CRPF ਜਵਾਨ ਨੇ ਪਾਕਿਸਤਾਨੀ ਮਹਿਲਾ ਨਾਲ Video Call ਰਾਹੀਂ ਕੀਤਾ ਸੀ ਨਿਕਾਹ, ਗ੍ਰਹਿ ਮੰਤਰਾਲੇ ਨੇ ਕੀਤਾ ਬਰਖਾਸਤ
CRPF Jawan Marrying Pakistani Woman : ਗ੍ਰਹਿ ਮੰਤਰਾਲੇ ਨੇ ਸੀਆਰਪੀਐਫ ਜਵਾਨ ਮੁਨੀਰ ਅਹਿਮਦ (CRPF Jawan Munir Ahmed) ਵਿਰੁੱਧ ਸਖ਼ਤ ਕਾਰਵਾਈ ਕੀਤੀ ਹੈ, ਜਿਸਨੇ ਵਿਭਾਗ ਨੂੰ ਦੱਸੇ ਬਿਨਾਂ ਇੱਕ ਪਾਕਿਸਤਾਨੀ ਔਰਤ ਨਾਲ ਗੁਪਤ ਢੰਗ ਨਾਲ ਵਿਆਹ ਕੀਤਾ ਸੀ। ਇਸ ਸਿਪਾਹੀ ਨੂੰ ਸੀਆਰਪੀਐਫ ਤੋਂ ਬਰਖਾਸਤ ਕਰ ਦਿੱਤਾ ਗਿਆ ਹੈ। ਉਸਨੇ ਕਿਸੇ ਨੂੰ ਦੱਸੇ ਬਿਨਾਂ ਇੱਕ ਪਾਕਿਸਤਾਨੀ ਔਰਤ ਨਾਲ ਆਨਲਾਈਨ ਵਿਆਹ (online marriage) ਕਰਵਾ ਲਿਆ। ਹੁਣ ਜਦੋਂ ਭਾਰਤ ਸਰਕਾਰ (Indian Government) ਨੇ ਪਾਕਿਸਤਾਨੀ ਲੋਕਾਂ ਨੂੰ ਆਪਣੇ ਦੇਸ਼ ਵਾਪਸ ਜਾਣ ਦਾ ਹੁਕਮ ਜਾਰੀ ਕੀਤਾ ਤਾਂ ਉਸਨੇ ਹਾਈਕੋਰਟ ਦਾ ਸਹਾਰਾ ਲਿਆ, ਜਿਸ 'ਤੇ ਜੰਮੂ-ਕਸ਼ਮੀਰ ਹਾਈ ਕੋਰਟ ਨੇ ਇਸ ਵੇਲੇ ਔਰਤ ਨੂੰ ਪਾਕਿਸਤਾਨ ਭੇਜਣ 'ਤੇ ਅਸਥਾਈ ਰੋਕ ਲਗਾ ਦਿੱਤੀ ਹੈ।
ਸੀਆਰਪੀਐਫ ਜਵਾਨ ਮੁਨੀਰ ਅਹਿਮਦ ਨੇ ਵਿਭਾਗ ਦੀ ਇਜਾਜ਼ਤ ਤੋਂ ਬਿਨਾਂ ਪਾਕਿਸਤਾਨੀ ਨਾਗਰਿਕ ਮੀਨਲ ਖਾਨ ਨਾਲ ਵਿਆਹ ਕਰਵਾ ਲਿਆ ਸੀ। ਅਧਿਕਾਰਤ ਸੂਤਰਾਂ ਨੇ ਪੀਟੀਆਈ ਨੂੰ ਦੱਸਿਆ ਕਿ ਉਸਨੂੰ ਨਿਯਮਾਂ ਅਨੁਸਾਰ ਨੌਕਰੀ ਤੋਂ ਬਰਖਾਸਤ ਕਰ ਦਿੱਤਾ ਗਿਆ ਹੈ ਜਿਸ ਲਈ ਕਿਸੇ ਵੀ ਜਾਂਚ ਦੀ ਲੋੜ ਨਹੀਂ ਹੈ। ਸੀਆਰਪੀਐਫ ਦੇ ਡੀਆਈਜੀ ਐਮ ਦਿਨਾਕਰਨ ਨੇ ਕਿਹਾ, "ਉਸਦੀਆਂ ਗਤੀਵਿਧੀਆਂ ਨੂੰ ਸੇਵਾ ਆਚਰਣ ਦੀ ਉਲੰਘਣਾ ਅਤੇ ਰਾਸ਼ਟਰੀ ਸੁਰੱਖਿਆ ਲਈ ਨੁਕਸਾਨਦੇਹ ਪਾਇਆ ਗਿਆ। ਇਸ ਲਈ, ਉਸ ਵਿਰੁੱਧ ਸਖ਼ਤ ਕਾਰਵਾਈ ਕੀਤੀ ਜਾ ਰਹੀ ਹੈ।"
ਨਿਕਾਹ ਵਟਸਐਪ 'ਤੇ ਹੋਇਆ
ਸੀਆਰਪੀਐਫ ਦੇ ਸਾਬਕਾ ਜਵਾਨ ਮੁਨੀਰ ਅਹਿਮਦ ਅਤੇ ਪਾਕਿਸਤਾਨੀ ਨਾਗਰਿਕ ਮੈਨਾਲ ਖਾਨ ਦਾ ਵਿਆਹ 24 ਮਈ, 2024 ਨੂੰ ਵਟਸਐਪ ਵੀਡੀਓ ਕਾਲ ਰਾਹੀਂ ਹੋਇਆ ਸੀ। ਉਸਨੇ ਅਜਿਹਾ ਕਰਨ ਤੋਂ ਪਹਿਲਾਂ ਵਿਭਾਗ ਤੋਂ ਇਜਾਜ਼ਤ ਨਹੀਂ ਲਈ। ਮੁਨੀਰ ਸੀਆਰਪੀਐਫ ਦੀ 41ਵੀਂ ਬਟਾਲੀਅਨ ਵਿੱਚ ਤਾਇਨਾਤ ਹੈ। ਉਸਨੇ ਨਾ ਸਿਰਫ਼ ਬਿਨਾਂ ਇਜਾਜ਼ਤ ਵਿਆਹ ਕੀਤਾ, ਸਗੋਂ ਆਪਣੀ ਪਤਨੀ ਦੇ ਵੀਜ਼ੇ ਦੀ ਸਥਿਤੀ ਅਤੇ ਭਾਰਤ ਵਿੱਚ ਉਸਦੇ ਠਹਿਰਨ ਬਾਰੇ ਜਾਣਕਾਰੀ ਵੀ ਸੀਆਰਪੀਐਫ ਤੋਂ ਲੁਕਾਈ। ਇੰਨਾ ਹੀ ਨਹੀਂ, ਉਸਨੇ ਅਦਾਲਤ ਵਿੱਚ ਗਲਤ ਬਿਆਨ ਵੀ ਦਿੱਤੇ, ਜਿਸ ਕਾਰਨ ਉਸਦੀ ਹਾਲਤ ਹੋਰ ਗੰਭੀਰ ਹੋ ਗਈ।
ਹਾਈਕੋਰਟ ਨੇ ਮੀਨਲ ਖਾਨ ਨੂੰ ਪਾਕਿਸਤਾਨ ਵਾਪਸੀ ਤੋਂ ਦਿੱਤੀ ਰਾਹਤ
ਸੀਆਰਪੀਐਫ ਜਵਾਨ ਮੁਨੀਰ ਅਹਿਮਦ ਨੂੰ ਜੰਮੂ-ਕਸ਼ਮੀਰ ਹਾਈ ਕੋਰਟ (Jammu Kashmir High Court) ਤੋਂ ਵੱਡੀ ਰਾਹਤ ਮਿਲੀ ਹੈ। ਉਸਦੀ ਪਾਕਿਸਤਾਨੀ ਪਤਨੀ ਮੀਨਲ ਖਾਨ ਨੂੰ ਦੇਸ਼ ਨਿਕਾਲਾ ਦੇਣ ਤੋਂ ਰੋਕ ਦਿੱਤਾ ਗਿਆ ਹੈ। ਪਹਿਲਗਾਮ ਅੱਤਵਾਦੀ ਹਮਲੇ (Pahalgam Attack) ਤੋਂ ਬਾਅਦ, ਭਾਰਤ ਨੇ ਪਾਕਿਸਤਾਨੀ ਨਾਗਰਿਕਾਂ ਦੇ ਵੀਜ਼ੇ ਰੱਦ ਕਰ ਦਿੱਤੇ ਸਨ ਅਤੇ ਉਨ੍ਹਾਂ ਨੂੰ ਦੇਸ਼ ਛੱਡਣ ਦਾ ਹੁਕਮ ਦਿੱਤਾ ਸੀ। ਮੀਨਲ ਮਾਰਚ 2025 ਵਿੱਚ ਭਾਰਤ ਆਈ ਸੀ। ਉਸਨੂੰ 29 ਅਪ੍ਰੈਲ ਨੂੰ ਵਾਹਗਾ ਸਰਹੱਦ ਤੋਂ ਵਾਪਸ ਭੇਜਿਆ ਜਾ ਰਿਹਾ ਸੀ, ਪਰ ਆਖਰੀ ਸਮੇਂ 'ਤੇ ਅਦਾਲਤ ਨੇ ਉਸਦੀ ਦੇਸ਼ ਨਿਕਾਲੇ 'ਤੇ ਰੋਕ ਲਗਾ ਦਿੱਤੀ। ਅਦਾਲਤ ਨੇ ਸਰਕਾਰ ਨੂੰ ਮੀਨਲ ਦੀ ਲੰਬੇ ਸਮੇਂ ਦੀ ਵੀਜ਼ਾ ਅਰਜ਼ੀ 'ਤੇ ਵਿਚਾਰ ਕਰਨ ਲਈ ਕਿਹਾ ਹੈ। ਇਸ ਮਾਮਲੇ ਦੀ ਅਗਲੀ ਸੁਣਵਾਈ 14 ਮਈ ਨੂੰ ਹੋਵੇਗੀ।
- PTC NEWS
