Meghalaya honeymoon murder : ਰਾਜਾ ਰਘੂਵੰਸ਼ੀ ਦੇ ਕਤਲ ਚ ਵਰਤਿਆ ਗਿਆ ਹਥਿਆਰ ਬਰਾਮਦ, ਵਿਸ਼ਾਲ ਨੇ ਕੀਤਾ ਸੀ ਪਹਿਲਾ ਵਾਰ

Meghalaya honeymoon murder  : ਮੇਘਾਲਿਆ ਵਿੱਚ ਇੰਦੌਰ ਦੇ ਕਾਰੋਬਾਰੀ ਰਾਜਾ ਰਘੂਵੰਸ਼ੀ ਦੇ ਕਤਲ ਕੇਸ ਵਿੱਚ ਇੱਕ ਵੱਡਾ ਅਪਡੇਟ ਸਾਹਮਣੇ ਆਇਆ ਹੈ। ਪੁਲਿਸ ਨੇ ਕਤਲ ਵਿੱਚ ਵਰਤੇ ਗਏ ਹਥਿਆਰ (ਦਾਤ) ਨੂੰ ਬਰਾਮਦ ਕਰ ਲਿਆ ਹੈ ,ਜਿਸ ਨਾਲ ਰਾਜਾ ਦਾ ਬੇਰਹਿਮੀ ਨਾਲ ਕਤਲ ਕੀਤਾ ਗਿਆ ਸੀ। ਹਥਿਆਰ ਦੀ ਤਸਵੀਰ ਸਾਹਮਣੇ ਆਈ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਰਾਜਾ 'ਤੇ ਹਥਿਆਰ (ਦਾਤ) ਨਾਲ ਕਈ ਵਾਰ ਹਮਲਾ ਕੀਤਾ ਗਿਆ ਸੀ। ਪੁਲਿਸ ਜਾਂਚ ਵਿੱਚ ਸਾਹਮਣੇ ਆਇਆ ਹੈ ਕਿ ਪਹਿਲਾ ਹਮਲਾ ਆਰੋਪੀ ਵਿਸ਼ਾਲ ਚੌਹਾਨ ਨੇ ਕੀਤਾ ਸੀ। 

ਸੂਤਰਾਂ ਤੋਂ ਪਤਾ ਲੱਗਾ ਹੈ ਕਿ ਰਾਜਾ ਨੇ ਖ਼ੁਦ ਨੂੰ ਬਚਾਉਣ ਦੀ ਪੂਰੀ ਕੋਸ਼ਿਸ਼ ਕੀਤੀ ਸੀ ਪਰ ਹਮਲਾਵਰਾਂ ਨੇ ਉਸਨੂੰ ਬੇਰਹਿਮੀ ਨਾਲ ਮਾਰ ਦਿੱਤਾ। ਇਸ ਕਾਰਨ ਆਕਾਸ਼ ਨਾਮ ਦੇ ਦੋਸ਼ੀ ਦੀ ਕਮੀਜ਼ 'ਤੇ ਖੂਨ ਦੇ ਧੱਬੇ ਲੱਗ ਗਏ ਸਨ। ਹੁਣ ਇਹ ਹਥਿਆਰ ਮੇਘਾਲਿਆ ਦੇ ਅਪਰਾਧ ਸਥਾਨ ਤੋਂ ਬਰਾਮਦ ਕੀਤਾ ਗਿਆ ਹੈ। ਪੁਲਿਸ ਜਾਂਚ ਤੋਂ ਪਤਾ ਲੱਗਾ ਹੈ ਕਿ ਦੋਸ਼ੀ ਨੇ ਇਹ ਹਥਿਆਰ ਗੁਹਾਟੀ ਰੇਲਵੇ ਸਟੇਸ਼ਨ ਦੇ ਨੇੜੇ ਤੋਂ ਖਰੀਦਿਆ ਸੀ।

ਕੀ ਹੈ ਪੂਰਾ ਮਾਮਲਾ?

ਦੱਸ ਦੇਈਏ ਕਿ ਇੰਦੌਰ ਦਾ ਇੱਕ ਟਰਾਂਸਪੋਰਟ ਕਾਰੋਬਾਰੀ ਰਾਜਾ ਰਘੂਵੰਸ਼ੀ 21 ਮਈ ਨੂੰ ਆਪਣੀ ਪਤਨੀ ਸੋਨਮ ਰਘੂਵੰਸ਼ੀ ਨਾਲ ਹਨੀਮੂਨ ਮਨਾਉਣ ਲਈ ਮੇਘਾਲਿਆ ਗਿਆ ਸੀ। ਦੋਵਾਂ ਦਾ ਵਿਆਹ 11 ਮਈ ਨੂੰ ਇੰਦੌਰ ਵਿੱਚ ਹੋਇਆ ਸੀ। 23 ਮਈ ਨੂੰ ਉਹ ਮੇਘਾਲਿਆ ਦੇ ਸੋਹਰਾ (ਚੇਰਾਪੂੰਜੀ) ਇਲਾਕੇ ਤੋਂ ਲਾਪਤਾ ਹੋ ਗਏ ਸਨ। ਇਸ ਤੋਂ ਬਾਅਦ ਰਾਜਾ ਦੀ ਲਾਸ਼ 2 ਜੂਨ ਨੂੰ ਮਿਲੀ, ਜਦੋਂ ਕਿ ਸੋਨਮ ਦੀ ਭਾਲ ਜਾਰੀ ਰਹੀ।

ਰਾਜਾ ਦੇ ਕਤਲ ਤੋਂ ਬਾਅਦ ਲਾਪਤਾ ਸੀ ਸੋਨਮ  

ਰਾਜਾ ਦੇ ਕਤਲ ਤੋਂ ਬਾਅਦ ਸੋਨਮ ਲਾਪਤਾ ਹੋ ਗਈ ਸੀ ਪਰ ਬਾਅਦ ਵਿੱਚ ਜਦੋਂ ਰਾਜਾ ਦੀ ਲਾਸ਼ ਮਿਲੀ ਤਾਂ ਸੋਨਮ ਨੇ 7 ਜੂਨ ਨੂੰ ਉੱਤਰ ਪ੍ਰਦੇਸ਼ ਦੇ ਗਾਜ਼ੀਪੁਰ ਵਿੱਚ ਪੁਲਿਸ ਅੱਗੇ ਆਤਮ ਸਮਰਪਣ ਕਰ ਦਿੱਤਾ। ਇਸ ਤੋਂ ਬਾਅਦ ਮੇਘਾਲਿਆ ਪੁਲਿਸ ਨੇ ਸੋਨਮ ਨੂੰ ਆਪਣੀ ਹਿਰਾਸਤ ਵਿੱਚ ਲੈ ਲਿਆ। ਸੋਨਮ ਤੋਂ ਇਲਾਵਾ ਇਸ ਕਤਲ ਕੇਸ ਵਿੱਚ ਰਾਜ ਕੁਸ਼ਵਾਹਾ ਸਮੇਤ ਚਾਰ ਹੋਰ ਲੋਕਾਂ ਨੂੰ ਵੀ ਗ੍ਰਿਫ਼ਤਾਰ ਕੀਤਾ ਗਿਆ ਹੈ।

ਹੁਣ ਤੱਕ ਦੀ ਜਾਂਚ ਅਤੇ ਪਰਿਵਾਰ ਦੀ ਮੰਗ

ਇਸ ਸਮੇਂ ਸਾਰੇ ਦੋਸ਼ੀ ਮੇਘਾਲਿਆ ਪੁਲਿਸ ਦੀ ਹਿਰਾਸਤ ਵਿੱਚ ਹਨ ਅਤੇ ਮਾਮਲੇ ਦੀ ਜਾਂਚ ਲਈ ਇੱਕ ਐਸਆਈਟੀ (ਵਿਸ਼ੇਸ਼ ਜਾਂਚ ਟੀਮ) ਬਣਾਈ ਗਈ ਹੈ। ਇਸ ਦੇ ਨਾਲ ਹੀ ਰਾਜਾ ਰਘੂਵੰਸ਼ੀ ਦੇ ਵੱਡੇ ਭਰਾ ਨੇ ਵੀ ਸੋਨਮ ਦੇ ਮਾਪਿਆਂ 'ਤੇ ਸ਼ੱਕ ਪ੍ਰਗਟ ਕੀਤਾ ਹੈ ਅਤੇ ਉਨ੍ਹਾਂ ਦੇ ਨਾਰਕੋ-ਵਿਸ਼ਲੇਸ਼ਣ ਟੈਸਟ ਦੀ ਮੰਗ ਕੀਤੀ ਹੈ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਇਸ ਘਟਨਾ ਵਿੱਚ ਹੋਰ ਵੀ ਲੋਕ ਸ਼ਾਮਲ ਹੋ ਸਕਦੇ ਹਨ।