Hantavirus : ਹੰਤਾਵਾਇਰਸ ਦਾ ਕਹਿਰ, ਹੁਣ ਤੱਕ ਕਰੂਜ਼ 'ਚ 3 ਲੋਕਾਂ ਦੀ ਮੌਤ, ਜਹਾਜ਼ 'ਚ ਚਾਲਕ ਦਲ 'ਚ ਦੋ ਭਾਰਤੀ ਵੀ ਸ਼ਾਮਲ
Hantavirus : ਕੋਰੋਨਾਵਾਇਰਸ ਤੋਂ ਬਾਅਦ ਹੁਣ ਇੱਕ ਨਵੇਂ ਵਾਇਰਸ ਹੰਤਾਵਾਇਰਸ ਦੁਨੀਆ 'ਚ ਦਹਿਸ਼ਤ ਮਚਾਉਣ ਦੀ ਤਿਆਰੀ ਕਰ ਰਿਹਾ ਹੈ। ਇਹ ਖ਼ਤਰਨਾਕ ਵਾਇਰਸ, ਜੋ ਕਿ ਇੱਕ ਕਰੂਜ਼ ਜਹਾਜ਼, ਐਮਵੀ ਹੋਂਡੀਅਸ 'ਤੇ ਫੈਲਣ ਕਾਰਨ ਦੁਨੀਆ ਭਰ ਵਿੱਚ ਹੰਗਾਮਾ ਮੱਚ ਗਿਆ ਹੈ। ਜਹਾਜ਼ ਵਿੱਚ ਸਵਾਰ ਪੰਜ ਲੋਕ ਵਾਇਰਸ ਨਾਲ ਸੰਕਰਮਿਤ ਹੋਏ ਹਨ, ਜਦੋਂ ਕਿ ਕਈ ਹੋਰਾਂ ਨੂੰ ਸ਼ੱਕੀ ਸੂਚੀ ਵਿੱਚ ਰੱਖਿਆ ਗਿਆ ਹੈ। ਇਸ ਦੌਰਾਨ ਇਹ ਗੱਲ ਵੀ ਸਾਹਮਣੇ ਆ ਰਹੀ ਹੈ ਕਿ ਉਕਤ ਜਹਾਜ਼ ਦੇ ਚਾਲਕ ਦਲ ਵਿੱਚ ਦੋ ਭਾਰਤੀ ਵੀ ਹਨ।
ਦੱਸ ਦਈਏ ਕਿ ਜਹਾਜ਼ 'ਚ ਵਾਇਰਲ ਦੇ ਪ੍ਰਭਾਵ 'ਚ ਆਉਣ ਕਾਰਨ ਇੱਕ ਡੱਚ ਜੋੜੇ ਸਮੇਤ ਤਿੰਨ ਲੋਕਾਂ ਦੀ ਮੌਤ ਹੋ ਗਈ ਹੈ। ਇਸ ਲਈ ਹੁਣ ਜਹਾਜ਼ ਵਿੱਚ ਸਵਾਰ ਲੋਕ ਕਿਹੜੇ ਦੇਸ਼ਾਂ 'ਚ ਪਹੁੰਚੇ, ਇਸ ਦਾ ਪਤਾ ਲਗਾਉਣ ਦੀਆਂ ਕੋਸ਼ਿਸ਼ਾਂ ਜਾਰੀ ਹਨ, ਤਾਂ ਜੋ ਇਸ ਨੂੰ ਰੋਕਿਆ ਜਾ ਸਕੇ।
ਓਸ਼ਨਵਾਈਡ ਐਕਸਪੀਡੀਸ਼ਨਜ਼ ਵੱਲੋਂ ਸੰਚਾਲਿਤ ਇਹ ਆਲੀਸ਼ਾਨ ਕਰੂਜ਼ ਜਹਾਜ਼ 1 ਅਪ੍ਰੈਲ ਨੂੰ ਅਰਜਨਟੀਨਾ ਤੋਂ ਸਫਰ 'ਤੇ ਨਿਕਲਿਆ ਸੀ ਅਤੇ 10 ਮਈ ਨੂੰ ਸਪੇਨ ਦੇ ਕੈਨਰੀ ਟਾਪੂਆਂ 'ਤੇ ਪੁੱਜ ਸਕਦਾ ਹੈ। ਮੀਡੀਆ ਰਿਪੋਰਟਾਂ ਅਨੁਸਾਰ, ਇਸ ਜਹਾਜ਼ 'ਤੇ 28 ਦੇਸ਼ਾਂ ਦੇ ਲਗਭਗ 150 ਯਾਤਰੀ ਅਤੇ ਚਾਲਕ ਦਲ ਦੇ ਮੈਂਬਰ ਸਨ, ਪਰ ਕੁੱਝ ਲੋਕ 24 ਅਪ੍ਰੈਲ ਨੂੰ ਸੇਂਟ ਹੇਲੇਨਾ ਟਾਪੂ 'ਤੇ ਉਤਰ ਗਏ ਸਨ। ਬੀਬੀਸੀ ਦੀ ਰਿਪੋਰਟ ਅਨੁਸਾਰ, ਇਨ੍ਹਾਂ ਵਿਚੋਂ 38 ਫਿਲੀਪਾਈਨ, 31 ਯੂਕੇ, 23 ਅਮਰੀਕਾ, 16 ਨੀਦਰਲੈਂਡ, 14 ਸਪੇਨ, 9 ਜਰਮਨੀ, 6 ਕੈਨੇਡਾ ਅਤੇ ਦੋ ਚਾਲਕ ਦਲ ਦੇ ਮੈਂਬਰ ਭਾਰਤ ਤੋਂ ਹਨ।
ਉਧਰ, ਵਿਸ਼ਵ ਸਿਹਤ ਸੰਗਠਨ ਨੇ ਵੀ ਵੀਰਵਾਰ ਨੂੰ ਕਿਹਾ ਸੀ ਕਿ ਹੰਤਾਵਾਇਰਸ ਕਾਰਨ 8 ਸ਼ੱਕੀਆਂ ਵਿਚੋਂ 5 ਦੀ ਪੁਸ਼ਟੀ ਹੋਈ ਹੈ, ਜਿਨ੍ਹਾਂ ਵਿਚੋਂ 3 ਦੀ ਮੌਤ ਹੋ ਗਈ ਹੈ। WHO ਨੇ ਕਿਹਾ ਕਿ ਇਹ ਵਾਇਰਸ ਆਮ ਤੌਰ 'ਤੇ ਚੂਹਿਆਂ ਤੋਂ ਫੈਲਦਾ ਹੈ, ਪਰ ਤਾਜ਼ਾ ਘਟਨਾਕ੍ਰਮ 'ਚ ਪਹਿਲੀ ਵਾਰ ਲੋਕਾਂ ਵਿਚਕਾਰ ਸੰਚਾਰ ਦਸਤਾਵੇਜ਼ੀ ਰੂਪ ਵਿੱਚ ਦਰਜ ਕੀਤਾ ਗਿਆ ਹੈ।
ਹੰਤਾ ਦਾ ਕੀ ਅਰਥ ਹੈ?
ਹੰਤਾ ਵਾਇਰਸ ਨਾਮ ਖ਼ਤਰਨਾਕ ਲੱਗਦਾ ਹੈ। ਇਸਦਾ ਨਾਮ ਦੱਖਣੀ ਕੋਰੀਆ ਵਿੱਚ ਹੰਤਾਨ ਨਦੀ ਦੇ ਨਾਮ ਤੇ ਰੱਖਿਆ ਗਿਆ ਹੈ। ਇਹ ਵਾਇਰਸ ਪਹਿਲੀ ਵਾਰ 1978 ਵਿੱਚ ਹੰਤਾਨ ਨਦੀ ਦੇ ਨੇੜੇ ਪਾਏ ਗਏ ਧਾਰੀਦਾਰ ਜੰਗਲੀ ਚੂਹਿਆਂ ਵਿੱਚ ਪਾਇਆ ਗਿਆ ਸੀ। ਇਸ ਵਾਇਰਸ ਨੂੰ ਕੋਰੀਆਈ ਯੁੱਧ ਨਾਲ ਵੀ ਜੋੜਿਆ ਗਿਆ ਹੈ। 1951-1953 ਦੇ ਕੋਰੀਆਈ ਯੁੱਧ ਦੌਰਾਨ, 3,000 ਤੋਂ ਵੱਧ ਸੰਯੁਕਤ ਰਾਸ਼ਟਰ ਸੈਨਿਕ ਅਚਾਨਕ ਬਿਮਾਰ ਹੋ ਗਏ, ਜਿਸ ਕਾਰਨ ਵਿਗਿਆਨੀਆਂ ਨੂੰ ਇਸ ਬਿਮਾਰੀ ਦੀ ਜਾਂਚ ਕਰਨ ਲਈ ਪ੍ਰੇਰਿਤ ਕੀਤਾ ਗਿਆ। ਅਖੀਰ ਇਸ ਖ਼ਤਰਨਾਕ ਹੰਤਾਵਾਇਰਸ ਦੀ ਖੋਜ ਕੀਤੀ ਗਈ।
ਹੰਤਾਵਾਇਰਸ ਕਿੰਨਾ ਖ਼ਤਰਨਾਕ ਹੈ?
ਹੰਤਾਵਾਇਰਸ ਆਮ ਤੌਰ 'ਤੇ ਚੂਹਿਆਂ, ਗਿਲਹਰੀਆਂ ਅਤੇ ਹੋਰ ਜੀਵਾਂ ਸਮੇਤ ਚੂਹਿਆਂ ਰਾਹੀਂ ਫੈਲਦਾ ਹੈ। ਇਹ ਵਾਇਰਸ ਉਨ੍ਹਾਂ ਦੇ ਮਲ, ਪਿਸ਼ਾਬ ਜਾਂ ਲਾਰ ਰਾਹੀਂ ਫੈਲ ਸਕਦਾ ਹੈ। ਇਹ ਮਨੁੱਖਾਂ ਵਿੱਚ ਤੇਜ਼ੀ ਨਾਲ ਫੈਲਦਾ ਹੈ ਅਤੇ ਸਾਹ ਦੇ ਸੰਪਰਕ ਰਾਹੀਂ ਵੀ ਫੈਲ ਸਕਦਾ ਹੈ। 2018 ਵਿੱਚ ਅਰਜਨਟੀਨਾ ਵਿੱਚ ਇੱਕ ਆਦਮੀ ਨੇ 34 ਲੋਕਾਂ ਨੂੰ ਸੰਕਰਮਿਤ ਕੀਤਾ, ਜਿਸ ਵਿੱਚ 11 ਦੀ ਮੌਤ ਹੋ ਗਈ। ਹਾਲਾਂਕਿ, ਮਾਹਰ ਇਸਨੂੰ ਕੋਰੋਨਾਵਾਇਰਸ ਜਿੰਨਾ ਘਾਤਕ ਮੰਨਣ ਤੋਂ ਝਿਜਕਦੇ ਹਨ, ਕਿਉਂਕਿ ਇਹ ਕਈ ਘੰਟਿਆਂ ਜਾਂ ਦਿਨਾਂ ਤੱਕ ਸੰਕਰਮਿਤ ਵਿਅਕਤੀ ਨਾਲ ਨੇੜਲੇ ਸੰਪਰਕ ਰਾਹੀਂ ਫੈਲਦਾ ਹੈ।
ਹੰਤਾਵਾਇਰਸ ਦੇ ਲੱਛਣ ਕੀ ਹਨ ?
ਹੰਤਾ ਵਾਇਰਸ ਨਾਲ ਸੰਕਰਮਿਤ ਹੋਣ ਤੋਂ ਬਾਅਦ, ਇੱਕ ਵਿਅਕਤੀ ਨੂੰ ਸਾਹ ਲੈਣ ਵਿੱਚ ਮੁਸ਼ਕਲ ਅਤੇ ਫੇਫੜਿਆਂ ਨੂੰ ਨੁਕਸਾਨ ਹੁੰਦਾ ਹੈ। ਇਸ ਨਾਲ ਗੁਰਦੇ ਫੇਲ੍ਹ ਹੋ ਸਕਦੇ ਹਨ ਅਤੇ ਅੰਦਰੂਨੀ ਖੂਨ ਵਹਿਣ ਦਾ ਖ਼ਤਰਾ ਵੀ ਹੋ ਸਕਦਾ ਹੈ। ਹੋਰ ਲੱਛਣਾਂ ਵਿੱਚ ਬੁਖਾਰ, ਸਿਰ ਦਰਦ, ਥਕਾਵਟ, ਠੰਢ ਅਤੇ ਮਾਸਪੇਸ਼ੀਆਂ ਵਿੱਚ ਦਰਦ ਸ਼ਾਮਲ ਹਨ।
- PTC NEWS
