Nobel Prize 2020 ਦੀ ਹੋਈ ਘੋਸ਼ਣਾ, ਮੈਡੀਕਲ ਖ਼ੇਤਰ ਦੇ ਤਿੰਨ ਨਾਮ ਆਏ ਸਾਹਮਣੇ
ਸੋਮਵਾਰ ਨੂੰ ਸਾਲ 2020 ਦੇ ਨੋਬਲ ਪੁਰਸਕਾਰ ਦੀ ਘੋਸ਼ਣਾ ਸ਼ੁਰੂ ਕੀਤੀ ਗਈ। ਇਹ ਘੋਸ਼ਣਾ ਸਵੀਡਨ ਦੇ ਸਟਾਕਹੋਲਮ ਸ਼ਹਿਰ ਵਿਚ ਹੋਈ ਜਿਥੇ ਮੈਡੀਸਨ ਖੇਤਰ 'ਚ ਨੋਬਲ ਪੁਰਸਕਾਰ ਦੀ ਘੋਸ਼ਣਾ ਕਰ ਦਿੱਤੀ ਗਈ ਹੈ। ਇਸ ਸਾਲ ਮੈਡੀਸਨ ਦਾ ਨੋਬਲ ਪੁਰਸਕਾਰ ਹਾਰਵੇ ਅਲਟਰ, ਮਾਇਕਲ ਹਾਫਟਨ ਤੇ ਚਾਰਲਸ ਰਾਈਸ ਨੂੰ ਦਿੱਤਾ ਗਿਆ ਹੈ। ਇਹਨਾਂ ਵਿਗਿਆਨੀਆਂ ਨੂੰ ਨੋਬਲ ਪੁਰਸਕਾਰ ਹੇਪਟਾਇਟਿਸ ਸੀ ਵਾਇਰਸ ਦੀ ਖੋਜ ਲਈ ਦਿੱਤਾ ਗਿਆ ਹੈ। ਅਲਟਰ ਅਤੇ ਚਾਰਲਸ ਰਾਇਸ ਜਿੱਥੇ ਅਮਰੀਕਾ ਤੋਂ ਹਨ ਉੱਥੇ ਮਾਇਕਲ ਹਾਫਟਨ ਬ੍ਰਿਟੇਨ ਦੇ ਵਸਨੀਕ ਹਨ।ਨੋਬਲ ਪੁਰਸਕਾਰ ਲਈ ਨਾਮਾਂਕਿਤ ਇਹਨਾਂ ਵਿਗਿਆਨੀਆਂ ਨੂੰ ਕਰੀਬ 11 ਲੱਖ 20 ਹਜ਼ਾਰ ਡਾਲਰ ਦੀ ਰਾਸ਼ੀ ਦਿੱਤੀ ਜਾਵੇਗੀ। ਨੋਬਲ ਪੁਰਸਕਾਰ ਦੇਣ ਵਾਲੀ ਸੰਸਥਾ ਨੇ ਕਿਹਾ ਕਿ ਇਸ ਸਾਲ ਇਹ ਪੁਰਸਕਾਰ ਖੂਨ ਤੋਂ ਪੈਦਾ ਹੋਣ ਵਾਲੇ ਹੇਪਟਾਇਟਿਸ ਨਾਲ ਲੜਾਈ ਵਿਚ ਯੋਗਦਾਨ ਦੇਣ ਦੇ ਲਈ ਤਿੰਨ ਵਿਗਿਆਨੀਆਂ ਨੂੰ ਦਿੱਤਾ ਗਿਆ ਹੈ। ਸੰਸਥਾ ਨੇ ਕਿਹਾ ਕਿ ਇਸ ਹੇਪਟਾਇਟਿਸ ਨਾਲ ਦੁਨੀਆ ਭਰ ਵਿਚ ਵੱਡੀ ਗਿਣਤੀ ਵਿਚ ਲੋਕਾਂ ਨੂੰ ਸਿਰੋਸਿਸ ਅਤੇ ਲੀਵਰ ਕੈਂਸਰ ਹੁੰਦਾ ਹੈ। ਤਿੰਨੇ ਹੀ ਵਿਗਿਆਨੀਆਂ ਨੇ ਇਕ ਨੋਵਲ ਵਾਇਰਸ ਦੀ ਖੋਜ ਵਿਚ ਬੁਨਿਆਦੀ ਖੋਜ ਕੀਤੀ, ਜਿਸ ਨਾਲ ਹੇਪਟਾਇਟਿਸ ਸੀ ਦੀ ਪਛਾਣ ਹੋ ਸਕੀ।