ਚੰਡੀਗੜ੍ਹ: ਪੈਸਿਆਂ ਪਿੱਛੇ ਅੱਜ ਕਲ ਲੋਕ ਕਿਸੇ ਦੀ ਜਾਨ ਦੀ ਕੀਮਤ ਤੱਕ ਨਹੀਂ ਸਮਝਦੇ , ਅਜਿਹਾ ਹੀ ਸਾਹਮਣੇ ਆਇਆ ਹੈ ਚੰਡੀਗੜ੍ਹ ਦੇ ਸੈਕਟਰ 44 ਤੋਂ , ਜਿਥੇ ਸਥਿਤ ਲੇਬਰ ਚੌਕ ਕੋਲ ਪਲੰਬਰ ਦਾ ਕੰਮ ਕਰਨ ਵਾਲੇ ਜਸਪਾਲ ਦਾ ਕਤਲ ਕਰ ਦਿੱਤਾ ਗਿਆ। ਹਾਲਾਂਕਿ ਪੁਲਿਸ ਨੇ ਕਤਲ ਕਰਨ ਵਾਲੇ ਤਿੰਨ ਮੁਲਜ਼ਮਾਂ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ। ਪੁਲਿਸ ਵੱਲੋਂ ਫੜੇ ਗਏ ਮੁਲਜ਼ਮਾਂ ਦੀ ਪਛਾਣ ਧਨਾਸ ਨਿਵਾਸੀ ਦਿਨੇਸ਼, ਅਨਿਲ ਅਤੇ ਪਰਵਿੰਦਰ ਦੇ ਰੂਪ ਵਿਚ ਹੋਈ ਹੈ।
ਹਿਰਾਸਤ ਵਿਚ ਲੈਣ ਤੋਂ ਬਾਅਦ ਪੁਲਿਸ ਨੇ ਅਨਿਲ ਅਤੇ ਪਰਵਿੰਦਰ ਨੂੰ ਜ਼ਿਲ੍ਹਾ ਅਦਾਲਤ ਵਿਚ ਪੇਸ਼ ਕੀਤਾ, ਜਿੱਥੋਂ ਅਦਾਲਤ ਨੇ ਉਨ੍ਹਾਂ ਨੂੰ ਦੋ ਦਿਨਾਂ ਦੇ ਪੁਲਸ ਰਿਮਾਂਡ 'ਤੇ ਭੇਜ ਦਿੱਤਾ। ਜਦ ਕਿ ਇਕ ਮੁਲਜ਼ਮ ਨੇ ਬਚਨ ਦੇ ਚੱਕਰ 'ਚ ਥਾਣੇ ਦੀ ਛੱਤ ਤੋਂ ਛਾਲ ਮਾਰ ਦਿੱਤੀ। ਜੋ ਕਿ ਹੁਣ ਹਸਪਤਾਲ 'ਚ ਜ਼ੇਰੇ ਇਲਾਜ ਹੈ।
ਮਾਮਲੇ ਦੀ ਜਾਣਕਾਰੀ ਦਿੰਦੇ ਹੋਏ ਪੁਲਿਸ ਨੇ ਦੱਸਿਆ ਕਿ ਤਿੰਨੇ ਮੁਲਜ਼ਮਾਂ ਨੇ ਸ਼ਰਾਬ ਖਰੀਦਣ ਵੇਲੇ ਪੈਸਿਆਂ ਦਾ ਹੇਰਫੇਰ ਕੀਤਾ ਸੀ। ਜਿਸ ਵਿਚ 10 ਰੁਪਏ ਦੀ ਹੇਰਾਫੇਰੀ ਕਰਨ 'ਤੇ ਪਲੰਬਰ ਜਸਪਾਲ ਦੀ ਹੱਤਿਆ ਕੀਤੀ ਸੀ। ਦਸਣਯੋਗ ਹੈ ਕਿ ਬੀਤੀ 16 ਨਵੰਬਰ ਦੀ ਸਵੇਰੇ ਲੇਬਰ ਚੌਕ ਕੋਲ ਲਹੂ-ਲੁਹਾਨ ਇਕ ਵਿਅਕਤੀ ਦੇ ਬੇਹੋਸ਼ ਪਏ ਹੋਣ ਦੀ ਸੂਚਨਾ ਪੁਲਿਸ ਨੂੰ ਮਿਲੀ ਸੀ। ਜਿਸ ਤੋਂ ਸੈਕਟਰ-34 ਥਾਣਾ ਇੰਚਾਰਜ ਬਲਦੇਵ ਸਿੰਘ ਦੇ ਨਾਲ ਪਹੁੰਚੀ ਟੀਮ ਨੇ ਉਸ ਨੂੰ ਜੀ. ਐੱਮ. ਸੀ. ਐੱਚ.-32 ਵਿਚ ਭਰਤੀ ਕਰਵਾਇਆ, ਜਿੱਥੇ ਡਾਕਟਰ ਨੇ ਉਸ ਨੂੰ ਮ੍ਰਿਤਕ ਐਲਾਨ ਦਿੱਤਾ ਸੀ।
ਪੁਲਿਸ ਕਰ ਰਹੀ ਮਾਮਲੇ ਦੀ ਜਾਂਚ
ਮ੍ਰਿਤਕ ਦੀ ਪਛਾਣ ਪੰਜਾਬ ਦੇ ਜਗਤਪੁਰਾ ਨਿਵਾਸੀ 32 ਸਾਲਾ ਜਸਪਾਲ ਦੇ ਤੌਰ 'ਤੇ ਹੋਈ ਸੀ। ਗ੍ਰਿਫ਼ਤਾਰ ਮੁਲਜ਼ਮਾਂ ਨੇ ਪੁੱਛਗਿਛ ਵਿਚ ਦੱਸਿਆ ਕਿ ਉਨ੍ਹਾਂ ਨਾਲ ਜਸਪਾਲ ਨੇ ਦੇਰ ਰਾਤ ਚੌਕ ਦੇ ਨੇੜੇ ਸ਼ਰਾਬ ਪੀਤੀ। ਸ਼ਰਾਬ ਖ਼ਤਮ ਹੋਣ 'ਤੇ ਜਸਪਾਲ ਨੂੰ ਪੈਸੇ ਦੇ ਕੇ ਦੁਬਾਰਾ ਸ਼ਰਾਬ ਮੰਗਵਾਈ।ਉਸ ਨੇ ਸ਼ਰਾਬ ਲਿਆ ਕੇ ਦੱਸਿਆ ਕਿ 50 ਰੁਪਏ ਦੀ ਮਿਲੀ ਹੈ ਜਦੋਂ ਕਿ ਦਿਨੇਸ਼ ਨੇ ਕਿਹਾ ਕਿ 40 ਰੁਪਏ ਦੀ ਮਿਲਦੀ ਹੈ। 10 ਰੁਪਏ ਵਾਪਸ ਕਰਨੇ ਪੈਣਗੇ।
ਇਸ ਗੱਲ ਨੂੰ ਲੈ ਕੇ ਵਿਵਾਦ ਵਧਿਆ। ਇਸ ਤੋਂ ਬਾਅਦ ਦਿਨੇਸ਼, ਅਨਿਲ ਅਤੇ ਪਰਵਿੰਦਰ ਨੇ ਜਸਪਾਲ ਦੇ ਸਿਰ 'ਤੇ ਪੱਥਰ ਨਾਲ ਤਾਬੜਤੋੜ ਹਮਲਾ ਕਰ ਦਿੱਤਾ ਅਤੇ ਫਰਾਰ ਹੋ ਗਏ।