ਝੋਨੇ ਦੀ ਲਵਾਈ ਲਈ ਲੇਬਰ ਨਾ ਮਿਲਣ ਕਾਰਨ ਪ੍ਰੇਸ਼ਾਨੀ 'ਚ ਗਰੀਬ ਕਿਸਾਨ ਨੂੰ ਪਿਆ ਦਿਲ ਦਾ ਦੌਰਾ
ਝੋਨੇ ਦੀ ਲਵਾਈ ਲਈ ਲੇਬਰ ਨਾ ਮਿਲਣ ਕਾਰਨ ਪ੍ਰੇਸ਼ਾਨੀ 'ਚ ਗਰੀਬ ਕਿਸਾਨ ਨੂੰ ਪਿਆ ਦਿਲ ਦਾ ਦੌਰਾ:ਅੱਜ ਕਿਸਾਨ ਝੋਨੇ ਦੀ ਲੇਬਰ ਲਈ ਜਗ੍ਹਾ ਜਗ੍ਹਾ ਧੱਕੇ ਖਾ ਰਹੇ ਹਨ।ਕਿਸਾਨ ਕਦੇ ਸਟੇਸ਼ਨ 'ਤੇ ਕਦੀ ਬੱਸ ਅੱਡਿਆਂ 'ਤੇ ਲੇਬਰ ਨੂੰ ਲੱਭ ਰਹੇ ਹਨ।
ਕਿਸਾਨਾਂ ਵੱਲੋਂ ਲੇਬਰ ਨੂੰ ਰਹਿਣ,ਖਾਣ ਪੀਣ ਤੋਂ ਇਲਾਵਾ ਕਈ ਸਹੂਲਤਾਂ ਦੇਣ ਦੇ ਬਾਵਜੂਦ ਨੂੰ ਲੇਬਰ ਨਹੀਂ ਮਿਲ ਰਹੀ।ਸਰਕਾਰ ਵੱਲੋਂ ਪੰਜਾਬ 'ਚ ਝੋਨਾ ਲਾਉਣ ਦੀ ਤਰੀਖ ਮਿਥਨ ਤੋਂ ਬਾਅਦ ਇਕਦਮ ਝੋਨੇ ਦੀ ਲਵਾਈ ਦਾ ਜ਼ੋਰ ਵੱਧਣ ਕਾਰਨ ਲੇਬਰ ਦੀ ਤੋੜ ਪੈ ਗਈ,ਜੋ ਕਿਸਾਨਾਂ ਲਈ ਪ੍ਰੇਸ਼ਾਨੀ ਦਾ ਸਬੱਬ ਬਣ ਬਣ ਗਈ।ਜਿਸ ਕਾਰਨ ਕਿਸਾਨ ਹੁਣ ਨਵੀ ਪ੍ਰੇਸ਼ਾਨੀ ਅਤੇ ਚਿੰਤਾ 'ਚੋ ਗੁਜ਼ਰ ਰਿਹਾ ਹੈ।
ਅਜਿਹਾ ਹੀ ਇੱਕ ਮਾਮਲਾ ਫਰੀਦਕੋਟ ਦੇ ਕਸਬਾ ਸਾਦਿਕ ਵਿੱਚ ਸਾਹਮਣੇ ਆਇਆ ਹੈ।ਜਿੱਥੇ ਇੱਕ 42 ਸਾਲਾ ਗਰੀਬ ਕਿਸਾਨ ਨਰਿੰਦਰ ਸਿੰਘ ਦੀ ਖੇਤ ਵਿੱਚ ਕੰਮ ਕਰਨ ਦੌਰਾਨ ਹੀ ਦਿਲ ਦਾ ਦੌਰਾ ਪੈਣ ਨਾਲ ਮੌਤ ਹੋ ਗਈ।
ਮ੍ਰਿਤਕ ਕਿਸਾਨ ਦੇ ਪਿਤਾ ਨੇ ਦੱਸਿਆ ਕਿ ਨਰਿੰਦਰ ਸਿੰਘ ਦੀ ਕੁਝ ਆਪਣੀ ਜਮੀਨ ਸੀ ਅਤੇ ਕੁਝ ਠੇਕੇ 'ਤੇ ਲੈ ਕੇ ਵਾਹੀ ਕਰਦਾ ਸੀ ਪ੍ਰੰਤੂ ਲੇਬਰ ਦੀ ਸਮੱਸਿਆ ਕਾਰਨ ਝੋਨਾ ਨਹੀਂ ਲੱਗ ਰਿਹਾ ਸੀ ਜਿਸ ਕਾਰਨ ਉਹ ਦਿਮਾਗੀ ਤੌਰ 'ਤੇ ਪ੍ਰੇਸ਼ਾਨ ਰਹਿਣ ਲੱਗ ਪਿਆ ਕਿਉਕਿ ਉਸਦੀ ਬੇਟੀ ਦੀ ਸ਼ਾਦੀ ਵੀ ਪੱਕੀ ਹੋ ਚੁਕੀ ਸੀ ਅਤੇ ਉਸਨੂੰ ਫਿਕਰ ਸੀ ਕਿ ਜੇਕਰ ਝੋਨਾ ਨਾ ਲੱਗਿਆ ਤਾਂ ਉਹ ਆਪਣੀ ਧੀ ਦੀ ਸ਼ਾਦੀ ਕਿਵੇ ਕਰੇਗਾ ਅਤੇ ਠੇਕੇ ਦੀ ਪੈਲੀ ਦੇ ਪੈਸੇ ਕਿਵੇਂ ਪੂਰੇ ਕਰੇਗਾ।ਉਸਨੇ ਕਿਹਾ ਕਿ ਇਸ ਸਭ 'ਚ ਛੋਟਾ ਕਿਸਾਨ ਮਰ ਰਿਹਾ ਕਿਉਕਿ ਵੱਡੇ ਕਿਸਾਨ ਨੂੰ ਤਾਂ ਲੇਬਰ ਜਲਦੀ ਮਿਲ ਜਾਂਦੀ ਹੈ ਲੇਕਿਨ ਛੋਟੇ ਕਿਸਾਨਾਂ ਵੱਲ ਲੇਬਰ ਮੂੰਹ ਨਹੀਂ ਕਰਦੀ।
ਸ਼੍ਰੋਮਣੀ ਅਕਾਲੀ ਦਲ ਦੇ ਬੁਲਾਰੇ ਪਰਮਬੰਸ ਸਿੰਘ ਬੰਟੀ ਰੋਮਾਨਾਂ ਨੇ ਕਿਹਾ ਕਿ ਇਹ ਬੜੀ ਅਫਸੋਸ ਵਾਲੀ ਗੱਲ ਹੈ ਕਿ ਪਹਿਲਾਂ ਕਿਸਾਨ ਕਰਜ਼ੇ ਕਾਰਨ ਮਰ ਰਹੇ ਸਨ ਪਰ ਹੁਣ ਇਹ ਪਹਿਲੀ ਨਵਾਂ ਕੇਸ ਪੰਜਾਬ ਵਿੱਚ ਦੇਖਣ ਨੂੰ ਮਿਲਿਆ ਹੈ ਜਦ ਕਿਸਾਨ ਲੇਬਰ ਨਾ ਮਿਲਣ ਕਾਰਨ ਦਿਮਾਗੀ ਪ੍ਰੇਸ਼ਾਨ ਰਹਿਣ ਲੱਗ ਪਿਆ ਹੈ।ਉਨ੍ਹਾਂ ਕਿਹਾ ਕਿ ਸਰਕਾਰ ਵੱਲੋਂ ਜੋ ਝੋਨਾ ਲਾਉਣ ਦੀ ਤਾਰੀਖ ਨਿਸ਼ਚਿਤ ਕੀਤੀ ਸੀ ਉਸੇ ਸਮੇਂ ਹੀ ਹਰਿਆਣਾ ਵਿੱਚ ਵੀ ਝੋਨਾ ਲਾਉਣ ਦਾ ਸਮਾਂ ਸੀ ਜਿਸ ਕਾਰਨ ਪਰਵਾਸੀ ਲੇਬਰ ਦੀ ਕਾਫੀ ਘਾਟ ਮਿਲ ਰਹੀ ਹੈ।ਉਨ੍ਹਾਂ ਸਰਕਾਰ ਕੋਲੋਂ ਮੰਗ ਕੀਤੀ ਕਿ ਜੋ ਇਹ ਨਵੀ ਸਥਿਤੀ ਪੰਜਾਬ ਵਿੱਚ ਉਤਪਨ ਹੋ ਰਹੀ ਹੈ ਉਸ ਲਈ ਸਹੀ ਫੈਸਲੇ ਲੈਣ ਲੀਏ ਗੰਭੀਰ ਹੋਣਾ ਪਵੇਗਾ।
-PTCNews
