Heavy Rainfall - ਕਰਨਾਟਕਾ ਚ ਭਾਰੀ ਮੀਂਹ ਦਾ ਕਹਿਰ! 6 ਲੋਕਾਂ ਦੀ ਮੌਤ, ਪਾਣੀ ਚ ਡੁੱਬੇ ਕਈ ਘਰ, ਸੜਕਾਂ ਤੇ ਲੱਗਿਆ ਜਾਮ

Heavy Rain In South : ਬੰਗਲੁਰੂ ਅਤੇ ਆਸ-ਪਾਸ ਦੇ ਇਲਾਕਿਆਂ ਵਿੱਚ ਭਾਰੀ ਬਾਰਿਸ਼ ਨੇ ਜਨਜੀਵਨ ਪੂਰੀ ਤਰ੍ਹਾਂ ਪ੍ਰਭਾਵਿਤ ਕਰ ਦਿੱਤਾ। ਕਈ ਇਲਾਕਿਆਂ ਵਿੱਚ ਹੜ੍ਹ (Flood) ਵਰਗੇ ਹਾਲਾਤ ਪੈਦਾ ਹੋ ਗਏ। ਪਾਣੀ ਸੜਕਾਂ 'ਤੇ ਭਰ ਗਿਆ ਅਤੇ ਨੀਵੇਂ ਇਲਾਕਿਆਂ ਵਿੱਚ ਰਹਿਣ ਵਾਲੇ ਲੋਕਾਂ ਦੇ ਘਰਾਂ ਵਿੱਚ ਵੀ ਦਾਖਲ ਹੋ ਗਿਆ। ਸ਼ਹਿਰ ਦੇ ਉੱਤਰੀ ਅਤੇ ਪੂਰਬੀ ਹਿੱਸਿਆਂ ਵਿੱਚ ਸਭ ਤੋਂ ਵੱਧ ਮੀਂਹ ਪਿਆ। ਇਸ ਕਾਰਨ 25 ਤੋਂ ਵੱਧ ਦਰੱਖਤ ਡਿੱਗ ਗਏ ਅਤੇ ਆਵਾਜਾਈ ਬੁਰੀ ਤਰ੍ਹਾਂ ਪ੍ਰਭਾਵਿਤ ਹੋਈ।

ਮੀਂਹ ਦਾ ਕਹਿਰ, 6 ਲੋਕਾਂ ਦੀ ਮੌਤ

ਭਾਰੀ ਮੀਂਹ ਨੇ ਨਾ ਸਿਰਫ਼ ਮੁਸੀਬਤ ਪੈਦਾ ਕੀਤੀ, ਸਗੋਂ ਘਾਤਕ ਵੀ ਸਾਬਤ ਹੋਇਆ। ਕਰਨਾਟਕ ਦੇ ਵੱਖ-ਵੱਖ ਜ਼ਿਲ੍ਹਿਆਂ ਵਿੱਚ 6 ਲੋਕਾਂ ਦੀ ਮੌਤ ਹੋ ਗਈ। ਭਾਰੀ ਮੀਂਹ ਦੇ ਵਹਾਅ ਵਿੱਚ ਇੱਕ ਬਾਈਕ ਸਵਾਰ ਵਹਿ ਗਿਆ। ਗੋਕਕ ਵਿੱਚ ਵੀ ਇੱਕ ਵਿਅਕਤੀ ਨਾਲੇ ਵਿੱਚ ਡਿੱਗ ਪਿਆ ਅਤੇ ਵਹਿ ਗਿਆ। ਕੋਪਲ ਅਤੇ ਬੇਲਾਰੀ ਵਿੱਚ ਬਿਜਲੀ ਡਿੱਗਣ ਕਾਰਨ ਦੋ-ਦੋ ਲੋਕਾਂ ਦੀ ਮੌਤ ਹੋ ਗਈ। ਚਿੱਕਮਗਲੁਰੂ ਅਤੇ ਵਿਜੇਪੁਰਾ ਵਿੱਚ ਇੱਕ-ਇੱਕ ਵਿਅਕਤੀ ਦੀ ਜਾਨ ਚਲੀ ਗਈ।

ਕਾਲਾਬੁਰਗੀ ਜ਼ਿਲ੍ਹੇ ਵਿੱਚ ਵੀ ਮੀਂਹ ਨੇ ਤਬਾਹੀ ਮਚਾਈ। ਭਾਰੀ ਮੀਂਹ ਅਤੇ ਬਿਜਲੀ ਡਿੱਗਣ ਕਾਰਨ ਨਾਲੀਆਂ ਦਾ ਪਾਣੀ ਘਰਾਂ ਵਿੱਚ ਦਾਖਲ ਹੋ ਗਿਆ। ਚਿੰਚੋਲੀ ਤਾਲੁਕ ਦੇ ਸੁਲੇਪੇਟ ਅਤੇ ਬੇਨਕਾਨਹੱਲੀ ਪਿੰਡਾਂ ਵਿੱਚ ਸਥਿਤੀ ਸਭ ਤੋਂ ਮਾੜੀ ਸੀ। ਇੱਥੇ ਪਿੰਡ ਵਾਸੀਆਂ ਦੇ ਘਰਾਂ ਵਿੱਚ ਰੱਖੇ ਅਨਾਜ ਅਤੇ ਹੋਰ ਸਮਾਨ ਗਿੱਲਾ ਹੋ ਗਿਆ। ਲੋਕਾਂ ਨੂੰ ਆਪਣਾ ਸਮਾਨ ਘਰੋਂ ਬਾਹਰ ਕੱਢਣ ਲਈ ਮਜਬੂਰ ਹੋਣਾ ਪਿਆ। ਕਈ ਘਰਾਂ ਵਿੱਚ ਕਮਰ ਤੱਕ ਪਾਣੀ ਭਰ ਗਿਆ, ਜਿਸ ਕਾਰਨ ਦਹਿਸ਼ਤ ਦਾ ਮਾਹੌਲ ਬਣ ਗਿਆ।

ਹੁਬਲੀ ਅਤੇ ਧਾਰਵਾੜ ਵਿੱਚ ਵੀ ਮਾੜੇਹਾਲਾਤ

ਹੁਬਲੀ ਅਤੇ ਧਾਰਵਾੜ ਵਿੱਚ ਵੀ ਭਾਰੀ ਮੀਂਹ ਨੇ ਲੋਕਾਂ ਨੂੰ ਪਰੇਸ਼ਾਨ ਕੀਤਾ। ਹੁਬਲੀ ਦੇ ਗਣੇਸ਼ਪੇਟ ਅਤੇ ਆਨੰਦ ਨਗਰ ਵਰਗੇ ਇਲਾਕਿਆਂ ਵਿੱਚ ਪਾਣੀ ਘਰਾਂ ਵਿੱਚ ਦਾਖਲ ਹੋ ਗਿਆ। ਲੋਕਾਂ ਨੂੰ ਬਾਲਟੀਆਂ, ਮੱਗਾਂ ਅਤੇ ਪਾਈਪਾਂ ਦੀ ਮਦਦ ਨਾਲ ਪਾਣੀ ਕੱਢਣ ਦੀ ਕੋਸ਼ਿਸ਼ ਕਰਦੇ ਦੇਖਿਆ ਗਿਆ। ਕਈ ਪਰਿਵਾਰਾਂ ਨੂੰ ਆਪਣੇ ਘਰ ਖਾਲੀ ਕਰਨੇ ਪਏ। ਲਗਾਤਾਰ ਮੀਂਹ ਕਾਰਨ ਪੁਣੇ-ਬੈਂਗਲੁਰੂ ਰਾਸ਼ਟਰੀ ਰਾਜਮਾਰਗ ਵੀ ਮਨਸੂਰ ਨੇੜੇ ਪਾਣੀ ਨਾਲ ਭਰ ਗਿਆ, ਜਿਸ ਕਾਰਨ ਲੰਬਾ ਟ੍ਰੈਫਿਕ ਜਾਮ ਹੋ ਗਿਆ।

ਹੋਰ ਮੀਂਹ ਪੈਣ ਦਾ ਖ਼ਤਰਾ

ਮੌਸਮ ਵਿਭਾਗ ਨੇ ਚੇਤਾਵਨੀ ਦਿੱਤੀ ਹੈ ਕਿ ਅਗਲੇ 24 ਘੰਟਿਆਂ ਵਿੱਚ ਮੀਂਹ ਜਾਰੀ ਰਹਿ ਸਕਦਾ ਹੈ। ਅਜਿਹੀ ਸਥਿਤੀ ਵਿੱਚ ਲੋਕਾਂ ਨੂੰ ਸੁਚੇਤ ਰਹਿਣ ਦੀ ਸਲਾਹ ਦਿੱਤੀ ਗਈ ਹੈ। ਪ੍ਰਸ਼ਾਸਨ ਵੱਲੋਂ ਰਾਹਤ ਅਤੇ ਬਚਾਅ ਲਈ ਟੀਮਾਂ ਤਾਇਨਾਤ ਕੀਤੀਆਂ ਗਈਆਂ ਹਨ, ਪਰ ਕਈ ਥਾਵਾਂ 'ਤੇ ਲੋਕ ਅਜੇ ਵੀ ਮਦਦ ਦੀ ਉਡੀਕ ਕਰ ਰਹੇ ਹਨ।