ਕੋਵਿਡ 19 - "ਸੈੱਲਫ਼- ਆਈਸੋਲੇਸ਼ਨ" 'ਤੇ ਹੋ ਤਾਂ ਘਬਰਾਉਣਾ ਕਿਉਂ? ਸਮੇਂ ਨੂੰ ਕਰੋ ਇੰਝ ਬਤੀਤ!
ਕੋਰੋਨਾ ਵਾਇਰਸ ਕਰਕੇ ਸਾਰੇ ਦੇਸ਼ਾਂ ਦੀਆਂ ਸਰਕਾਰਾਂ ਆਪਣੇ ਨਾਗਰਿਕਾਂ ਦੀ ਸਿਹਤ ਸੁਰੱਖਿਆ ਸੰਬੰਧੀ ਅਹਿਮ ਫ਼ੈਸਲੇ ਲੈ ਰਹੀਆਂ ਹਨ ਅਤੇ ਕਰੜੇ ਪ੍ਰਬੰਧ ਕਰਨ 'ਚ ਜੁਟੀਆਂ ਹੋਈਆਂ ਹਨ । ਕਨੇਡਾ , ਅਮਰੀਕਾ , ਆਸਟ੍ਰੇਲੀਆ, ਇਟਲੀ ਅਤੇ ਭਾਰਤ ਸਮੇਤ ਜਿੰਨ੍ਹਾਂ ਵੀ ਦੇਸ਼ਾਂ 'ਚ ਕਰੋਨਾ ਦਸਤਕ ਦੇ ਚੁੱਕਾ ਹੈ ਉੱਥੋਂ ਦੀਆਂ ਸਰਕਾਰਾਂ ਚੁਕੰਨੀਆਂ ਹੋ ਚੁੱਕੀਆਂ ਹਨ ਅਤੇ ਸਭ ਨੇ ਆਪਣੀ ਕਮਰ ਕੱਸ ਲਈ ਹੈ ।
ਤਕਰੀਬਨ ਇਹਨਾਂ ਸਾਰੇ ਹੀ ਦੇਸ਼ਾਂ ਦੇ ਨਾਗਰਿਕਾਂ ਨੂੰ ਘਰ 'ਚ ਹੀ ਰਹਿਣ ਦੀਆਂ ਹਦਾਇਤਾਂ ਦਿੱਤੀਆਂ ਜਾ ਰਹੀਆਂ ਹਨ ਤਾਂ ਜੋ ਉਹ ਕਰੋਨਾ ਵਾਇਰਸ ਦੀ ਲਪੇਟ 'ਚ ਨਾ ਆ ਸਕਣ । ਆਪਣੇ ਨਾਗਰਿਕਾਂ ਦੀ ਸੁਰੱਖਿਆ ਨੂੰ ਮੁੱਖ ਰੱਖ ਕੇ ਰਾਤ-ਦਿਨ ਸਰਕਾਰਾਂ ਹਰ ਪ੍ਰਬੰਧ ਦਾ ਜਾਇਜ਼ਾ ਲੈ ਰਹੀਆਂ ਹਨ ।
ਇਸ ਸਮੇਂ 'ਚ ਜੋ ਵੀ ਸਾਵਧਾਨੀ ਵਜੋਂ ਆਪਣੇ ਆਪ ਨੂੰ ਘਰ ਦੇ ਅੰਦਰ ਬੰਦ ( ਕੁਆਰੰਟੀਨ) ਕਰ ਰਹੇ ਹਨ ਜਾਂ ਜੋ ਘਰ ਤੋਂ ਹੀ ਦਫ਼ਤਰੀ ਕੰਮ ਕਾਜ ਨੂੰ ਸੰਭਾਲ ਰਹੇ ਹਨ ਉਹਨਾਂ ਲਈ ਇਹ ਸਮਾਂ ਕੁਝ ਚੁਣੌਤੀਆਂ ਭਰਪੂਰ ਵੀ ਹੋਵੇਗਾ । ਇਸ ਦੇ ਨਾਲ ਹੀ ਸੈਲਫ਼- ਆਈਸੋਲੇਸ਼ਨ 'ਤੇ ਗਏ ਲੋਕਾਂ ਨੂੰ ਇਸ ਸਮੇਂ ਦੌਰਾਨ ਸਵੈ-ਪੜਚੋਲ ਤੋਂ ਲੈ ਕੇ ਕੁਝ ਨਵਾਂ ਸਿੱਖਣ ਅਤੇ ਆਪਣੇ ਪਰਿਵਾਰ ਨਾਲ ਸਮਾਂ ਬਿਤਾਉਣ ਦਾ ਵਕਤ ਮਿਲੇਗਾ । ਸੋ ਇਸ ਸਮੇਂ 'ਚ ਕੋਰੋਨਾ ਵਾਇਰਸ ਨੂੰ ਆਪਣੇ ਆਪ 'ਤੇ ਹਾਵੀ ਨਾ ਹੋਣ ਦਿਓ ਬਲਕਿ ਘਰ 'ਚ ਰਹਿ ਕੇ ਹੀ ਕੁਝ ਨਵਾਂ ਸਿੱਖੋ ਅਤੇ ਆਪਣੇ ਪਰਿਵਾਰ ਨਾਲ ਕੁਆਲਿਟੀ (ਵਧੀਆ) ਸਮਾਂ ਬਤੀਤ ਕਰੋ । ਇਸ ਸਮੇਂ ਨੂੰ ਤੁਸੀਂ ਇੰਝ ਵੀ ਬਤੀਤ ਕਰ ਸਕਦੇ ਹੋ :-
1. ਕਿਤਾਬਾਂ ਮਨੁੱਖ ਦੀਆਂ ਬਿਹਤਰੀਨ ਸਾਥੀ ਹੁੰਦੀਆਂ ਹਨ , ਇਸ ਲਈ ਸੈਲਫ਼- ਆਈਸੋਲੇਸ਼ਨ ਦੇ ਸਮੇਂ ਦੌਰਾਨ ਚੰਗੀਆਂ ਕਿਤਾਬਾਂ ਪੜੋ ਅਤੇ ਆਪਣੀ ਜਾਣਕਾਰੀ 'ਚ ਵਾਧਾ ਕਰੋ ।
2. ਤੁਹਾਡੀ ਜਿਸ ਕੰਮ 'ਚ ਰੁਚੀ ਹੈ ਉਸ ਕੰਮ 'ਚ ਹੋਰ ਮੁਹਾਰਤ ਹਾਸਿਲ ਕਰਨ ਲਈ ਤੁਸੀਂ ਉਸਦਾ ਅਭਿਆਸ ਕਰ ਸਕਦੇ ਹੋ , ਉਦਾਹਰਣ ਵਜੋਂ ਜੇ ਤੁਸੀਂ ਪੇਂਟਿੰਗ ਕਰਦੇ ਹੋ ਜਾਂ ਫਿਰ ਗਾਉਣ ਦਾ ਸ਼ੌਂਕ ਰੱਖਦੇ ਹੋ ਤਾਂ ਘਰ ਦੇ ਅੰਦਰ ਰਹਿ ਕੇ ਹੀ ਤੁਸੀਂ ਆਪਣਾ ਅਭਿਆਸ ਕਰ ਸਕਦੇ ਹੋ ।
3. ਜੇਕਰ ਤੁਹਾਡੇ ਪਰਿਵਾਰ ਦਾ ਕੋਈ ਜੀਅ ਕੁਝ ਸਿੱਖਣਾ ਚਾਹੁੰਦਾ ਹੈ ਤਾਂ ਤੁਸੀਂ ਉਸਦੀ ਮਦਦ ਕਰ ਸਕਦੇ ਹੋ , ਇਸ ਨਾਲ ਤੁਹਾਨੂੰ ਖੁਸ਼ੀ ਵੀ ਮਿਲੇਗੀ ।
4. ਮੈਡੀਟੇਸ਼ਨ ਖੁਦ ਨੂੰ ਤਣਾਅ-ਮੁਕਤ ਰੱਖਣ ਦਾ ਸਭ ਤੋਂ ਅਸਰਦਾਰ ਤਰੀਕਾ ਹੈ , ਜੇ ਤੁਸੀ ਖੁਦ ਨੂੰ ਤਣਾਅ 'ਚ ਮਹਿਸੂਸ ਕਰੋ ਤਾਂ ਮੈਡੀਟੇਸ਼ਨ ਤੁਹਾਡੇ ਲਈ ਬਹੁਤ ਵਧੀਆ ਰਹੇਗੀ ।
5. ਚੰਗੀਆਂ ਅਤੇ ਆਪਣੀ ਪਸੰਦ ਦੀਆਂ ਮੂਵੀਜ਼ ਦੇਖ ਸਕਦੇ ਹੋ , ਇਸ ਨਾਲ ਤੁਹਾਡਾ ਸਮਾਂ ਵਧੀਆ ਬੀਤੇਗਾ ।
6. ਆਪਣੇ ਦਫ਼ਤਰੀ ਕੰਮ-ਕਾਜ 'ਚ ਹੋਰ ਨਿਪੁੰਨਤਾ ਹਾਸਿਲ ਕਰਨ ਲਈ ਇਸਤੇ ਕੰਮ ਕਰ ਸਕਦੇ ਹੋ ।
7. ਜੇ ਤੁਸੀਂ ਕੁਕਿੰਗ ਦੇ ਸ਼ੌਕੀਨ ਹੋ ਤਾਂ ਨਵੇਂ ਖਾਣਿਆਂ ਦੇ ਤਜ਼ਰਬੇ ਹਾਸਿਲ ਕਰ ਸਕਦੇ ਹੋ ।
8. ਜੇਕਰ ਤੁਸੀਂ ਵਿਆਹੇ ਹੋ ਅਤੇ ਤੁਹਾਡੇ ਬੱਚੇ ਹਨ ਤਾਂ ਉਹਨਾਂ ਦੀ ਪੜ੍ਹਾਈ ਪ੍ਰਤੀ ਵਧੇਰੇ ਧਿਆਨ ਦੇ ਸਕਦੇ ਹੋ ।
ਇਹ ਸਮਾਂ ਜੇਕਰ ਪੈਨਿਕ ਨਾ ਹੋ ਕੇ ਸੁਲਝੇ ਤਰੀਕੇ ਨਾਲ ਹੰਢਾਇਆ ਜਾਵੇ ਤਾਂ ਯਕੀਨਨ ਤੁਸੀਂ ਖੁਦ ਨੂੰ ਬਿਹਤਰ ਮਹਿਸੂਸ ਕਰੋਗੇ ।