ਹੁਸ਼ਿਆਰਪੁਰ 'ਚ ਫੁਕਰਿਆਂ ਦੀ ਫੁਕਰਬਾਜ਼ੀ ਨੇ ਲਈ 20 ਸਾਲਾਂ ਲੜਕੀ ਦੀ ਜਾਨ,ਕੱਲ ਹੋਣਾ ਸੀ ਪੇਪਰ
ਮਿਲੀ ਜਾਣਕਾਰੀ ਮੁਤਾਬਕ ਹੁਸ਼ਿਆਰਪੁਰ ਦੇ ਮੁਹੱਲਾ ਛੱਤਾ ਬਾਜ਼ਾਰ 'ਚ ਬੀਤੀ ਰਾਤ 11 ਵਜੇ ਦੇ ਕਰੀਬ ਇਕ ਲੜਕੀ ਦੇ ਵਿਆਹ ਸਮਾਰੋਹ ਦੇ ਚਲਦਿਆਂ ਜਾਗੋ ਕੱਢੀ ਜਾ ਰਹੀ ਸੀ ਕਿ ਇਸ ਦੌਰਾਨ ਗੁਆਂਢ 'ਚ ਰਹਿਣ ਵਾਲੀ ਲੜਕੀ ਸਾਕਸ਼ੀ ਅਰੋੜਾ (20) ਐੱਮ.ਬੀ.ਏ. ਦੀ ਵਿਦਿਆਰਥਣ ਆਪਣੇ ਘਰ ਦੀ ਛੱਤ 'ਤੇ ਖੜੀ ਹੋ ਕੇ ਜਾਗੋ ਦੇਖ ਰਹੀ ਸੀ।
ਕੱਢੀ ਗਈ ਜਾਗੋ ਦੇ ਸਮਾਰੋਹ ਦੌਰਾਨ ਲਾੜੀ ਦੇ ਪਿਤਾ ਅਸ਼ੋਕ ਸ਼ੋਕੀ ਨੇ ਗੋਲੀ ਚਲਾ ਦਿੱਤੀ,ਜੋ ਛੱਤ 'ਤੇ ਖੜੀ ਸਾਕਸ਼ੀ ਦੇ ਜਾ ਲੱਗੀ,ਜਿਸ ਨਾਲ ਉਸ ਦੀ ਮੌਤ ਹੋ ਗਈ।ਗੋਲੀ ਲੱਗਣ ਤੋਂ ਬਾਅਦ ਸਾਕਸ਼ੀ ਅਰੋੜਾ ਨੂੰ 2 ਨੌਜਵਾਨ ਤੁਰੰਤ ਐਕਟਿਵਾ 'ਤੇ ਸਵਾਰ ਹੋ ਇਕ ਨਿੱਜੀ ਹਸਪਤਾਲ 'ਚ ਲੈ ਕੇ ਪਹੁੰਚੇ।
ਡਿਊਟੀ 'ਤੇ ਤਾਇਨਾਤ ਮੈਡੀਕਲ ਸਟਾਫ ਨੇ ਜਦ ਕਿਹਾ ਕਿ ਲੜਕੀ ਦੀ ਤਾਂ ਮੌਤ ਹੋ ਚੁੱਕੀ ਹੈ ਤਾਂ ਦੋਵੇਂ ਹੀ ਲੜਕੇ ਮੌਕੇ ਤੋਂ ਗਾਇਬ ਹੋ ਗਏ।ਘਟਨਾ ਦਾ ਪਤਾ ਚੱਲਦੇ ਹੀ ਡੀ.ਐੱਸ.ਪੀ. ਸਿਟੀ ਸੁਖਵਿੰਦਰ ਸਿੰਘ ਨੇ ਪੁਲਿਸ ਫੋਰਸ ਦੇ ਨਾਲ ਮੌਕੇ 'ਤੇ ਪਹੁੰਚ ਕੇ ਅਸ਼ੋਕ ਸ਼ੋਕੀ ਨੂੰ ਗ੍ਰਿਫਤਾਰ ਕਰ ਲਿਆ ਸੀ,ਜਦਕਿ ਉਸ ਦਾ ਦੋਸਤ ਫਰਾਰ ਦੱਸਿਆ ਜਾ ਰਿਹਾ ਹੈ।ਸਿਟੀ ਪੁਲਸ ਨੇ ਦੋਸ਼ੀਆਂ ਦੇ ਖਿਲਾਫ ਧਾਰਾ 302 ਅਤੇ ਆਰਮਜ ਐਕਟ ਦੇ ਅਧੀਨ ਕੇਸ ਦਰਜ ਕੀਤਾ ਹੈ।
ਸਾਕਸ਼ੀ ਦੀ ਮੌਤ ਦੀ ਖਬਰ ਫੈਲਦੇ ਹੀ ਵਿਆਹ ਦੀਆਂ ਖੁਸ਼ੀਆਂ ਚੀਖ-ਦਿਹਾੜੇ 'ਚ ਬਦਲ ਗਈਆਂ।ਸਾਕਸ਼ੀ ਦੇ ਪਿਤਾ ਚਰਨਜੀਤ ਅਰੋੜਾ ਨੇ ਪੁਲਿਸ ਨੂੰ ਦੱਸਿਆ ਕਿ ਪ੍ਰਸ਼ਾਸਨ ਦੀ ਇਜਾਜ਼ਤ ਲਏ ਬਿਨਾਂ ਦੇਰ ਰਾਤ ਡੀ.ਜੇ. ਦੇ ਰੋਲੇ 'ਚ ਅਸ਼ੋਕ ਅਤੇ ਉਸ ਦੇ ਸਾਥੀ ਦੋਨਾਲੀ ਅਤੇ ਪਿਸਤੌਲ ਚਲਾ ਰਹੇ ਸੀ,ਜਿਸ ਦੀ ਗੋਲੀ ਨਾਲ ਮੇਰੀ ਬੇਟੀ ਸਾਕਸ਼ੀ ਦੀ ਮੌਤ ਹੋ ਗਈ।
ਸਾਕਸ਼ੀ ਜਲੰਧਰ ਦੇ ਏ.ਪੀ.ਜੇ. ਕਾਲਜ 'ਚ ਐੱਮ.ਬੀ.ਏ ਦੀ ਹੋਣਹਾਰ ਵਿਦਿਆਰਥਣ ਸੀ ਅਤੇ ਸੋਮਵਾਰ ਤੋਂ ਪ੍ਰੀਖਿਆ ਸ਼ੁਰੂ ਹੋਣ ਵਾਲੀ ਸੀ।ਉਨ੍ਹਾਂ ਨੇ ਪੁਲਿਸ ਤੋਂ ਮੰਗ ਕੀਤੀ ਕਿ ਦੋਸ਼ੀਆਂ ਦੇ ਖਿਲਾਫ ਸਖਤ ਕਾਰਵਾਈ ਕੀਤੀ ਜਾਵੇ।
-PTCNews
