Result: ਸਵੱਛਤਾ ਰੈਂਕਿੰਗ 'ਚ ਪੰਜਾਬ ਦੇ ਛੋਟੇ ਸ਼ਹਿਰ ਸਭ ਤੋਂ ਰਹੇ ਅੱਗੇ, ਗੋਬਿੰਦਗੜ੍ਹ ਪਹਿਲੇ ਨੰਬਰ 'ਤੇ
Swachh Survekshan 2022 Result: ਪੰਜਾਬ ਦੇ ਛੋਟੇ ਕਸਬਿਆਂ ਨੇ ਕੇਂਦਰ ਸਰਕਾਰ ਵੱਲੋਂ ਐਲਾਨੀ ਸਫਾਈ ਰੈਂਕਿੰਗ ਦਾ ਜ਼ੋਨਲ ਪੱਧਰ ਦਾ ਐਵਾਰਡ ਜਿੱਤਿਆ ਹੈ। 50 ਹਜ਼ਾਰ ਤੋਂ ਇੱਕ ਲੱਖ ਦੀ ਆਬਾਦੀ ਵਾਲੇ ਉੱਤਰੀ ਜ਼ੋਨ ਦੀ ਸ਼੍ਰੇਣੀ ਵਿੱਚ ਸਭ ਤੋਂ ਸਾਫ਼ ਸ਼ਹਿਰ ਦਾ ਐਵਾਰਡ ਗੋਬਿੰਦਗੜ੍ਹ ਨੂੰ ਮਿਲਿਆ। ਇਸ ਸ਼੍ਰੇਣੀ ਵਿੱਚ ਫਾਜ਼ਿਲਕਾ ਨੇ ਸੈਲਫ ਸਸਟੇਨੇਬਲ ਸਿਟੀ ਐਵਾਰਡ ਜਿੱਤਿਆ ਹੈ। 25 ਤੋਂ 50 ਹਜ਼ਾਰ ਦੀ ਆਬਾਦੀ ਦੀ ਸ਼੍ਰੇਣੀ ਵਿੱਚ ਨਵਾਂਸ਼ਹਿਰ ਨੂੰ ਸਭ ਤੋਂ ਸਵੱਛ ਸ਼ਹਿਰ ਦਾ ਐਵਾਰਡ ਮਿਲਿਆ ਹੈ।
ਸਿਟੀਜ਼ਨਜ਼ ਫੀਡਬੈਕ ਵਿੱਚ ਦਸੂਹਾ, ਇਨੋਵੇਸ਼ਨ ਐਂਡ ਬੈਸਟ ਪ੍ਰੈਕਟਿਸ ਵਿੱਚ ਕੁਰਾਲੀ ਅਤੇ ਸੈਲਫ ਸਸਟੇਨੇਬਲ ਸਿਟੀ ਵਿੱਚ ਨੰਗਲ ਸ਼ਹਿਰ ਉੱਤਰੀ ਜ਼ੋਨ ਵਿੱਚ ਪਹਿਲੇ ਸਥਾਨ ’ਤੇ ਰਿਹਾ। 15 ਤੋਂ 25 ਹਜ਼ਾਰ ਦੀ ਆਬਾਦੀ ਵਾਲੇ ਖੇਤਰ ਵਿੱਚ ਸਭ ਤੋਂ ਸਾਫ਼-ਸੁਥਰੇ ਸ਼ਹਿਰ ਦਾ ਐਵਾਰਡ ਮੂਨਕ ਨੂੰ ਅਤੇ ਸਵੈ-ਨਿਰਭਰ ਦਾ ਐਵਾਰਡ ਭੀਖੀ ਨੂੰ ਮਿਲਿਆ। 15 ਹਜ਼ਾਰ ਦੀ ਆਬਾਦੀ ਦੀ ਸ਼੍ਰੇਣੀ ਵਿੱਚ ਇਨੋਵੇਸ਼ਨ ਅਤੇ ਬੈਸਟ ਪ੍ਰੈਕਟਿਸ ਦਾ ਐਵਾਰਡ ਘੱਗਾ ਨੂੰ ਮਿਲਿਆ। ਹਾਲਾਂਕਿ ਵੱਡੇ ਸ਼ਹਿਰਾਂ ਦੀ ਸੂਚੀ ਵਿੱਚ ਪੰਜਾਬ ਦਾ ਕੋਈ ਵੀ ਸ਼ਹਿਰ ਟਾਪ 50 ਵਿੱਚ ਥਾਂ ਨਹੀਂ ਬਣਾ ਸਕਿਆ। ਟਾਪ 100 ਵਿੱਚ ਸਿਰਫ਼ ਫਿਰੋਜ਼ਪੁਰ ਦਾ ਹੀ ਨਾਂ ਹੈ। ਇਸ ਦਾ ਰੈਂਕ 85ਵਾਂ ਹੈ।
ਇਹ ਵੀ ਪੜ੍ਹੋ: ਇੰਡੋਨੇਸ਼ੀਆ 'ਚ ਫੁੱਟਬਾਲ ਮੈਚ ਦੌਰਾਨ ਹੋਈ ਹਿੰਸਾ, 127 ਦੀ ਮੌਤ, 180 ਤੋਂ ਵੱਧ ਜ਼ਖਮੀ
ਸਫਾਈ ਰੈਂਕਿੰਗ ਵਿੱਚ ਕੰਟੋਨਮੈਂਟ ਬੋਰਡ ਦਾ ਨਤੀਜਾ ਵੀ ਜਾਰੀ ਹੋ ਗਿਆ ਹੈ। ਇਸ ਵਿੱਚ ਜਲੰਧਰ ਛਾਉਣੀ ਅੱਠਵੇਂ, ਫਿਰੋਜ਼ਮੈਂਟ 12ਵੇਂ ਅਤੇ ਅੰਮ੍ਰਿਤਸਰ 37ਵੇਂ ਸਥਾਨ ’ਤੇ ਰਹੀ। ਮਹਾਰਾਸ਼ਟਰ ਦੀ ਦੇਵਲੀ ਪਹਿਲੇ ਸਥਾਨ 'ਤੇ ਅਤੇ ਅਹਿਮਦਾਬਾਦ ਕੈਂਟ ਦੂਜੇ ਸਥਾਨ 'ਤੇ ਰਹੀ। ਇਨ੍ਹਾਂ ਨਤੀਜਿਆਂ ਵਿੱਚ ਲੁਧਿਆਣਾ ਸ਼ਹਿਰ ਨੂੰ 10 ਲੱਖ ਤੋਂ ਵੱਧ ਆਬਾਦੀ ਵਾਲੇ ਸ਼ਹਿਰਾਂ ਵਿੱਚੋਂ 40ਵਾਂ ਸਥਾਨ ਮਿਲਿਆ ਹੈ। ਪਿਛਲੇ ਸਾਲ ਨਗਰ ਨਿਗਮ ਨੂੰ 39ਵਾਂ ਰੈਂਕ ਮਿਲਿਆ ਸੀ। ਹਾਲਾਂਕਿ ਨਿਗਮ ਅਧਿਕਾਰੀਆਂ ਨੂੰ ਇਸ ਰੈਂਕਿੰਗ ਤੋਂ ਕੁਝ ਰਾਹਤ ਮਿਲੀ ਹੈ ਕਿਉਂਕਿ ਇਸ ਵਾਰ ਰੈਂਕਿੰਗ 'ਚ ਜ਼ਿਆਦਾ ਗਿਰਾਵਟ ਨਹੀਂ ਆਈ ਹੈ।
ਧਿਆਨ ਯੋਗ ਹੈ ਕਿ ਕੇਂਦਰ ਸਰਕਾਰ ਨੇ ਸਾਲ 2022 ਲਈ ਸਵੱਛ ਸਰਵੇਖਣ ਕਰਵਾਇਆ ਸੀ। ਇਸ ਵਾਰ ਦਰਜਾਬੰਦੀ ਲਈ ਕੁੱਲ ਤਿੰਨ ਸ਼੍ਰੇਣੀਆਂ ਰੱਖੀਆਂ ਗਈਆਂ ਸਨ। ਇਸ ਵਿੱਚ ਨਾਗਰਿਕ ਦੀ ਆਵਾਜ਼, ਪ੍ਰਮਾਣੀਕਰਨ ਅਤੇ ਸੇਵਾ ਪੱਧਰ ਸ਼ਾਮਲ ਹਨ। ਇਨ੍ਹਾਂ ਤਿੰਨਾਂ ਸ਼੍ਰੇਣੀਆਂ ਵਿੱਚ ਕੁੱਲ 7500 ਅੰਕ ਰੱਖੇ ਗਏ ਸਨ। ਨਗਰ ਨਿਗਮ ਲੁਧਿਆਣਾ ਨੇ ਇਸ ਵਿੱਚ 3005.07 ਅੰਕ ਪ੍ਰਾਪਤ ਕੀਤੇ ਹਨ।
-PTC News
