India Women vs Australia Women 3rd T20 : ਭਾਰਤ ਦੀ ਇਤਿਹਾਸਕ ਜਿੱਤ; ਆਸਟ੍ਰੇਲੀਆਈ ਧਰਤੀ 'ਤੇ ਪਹਿਲੀ ਵਾਰ ਸੀਰੀਜ ਕੀਤੀ ਆਪਣੇ ਨਾਂਅ
India Women vs Australia Women 3rd T20 : ਭਾਰਤ ਨੇ ਤੀਜੇ ਅਤੇ ਫੈਸਲਾਕੁੰਨ ਮੈਚ ਵਿੱਚ ਆਸਟ੍ਰੇਲੀਆ ਨੂੰ 17 ਦੌੜਾਂ ਨਾਲ ਹਰਾ ਕੇ ਸੀਰੀਜ਼ 2-1 ਨਾਲ ਜਿੱਤ ਲਈ। ਭਾਰਤੀ ਮਹਿਲਾ ਟੀਮ ਨੇ ਇਸ ਜਿੱਤ ਨਾਲ ਇਤਿਹਾਸ ਰਚ ਦਿੱਤਾ। ਟੀਮ ਇੰਡੀਆ ਨੇ ਆਸਟ੍ਰੇਲੀਆਈ ਧਰਤੀ 'ਤੇ ਪਹਿਲੀ ਵਾਰ ਟੀ-20 ਸੀਰੀਜ਼ ਜਿੱਤੀ ਹੈ।
ਦੱਸ ਦਈਏ ਕਿ ਸ਼ਨੀਵਾਰ ਨੂੰ ਐਡੀਲੇਡ ਵਿੱਚ ਖੇਡੇ ਗਏ ਤੀਜੇ ਮੈਚ ਵਿੱਚ ਭਾਰਤ ਨੇ ਸਮ੍ਰਿਤੀ ਮੰਧਾਨਾ (82) ਅਤੇ ਜੇਮਿਮਾ ਰੌਡਰਿਗਜ਼ (59) ਦੀਆਂ ਅਰਧ-ਸੈਂਕੜਾ ਪਾਰੀਆਂ ਦੀ ਮਦਦ ਨਾਲ 20 ਓਵਰਾਂ ਵਿੱਚ ਛੇ ਵਿਕਟਾਂ 'ਤੇ 176 ਦੌੜਾਂ ਬਣਾਈਆਂ। ਜਵਾਬ ਵਿੱਚ, ਆਸਟ੍ਰੇਲੀਆਈ ਟੀਮ ਨਿਰਧਾਰਤ ਓਵਰਾਂ ਵਿੱਚ ਨੌਂ ਵਿਕਟਾਂ ਗੁਆ ਕੇ ਸਿਰਫ਼ 159 ਦੌੜਾਂ ਹੀ ਬਣਾ ਸਕੀ। ਇਸ ਮੈਚ ਵਿੱਚ ਭਾਰਤ ਲਈ ਸ਼੍ਰੀ ਚਰਨੀ ਅਤੇ ਸ਼੍ਰੇਯੰਕਾ ਪਾਟਿਲ ਨੇ ਤਿੰਨ-ਤਿੰਨ ਵਿਕਟਾਂ ਲਈਆਂ ਜਦਕਿ ਅਰੁੰਧਤੀ ਰੈੱਡੀ ਨੇ ਦੋ ਵਿਕਟਾਂ ਲਈਆਂ। ਦੂਜੇ ਪਾਸੇ, ਰੇਣੂਕਾ ਸਿੰਘ ਨੇ ਇੱਕ ਵਿਕਟ ਲਈ।
ਭਾਰਤ ਲਈ ਸਮ੍ਰਿਤੀ ਮੰਧਾਨਾ ਅਤੇ ਸ਼ੇਫਾਲੀ ਵਰਮਾ ਨੇ ਪਾਰੀ ਦੀ ਸ਼ੁਰੂਆਤ ਕੀਤੀ। ਹਾਲਾਂਕਿ, ਸ਼ੇਫਾਲੀ ਜ਼ਿਆਦਾ ਦੇਰ ਤੱਕ ਕ੍ਰੀਜ਼ 'ਤੇ ਨਹੀਂ ਰਹਿ ਸਕੀ, ਕਿਮ ਗਾਰਥ ਦੁਆਰਾ ਆਊਟ ਕੀਤੀ ਗਈ। ਉਹ ਸੱਤ ਦੌੜਾਂ ਬਣਾ ਕੇ ਆਊਟ ਹੋ ਗਈ। ਫਿਰ ਮੰਧਾਨਾ ਅਤੇ ਜੇਮੀਮਾ ਰੌਡਰਿਗਜ਼ ਨੇ ਜ਼ਿੰਮੇਵਾਰੀ ਸੰਭਾਲੀ ਅਤੇ ਇੱਕ ਸ਼ਾਨਦਾਰ ਸਾਂਝੇਦਾਰੀ ਬਣਾਈ, ਜਿਸ ਨਾਲ ਭਾਰਤੀ ਪਾਰੀ ਸਥਿਰ ਹੋਈ। ਮੰਧਾਨਾ ਨੇ ਛੱਕੇ ਨਾਲ ਆਪਣਾ ਅਰਧ ਸੈਂਕੜਾ ਪੂਰਾ ਕੀਤਾ, ਜਦੋਂ ਕਿ ਜੇਮੀਮਾ ਵੀ ਅਰਧ ਸੈਂਕੜਾ ਲਗਾਉਣ ਵਿੱਚ ਕਾਮਯਾਬ ਰਹੀ।
ਭਾਰਤ ਨੇ ਪਲੇਇੰਗ ਇਲੈਵਨ ’ਚ ਕੀਤਾ ਬਦਲਾਅ
ਭਾਰਤੀ ਕਪਤਾਨ ਹਰਮਨਪ੍ਰੀਤ ਕੌਰ ਨੇ ਟਾਸ ਜਿੱਤ ਕੇ ਪਹਿਲਾਂ ਬੱਲੇਬਾਜ਼ੀ ਕਰਨ ਦਾ ਫੈਸਲਾ ਕੀਤਾ। ਭਾਰਤ ਨੇ ਇਸ ਮੈਚ ਲਈ ਪਲੇਇੰਗ ਇਲੈਵਨ ਵਿੱਚ ਇੱਕ ਬਦਲਾਅ ਕੀਤਾ। ਕ੍ਰਾਂਤੀ ਗੌਡ ਦੀ ਜਗ੍ਹਾ ਸ਼੍ਰੇਯੰਕਾ ਪਾਟਿਲ ਨੂੰ ਲਿਆ। ਆਸਟ੍ਰੇਲੀਆ ਨੇ ਵੀ ਇੱਕ ਬਦਲਾਅ ਕੀਤਾ, ਨਿੱਕ ਕੈਰੀ ਦੀ ਜਗ੍ਹਾ ਗ੍ਰੇਸ ਹੈਰਿਸ ਨੂੰ ਲਿਆ।
ਦੋਵਾਂ ਟੀਮਾਂ ਲਈ ਪਲੇਇੰਗ ਇਲੈਵਨ:
ਭਾਰਤ: ਸਮ੍ਰਿਤੀ ਮੰਧਾਨਾ, ਸ਼ੇਫਾਲੀ ਵਰਮਾ, ਜੇਮੀਮਾ ਰੌਡਰਿਗਜ਼, ਹਰਮਨਪ੍ਰੀਤ ਕੌਰ (ਕਪਤਾਨ), ਰਿਚਾ ਘੋਸ਼ (ਵਿਕਟਕੀਪਰ), ਦੀਪਤੀ ਸ਼ਰਮਾ, ਅਮਨਜੋਤ ਕੌਰ, ਸ਼੍ਰੇਯੰਕਾ ਪਾਟਿਲ, ਅਰੁੰਧਤੀ ਰੈਡੀ, ਸ਼੍ਰੀ ਚਰਨੀ, ਰੇਣੂਕਾ ਸਿੰਘ ਠਾਕੁਰ।
ਆਸਟ੍ਰੇਲੀਆ: ਬੈਥ ਮੂਨੀ (ਵਿਕਟਕੀਪਰ), ਜਾਰਜੀਆ ਵੋਲ, ਫੋਬੀ ਲਿਚਫੀਲਡ, ਐਲਿਸ ਪੈਰੀ, ਐਸ਼ਲੇ ਗਾਰਡਨਰ, ਜਾਰਜੀਆ ਵੇਅਰਹੈਮ, ਐਨਾਬੇਲ ਸਦਰਲੈਂਡ, ਗ੍ਰੇਸ ਹੈਰਿਸ, ਕਿਮ ਗਾਰਥ, ਸੋਫੀ ਮੋਲੀਨੇਕਸ (ਕਪਤਾਨ), ਡਾਰਸੀ ਬ੍ਰਾਊਨ।
ਇਹ ਵੀ ਪੜ੍ਹੋ : BBC ਸਪੋਰਟਸ ਵੁਮੈਨ ਆਫ ਦਿ ਈਅਰ ਐਵਾਰਡਜ਼ 2025 'ਚ ਸਮ੍ਰਿਤੀ ਮੰਧਾਨਾ, ਦਿਵਿਆ ਦੇਸ਼ਮੁਖ, ਪ੍ਰੀਤੀ ਪਾਲ ਅਤੇ ਅੰਜਲੀ ਭਾਗਵਤ ਨੂੰ ਕੀਤਾ ਸਨਮਾਨਿਤ
- PTC NEWS
