਤਲਬ ਕੀਤਾ ਹੈ ਅਤੇ ਸਪੱਸ਼ਟੀਕਰਨ ਮੰਗਿਆ ਹੈ।

ਪੰਚਕੂਲਾ 'ਚ ਰੈਪਰ ਬਾਦਸ਼ਾਹ 'ਤੇ FIR

ਉਧਰ, ਗਾਇਕ ਰੈਪਰ ਖਿਲਾਫ਼ ਪੰਚਕੂਲਾ ਦੇ ਸੈਕਟਰ 20 ਸਥਿਤ ਸਾਈਬਰ ਕਰਾਈਮ ਥਾਣੇ ਵਿੱਚ ਇੱਕ FIR ਵੀ ਦਰਜ ਹੋ ਗਈ ਹੈ। ਜਾਣਕਾਰੀ ਅਨੁਸਾਰ, ਇਹ ਸ਼ਿਕਾਇਤ ਇੱਕ ਅਭੈ ਚੌਧਰੀ ਨਾਮ ਦੇ ਵਿਅਕਤੀ ਨੇ ਦਿੱਤੀ ਹੈ, ਜਿਸ ਨੂੰ ਗੰਭੀਰਤਾ ਨਾਲ ਲੈਂਦਿਆਂ ਪੁਲਿਸ ਨੇ ਭਾਰਤੀ ਦੰਡਾਵਲੀ (BNS) 2023 ਦੀ ਧਾਰਾ 296 ਅਤੇ ਔਰਤਾਂ ਦੀ ਅਸ਼ਲੀਲ ਪ੍ਰਤੀਨਿਧਤਾ (ਮਨਾਹੀ) ਐਕਟ, 1986 ਦੀ ਧਾਰਾ 3 ਅਤੇ 4 ਦੇ ਤਹਿਤ ਮਾਮਲਾ ਦਰਜ ਕੀਤਾ ਹੈ।

ਰੈਪਰ ਬਾਦਸ਼ਾਹ ਦੇ ਗੀਤ 'ਤੇ ਕਿਉਂ ਛਿੜਿਆ ਵਿਵਾਦ ?

1 ਮਾਰਚ ਨੂੰ ਰਿਲੀਜ਼ ਹੋਏ ਇਸ ਗੀਤ ਵਿੱਚ ਸਕੂਲੀ ਵਰਦੀਆਂ ਵਿੱਚ ਕੁੜੀਆਂ ਨੂੰ ਹਰਿਆਣਾ ਦੇ ਲੋਕ ਸੰਗੀਤ (Haryana Lok Sangeet) 'ਤੇ ਨੱਚਦੇ ਦਿਖਾਇਆ ਗਿਆ ਹੈ। ਹਾਲਾਂਕਿ, ਵਿਵਾਦ ਸਿਰਫ਼ ਕੱਪੜਿਆਂ ਤੱਕ ਹੀ ਸੀਮਿਤ ਨਹੀਂ ਹੈ। ਗੀਤ ਨੂੰ ਲੈ ਕੇ ਇਲਜ਼ਾਮ ਲਗਾਇਆ ਗਿਆ ਹੈ ਕਿ ਗੀਤ ਦੇ ਬੋਲਾਂ ਵਿੱਚ ਔਰਤਾਂ ਵਿਰੁੱਧ ਬਹੁਤ ਹੀ ਇਤਰਾਜ਼ਯੋਗ ਅਤੇ ਅਸ਼ਲੀਲ ਭਾਸ਼ਾ ਹੈ। (Comment on Women Dress)

ਕਮਿਸ਼ਨ ਦਾ ਮੰਨਣਾ ਹੈ ਕਿ ਗੀਤ ਵਿੱਚ ਵਰਤੇ ਗਏ ਸ਼ਬਦ ਹਰਿਆਣਾ ਦੀਆਂ ਧੀਆਂ ਦੀ ਇੱਜ਼ਤ ਦਾ ਅਪਮਾਨ ਕਰਦੇ ਹਨ, ਇਸ ਲਈ ਬਾਦਸ਼ਾਹ ਨੂੰ ਪੇਸ਼ ਹੋ ਕੇ ਸਪੱਸ਼ਟੀਕਰਨ ਦੇਣਾ ਚਾਹੀਦਾ ਹੈ।

ਖਾਪ ਨੇ ਸੀਐਮ ਨਾਇਬ ਸਿੰਘ ਸੈਣੀ ਨੂੰ ਲਿਖਿਆ ਪੱਤਰ

ਗੀਤ ਦਾ ਵਿਰੋਧ ਸਿਰਫ਼ ਮਹਿਲਾ ਕਮਿਸ਼ਨ ਤੱਕ ਹੀ ਸੀਮਿਤ ਨਹੀਂ ਹੈ, ਸਗੋਂ ਸਮਾਜ ਦੇ ਵੱਖ-ਵੱਖ ਹਿੱਸਿਆਂ ਤੋਂ ਵੀ ਤਿੱਖੀਆਂ ਪ੍ਰਤੀਕਿਰਿਆਵਾਂ ਆ ਰਹੀਆਂ ਹਨ। ਆਲ ਇੰਡੀਆ ਸਹਾਰਨ ਖਾਪ ਨੇ ਸਿੱਧੇ ਤੌਰ 'ਤੇ ਹਰਿਆਣਾ (Haryana Government) ਦੇ ਮੁੱਖ ਮੰਤਰੀ ਨਾਇਬ ਸਿੰਘ ਸੈਣੀ (CM Nayab Singh Saini) ਨੂੰ ਪੱਤਰ ਲਿਖ ਕੇ ਆਪਣੀ ਨਾਰਾਜ਼ਗੀ ਜ਼ਾਹਰ ਕੀਤੀ ਹੈ।

ਖਾਪ ਦਾ ਕਹਿਣਾ ਹੈ ਕਿ ਗੀਤ ਵਿੱਚ ਵਰਤੀ ਗਈ ਭਾਸ਼ਾ ਸਮਾਜ ਲਈ ਇੱਕ ਘਟੀਆ ਉਦਾਹਰਣ ਪੇਸ਼ ਕਰਦੀ ਹੈ ਅਤੇ ਹਰਿਆਣਾ ਦੇ ਸੱਭਿਆਚਾਰਕ ਅਕਸ ਨੂੰ ਢਾਹ ਲਗਾਉਂਦੀ ਹੈ। ਰੋਹਤਕ ਦੇ ਇੱਕ ਵਕੀਲ ਨੇ ਬਾਲ ਵਿਕਾਸ ਮੰਤਰਾਲੇ ਕੋਲ ਵੀ ਸ਼ਿਕਾਇਤ ਦਰਜ ਕਰਵਾਈ ਹੈ, ਜਿਸ ਵਿੱਚ ਗੀਤ ਵਿੱਚ ਕੁੜੀਆਂ ਦੇ ਸਕੂਲ ਬੈਗ ਸੁੱਟਣ ਅਤੇ ਅਸ਼ਲੀਲ ਭਾਸ਼ਾ ਦੀ ਵਰਤੋਂ ਦੇ ਫਿਲਮਾਂਕਣ 'ਤੇ ਸਖ਼ਤ ਇਤਰਾਜ਼ ਜਤਾਇਆ ਗਿਆ ਹੈ।

ਪਹਿਲਾਂ ਵੀ ਵਿਵਾਦਾਂ 'ਚ ਘਿਰੇ ਸਨ ਗਾਇਕ ਬਾਦਸ਼ਾਹ

ਜ਼ਿਕਰਯੋਗ ਕਿ ਬਾਦਸ਼ਾਹ ਦਾ ਵਿਵਾਦਾਂ ਨਾਲ ਪੁਰਾਣਾ ਰਿਸ਼ਤਾ ਹੈ ਅਤੇ ਉਹ ਪਹਿਲਾਂ ਵੀ ਕਈ ਵਾਰ ਘਿਰ ਚੁੱਕੇ ਹਨ। ਉਨ੍ਹਾਂ ਉਪਰ ਸੁਪਰਹਿੱਟ ਗੀਤ "ਗੇਂਦਾ ਫੂਲ" 'ਤੇ ਪਹਿਲਾਂ ਬੰਗਾਲੀ ਲੋਕ ਸੰਗੀਤ ਦੀਆਂ ਲਾਈਨਾਂ ਨੂੰ ਬਿਨਾਂ ਕ੍ਰੈਡਿਟ ਦੇ ਵਰਤਣ ਦਾ ਦੋਸ਼ ਵੀ ਲੱਗਿਆ ਸੀ। ਹੁਣ ਨਾ ਤਾਂ ਬਾਦਸ਼ਾਹ ਅਤੇ ਨਾ ਹੀ ਉਸਦੀ ਟੀਮ ਨੇ "ਟਟੀਰੀ" ਗੀਤ ਵਿਵਾਦ 'ਤੇ ਕੋਈ ਅਧਿਕਾਰਤ ਬਿਆਨ ਜਾਰੀ ਕੀਤਾ ਹੈ। ਲੋਕ ਸੋਸ਼ਲ ਮੀਡੀਆ 'ਤੇ ਵੀ ਗੀਤ ਦੇ ਬੋਲਾਂ ਨੂੰ ਲੈ ਕੇ ਵੰਡੇ ਹੋਏ ਹਨ, ਪਰ ਮਹਿਲਾ ਕਮਿਸ਼ਨ ਤੇ ਖਾਪ ਦੇ ਐਕਸ਼ਨ ਨਾਲ ਲਗਦਾ ਹੈ ਕਿ ਆਉਣ ਵਾਲੇ ਦਿਨਾਂ ਵਿੱਚ ਬਾਦਸ਼ਾਹ ਦੀਆਂ ਮੁਸ਼ਕਲਾਂ ਹੋਰ ਵੀ ਵਧ ਸਕਦੀਆਂ ਹਨ।