ਉੱਜਵਲਾ ਯੋਜਨਾ ਦਾ ਸੱਚ, ਕਰੋੜਾਂ ਲੋਕਾਂ ਨੇ ਇੱਕ ਵਾਰ ਵੀ ਨਹੀਂ ਭਰਵਾਇਆ ਸਿਲੰਡਰ, ਜਾਣੋ ਹੈਰਾਨੀਜਨਕ ਅੰਕੜਾ

The truth of Ujjwala Yojana: ਪਿਛਲੇ ਦਿਨੀਂ ਕੇਂਦਰ ਸਰਕਾਰ ਨੇ ਸੰਸਦ ਵਿੱਚ ਪ੍ਰਧਾਨ ਮੰਤਰੀ ਉੱਜਵਲਾ ਯੋਜਨਾ ਤਹਿਤ ਦਿੱਤੇ ਗਏ ਗੈਸ ਕੁਨੈਕਸ਼ਨਾਂ ਨੂੰ ਰੀਫਿਲ ਕਰਨ ਦੇ ਅੰਕੜੇ ਦਿੱਤੇ ਸਨ। ਪੈਟਰੋਲੀਅਮ ਅਤੇ ਕੁਦਰਤੀ ਗੈਸ ਕੇਂਦਰੀ ਰਾਜ ਮੰਤਰੀ ਰਾਮੇਸ਼ਵਰ ਤੇਲੀ ਨੇ ਰਾਜ ਸਭਾ ਵਿੱਚ ਇੱਕ ਸਵਾਲ ਦੇ ਲਿਖਤੀ ਜਵਾਬ ਵਿੱਚ ਦੱਸਿਆ ਕਿ ਉੱਜਵਲਾ ਯੋਜਨਾ ਦੇ 4.13 ਕਰੋੜ ਲਾਭਪਾਤਰੀਆਂ ਨੇ ਇੱਕ ਵਾਰ ਵੀ ਐਲਪੀਜੀ ਸਿਲੰਡਰ ਰੀਫਿਲ ਨਹੀਂ ਕੀਤਾ ਹੈ। ਇਸ ਦੇ ਨਾਲ ਹੀ 7.67 ਕਰੋੜ ਲਾਭਪਾਤਰੀਆਂ ਨੇ ਸਿਰਫ਼ ਇੱਕ ਵਾਰ ਸਿਲੰਡਰ ਭਰਵਾਇਆ ਹੈ। ਵਿਰੋਧੀ ਧਿਰ ਦੇ ਨੇਤਾ ਮਲਿਕਾਰਜੁਨ ਖੜਗੇ ਨੇ ਉੱਜਵਲਾ ਯੋਜਨਾ ਦੇ ਲਾਭਪਾਤਰੀਆਂ ਨਾਲ ਸਬੰਧਤ ਜਾਣਕਾਰੀ ਮੰਗੀ ਸੀ।

1 ਅਗਸਤ ਨੂੰ ਵਪਾਰਕ ਗੈਸ ਸਿਲੰਡਰਾਂ ਦੀਆਂ ਕੀਮਤਾਂ ਵਿੱਚ ਕਟੌਤੀ ਕੀਤੀ ਗਈ ਸੀ, ਪਰ ਘਰੇਲੂ ਰਸੋਈ ਗੈਸ ਸਿਲੰਡਰ (ਐਲਪੀਜੀ) ਦੀਆਂ ਕੀਮਤਾਂ ਪਹਿਲਾਂ ਵਾਂਗ ਹੀ ਬਰਕਰਾਰ ਹਨ। ਸਰਕਾਰ ਨੇ ਸਿਰਫ਼ ਪ੍ਰਧਾਨ ਮੰਤਰੀ ਉੱਜਵਲਾ ਯੋਜਨਾ (PMUY) ਦੇ ਲਾਭਪਾਤਰੀਆਂ ਲਈ ਸਬਸਿਡੀ (LPG ਸਬਸਿਡੀ) ਬਰਕਰਾਰ ਰੱਖੀ ਹੈ। ਬਾਕੀ ਐਲਪੀਜੀ ਖਪਤਕਾਰਾਂ ਲਈ ਸਬਸਿਡੀ ਖ਼ਤਮ ਕਰ ਦਿੱਤੀ ਗਈ ਹੈ। ਪਰ ਸਰਕਾਰ ਦੁਆਰਾ ਸੰਸਦ ਵਿੱਚ ਪੇਸ਼ ਕੀਤੇ ਗਏ ਅੰਕੜਿਆਂ ਤੋਂ ਪਤਾ ਚੱਲਦਾ ਹੈ ਕਿ ਉੱਜਵਲਾ ਯੋਜਨਾ ਦੇ ਲਾਭਪਾਤਰੀਆਂ ਦੀ ਇੱਕ ਵੱਡੀ ਗਿਣਤੀ ਨੇ ਇੱਕ ਵਾਰ ਵੀ ਐਲਪੀਜੀ ਸਿਲੰਡਰ ਨੂੰ ਰੀਫਿਲ ਨਹੀਂ ਕੀਤਾ ਹੈ।

ਰਾਮੇਸ਼ਵਰ ਤੇਲੀ ਨੇ ਕਿਹਾ ਕਿ ਸਾਲ 2017-18 ਦਰਮਿਆਨ ਉੱਜਵਲਾ ਯੋਜਨਾ ਦੇ 46 ਲੱਖ ਲਾਭਪਾਤਰੀਆਂ ਨੇ ਇਕ ਵੀ ਸਿਲੰਡਰ ਰੀਫਿਲ ਨਹੀਂ ਕੀਤਾ। ਇਸ ਦੇ ਨਾਲ ਹੀ ਇਕ ਵਾਰ ਰੀਫਿਲ ਹੋਣ ਵਾਲੇ ਲੋਕਾਂ ਦੀ ਗਿਣਤੀ 1.19 ਕਰੋੜ ਸੀ। ਕੇਂਦਰੀ ਰਾਜ ਮੰਤਰੀ ਅਨੁਸਾਰ 2018-19 ਦੌਰਾਨ 1.24 ਕਰੋੜ, 2019-20 ਦੌਰਾਨ 1.41 ਕਰੋੜ, 2020-21 ਦੌਰਾਨ 10 ਲੱਖ ਅਤੇ 2021-22 ਦੌਰਾਨ 92 ਲੱਖ ਨੇ ਇੱਕ ਵਾਰ ਵੀ ਸਿਲੰਡਰ ਨਹੀਂ ਭਰਵਾਇਆ। ਇਸ ਦੇ ਨਾਲ ਹੀ ਉਨ੍ਹਾਂ ਨੇ ਇੱਕ ਵਾਰ ਸਿਲੰਡਰ ਰਿਫਿਲ ਕਰਵਾਉਣ ਵਾਲਿਆਂ ਦੇ ਵੀ ਅੰਕੜੇ ਦਿੱਤੇ।

ਕਿੰਨੀ ਮਿਲਦੀ ਹੈ ਸਬਸਿਡੀ ?

ਰਾਮੇਸ਼ਵਰ ਤੇਲੀ ਨੇ ਦੱਸਿਆ ਕਿ ਸਾਲ 2018-19 ਦੌਰਾਨ 2.90 ਕਰੋੜ, 2019-20 ਦੌਰਾਨ 1.83 ਕਰੋੜ, 2020-21 ਦੌਰਾਨ 67 ਲੱਖ ਅਤੇ 2021-22 ਦੌਰਾਨ 1.08 ਕਰੋੜ ਉਜਵਾਲਾ ਯੋਜਨਾ ਦੇ ਲਾਭਪਾਤਰੀਆਂ ਨੇ ਸਿਰਫ਼ ਇੱਕ ਵਾਰ ਸਿਲੰਡਰ ਰੀਫਿਲ ਕਰਵਾਇਆ। ਉਨ੍ਹਾਂ ਇਹ ਵੀ ਦੱਸਿਆ ਕਿ ਸਾਲ 2021-22 ਦੌਰਾਨ ਕੁੱਲ 30.53 ਕਰੋੜ ਘਰੇਲੂ ਗੈਸ ਖਪਤਕਾਰਾਂ ਵਿੱਚੋਂ 2.11 ਕਰੋੜ ਨੇ ਇੱਕ ਵਾਰ ਵੀ ਗੈਸ ਸਿਲੰਡਰ ਰੀਫਿਲ ਨਹੀਂ ਕੀਤਾ। ਇਸ ਦੇ ਨਾਲ ਹੀ 2.91 ਕਰੋੜ ਗਾਹਕਾਂ ਨੇ ਇਕ ਵਾਰ ਘਰੇਲੂ ਗੈਸ ਸਿਲੰਡਰ ਭਰਵਾਏ ਹਨ। ਅਪ੍ਰੈਲ 2020 ਤੱਕ ਉੱਜਵਲਾ ਗੈਸ ਦਾ ਸਿਲੰਡਰ ਭਰਵਾਉਣ 'ਤੇ ਗਰੀਬਾਂ ਨੂੰ 162 ਰੁਪਏ ਦੀ ਸਬਸਿਡੀ ਮਿਲਦੀ ਸੀ।

ਕੀ ਨੇ ਨਵੇਂ ਨਿਯਮ ?

ਸਰਕਾਰ ਨੇ ਉੱਜਵਲਾ ਸਕੀਮ ਤਹਿਤ 9 ਕਰੋੜ ਮੁਫਤ ਐਲਪੀਜੀ ਕੁਨੈਕਸ਼ਨ ਵੰਡੇ ਹਨ। ਇਨ੍ਹਾਂ ਸਾਰੇ ਲੋਕਾਂ ਨੂੰ ਐਲਪੀਜੀ ਸਬਸਿਡੀ ਵਜੋਂ 200 ਰੁਪਏ ਪ੍ਰਤੀ ਸਿਲੰਡਰ ਤੈਅ ਕੀਤਾ ਗਿਆ ਹੈ। ਸਰਕਾਰ ਨੇ ਸਾਲਾਨਾ 12 ਸਿਲੰਡਰਾਂ 'ਤੇ ਸਬਸਿਡੀ ਦੇਣ ਦਾ ਨਿਯਮ ਬਣਾਇਆ ਹੈ। 21 ਮਈ 2022 ਤੋਂ 2022-23 ਤੱਕ ਸਰਕਾਰ ਨੇ ਇਹ ਨਿਯਮ ਤੈਅ ਕੀਤੇ ਹਨ। ਉਜਵਲਾ ਸਕੀਮ ਤਹਿਤ ਸਰਕਾਰ ਗਰੀਬ ਪਰਿਵਾਰਾਂ ਦੀਆਂ ਔਰਤਾਂ ਨੂੰ ਮੁਫ਼ਤ ਗੈਸ ਕੁਨੈਕਸ਼ਨ ਦਿੰਦੀ ਹੈ।

ਇਹ ਵੀ ਪੜ੍ਹੋ : ਕੇਂਦਰ ਸਰਕਾਰ ਨੇ ਸੂਬਿਆਂ ਨੂੰ ਵਿਦੇਸ਼ਾਂ ਤੋਂ ਕੋਲਾ ਮੰਗਵਾਉਣ ਦੀ ਦਿੱਤੀ ਛੋਟ

- PTC News