ਚੰਡੀਗੜ੍ਹ - ਚੰਡੀਗੜ੍ਹ ਦੇ ਗਵਰਮੈਂਟ ਮੈਡੀਕਲ ਕਾਲੇਜ ਐਂਡ ਹੌਸਪਿਟਲ ਸੈਕਟਰ 32 (GMCH-32) ਦੇ ਐਮਰਜੈਂਸੀ ਵਾਰਡ 'ਚ ਜ਼ਿਆਦਾ ਲੋਕਾਂ ਨੂੰ ਅੰਦਰ ਜਾਣ ਤੋਂ ਰੋਕਣਾ ਸਿਕਿਓਰਟੀ ਗਾਰਡ ਨੂੰ ਐਨਾ ਭਾਰੀ ਪਿਆ ਕਿ ਉਸ ਨੂੰ ਜਾਨ ਤੋਂ ਹੱਥ ਧੋਣੇ ਪਏ। ਕੁਝ ਭੜਕੇ ਨੌਜਵਾਨਾਂ ਨੇ ਸਿਕਿਓਰਟੀ ਗਾਰਡ ਦੀ ਏਨੀ ਬੇਰਹਿਮੀ ਨਾਲ ਕੁੱਟਮਾਰ ਕੀਤੀ ਕਿ ਉਸ ਨੂੰ ਵੈਂਟੀਲੇਟਰ 'ਤੇ ਰੱਖਣਾ ਪਿਆ, ਅਤੇ ਜ਼ਖਮਾਂ ਦੀ ਤਾਬ ਨਾ ਸਹਾਰਦੇ ਹੋਏ, ਸੋਮਵਾਰ ਸਵੇਰੇ ਉਸ ਨੇ ਦਮ ਤੋੜ ਦਿੱਤਾ।
ਐਮਰਜੈਂਸੀ ਤੇ ਕੋਰੋਨਾ ਕਾਰਨ ਭੀੜ ਤੋਂ ਵਰਜਿਆ
ਮ੍ਰਿਤਕ ਸਿਕਿਓਰਟੀ ਗਾਰਡ ਦੀ ਪਛਾਣ 51 ਸਾਲਾ ਸ਼ਾਮ ਸੁੰਦਰ ਵਜੋਂ ਹੋਈ ਹੈ। ਥਾਣਾ ਸੈਕਟਰ-34 ਪੁਲਿਸ ਟੀਮ ਨੇ ਚਾਰ ਦੋਸ਼ੀਆਂ ਨੂੰ ਗ੍ਰਿਫ਼ਤਾਰ ਵੀ ਕਰ ਲਿਆ ਹੈ। ਪੁਲਿਸ ਨੇ ਇਨ੍ਹਾਂ ਸਾਰਿਆਂ ਖ਼ਿਲਾਫ਼ ਧਾਰਾ 302 ਤਹਿਤ ਕੇਸ ਦਰਜ ਕਰ ਲਿਆ ਹੈ। ਸੁਰਿੰਦਰ ਕੁਮਾਰ ਨਾਂਅ ਦੇ ਇੱਕ ਹੋਰ ਸਿਕਿਓਰਟੀ ਗਾਰਡ ਨੇ ਦੱਸਿਆ ਕਿ ਐਤਵਾਰ ਦੇਰ ਰਾਤ ਹਸਪਤਾਲ 'ਚ ਇੱਕ ਐਕਸੀਡੈਂਟ ਕੇਸ ਆਇਆ ਸੀ। ਸੜਕ ਹਾਦਸੇ 'ਚ ਜ਼ਖ਼ਮੀ ਨੌਜਵਾਨ ਨੂੰ ਕਰੀਬ 8 ਤੋਂ 10 ਲੋਕ ਲਿਆਏ ਸਨ। ਉਸ ਦੀ ਗੰਭੀਰ ਹਾਲਤ ਨੂੰ ਦੇਖਦੇ ਹੋਏ ਡਾਕਟਰਾਂ ਨੇ ਉਸ ਨੂੰ ਐਮਰਜੈਂਸੀ 'ਚ ਭੇਜਣ ਦੀ ਸਲਾਹ ਦਿੱਤੀ। ਜ਼ਖ਼ਮੀ ਨੌਜਵਾਨ ਦੇ ਨਾਲ ਆਏ ਸਾਰੇ ਨੌਜਵਾਨ ਜਦੋਂ ਐਮਰਜੈਂਸੀ 'ਚ ਵੜਨ ਲੱਗੇ ਤਾਂ ਉੱਥੇ ਤਾਇਨਾਤ ਸਿਕਿਓਰਟੀ ਗਾਰਡ ਨੇ ਉਨ੍ਹਾਂ ਨੂੰ ਐਮਰਜੈਂਸੀ 'ਚ ਭੀੜ ਕਰਨ ਤੋਂ ਮਨ੍ਹਾ ਕੀਤਾ ਅਤੇ ਬਾਕੀਆਂ ਨੂੰ ਬਾਹਰ ਉਡੀਕ ਕਰਨ ਲਈ ਕਿਹਾ। ਇਸ ਤੋਂ ਇਲਾਵਾ ਕੋਰੋਨਾ ਦੇ ਪ੍ਰਕੋਪ ਨੂੰ ਦੇਖਦੇ ਹੋਏ ਵੀ ਹਸਪਤਾਲ ਪ੍ਰਸ਼ਾਸਨ ਨੇ ਕਾਫ਼ੀ ਸਖ਼ਤੀ ਦੇ ਹੁਕਮ ਦਿੱਤੇ ਹੋਏ ਹਨ। ਇਸ ਲਈ ਕਿਹਾ ਗਿਆ ਕਿ ਦੋ ਤੋਂ ਤਿੰਨ ਲੋਕ ਜ਼ਖ਼ਮੀ ਨਾਲ ਅੰਦਰ ਜਾਣ। ਪਰ ਜ਼ਖਮੀ ਨਾਲ ਆਏ ਨੌਜਵਾਨ ਲੜਕੇ ਸਾਰਿਆਂ ਦੇ ਅੰਦਰ ਜਾਣ ਦੀ ਜ਼ਿੱਦ ਤੇ ਅੜ ਗਏ ਅਤੇ ਇਸੇ ਗੱਲ 'ਤੇ ਭੜਕ ਕੇ ਉਹ ਸਿਕਿਓਰਟੀ ਗਾਰਡ ਨਾਲ ਹੱਥੋਪਾਈ 'ਤੇ ਉੱਤਰ ਆਏ, ਅਤੇ ਕੁੱਟਮਾਰ ਕਰ ਦੇ ਹੋਏ ਉਸ ਨੂੰ ਘਸੀਟਦੇ ਹੋਏ ਬਾਹਰ ਲੈ ਗਏ।
ਝਗੜੇ ਤੋਂ ਰੋਕਣਾ ਪਿਆ ਮਹਿੰਗਾ
ਇਸ ਦੌਰਾਨ ਐਮਰਜੈਂਸੀ ਦੇ ਬਾਹਰ ਡਿਊਟੀ 'ਤੇ ਤਾਇਨਾਤ ਸ਼ਾਮ ਸੁੰਦਰ ਨੇ ਕੁੱਟਮਾਰ ਕਰ ਰਹੇ ਨੌਜਵਾਨਾਂ ਨੂੰ ਰੋਕਣ ਦੀ ਕੋਸ਼ਿਸ਼ ਕੀਤੀ। ਭੜਕੇ ਨੌਜਵਾਨ ਐਮਰਜੈਂਸੀ ਦੇ ਅੰਦਰ ਡਿਊਟੀ ਕਰਦੇ ਗਾਰਡ ਨੂੰ ਜ਼ਖ਼ਮੀ ਛੱਡ ਕੇ ਬਚਾਅ ਕਰਨ ਆਏ ਸ਼ਾਮ ਸੁੰਦਰ 'ਤੇ ਟੁੱਟ ਪਏ। ਉਸ ਦੀ ਬੁਰੀ ਤਰ੍ਹਾਂ ਕੁੱਟਮਾਰ ਕਰਨ ਤੋਂ ਬਾਅਦ ਸਾਰੇ ਦੋਸ਼ੀ ਨੌਜਵਾਨ ਉੱਥੋਂ ਭੱਜ ਨਿੱਕਲੇ। ਜ਼ਖਮੀ ਸ਼ਾਮ ਸੁੰਦਰ ਨੂੰ ਹੋਰਨਾਂ ਸਿਕਿਓਰਿਟੀ ਗਾਰਡਾਂ ਨੇ ਉਸ ਨੂੰ ਤੁਰੰਤ ਐਮਰਜੈਂਸੀ 'ਚ ਦਾਖ਼ਲ ਕਰਵਾਇਆ, ਜਿੱਥੇ ਉਸ ਨੂੰ ਵੈਂਟੀਲੇਟਰ 'ਤੇ ਸ਼ਿਫਟ ਕਰ ਦਿੱਤਾ ਗਿਆ। ਹਾਲਾਂਕਿ ਇਲਾਜ ਦੌਰਾਨ ਜ਼ਿਆਦਾ ਸੱਟਾਂ ਲੱਗਣ ਕਰਕੇ ਉਸ ਨੇ ਦਮ ਤੋੜ ਦਿੱਤਾ।
ਬਾਕੀ ਦੋਸ਼ੀਆਂ ਦੀ ਤਲਾਸ਼ ਜਾਰੀ
ਸ਼ਾਮ ਸੁੰਦਰ ਦੀ ਮੌਤ ਤੋਂ ਬਾਅਦ ਉਸ ਦੇ ਪਰਿਵਾਰ ਅਤੇ ਹੋਰਨਾਂ ਸਿਕਿਓਰਿਟੀ ਗਾਰਡਾਂ ਨੇ ਇਸ ਮਸਲੇ ਨੂੰ ਲੈ ਕੇ ਜੰਮ ਕੇ ਹੰਗਾਮਾ ਕੀਤਾ। ਚੰਡੀਗੜ੍ਹ ਪੁਲਿਸ ਬਾਕੀ ਮੁਲਜ਼ਮਾਂ ਦੀ ਭਾਲ਼ 'ਚ ਲਗਾਤਾਰ ਜੁਟੀ ਹੋਈ ਹੈ। ਗ੍ਰਿਫ਼ਤਾਰ ਹੋਏ ਚਾਰ ਦੋਸ਼ੀਆਂ ਰਾਹੀਂ ਪੁਲਿਸ ਵੱਲੋਂ ਬਾਕੀ ਦੇ ਫ਼ਰਾਰ ਦੋਸ਼ੀਆਂ ਦੀ ਪਛਾਣ ਕੀਤੀ ਜਾ ਚੁੱਕੀ ਹੈ। ਪੁਲਿਸ ਟੀਮਾਂ ਵੱਲੋਂ ਛਾਪੇਮਾਰੀ ਜਾਰੀ ਹੈ, ਅਤੇ ਦਾਅਵਾ ਕੀਤਾ ਜਾ ਰਿਹਾ ਹੈ ਕਿ ਸਾਰੇ ਦੋਸ਼ੀਆਂ ਨੂੰ ਛੇਤੀ ਗ੍ਰਿਫ਼ਤਾਰ ਕਰ ਲਿਆ ਜਾਵੇਗਾ।
