Pakistani Cricketers ਨੇ ਖੋਲ੍ਹਿਆ ਇਮਰਾਨ ਖਾਨ ਲਈ ਮੋਰਚਾ; ਗਾਵਸਕਰ ਅਤੇ ਕਪਿਲ ਵੀ ਹੋਏ ਸ਼ਾਮਲ, ਜਾਣੋ ਕੀ ਕੀਤੀ ਜਾ ਰਹੀ ਮੰਗ
ਦੁਨੀਆ ਭਰ ਦੇ ਸਾਬਕਾ ਕ੍ਰਿਕਟ ਕਪਤਾਨਾਂ ਨੇ ਇੱਕ ਸਾਂਝਾ ਬਿਆਨ ਜਾਰੀ ਕਰਕੇ ਪਾਕਿਸਤਾਨ ਸਰਕਾਰ ਨੂੰ ਸਾਬਕਾ ਪ੍ਰਧਾਨ ਮੰਤਰੀ ਅਤੇ 1992 ਦੇ ਵਿਸ਼ਵ ਕੱਪ ਜੇਤੂ ਕਪਤਾਨ ਇਮਰਾਨ ਖਾਨ ਨੂੰ ਤੁਰੰਤ ਸਹੀ ਡਾਕਟਰੀ ਦੇਖਭਾਲ ਅਤੇ ਸਨਮਾਨਜਨਕ ਇਲਾਜ ਪ੍ਰਦਾਨ ਕਰਨ ਦੀ ਅਪੀਲ ਕੀਤੀ ਹੈ।
ਦੱਸ ਦਈਏ ਕਿ 17 ਫਰਵਰੀ ਨੂੰ ਜਾਰੀ ਬਿਆਨ ਵਿੱਚ, ਸੁਨੀਲ ਗਾਵਸਕਰ, ਕਪਿਲ ਦੇਵ, ਐਲਨ ਬਾਰਡਰ ਅਤੇ ਕਲਾਈਵ ਲੋਇਡ ਵਰਗੇ ਪ੍ਰਮੁੱਖ ਕ੍ਰਿਕਟਰਾਂ ਨੇ ਪਿਛਲੇ ਢਾਈ ਸਾਲਾਂ ਤੋਂ ਇਮਰਾਨ ਖਾਨ ਦੀ ਵਿਗੜਦੀ ਸਿਹਤ ਅਤੇ ਜੇਲ੍ਹ ਵਿੱਚ ਉਨ੍ਹਾਂ ਦੀ ਹਾਲਤ 'ਤੇ ਡੂੰਘੀ ਚਿੰਤਾ ਪ੍ਰਗਟ ਕੀਤੀ ਹੈ।
ਇਮਰਾਨ ਖਾਨ ਲਈ ਚੁੱਕੀ ਗਈ ਆਵਾਜ਼
ਅਪੀਲ 'ਤੇ ਦਸਤਖਤ ਕਰਨ ਵਾਲੇ 14 ਕਪਤਾਨਾਂ ਵਿੱਚ ਮਾਈਕਲ ਐਥਰਟਨ, ਐਲਨ ਬਾਰਡਰ, ਮਾਈਕਲ ਬ੍ਰੇਅਰਲੀ, ਗ੍ਰੇਗ ਚੈਪਲ, ਇਆਨ ਚੈਪਲ, ਬੇਲਿੰਡਾ ਕਲਾਰਕ, ਸੁਨੀਲ ਗਾਵਸਕਰ, ਡੇਵਿਡ ਗਾਵਰ, ਕਿਮ ਹਿਊਜ, ਨਾਸਿਰ ਹੁਸੈਨ, ਕਲਾਈਵ ਲੋਇਡ, ਕਪਿਲ ਦੇਵ, ਸਟੀਫਨ ਵਾ ਅਤੇ ਜੌਨ ਰਾਈਟ ਸ਼ਾਮਲ ਹਨ। ਕਪਤਾਨਾਂ ਨੇ ਇਮਰਾਨ ਖਾਨ ਦੇ ਖੇਡ ਵਿੱਚ ਯੋਗਦਾਨ ਨੂੰ ਯਾਦ ਕੀਤਾ, ਉਨ੍ਹਾਂ ਨੂੰ ਕ੍ਰਿਕਟ ਜਗਤ ਵਿੱਚ ਇੱਕ ਮਹਾਨ ਹਸਤੀ ਕਿਹਾ।
ਇਮਰਾਨ ਖਾਨ ਹਨ ਬਹੁਤ ਹੀ ਬਿਮਾਰ
ਰਿਪੋਰਟਾਂ ਅਨੁਸਾਰ, 73 ਸਾਲਾ ਇਮਰਾਨ ਖਾਨ ਨੇ ਦਾਅਵਾ ਕੀਤਾ ਹੈ ਕਿ ਉਨ੍ਹਾਂ ਦੀ ਸੱਜੀ ਅੱਖ ਵਿੱਚ ਲਗਭਗ 85 ਫੀਸਦ ਨਜ਼ਰ ਘੱਟ ਗਈ ਹੈ। ਡਾਕਟਰਾਂ ਦੀ ਇੱਕ ਟੀਮ ਨੇ ਹਾਲ ਹੀ ਵਿੱਚ 15 ਫਰਵਰੀ ਨੂੰ ਰਾਵਲਪਿੰਡੀ ਦੀ ਅਦਿਆਲਾ ਜੇਲ੍ਹ ਵਿੱਚ ਉਨ੍ਹਾਂ ਦੀ ਜਾਂਚ ਕੀਤੀ ਸੀ, ਪਰ ਖਾਨ ਦੀ ਪਾਰਟੀ, ਪੀਟੀਆਈ, ਨੇ ਜਾਂਚ ਦੇ ਢੰਗ 'ਤੇ ਸਵਾਲ ਉਠਾਏ ਹਨ। ਕੈਪਟਨਾਂ ਦੇ ਸਮੂਹ ਨੇ ਮੰਗ ਕੀਤੀ ਹੈ ਕਿ ਇਮਰਾਨ ਖਾਨ ਨੂੰ ਮਾਹਿਰਾਂ ਦੁਆਰਾ ਨਿਰੰਤਰ ਡਾਕਟਰੀ ਦੇਖਭਾਲ, ਉਨ੍ਹਾਂ ਦੇ ਪਰਿਵਾਰ ਤੋਂ ਨਿਯਮਤ ਮੁਲਾਕਾਤਾਂ ਅਤੇ ਇੱਕ ਪਾਰਦਰਸ਼ੀ ਕਾਨੂੰਨੀ ਪ੍ਰਕਿਰਿਆ ਮਿਲਣੀ ਚਾਹੀਦੀ ਹੈ।
ਪਾਕਿਸਤਾਨੀ ਖਿਡਾਰੀਆਂ ਨੇ ਵੀ ਚੁੱਕੀ ਮੰਗ
ਕਾਬਿਲੇਗੌਰ ਹੈ ਕਿ ਇਮਰਾਨ ਖਾਨ ਅਗਸਤ 2023 ਤੋਂ ਜੇਲ੍ਹ ਵਿੱਚ ਹਨ ਅਤੇ ਕਈ ਕਾਨੂੰਨੀ ਮਾਮਲਿਆਂ ਦਾ ਸਾਹਮਣਾ ਕਰ ਰਹੇ ਹਨ। ਉਨ੍ਹਾਂ ਦੇ ਸਾਬਕਾ ਸਾਥੀ ਵਸੀਮ ਅਕਰਮ ਨੇ ਹਾਲ ਹੀ ਵਿੱਚ ਉਨ੍ਹਾਂ ਦੀ ਵਿਗੜਦੀ ਸਿਹਤ 'ਤੇ ਦੁੱਖ ਪ੍ਰਗਟ ਕੀਤਾ ਹੈ ਅਤੇ ਅਧਿਕਾਰੀਆਂ ਨੂੰ ਬਿਹਤਰ ਇਲਾਜ ਯਕੀਨੀ ਬਣਾਉਣ ਦੀ ਅਪੀਲ ਕੀਤੀ ਹੈ। ਸਾਬਕਾ ਪਾਕਿਸਤਾਨੀ ਕ੍ਰਿਕਟਰ ਆਪਣੇ ਮਹਾਨ ਕਪਤਾਨ ਇਮਰਾਨ ਖਾਨ ਲਈ ਇਕੱਠੇ ਹੋ ਰਹੇ ਹਨ ਅਤੇ ਆਵਾਜਾ ਬੁਲੰਦ ਕਰ ਰਹੇ ਹਨ।
ਇਹ ਵੀ ਪੜ੍ਹੋ : Jammu and Kashmir ’ਚ ਵੱਡੀ ਅੱਤਵਾਦੀ ਸਾਜ਼ਿਸ਼ ਨਾਕਾਮ, ਸੁਰੱਖਿਆ ਬਲਾਂ ਨੇ ਸ਼੍ਰੀਨਗਰ-ਬਾਰਾਮੂਲਾ ਹਾਈਵੇਅ 'ਤੇ IED ਨੂੰ ਕੀਤਾ Diffuse
- PTC NEWS
